តើក្រុមកីឡាការិនីវាយកូនបាល់លើតុអាមេរិកប្រកួតឈ្នះក្រុមជម្រើសជាតិចិនមែនឬ?

ខណៈដែលព្រឹត្តិការណ៍កីឡាអូឡាំពិកឆ្នាំ២០២៤កំពុងប្រព្រឹត្តទៅនៅទីក្រុងប៉ារីសនោះ ព័ត៌មានដ៏ផុសផុលមួយបានផ្សាយនៅលើបណ្ដាញសង្គមថា ក្រុមកីឡាការិនីវាយកូនបាល់លើតុជម្រើសជាតិអាមេរិកដែលមានមុខមាត់ដូចកូនចៅចិននោះ បានប្រកួតឈ្នះក្រុមជម្រើសជាតិចិន និងដណ្ដើមបានមេដាយមាស។ ព័ត៌មាននេះ ត្រូវបានផ្សព្វផ្សាយព្រោងព្រាតលើបណ្ដាញសង្គមក្នុងរយៈពេលប៉ុន្មានថ្ងៃមកនេះ។ ទោះជាយ៉ាងណា យើងរកឃើញថា ព័ត៌មាននេះមិនត្រឹមត្រូវនោះឡើយ។

ការអះអាងលើបណ្ដាញសង្គម

រូបថតក្រុមកីឡាការិនីវាយកូនបាល់លើតុជម្រើសជាតិអាមេរិក ត្រូវបានគេបង្ហោះព្រោងព្រាតនៅលើបណ្ដាញសង្គមជាមួយសំណេរថា ក្រុមដែលមានមុខមាត់ដូចជនជាតិចិននេះ បានប្រកួតឈ្នះក្រុមកីឡាការិនីវាយកូនបាល់លើតុជម្រើសជាតិចិន និងដណ្ដើមបានមេដាយមាសនៅក្នុងព្រឹត្តិការណ៍ប្រកួតកីឡាអូឡាំពិកនៅទីក្រុងប៉ារីស ប្រទេសបារាំងឆ្នាំ២០២៤នេះ។

រូបថតជាមួយសំណេរបែបនេះ ត្រូវបានចែករំលែកយ៉ាងផុសផុលនៅលើបណ្ដាញសង្គម ក្នុងនោះក៏មានអ្នកប្រើប្រាស់បណ្ដាញសង្គមកម្ពុជាផងដែរ ដែលបានបង្ហោះ និងចែករំលែករូបថតជាមួយសំណេរបែបនេះ។

ខាងក្រោមនេះ គឺជារូបភាពផ្ដាមចេញពីការបង្ហោះលើបណ្ដាញសង្គមកាលពីថ្ងៃទី០៣ ខែសីហា ឆ្នាំ២០២៤ ដែលរៀបរាប់ថា “កីឡាវាយកូនបាល់លើតុ ឬប៉េងប៉ុង មានតែចិនទេដែលខ្លាំង ប៉ុន្តែ … នេះជាក្រុមរបស់សហរដ្ឋអាមេរិកដែលយកឈ្នះចិនដណ្ដើមមេដាយមាស …”។

Facebook Post | Archived

ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានេះដោយទំព័រហ្វេសប៊ុកមួយទៀតកាលពីថ្ងៃទី០៣ ខែសីហា ឆ្នាំ២០២៤ ដែលសរសេររៀបរាប់ថា “នេះជាក្រុមនារីសហរដ្ឋអាមេរិកដែលឈ្នះមេដាយមាសលើវិញ្ញាសាវាយ Tennis ដែលបានយកឈ្នះក្រុមនារីចិន អាមេរិកភ្នែកតឹងៗរបស់គេ”។

Facebook Post | Archived Link

ខាងក្រោមនេះ គឺជារូបភាពផ្ដាមចេញពីការបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតកាលពីថ្ងៃទី០៧ ខែសីហា ឆ្នាំ២០២៤ ដែលសរសេររៀបរាប់ថា “The gold winning USA table tennis team that beat China … ក្រុមប៉េងប៉ុងនារីអាមេរិកដែលឈ្នះមេដាយមាសបន្ទាប់ពីបំបាក់ជម្រើសជាតិនារីចិន”។

