ទំនាក់ទំនងរវាងប្រទេសកម្ពុជា និងវៀតណាម ត្រូវបានគេសង្កេតឃើញថា មានភាពមិនសូវជាចុះសម្រុងនឹងគ្នានោះឡេីយ ជាពិសេសបញ្ហាដែលទាក់ទងទៅនឹងទឹកដីកម្ពុជាក្រោម និងប្រជាជនខ្មែររស់នៅទីនោះ ដែលត្រូវបានចែករំលែក និងជជែកដេញដោលពីសំណាក់អ្នកប្រើប្រាស់យ៉ាងផុសផុលនៅលើបណ្ដាញសង្គម។
ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពក្រុមមនុស្សមួយក្រុមដែលត្រូវបានចងជាមួយនឹងច្រវាក់ជើង និងរាងកាយនោះ ត្រូវបានអ្នកប្រើប្រាស់បណ្តាញហ្វេសប៊ុកម្នាក់ បានអះអាងថាគឺជាទិដ្ឋភាពការធ្វើទារុណកម្មទៅលើពលរដ្ឋខ្មែរកម្ពុជាក្រោមពីសំណាក់ជនជាតិវៀតណាម។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ Fact Crescendo Cambodia បានរកឃើញថា ការអះអាងរបស់អ្នកប្រើប្រាស់ហ្វេសប៊ុកនៅលើបណ្តាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២០ ខែមិថុនា ឆ្នាំ២០១៧កន្លងទៅ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកបង្ហាញអំពីទិដ្ឋភាពការចាប់ចងក្រុមមនុស្សមួយក្រុមដោយដាក់នឹងច្រវាក់ដៃ ជើង និងកយ៉ាងតឹងរឹង។ អ្នកប្រើប្រាស់ដដែលនេះ ក៏បានអះអាងនៅក្នុងសំណេររបស់ខ្លួនផងដែរថា ទិដ្ឋភាពមួយនោះគឺជាការធ្វើទារុណកម្មទៅលើពលរដ្ឋខ្មែរក្រោមពីជនជាតិវៀតណាម។
រូបថតមួយសន្លឹកនេះត្រូវបានប្រតិកម្មបញ្ចេញមតិចម្រុះ និងចែករំលែកតៗគ្នាជាច្រើនពាន់ដង ពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ័អ្នកប្រើប្រាស់ហ្វេសប៊ុក ដែលបានសរសេររៀបរាប់ថា «មើលសិនទៅមុននឹងសម្រេចចិត្តស្រលាញ់យួន នេះជារូបភាពខ្មែរក្រោមដែលយួនធ្វើទារុណកម្ម»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបភាពនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួនដូចខាងក្រោម។
រូបថតដែលមានទម្រង់ និងទិដ្ឋភាពដូចគ្នាមួយសន្លឹកនេះ ត្រូវបានរកឃើញនៅក្នុងគេហទំព័រ Granger ជាគេហទំព័របណ្ណសារដ្ឋានមួយដែលបានរក្សាទុកនូវរូបថតបុរាណ និងប្រវត្តិសាស្ត្រនានាជាច្រើន។ គេហទំព័រដដែលនេះ ក៏បានបញ្ជាក់ផងដែរថា នោះគឺជាទិដ្ឋភាពអ្នកទោសជាប់ពាក់ព័ន្ធទៅនឹងផែនការចង់បំពុល មេយោធភូមិភាគជនជាតិបារាំងម្នាក់ ដែលត្រៀមនឹងយកទៅកាត់ក្តីជំនុំជម្រះក្នុងអំឡុងឆ្នាំ១៩០៨។
