ខណៈដែលព្រឹត្តិការណ៍ប្រកួតកីឡាបាល់ទាត់ពិភពលោកឆ្នាំ២០២២ (World Cup 2022) កំពុងបន្តប្រព្រឹត្តទៅនៅប្រទេសកាតានោះ ការអះអាងមួយដ៏កក្រើកលើបណ្ដាញសង្គម បាននិយាយថា មុខកីឡាករខ្សែការពារអារ៉ាប៊ីសាអ៊ូឌីត Yasser Al-Shahrani បានរងរបួសប្រេះបែកជាពីរ បន្ទាប់ពីប៉ះទង្គិចជាមួយមិត្តរួមក្រុមនៅក្នុងការប្រកួតជាមួយក្រុមជម្រើសជាតិអាហ្សង់ទីនកាលពីសប្ដាហ៍មុន។ ការអះអាងនេះ ត្រូវបានផ្សព្វផ្សាយ ឬចែករំលែកបន្តយ៉ាងផុលផុសចាប់តាំងពីសប្ដាហ៍មុនមក។ ទោះជាយ៉ាងណា ការត្រួតពិនិត្យរបស់យើង បង្ហាញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតគ្រោងឆ្អឹងមុខប្រេះស្រាំដែលថតដោយម៉ាស៊ីនកាំរស្មី X-Ray នោះ ត្រូវបានទំព័រហ្វេសប៊ុកនៃទូរទស្សន៍ក្នុងស្រុកមួយចុះផ្សាយថា ជាគ្រោងឆ្អឹងមុខរបស់កីឡាករខ្សែការពារអារ៉ាប៊ីសាអ៊ូឌីត Yasir Al-Shahrani ដែលបានប្រេះបែកជាពីរ បន្ទាប់ពីការប៉ះទង្គិចនៅក្នុងការប្រកួតជាមួយក្រុមជម្រើសជាតិអាហ្សង់ទីនកាលពីរាត្រីថ្ងៃអង្គារកន្លងមកនេះ។
រូបថតដែលត្រូវបានចុះផ្សាយដោយប្រព័ន្ធផ្សព្វផ្សាយក្នុងស្រុកនោះ ត្រូវបានចែករំលែកបន្តរាប់រយដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ រួមជាមួយការបញ្ចេញមតិយ៉ាងច្រើនផងដែរ។
ខាងក្រោមនេះ គឺជារូបភាពផ្ដាមចេញពីការចុះផ្សាយដោយទូរទស្សន៍ PNN នៅលើទំព័រហ្វេសប៊ុករបស់ខ្លួនកាលពីថ្ងៃទី២៣ ខែវិច្ឆិកា ដែលសរសេររៀបរាប់ថា «ខ្សែបម្រើជម្រើសជាតិអារ៉ាប៊ីសាអ៊ូឌីត កីឡាករ Yasir Al-Shahrani ត្រូវបានបែកឆ្អឹងមុខ និងត្រូវវះកាត់ជាបន្ទាន់ ពេលនេះដែលសហព័ន្ធអារ៉ាប៊ីសាអ៊ូឌីតបានស្នើសុំជើងហោះហើរពិសេសមួយដើម្បីបញ្ជូនរូបគេទៅកាន់ប្រទេសអាល្លឺម៉ង់ដើម្បីព្យាបាល»។
ការអះអាងដដែលនេះ រឹតតែផុសផុលថែមទៀត បន្ទាប់ពីការផ្សព្វផ្សាយបន្តដោយទំព័រហ្វេសប៊ុកមួយឈ្មោះថា «ព្រឹត្តិការណ៍ FIFA World Cup 2022» នៅយប់ថ្ងៃពុធសប្ដាហ៍មុន ពោលគឺ ១ថ្ងៃក្រោយការប្រកួតរវាងក្រុមជម្រើសជាតិអារ៉ាប៊ីសាអ៊ូឌីត និងក្រុមជម្រើសជាតិអាហ្សង់ទីន។
ខាងក្រោមនេះ គឺជារូបភាពផ្ដាមចេញពីការអះអាងនៅលើទំព័រហ្វេសប៊ុកមួយឈ្មោះ «ព្រឹត្តិការណ៍ FIFA World Cup 2022» ដែលសរសេររៀបរាប់ថា «ពុទ្ធោ!!! ជូនពរឱ្យឆាប់ជាសះស្បើយ ខ្សែការពារ Yasir Al-Shahrani បានបែកឆ្អឹងមុខជាពីរ ដោយត្រូវវះកាត់ឆ្អឹងមុខជាបន្ទាន់ ខណៈដែលអារ៉ាប៊ីសាអ៊ូឌីតបានស្នើជើងហោះហើរពិសេសក្នុង[ការ]ដឹកកីឡការទៅកាន់ប្រទេសអាល្លឺម៉ង់ដើម្បីព្យាបាល។ សូមព្រះជាម្ចាស់តាមថែរក្សាផងចុះ! ស្រឡាញ់កីឡា ស្រឡាញ់ជីវិត!»។