Facebook Post | Archived Link

ក្រៅពីបង្ហោះដោយអ្នកប្រើប្រាស់បណ្ដាញសង្គមកម្ពុជាហើយនោះ ព័ត៌មានដដែលនេះ ក៏ត្រូវបានបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់បណ្ដាញសង្គមនៅប្រទេសដទៃទៀតដែរ។

ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គមហ្វេសប៊ុកកាលពីថ្ងៃទី០៣ ខែសីហា ឆ្នាំ២០២៤ ដែលរៀបរាប់ថា “The gold winning USA table tennis team that beat China”។

Facebook Post | Archived Link

ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដទៃទៀតដែរ ដូចជា X (Twitter) និងបណ្ដាញសង្គម Threads ដែលជាបណ្ដាញសង្គមមួយទៀតរបស់ក្រុមហ៊ុន Meta។

ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គម X (Twitter)កាលពីថ្ងៃទី០៣ ខែសីហា ឆ្នាំ២០២៤ ដែលរៀបរាប់ថា “The gold winning USA table tennis team that beat China at the Olympics” ឬអាចប្រែសម្រួលថា “មើលក្រុមវាយកូនបាល់លើតុជម្រើសជាតិនារីអាមេរិកដែលបានយកឈ្នះក្រុមនារីចិន”។

X Tweet | Archived Link

ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានេះនៅលើបណ្ដាញសង្គម Threads កាលពីថ្ងៃទី០៤ ខែសីហា ឆ្នាំ២០២៤ ជាមួយសំណេររៀបរាប់ថា “Check out the USA table tennis team that clinched the gold by beating China!”។

Threads Post | Archived Link

ការត្រួតពិនិត្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់វីដេអូមួយនេះតាមរយៈ Google Reverse Image Search និងការផ្ទៀងផ្ទាត់មើលលទ្ធផលនៃការប្រកួតកីឡាអូឡាំពិកទីក្រុងប៉ារីសឆ្នាំ២០២៤ ផ្នែកវិញ្ញាសាវាយកូនបាល់លើតុ ដែលនាំឱ្យយើងរកឃើញការពិតដូចខាងក្រោមនេះ។

តាមរយៈ Google Reverse Image Search យើងបានរកឃើញថា រូបថតមួយសន្លឹកនេះ ពិតជាកីឡាការិនីក្រុមជម្រើសជាតិអាមេរិកផ្នែកវាយកូនបាល់លើតុ ដែលត្រូវបានបញ្ជូនឱ្យទៅចូលរួមក្នុងព្រឹត្តិការណ៍ប្រកួតកីឡាអូឡាំពិកឆ្នាំ២០២៤ ដែលកំពុងប្រព្រឹត្តទៅនៅទីក្រុងប៉ារីស ប្រទេសបារាំង។

សមាជិកក្រុមជម្រើសនារីអាមេរិក មានកីឡាការិនីជើងចាស់នាង Lily Zhang អាយុ ២៨ឆ្នាំ និងកីឡាការិនីវ័យក្មេង នាង Rachel Sung អាយុ ២០ឆ្នាំ និងនាង Amy Wang អាយុ ២១ឆ្នាំ។

បើតាមប្រវត្តិដែលគេអាចរកមើលបាននៅលើបណ្ដាញអ៊ិនធឹណិត នាង Lily Zhang ជាកីឡាការិនីអាមេរិកកើតនៅទីក្រុង Redwood រដ្ឋកាលីហ្វ័រញ៉ា ក្នុងគ្រួសារអាមេរិកដើមកំណើតចិនដែលមានឪពុកជាសាស្ត្រាចារ្យគណិតវិទ្យានៅសាកលវិទ្យាល័យ Stanford និងម្ដាយជាកីឡាការិនីវាយកូនបាល់លើតុដែលលេងឱ្យខេត្តស៊ីអាន ប្រទេសចិន។

ចំណែកកីឡាការិនី Rachel Sung វិញ នាងមានដើមកំណើតនៅទីក្រុង San Jose រដ្ឋកាលីហ្វ័រញ៉ា នៅក្នុងគ្រួសារមានឪពុកម្ដាយដើមកំណើតចិនតៃវ៉ាន់ ខណៈនាង Amy Wang មានដើមកំណើតនៅទីក្រុង Sewell នៃរដ្ឋ New Jersey នៅក្នុងគ្រួសារមានសាច់ឈាមចិនដែរ។

