បន្ទាប់ពីកម្ពុជាបានសម្រេចផ្ដល់ដីទំហំ ៤០ហិកតាស្ថិតនៅក្នុងខេត្តកំពង់ឆ្នាំង ជាថ្នូរនឹងការបំលាស់ទីសហគមន៍រស់នៅលើផ្ទះបណ្ដែតទឹក ដែលភាគច្រើនលើសលប់ជាជនអន្តោប្រវេសន៍វៀតណាមនោះមក ការអះអាងជាច្រើន ត្រូវបានភ្ជាប់នឹងបញ្ហានេះជារឿយៗ។ ថ្មីៗនេះ វីដេអូឃ្លីបមួយដែលបង្ហាញរូបថតសំណង់ផ្ទះដូចៗគ្នាមួយជួរ ត្រូវបានបង្ហោះនៅលើបណ្ដាញសង្គមជាមួយការអះអាងក្នុងន័យថា វាជាសំណង់ផ្ទះនៅលើដីទំហំ ៤០ហិកតាដែលត្រូវបានផ្ដល់ទៅជនអន្តោប្រវេសន៍វៀតណាម។ វីដេអូនេះ ត្រូវបានចែករំលែកតគ្នារាប់សិបរយដងនៅក្នុងរយៈពេលប៉ុន្មានថ្ងៃមកនេះ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយបានបង្ហោះវីដេអូឃ្លីបមានរយៈពេល ៤២វិនាទីកាលពីថ្ងៃអង្គារកន្លងមកនេះ ដែលបង្ហាញឱ្យឃើញសំណង់ផ្ទះថ្មជាច្រើនស្ថិតនៅជាជួរនៅតាមបណ្ដោយប្រឡាយទឹកមួយខ្សែ។
សំណេររបស់ទំព័រហ្វេសប៊ុកនេះ ហាក់អះអាងថា រូបថតនៅក្នុងវីដេអូនេះជាសំណង់ផ្ទះដែលត្រូវបានសាងសង់នៅលើដីទំហំ ៤០ហិកតា ដែលត្រូវបានរដ្ឋាភិបាលផ្ដល់ទៅជនអន្តោប្រវេសន៍វៀតណាម ជាថ្នូរនឹងការចាកចេញពីការរស់នៅលើផ្ទៃបឹងទន្លេសាបនៅខេត្តកំពង់ឆ្នាំង។
វីដេអូនេះក៏បានបង្ហាញលោកនាយករដ្ឋមន្ត្រី ហ៊ុន សែន និងកូនប្រុសរបស់លោក ដែលបានថ្លែងក្នុងន័យដូចគ្នាថា លោកធានាការពារបូរណភាពទឹកកម្ពុជា។
វីដេអូឃ្លីបមួយនេះ ទទួលបានការចែករំលែករហូតដល់ទៅជាង ២,២០០ដង និងការបញ្ចេញមតិយោបល់ចម្រុះបែបយ៉ាងច្រើនពីសំណាក់អ្នកប្រើប្រាស់បណ្ដាញសង្គមហ្វេសប៊ុកនៅក្នុងរយៈពេលត្រឹមតែពីរបីថ្ងៃចុងក្រោយនេះប៉ុណ្ណោះ។
ការត្រួតពិនិត្យការពិត
រូបថតមួយសន្លឹកនេះ ត្រូវបានផ្សព្វផ្សាយជាច្រើននៅលើបណ្ដាញអ៊ិនធឹណិត ដោយបញ្ជាក់ថា ជាផ្ទះដែលត្រូវបានសាងសង់ឡើងនៅភូមិថ្លុកត្រាច និងភូមិអន្លង់ជ្រៃ ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ។