ការអះអាងទៅលើរូបថតនេះ ក៏ត្រូវបានបង្ហោះបន្តនៅលើបណ្ដាញសង្គមពីសំណាក់ទំព័រហ្វេសប៊ុកដទៃទៀតផងដែរ។ សូមមើលការអះអាងនេះតាមរយៈតំណភ្ជាប់នៅទីនេះ ឬតំណភ្ជាប់មួយទៀតមាននៅទីនេះផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការចុះផ្សាយនេះតាមរយៈ Google Reverse Image Search និងការពិនិត្យមើលសេចក្ដីរាយការណ៍ពីស្ថានភាពរបួសរបស់កីឡាករអារ៉ាប៊ីសាអ៊ូឌីតរូបនេះដែលចុះផ្សាយដោយសារព័ត៌មានអន្តរជាតិធំៗ។
កីឡាករខ្សែការពារអារ៉ាប៊ីសាអ៊ូឌីត Yasser Al-Shahrani (ឈ្មោះសរសេរដោយត្រឹមត្រូវ) បានដេកដួលនៅលើទីលានប្រកួត បន្ទាប់ពីបុកជាមួយមិត្តរួមក្រុមកីឡាករ Mohammed Al-Owais នៅក្នុងការប្រកួតជាមួយក្រុមជម្រើសជាតិអាហ្សង់ទីន កាលពីរាត្រីថ្ងៃទី២២ ខែវិច្ឆិកា នៅឯព្រឹត្តិការណ៍ World Cup ឆ្នាំ២០២២ នៅប្រទេសកាតា។
រូបថតដែលត្រូវបានផ្សព្វផ្សាយដោយសារព័ត៌មានអន្តរជាតិធំៗ បង្ហាញឱ្យឃើញផ្ទៃមុខផ្នែកខាងឆ្វេងរបស់កីឡាករ Yasser Al-Shahrani បានបុកនឹងជង្គង់របស់កីឡាករ Mohammed Al-Owais ដែលជាមិត្តរួមក្រុមលេងតំណែងជាអ្នកចាំទីក្នុងក្រុមជម្រើសជាតិអារ៉ាប៊ីសាអ៊ូឌីត។
កីឡាករ Yasser Al-Shahrani ត្រូវបានប្ដូរចេញ និងបញ្ជូនទៅសង្គ្រោះនៅឯមន្ទីរពេទ្យ ហើយក្រុមជម្រើសជាតិអារ៉ាប៊ីសាអ៊ូឌីត បានទទួលជ័យជម្នះជាមួយលទ្ធផល ២ ទល់ ១ លើក្រុមជម្រើសជាតិអាហ្សង់ទីន។
បន្ទាប់ពីមក រូបថតថតកាំរស្មើ X-Ray នៃគ្រោងឆ្អឹងក្បាលមួយ ត្រូវបានគេចុះផ្សាយ និងបង្ហោះនៅលើបណ្ដាញសង្គម ដោយត្រូវបានអះអាងថា ជាគ្រោងឆ្អឹងក្បាលរបស់កីឡាករ Yasser Al-Shahrani ដែលរងរបួសបែកឆ្អឹងមុខ។
ការពន្យល់របស់ Cleveland Clinic ដែលជាមជ្ឈមណ្ឌលវេជ្ជសាស្ត្រមិនគិតកម្រៃមានអាយុកាល ១០១ឆ្នាំមកហើយនោះ បានឱ្យដឹងថា ការរងរបួសបាក់ ឬបែកឆ្អឹងផ្ទៃមុខ ដែលធ្វើឱ្យគ្រោងឆ្អឹងផ្ទៃមុខប្ដូរទីតាំងខុសប្រក្រតី តែងតែបង្កឱ្យមានការឈឺចាប់ធ្ងន់ធ្ងរ និងធ្វើឱ្យពិបាកនិយាយ ឬក៏ហូបអាហារ ហើយក៏ធ្វើឱ្យពិបាកដកដង្ហើមផងដែរ។
Cleveland Clinic | Archived Link