ខាងក្រោមនេះ គឺជារូបថតមួយនៅក្នុងចំណោមរូបថតរបស់ក្រុមជម្រើសជាតិនារីអាមេរិកផ្នែកវាយកូនបាល់លើតុ ដែលត្រូវបានផ្សព្វផ្សាយនៅលើទំព័រហ្វេសប៊ុកផ្លូវការរបស់ក្រុមកីឡាវាយកូនបាល់លើតុជម្រើសជាតិអាមេរិក។

Facebook Post | Archived Link

តើក្រុមជម្រើសជាតិនារីអាមេរិកឈ្នះក្រុមជម្រើសជាតិនារីចិនឬទេ?

គិតត្រឹមម៉ោង ៥ល្ងាចថ្ងៃទី០៩ ខែសីហា ឆ្នាំ២០២៤ សហរដ្ឋអាមេរិកបន្តឈរនៅកំពូលតារាងក្នុងនាមជាប្រទេសដែលឈ្នះមេដាយច្រើនជាងគេនៅឯព្រឹត្តិការណ៍ប្រកួតកីឡាអូឡាំពិកឆ្នាំ២០២៤ នៅទីក្រុងប៉ារីស ប្រទេសបារាំង។ ក្រុមកីឡាករកីឡាការិនីអាមេរិក ដណ្ដើមបានមេដាយសរុប ១០៣ ក្នុងនោះមេដាយមាស ៣០គ្រឿង មេដាយប្រាក់ ៣៨គ្រឿង និងមេដាយសំរឹទ្ធ ៣៥គ្រឿង។

ចំណែកឯប្រទេសចិនស្ថិតនៅលំដាប់ទី២ កំពុងតាមពីក្រោយសហរដ្ឋអាមេរិក ដោយដណ្ដើមបានមេដាយសរុប ៧៣គ្រឿង ក្នុងនោះមានមេដាយមាស ២៩គ្រឿង មេដាយប្រាក់ ២៥គ្រឿង និងមេដាយសំរឹទ្ធ ១៩គ្រឿង។

Olympic Paris 2024 | Archived Link

ទោះជាយ៉ាងណា ក្រុមជម្រើសជាតិនារីអាមេរិកផ្នែកកីឡាវាយកូនបាល់លើតុ ពុំទទួលបានមេដាយអ្វីនោះឡើយនៅក្នុងព្រឹត្តិការណ៍ប្រកួតកីឡាអូឡាំពិកឆ្នាំ២០២៤ នៅទីក្រុងប៉ារីសនេះ។

ខាងក្រោមនេះ គឺជារូបភាពផ្ដាមចេញពីបណ្ដាញអ៊ិនធឹណិតនៅថ្ងៃទី០៩ ខែសីហា ឆ្នាំ២០២៤ ដែលបង្ហាញតារាងមេដាយរបស់ក្រុមកីឡាករកីឡាការិនីអាមេរិកដែលបានឈ្នះនៅក្នុងព្រឹត្តិការណ៍កីឡាអូឡាំពិកឆ្នាំ២០២៤ នៅទីក្រុងប៉ារីស ដោយអាមេរិកពុំទទួលបានមេដាយសូម្បីតែមួយសម្រាប់វិញ្ញាសាវាយកូនបាល់លើតុ។

វេបសាយកីឡាវាយកូនបាល់លើតុរបស់អាមេរិក បង្ហាញថា ក្រុមជម្រើសនារីអាមេរិក មិនអាចឈានទៅវគ្គបន្តដើម្បីដណ្ដើមមេដាយនៅក្នុងព្រឹត្តិការណ៍កីឡាអូឡាំពិកវិញ្ញាសាវាយកូនបាល់លើតុនោះឡើយ បន្ទាប់ពីចាញ់ក្រុមជម្រើសជាតិនារីអាល្លឺម៉ង់នៅវគ្គបឋមកាលពីថ្ងៃទី០៦ ខែសីហា ឆ្នាំ២០២៤។

USTT.ORG | Archived Link

ជារួម ក្រុមជម្រើសនារីអាមេរិកមិនបានប្រកួតជាមួយក្រុមជម្រើសនារីចិនក្នុងវិញ្ញាសាវាយកូនបាល់លើតុនៅឯព្រឹត្តិការណ៍អូឡាំពិកនោះឡើយ។