ខាងក្រោមនេះ ជារូបភាពផ្ដាមចេញពីទំព័រហ្វេសប៊ុកមួយដែលបានបង្ហោះរូបថតមួយសន្លឹកនេះជាមួយរូបថត ២សន្លឹកផ្សេងទៀត និងមានសំណេរថា «សម្រស់ថ្លុកត្រាច អន្លង់ជ្រៃ ទឹកដីដែលរបប ហ៊ុន សែន ថាជារបស់យួន។ ភូមិថ្លុកត្រាច និងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ»។
រូបថតបង្ហាញសំណង់ផ្ទះដូចៗគ្នានេះ ក៏ត្រូវបានបង្ហោះនៅបណ្ដាញសង្គមដោយទំព័រហ្វេសប៊ុកមួយទៀតកាលពី ៦ឆ្នាំមុន ដោយមានសំណេររៀបរាប់ថា សំណង់ផ្ទះដូចៗគ្នានេះ ស្ថិតនៅក្នុងភូមិអន្លង់ជ្រៃ ដែលជាស្រុកកំណើតរបស់លោក ហេង សំរិន ប្រធានរដ្ឋសភាកម្ពុជានាពេលបច្ចុប្បន្ន។
រូបថតសំណង់ផ្ទះដូចៗគ្នានេះ ក៏ត្រូវបានចុះផ្សាយដោយសារព័ត៌មានសំឡេងសហរដ្ឋអាមេរិក (VOA)ផងដែរកាលពីឆ្នាំ២០១២កន្លងមក ដោយសារព័ត៌មានអាមេរិកមួយនេះ បានបញ្ជាក់ថា វាជាសហគមន៍អភិវឌ្ឍដោយលោក ហេង សំរិន។
រូបថតសំណង់ផ្ទះដូចៗគ្នានេះ ក៏ត្រូវបានរកឃើញនៅលើទំព័រហ្វេសប៊ុកផ្លូវការរបស់លោក ហេង សំរិន ផងដែរ ជាមួយសំណេររៀបរាប់ថា វាជាគម្រោងអភិវឌ្ឍន៍ភូមិឋានដ៏ស្ងប់ស្ងាត់នៅតាមបន្ទាត់ព្រំដែនកម្ពុជា-វៀតណាម ឱ្យក្លាយទៅជាទីប្រជុំជន ដែលមានហេដ្ឋារចនាសម្ព័ន្ធផ្សេងៗនៅទីនោះ។
កាលពីឆ្នាំ២០១៩កន្លងមក រដ្ឋបាលខេត្តកំពង់ឆ្នាំងបានសម្រេចរៀបចំដីមួយកន្លែងទំហំ ៤០ហិកតាស្ថិតនៅក្នុងស្រុករលាប្អៀរ ដើម្បីផ្លាស់ប្ដូរជនអន្តោប្រវេសន៍វៀតណាមពីរស់នៅលើទឹក ទៅរស់នៅលើដីគោកវិញ។
សន្និដ្ឋាន
Fact Crescendo Cambodia រកឃើញថា រូបថតនៅក្នុងវីដេអូដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាសំណង់ផ្ទះដែលត្រូវបានសាងសង់ឡើងនៅលើផ្ទៃដីទំហំ ៤០ហិកតា ដែលកម្ពុជាផ្ដល់ទៅសហគមន៍ជនអន្តោប្រវេសន៍វៀតណាមនៅក្នុងខេត្តកំពង់ឆ្នាំងនោះឡើយ។ រូបថតមួយសន្លឹកនេះ គឺជាសំណង់ផ្ទះដូចៗគ្នាដែលត្រូវបានសាងសង់នៅក្នុងសហគមន៍អភិវឌ្ឍន៍ ហេង សំរិន អន្លង់ជ្រៃ ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ។
Title:តើនេះជាសំណង់ផ្ទះនៅលើដីទំហំ៤០ហិកតាផ្ដល់ឱ្យជនអន្តោប្រវេសន៍វៀតណាមមែនឬទេ?
Fact Check By: Jay UdomResult: False