រូបភាពផ្តាមចេញពីគេហទំព័រដែលបានរៀបរាប់ជាភាសាអង់គ្លេសថា «HANOI: PRISONERS, 1908. Accused participants in a Vietnamese plot to poison the French colonial garrison at Hanoi awaiting trial in 1908 while locked in the stocks at Hoa Loa prison, later known as the ‘Hanoi Hilton’» ឬប្រែសម្រួលជាភាសាខ្មែរថា «ទីក្រុងហាណូយ៖ អ្នកទោសក្នុងអំឡុងឆ្នាំ១៩០៨ ដែលជាអ្នកចូលរួមជាប់ពាក់ព័ន្ធនៅក្នុងផែនការ ដើម្បីបំពុលយោធភូមិភាគអាណានិគមបារាំងនៅទីក្រុងហាណូយ រង់ចាំការជំនុំជម្រះនៅឆ្នាំ១៩០៨ ខណៈកំពុងជាប់ឃុំនៅក្នុងពន្ធនាគារហូឡៅ (Hoa Loa prison) ដែលក្រោយមកត្រូវបានគេស្គាល់ហៅថាជា ហាណូយហ៊ីលតុន»។
តាមរយៈគេហទំព័រផ្សេងមួយទៀតរបស់ Atlas Obscura ក៏បានផ្សព្វផ្សាយរូបថតមួយសន្លឹក មានទម្រង់ដូចគ្នាអំពីទិដ្ឋភាពការចាប់ចងដាក់ច្រវាក់ទៅលើមនុស្សមួយក្រុមនោះផងដែរ ដោយគេហទំព័រដដែលនេះ ពុំបានបញ្ជាក់ក្រុមមនុស្សដែលជាអ្នកទោសនោះថាជាពលរដ្ឋខ្មែរកម្ពុជាក្រោមដូចបានអះអាងខាងលើនោះឡើយ។
រូបភាពផ្តាមចេញពីគេហទំព័រដែលបានបញ្ជាក់ជាភាសាអង់គ្លេសថា «Vietnamese prisoners in 1908 » ឬប្រែជាភាសាខ្មែរមានន័យថា «អ្នកទោសជនជាតិវៀតណាមនៅអំឡុងឆ្នាំ១៩០៨»។
Atlas Obscura Link | Archived Link
រូបថតមួយសន្លឹកដែលមានទម្រង់ និងភិនភាគដូចគ្នាទាំងស្រុង ក៏ត្រូវបានរកឃើញនៅក្នុងគេហទំព័រសារព័ត៌មានវៀតណាម VOV World ផងដែរកាលពីថ្ងៃទី១១ ខែកក្កដា ឆ្នាំ២០១៧កន្លងមកនេះ។
រូបភាពផ្តាមចេញពីគេហទំព័រសារព័ត៌មានដែលបានសរសេររៀបរាប់ជាភាសាវៀតណាមថា «Bức ảnh tư liệu về những chiến sỹ bị thực dân Pháp bắt nhốt» ឬប្រើសម្រួលជាភាសាខ្មែរតាមរយៈកម្មវិធី Google Translate មានន័យថា «រូបថតឯកសារបង្ហាញទិដ្ឋភាពអ្នកទោសដែលទាហាននាសម័យអាណានិគមនិយមបារាំងចាប់បាន»។
VOV World’s Report | Archived Link
សន្និដ្ឋាន
Fact Crescendo Cambodia បានរកឃើញថា ការអះអាងដូចបានរៀបរាប់ខាងលេីនេះ គឺមិនត្រឹមត្រូវនោះឡេីយ។ រូបថតមួយសន្លឹកនេះ មិនមែនជាទិដ្ឋភាពដែលវៀតណាមបានធ្វើទារុណកម្មទៅលើពលរដ្ឋខ្មែរក្រោមនោះទេ។ ការពិតរូបថតនេះ គឺជាក្រុមអ្នកទោសជនជាតិវៀតណាមនៅក្នុងពន្ធនាគារហូឡៅ ត្រៀមនឹងយកទៅកាត់ក្តីជំនុំជម្រះ ក្រោយពីបានជាប់ពាក់ព័ន្ធនៅក្នុងផែនការបំពុលមេយោធភូមិភាគជនជាតិបារាំងម្នាក់ ក្នុងអំឡុងឆ្នាំ១៩០៨។
Title:អ្នកទោសដែលចងភ្ជាប់នឹងច្រវាក់នោះ មិនមែនជាពលរដ្ឋខ្មែរក្រោមទេ
Fact Check By: Kakada SimResult: False
