វីដេអូឃ្លីបមួយ ដែលបង្ហាញទិដ្ឋភាពស្រ្តីដែលមានមាឌធំ និងខ្ពស់ ត្រូវបានបង្ហោះនៅលើបណ្ដាញសង្គម។ ការបង្ហោះខាងលើ ត្រូវបានចែកចាយដោយភ្ជាប់ថាជាទិដ្ឋភាពស្រ្តីជនជាតិឥណ្ឌា និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមយ៉ាងផុសផុល។ ទោះជាយ៉ាងណា ការត្រួតពិនិត្យការពិតរបស់ Fact Crescendo រកឃើញថា វីដេអូឃ្លីបបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៦ ខែវិច្ឆិកា ឆ្នាំ២០២៤កន្លងទៅនេះ អ្នកប្រើប្រាស់បណ្ដាញសង្គមហ្វេសប៊ុក បង្ហោះវីដេអូឃ្លីបមួយ ដែលបង្ហាញទិដ្ឋភាពស្រ្តីដែលមានសភាពមាឌធំ និងខ្ពស់។ អ្នកប្រើប្រាស់ដដែលនេះ បានភ្ជាប់នឹងការអះអាងថា ទិដ្ឋភាពនោះ គឺរកឃើញនៅក្នុងប្រទេសឥណ្ឌា។
ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គម។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «ចុម!នៅឥណ្ឌាពីមុនមានមនុស្សធំៗខ្ពស់ៗដូចនៅខ្មែរដែរ»។
https://www.facebook.com/reel/521492540729725
វីដេអូឃ្លីបដូចគ្នានេះ ក៏ត្រូវបានបង្ហោះព្រោងព្រាតនៅលើបណ្ដាញសង្គមដទៃទៀតផងដែរ ដូចជា Instagram ដែលជាបណ្ដាញសង្គមមួយទៀតរបស់ក្រុមហ៊ុន Meta។
Instagram Post | Archived Link
វីដេអូបង្ហោះខាងលើ ក៏ត្រូវបានរកឃើញ និងចែកចាយនៅលើគេហទំព័រវីដេអូ YouTube ផងដែរ កាលពីថ្ងៃទី០៩ ខែវិច្ឆិកា បានបង្ហាញទិដ្ឋភាពមនុស្សស្រីមានមាឌធំៗ និងខ្ពស់។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search និងកម្មវិធីផ្ទៀងផ្ទាត់ (AI) ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការបញ្ជូលរូបថតផ្ដាម ទៅក្នុងគេហទំព័រ Hive Moderation យើងបានរកឃើញថា រូបថតនោះ គឺមិនមែនជារូបថតពិតប្រាកដនោះឡើយ។ ផ្ទុយទៅវិញ រូបភាពផ្ដាមខាងក្រោមនេះ គឺបានបង្ហាញ វីដេអូឃ្លីបខាងលើ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
(រូបថតទី១)
(រូបថតទី២)
(រូបថតទី៣)
Hive Moderation Link | Archived Link
ដូចគ្នានេះដែរ គេហទំព័រ AI Detect Content ដែលជាគេហទំព័រមួយទៀត និងជាកម្មវិធីផ្ទៀងផ្ទាត់អត្ថបទ ឬរូបភាពទាំងឡាយណា ផលិតឡើងដោយបចេ្ចកវិទ្យាបញ្ញាសិប្បនិម្មិត ក៏បានបង្ហាញនូវលទ្ធផលបញ្ជាក់ថាទិដ្ឋភាពនោះ គឺលើសពី៦០ភាគរយ ដែលបង្កើតដោយកម្មវិធី (AI)។
AI Detect Content | Archived Link
ក្រុមការងាររបស់ Fact Crescendo ក៏បានរកឃើញផងដែរថា តាមរយៈកំណត់ត្រារបស់សៀវភៅហ្គីណេស ស្ត្រីដែលមានកម្ពស់ខ្ពស់ជាងគេនៅលើភពផែនដីយើងនេះ គឺបានទៅលើស្រ្ដីជនជាតិទួរគី ដែលមានឈ្មោះថា Rumeysa Gelgi។
លោកស្រី Rumeysa Gelgi កើតនៅថ្ងៃទី០១ ខែមករា ឆ្នាំ១៩៩៧ ដែលមានកម្ពស់រហូតទៅដល់ ២ម៉ែត្រ និង១៥សង់ទីម៉ែត្រ និងបានបំបែកឯតទគ្គកម្មសម្រាប់ស្ត្រីខ្ពស់ជាងគេនៅក្នុងឆ្នាំ២០២១។
Guinness World Records | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook | Twitter | Telegram | Google News | TikTok | WhatsApp
សន្និដ្ឋានFact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបមួយនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
Title:វីដេអូឃ្លីបបង្ហាញមនុស្សខ្ពស់នៅឥណ្ឌាត្រូវបានបង្កើតដោយកម្មវិធី AI
Written By: Kakada SimResult: Altered
