សារ​ចាស់​របស់​លោក ហ៊ុន សែន បង្ហាញ​​ឡើង​វិញ​លើ​ហ្វេសប៊ុក​ នាំ​ឱ្យ​មហាជន​យល់​ច្រឡំ

Misleading Social

លោក​នាយករដ្ឋ​មន្ត្រី ហ៊ុន សែន បាន​ប្ដេជ្ញា​ជា​សាធារណៈ​ថា កម្ពុជា​នឹង​រៀបចំ​ពិធី​បុណ្យ​ចូល​ឆ្នាំ​ថ្មី​ប្រពៃណី​ជាតិ​ឱ្យ​ខាង​តែ​បាន​នៅ​ឆ្នាំ​នេះ បន្ទាប់​ពី​ខក​ខាន​អស់​រយៈ​ពេល ២​ឆ្នាំ​ជាប់​គ្នា ដោយសារ​តែ​ការ​ផ្ទុះ​ឡើង និង​ការ​ឆ្លង​រីក​រាល​ដាល​នៃ​ជំងឺ​កូវីដ-១៩។ ខ្វះ​តែ​ពីរ​បី​សប្ដាហ៍​ទៀត​ប៉ុណ្ណោះ ពិធី​ចូល​ឆ្នាំ​ខ្មែរ​នឹង​ចូល​មក​ដល់ ស្រាប់​តែ​មាន​ការ​ផ្សព្វផ្សាយ​លើ​បណ្ដាញ​សង្គម និង​សារព័ត៌មាន​ ដែល​និយាយ​ថា លោក ហ៊ុន សែន នឹង​បើក​ប្រាក់​ខែ​ឌុប​សម្រាប់​មន្ត្រី​រាជការ​នៅ​ទូទាំង​ប្រទេស​នៅ​ខែ​មេសា​ខាង​មុខ​នេះ។ សារ​របស់​លោក ហ៊ុន សែន បែប​នេះ ត្រូវ​បាន​ចែក​រំលែក​តៗ​គ្នា​ព្រោង​ព្រាត​កាល​ពី​សប្ដាហ៍​មុន។ ទោះជាយ៉ាងណា លោក ហ៊ុន សែន បញ្ជាក់​កាល​ពី​ថ្ងៃ​ម្សិល​មិញ​ថា សារ​នេះ គឺ​ជា​សារ​ចាស់​ដែល​លោក​បាន​បង្ហោះ​កាល​ពី​ពីរ​បី​ឆ្នាំ​មុន ដែល​នាំ​ឱ្យ​មាន​ការ​យល់​ច្រឡំ។

ការ​អះ​អាង​លើ​បណ្ដាញ​សង្គម

កាល​ពី​ថ្ងៃ​ពុធ​សប្ដាហ៍​មុន រដ្ឋ​មន្ត្រី​ក្រសួង​ព័ត៌មាន លោក ខៀវ កាញ៉ារីទ្ធ បាន​បង្ហោះ​នូវ​រូបភាព​ផ្ដាម​ពី​ទំព័រ​ហ្វេសប៊ុក​លោក​នាយករដ្ឋ​មន្ត្រី ហ៊ុន សែន ដែល​មាន​ខ្លឹមសារ មន្ត្រីរាជ​ការ​កម្ពុជា នឹង​ទទួល​បាន​ប្រាក់​ខែ​ឌុប​នៅ​ក្នុង​ខែ​មេសា ដើម្បី​សម្រួល​ដល់​ការ​ចំណាយ​របស់​ពួកគេ​អំឡុង​ពេល​ឈប់​សម្រាក​ចូល​ឆ្នាំ​ប្រពៃណី​ជាតិ​។

ខ្លឹមសារ​នេះ ត្រូវ​បាន​ចែក​រំលែក​តៗ​គ្នា​រហូត​ដល់​ទៅ​ជាង ៦​ពាន់​ដង​ពី​សំណាក់​អ្នក​ប្រើ​ប្រាស់​ហ្វេសប៊ុក​និយាយ​ភាសា​ខ្មែរ និង​មាន​ការ​បញ្ចេញ​មតិ​ដល់​ទៅ​រាប់​រយ​ដង​ផង​ដែរ។

ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ការ​បង្ហោះ​របស់​រដ្ឋ​មន្ត្រី​ក្រសួង​ព័ត៌មាន លោក ខៀវ កាញ៉ារីទ្ធ កាល​ពី​ថ្ងៃ​ទី​១៦ ខែមីនា មាន​ខ្លឹមសារ​ថា «ការ​បើក​ប្រាក់​ខែ​ក្នុង​ខែ​មេសា​គឺ​ឌុប ចុង​ខែ​៣ គឺ​យើង​បើក​ប្រាក់​ខែ​ម្ដង រួម​ជាមួយ​នឹង​ប្រាក់​មុខ​ងារ​បន្ថែម ហើយ​បន្ទាប់​មក​ទៀត គឺ​នឹង​បើក​ប្រាក់​ខែ​នៅ​អាទិត្យ​ទី​៣ ខែ​ឧសភា ដើម្បី​ចៀស​វាង​បញ្ហា​ចំណាយ​របស់​មន្ត្រី​រាជការ​យើង»។

FACEBOOK POST | ARCHIVED LINK

បន្ទាប់​ថ្ងៃ​មក​ទៀត ទំព័រ​ហ្វេសប៊ុក​​មួយ​ទៀត ក៏​បាន​បង្ហោះ​ខ្លឹមសារ​នេះ​ផង​ដែរ ហើយ​ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ប៉ុស្តិ៍​របស់​ទំព័រ​ហ្វេសប៊ុក​នោះ។

FACEBOOK POST | ARCHIVED LINK

ព័ត៌មាន​ដែល​និយាយ​ថា រដ្ឋាភិបាល​នឹង​បើក​ប្រាក់​ខែ​ឌុប​សម្រាប់​មន្ត្រី​រាជការ​នៅ​ក្នុង​ខែ​មេសា​ខាង​មុខ​នេះ ត្រូវ​បាន​ចុះ​ផ្សាយ​ព្រោង​ព្រាត​ដោយ​បណ្ដាញ​សារព័ត៌មាន​នានា​នៅ​ក្នុង​ប្រទេស​កម្ពុជា និង​ ត្រូវ​បាន​ចែក​រំលែក​យ៉ាង​ព្រោង​ព្រាត​នៅ​លើ​បណ្ដាញ​សង្គម​កាល​ពី​សប្ដាហ៍​មុន។

ការ​ត្រួត​ពិនិត្យ​ការ​ពិត

Fact Crescendo Cambodia ចាប់​ផ្ដើម​ត្រួត​ពិនិត្យ​ទៅ​លើ​ព័ត៌មាន​នេះ​តាម​រយៈ​ការ​ពិនិត្យ​មើល​ខ្លឹមសារ​នៅ​លើ​ទំព័រ​ហ្វេសប៊ុក​ផ្លូវការ​របស់​លោក​នាយករដ្ឋ​មន្ត្រី ហ៊ុន សែន កាល​ពី​សប្ដាហ៍​មុន និង​ការ​ថ្លែង​ជាសាធារណៈ​របស់​លោក​នៅ​ថ្ងៃ​ចន្ទ​សប្ដាហ៍​នេះ។

លោក​នាយករដ្ឋ​មន្ត្រី ហ៊ុន សែន បាន​ថ្លែង​ជា​សាធារណៈ​កាល​ពី​ថ្ងៃ​ម្សិល​មិញ​ថា ខ្លឹមសារ​ដែល​ត្រូវ​បាន​គេ​ចែក​រំលែក​តៗ​គ្នា​នោះ គឺ​ជា​សារ​ចាស់​របស់​លោក​កាល​ពី​ពីរ​បី​ឆ្នាំ​មុន នៅ​មុន​ពេល​កម្ពុជា​ប្រឈម​មុខ​នឹង​ការ​រាត​ត្បាត​នៃ​ជំងឺ​កូវីដ-១៩​ទៅ​ទៀត។

