លោក សម រង្ស៊ី អតីតប្រធានគណបក្សសង្គ្រោះជាតិ ដែលជាគណបក្សប្រឆាំងដ៏ធំមួយនៅកម្ពុជា ខកខានមិនបានវិលត្រឡប់ទៅកម្ពុជានោះឡើយ។ ការបរាជ័យនៃការចូលស្រុករបស់លោក សម រង្ស៊ីនេះ បានធ្វើឲ្យមានការរិះគន់ និងវាយប្រហារជាពាក្យសម្តីនៅតាមបណ្តាញសង្គមនានាយ៉ាងផុសផុល។
ទន្ទឹមនឹងនេះ រូបថតមួយសន្លឹកដែលបង្ហាញអំពីទិដ្ឋភាពរូបថតលោក សម រង្ស៊ី ក្នុងសម្លៀកបំពាក់ឈុតស រត់នៅតាមដងផ្លូវមួយកន្លែង ត្រូវបានបង្ហោះលើបណ្ដាញសង្គមហ្វេសប៊ុក ភ្ជាប់ដោយអក្សរដែលបានសរសេសរថា «ឈ្នះហើយបងប្អូន»។ រូបថតមួយសន្លឹកនេះ ត្រូវបានចែកចាយ និងបញ្ចេញមតិចម្រុះយ៉ាងច្រើនពីសំណាក់អ្នកប្រើប្រាស់បណ្តាញសង្គមហ្វេសប៊ុកនិយាយភាសាខ្មែរ។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃទី០៩ ខែវិច្ឆិកា ឆ្នាំ២០២១ កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកចូលទៅក្នុងក្រុមហ្វេសប៊ុកមួយមានឈ្មោះថា ប្រជុំកំពូលអ្នកនយោបាយ ដែលបានបង្ហាញអំពីទិដ្ឋភាពអតីតប្រធានគណបក្សសង្គ្រោះជាតិលោក សម រង្ស៊ី ដោយបច្ចុប្បន្ននេះកំពុងស្នាក់នៅក្នុងប្រទេសបារាំងនោះ បានកំពុងរត់នៅតាមដងផ្លូវមួយក្នុងឈុតសម្លៀកបំពាក់ស (ឈុតសម្រាប់បុគ្គលស្លាប់)។
រូបថតខាងលើនេះ អាចនឹងត្រូវបានអ្នកប្រើប្រាស់ហ្វេសប៊ុកមួយចំនួនជឿថា ជារូបថតពិតប្រាកដដោយមានអ្នកប្រើប្រាស់ហ្វេសប៊ុកជាច្រើនបានចែករំលែកបន្ត និងប្រតិកម្មចម្រុះ។
ខាងក្រោមនេះ គឺជារូបភាពផ្តាមចេញពីប៉ុស្តិ៍របស់អ្នកប្រើប្រាស់ដោយបានសរសេររៀបរាប់ថា «ថ្ងៃនេះខួប ៣ឆ្នាំនៃខ្មោច អាសម រង្ស៊ី ហក់ចោលមេនពេលកំពុងដឹកទៅដុតចោល ៩ វិច្ឆិកា ២០១៩ – ៩ វិច្ឆិកា ២០២១»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតមួយសន្លឹកមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញនៅលើគេហទំព័រសារព័ត៌មានជាភាសាថៃ Daily News ដែលបានចុះផ្សាយកាលពីថ្ងៃទី២៧ ខែសីហា ឆ្នាំ២០១៩កន្លងទៅនេះ។ ខាងក្រោមនេះ គឺជារូបភាពផ្តាមចេញពីគេហទំព័រខាងលើ ដែលមានចំណងជើងជាភាសាថៃថា «มิติใหม่นักวิ่งแต่งคอสเพลย์ หลอนผีห่มผ้าดิบถือดอกบัว» ឬប្រែសម្រួលជាភាសាខ្មែរតាមរយៈកម្មវិធី Google Translate មានន័យថា «កីឡាកររត់ប្រណាំងម៉ារ៉ាតុន តែងខ្លួនជាសាកសពក្នុងឈុតសម្លៀកបំពាក់ស»។
Daily News Report | Archived Link
ដូចគ្នានេះដែរ តាមរយៈគេហទំព័រសារព័ត៌មានជាភាសាអង់គ្លេស The Smart Local បានចុះផ្សព្វផ្សាយកាលពីថ្ងៃទី២៩ ខែសីហា ឆ្នាំ២០១៩កន្លងទៅ ក៏បានបង្ហាញនូវទិដ្ឋភាពរូបថត និងសកម្មភាពដូចគ្នាទាំងស្រុង ដោយបានយកចេញមកពីការចូលរួមរត់ប្រណាំងម៉ារ៉ាតុន (Mairood Challenge Run 2019) ដែលបានធ្វើឡើងនៅក្នុងខេត្តត្រាត ប្រទេសថៃកាលពីថ្ងៃទី២៦ ខែសីហា ឆ្នាំ២០១៩កន្លងទៅនេះ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មាន ក៏បានសរសេរជាភាសាអង់គ្លេសថា «Thai Man Cosplays As Corpse During Marathon And Scares The Crap Out Of Fellow Runners» ឬប្រែសម្រួលជាភាសាខ្មែរមានន័យថា «បុរសជនជាតិថៃម្នាក់ស្លៀកពាក់តែងខ្លួនជាសាកសព ក្នុងពេលរត់ម៉ារ៉ាតុង ដោយបានធ្វើឲ្យមានការខ្លាចក្រែងពីសំណាក់អ្នករត់ប្រណាំងដទៃផ្សេងទៀត»។
រូបភាពផ្តាមមួយផ្សេងទៀតដកស្រង់ចេញពីគេហទំព័រខាងលើ បង្ហាញអំពីទិដ្ឋភាពបុរសជនជាតិថៃពេលកំពុងរត់ និងពេលទទួលបានរង្វាន់។
The Smart Local Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ គឺជាបុរសជនជាតិថៃម្នាក់ដែលបានចូលរួមប្រកួតការរត់ម៉ារ៉ាតុន (Mairood Challenge Run 2019) ដោយបានស្លៀកពាក់ និងតុបតែងខ្លួនជាសាកសព (ឈុតស)។ កម្មវិធីមួយនេះត្រូវបានធ្វើឡើងនៅក្នុងខេត្តត្រាត ប្រទេសថៃកាលពីថ្ងៃទី២៦ ខែសីហា ឆ្នាំ២០១៩កន្លងទៅនេះ។
Title:Fact Check: លោក សម រង្ស៊ី រត់ក្នុងឈុតរុំក្រណាត់ស ជារូបថតកាត់ត
Fact Check By: Kakada SimResult: Altered