ប៉ុន្តែ វីដេអូមួយមានរយៈពេល ២០វិនាទីដែលបង្ហោះដោយទំព័រហ្វេសប៊ុក Saudi Arabian Football Federation នៅព្រឹកថ្ងៃទី២៣ ខែវិច្ឆិកា បង្ហាញឱ្យឃើញកីឡាករ Yasser Al-Shahrani ស្ថិតនៅលើគ្រែវេជ្ជសាស្ត្រ និងនិយាយទៅកាន់អ្នកគាំទ្រ។
ទំព័រហ្វេសប៊ុកដដែលនេះ បានសរសេរសារជាអក្សរអារ៉ាប់ ហើយបកប្រែថា «សារពីកីឡាករ Yasser Al-Shahrani ទៅកាន់សាធារណជនអារ៉ាប៊ីសាអ៊ូឌីត»។
នេះបញ្ជាក់ថា គ្រោងឆ្អឹងមុខរបស់កីឡាករអារ៉ាប៊ីសាអ៊ូឌីតរូបនេះ មិនស្ថិតក្នុងស្ថានភាពប្រេះបែកជាពីរដូចរូបភាពដែលត្រូវបានបង្ហោះនៅលើបណ្ដាញសង្គម ឬចុះផ្សាយដោយសារប្រព័ន្ធផ្សព្វផ្សាយមួយចំនួននោះឡើយ។
រូបថតគ្រោងឆ្អឹងមុខបែកប្រេះជាពីរនេះ ដែលត្រូវបានផ្សាយភ្ជាប់នឹងស្ថានភាពរបួសរបស់កីឡាករអារ៉ាប៊ីសាអ៊ូឌីតខាងលើនេះ ក៏ត្រូវបានក្រុមអ្នកត្រួតពិនិត្យព័ត៌មានពិតនៃសារព័ត៌មាន Newsweek (archived) ផ្ទៀងផ្ទាត់ផងដែរកាលពីសប្ដាហ៍មុន។ លទ្ធផលនៃការត្រួតពិនិត្យ បង្ហាញថា គ្រោងឆ្អឹងមុខរបស់កីឡាករ Yasser Al-Shahrani មិនរងរបួសប្រេះបែកជាពីរដូចរូបថតកាំរស្មីដែលត្រូវបានផ្សព្វផ្សាយលើបណ្ដាញសង្គមនោះឡើយ។
ទំព័រហ្វេសប៊ុកសហព័ន្ធបាល់ទាត់អារ៉ាប៊ីសាអ៊ូឌីត បានបញ្ជាក់លើផេករបស់ខ្លួនថា កីឡាករ Yasser Al-Shahrani ត្រូវបានបញ្ជូនទៅដល់ទីក្រុងរីយ៉ាដ ប្រទេសកំណើតរបស់លោកវិញនៅល្ងាចថ្ងៃទី២៣ ខែវិច្ឆិកា។ នៅយប់ថ្ងៃដដែលនោះ ទំព័រហ្វេសប៊ុករបស់ស្ថាប័នគ្រប់គ្រងបាល់ទាត់អារ៉ាប៊ីសាអ៊ូឌីត ក៏បានបង្ហោះសារបន្ថែមទៀតថា ការវះកាត់របួសលើផ្ទៃមុខកីឡាករ Yasser Al-Shahrani ត្រូវបានធ្វើឡើងដោយជោគជ័យ។
នៅថ្ងៃនេះ ទំព័រហ្វេសប៊ុកដដែលនេះ បានបញ្ជាក់ជាថ្មីថា កីឡាករ Yasser Al-Shahrani បានចាកចេញពីមន្ទីរពេទ្យហើយ ពោលគឺ ១សប្ដាហ៍ក្រោយពីទទួលបានការវះកាត់របួសលើផ្ទៃមុខ។
សន្និដ្ឋាន
Fact Crescendo Cambodia រកឃើញថា ការអះអាង ឬការផ្សព្វផ្សាយរូបថតដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតគ្រោងឆ្អឹងក្បាលដែលថតដោយកាំរស្មី X-Ray មួយនេះ មិនឆ្លុះបញ្ចាំងពីស្ថានភាពរបួសរបស់កីឡាករខ្សែការពារអារ៉ាប៊ីសាអ៊ូឌីត Yasser Al-Shahrani នោះឡើយ។
Title:ស្ថានភាពកីឡាករអារ៉ាប៊ីសាអ៊ូឌីតមិនធ្ងន់ធ្ងររហូតប្រេះឆ្អឹងមុខជាពីរដូចការអះអាងឡើយ
Fact Check By: Jay UdomResult: Misleading