បើ​តាម​ការ​ថ្លែង​របស់​លោក​នាយករដ្ឋ​មន្ត្រី ហ៊ុន សែន ប្រាក់​ខែ​មន្ត្រី​រាជការ​កម្ពុជា​នៅ​ខែ​មេសា​ខាង​មុខ​នេះ នឹង​ត្រូវ​បើក​ជូន​ជា​ពីរ​ដង​ដូច​ធម្មតា ពោល​គឺ​មិន​មាន​ការ​បើក​ប្រាក់​ខែ​ឌុប​នោះ​ឡើយ។

គេ​អាច​មើល និង​ស្ដាប់​​វីដេអូ​ទាំង​ស្រុង​នៃ​ការ​បក​ស្រាយ​ជា​សាធារណៈ​របស់​លោក ហ៊ុន សែន នៅពេល​លោក​ថ្លែង​បាន ១​ម៉ោង ១៨​នាទី នៅ​ក្នុង​កម្មវិធី​សម្ពោធ​ដាក់​ឱ្យ​ប្រើ​ប្រាស់​អគារ​មន្ទីរ​ពេទ្យ​មិត្តភាព​កម្ពុជា-ចិន​ព្រះ​កុសមៈ កាល​ពី​ថ្ងៃ​ទី​២១ ខែ​មីនា។

FACEBOOK POST | ARCHIVED LINK

នៅ​មុន​ការ​ផ្ទុះ​រីក​រាល​ដាល​នៃ​ជំងឺ​កូវីដ-១៩ ដែល​នាំ​ឱ្យ​ជះ​ឥទ្ធិល​ទៅ​លើ​ដំណើរ​លូត​លាស​នៃ​សេដ្ឋកិច្ច​កម្ពុជា​នោះ រាជ​រដ្ឋាភិបាល​តែង​តែ​អនុវត្ត​ការ​បើក​ប្រាក់​ខែ​ឌុប​ ឬ​បើក​ប្រាក់​ខែ​លឿន​​នៅ​ក្នុង​ខែ​មេសា​សម្រាប់​មន្ត្រី​រាជ​ការ​ទូទាំង​ប្រទេស ដើម្បី​សម្រួល​ដល់​ការ​ចំណាយ​អំឡុង​ពិធី​បុណ្យ​ចូល​ឆ្នាំ​ថ្មី​ប្រពៃណី​ជាតិ។

KHMER POST | ARCHIVED LINK

សន្និដ្ឋាន

Fact Crescendo Cambodia រក​ឃើញ​ថា ការ​ផ្សព្វផ្សាយ​ថា រាជ​រដ្ឋាភិបាល​សម្រេច​បើក​ប្រាក់​ឌុប​ដល់​មន្ត្រី​រាជការ​នៅ​ក្នុង​ខែ​មេសា​ខាង​មុខ​នេះ មិន​ត្រឹម​ត្រូវ​នោះ​ឡើយ។ សារ​ដែល​ត្រូវ​ចែក​រំលែក​តៗ​គ្នា​នោះ គឺ​ជា​សារ​ចាស់​ដែល​លោក​នាយករដ្ឋ​មន្ត្រី ហ៊ុន សែន បាន​បង្ហោះ​កាល​ពី​ពីរ​បី​ឆ្នាំ​មុន នៅ​មុន​ពេល​ការ​ផ្ទុះ​រាត​ត្បាត​នៃ​ជំងឺ​កូវីដ-១៩។ លោក ហ៊ុន សែន បញ្ជាក់​ថា គ្មាន​ការ​បើក​ប្រាក់​ខែ​ឌុប​សម្រាប់​មន្ត្រី​រាជការ​នៅ​ក្នុង​ខែ​មេសា​ខាង​មុខ​នោះ​ឡើយ។

Avatar

Title:សារ​ចាស់​របស់​លោក ហ៊ុន សែន បង្ហាញ​​ឡើង​វិញ​លើ​ហ្វេសប៊ុក​ នាំ​ឱ្យ​មហាជន​យល់​ច្រឡំ

Fact Check By: Jay Udom 

Result: Misleading

Leave a Reply

Your email address will not be published.