នៅវគ្គបឋម ឬវគ្គ ១៦ក្រុមនេះ ក្រុមកីឡាការិនីវាយកូនបាល់លើតុរបស់ជម្រើសជាតិចិន ត្រូវប្រកួតជាមួយក្រុមជម្រើសនារីអេហ្ស៊ីប ដោយក្រុមជម្រើសនារីចិនបានយកឈ្នះលើក្រុមជម្រើសនារីអេហ្ស៊ីប ៣ ទល់ ០ ហើយឆ្លងទៅកាន់វគ្គបន្ទាប់។

Olympic Paris 2024

ក្រុមជម្រើសនារីចិន នឹងត្រូវប្រកួតដណ្ដើមមេដាយមាសជាមួយក្រុមជម្រើសនារីជប៉ុននៅថ្ងៃទី១០ ខែសីហា ឆ្នាំ២០២៤ បន្ទាប់ពីយកឈ្នះលើក្រុមជម្រើសនារីកោះតៃវ៉ាន់នៅវគ្គ ១/៤ និងឈ្នះលើក្រុមជម្រើសនារីកូរ៉េខាងត្បូងនៅវគ្គពាក់កណ្ដាល់ផ្ដាច់ព័ត្រ។

ខាងក្រោមនេះ គឺជារូបភាពផ្ដាមចេញពីវេបសាយអូឡាំពិក ដែលបង្ហាញកាលបរិច្ឆេទនៃការប្រកួតរវាងក្រុមកីឡាការិនីវាយកូនបាល់លើតុរបស់ជម្រើសជាតិចិន និងក្រុមជម្រើសជាតិជប៉ុន ដើម្បីដណ្ដើមមេដាយមាស ខណៈក្រុមជម្រើសជាតិកូរ៉េខាងត្បូង និងក្រុមជម្រើសជាតិអាល្លឺម៉ង់ នឹងត្រូវប្រកួតដណ្ដើមមេដាយសំរឹទ្ធ។

Olympic Paris 2024 | Archived Link

កំណត់ត្រារបស់វេបសាយអូឡាំពិក បង្ហាញថា ក្រុមកីឡាការិនីជម្រើសជាតិអាមេរិកផ្នែកវាយកូនបាល់លើតុនេះ មិនធ្លាប់ឈ្នះមេដាយនោះឡើយនៅក្នុងព្រឹត្តិការណ៍ប្រកួតកីឡាអូឡាំពិក ប៉ុន្តែ ពួកគេបានបង្កើតកំណត់ត្រាថ្មីៗមួយចំនួនផងដែរនាពេលកន្លងមក។

Olympic Paris 2024 | Archived Link

វិញ្ញាសាវាយកូនបាល់លើតុផ្នែកនារីនៅព្រឹត្តិការណ៍អូឡាំពិកឆ្នាំ២០២៤នេះ បានក្លាយជាទីចាប់អារម្មណ៍នៃមហាជនដោយសារតែវត្តមានកីឡាការិនីតំណាងឱ្យប្រទេសនានា មានប្រភពកំណើត ឬជាប់សាច់ឈាមចិន ឬមកពីតំបន់អាស៊ីខាងកើត។

អ្នកស្រី Ni Xia Lian អាយុ ៦១ឆ្នាំ ដែលគេហៅជាទូទៅថា “អ្នកមីង នី” គឺជាម្ចាស់មេដាយមាស ២គ្រឿង ឬជើងឯកកីឡាវាយកូនបាល់លើតុពិភពលោក ធ្វើឡើងនៅអាល្លឺម៉ង់ នៅឆ្នាំ១៩៨៣។

នៅក្នុងព្រឹត្តិការណ៍អូឡាំពិកឆ្នាំ២០២៤នេះ អ្នកមីង នី បានចូលរួមប្រកួតតំណាងប្រទេសលុចសំបួ (Luxembourg) ប៉ុន្តែ អ្នកស្រីមានដើមកំណើតនៅទីក្រុងសៀងហៃ ប្រទេសចិន មុននឹងផ្លាស់ទៅរស់នៅរៀននៅប្រទេសអាល្លឺម៉ង់ និងរស់នៅអចិន្ត្រៃយ៍នៅប្រទេសលុចសំបួនៅអំឡុងទសវត្សរ៍១៩៨០។ (Source)

ចំណែកឯអ្នកស្រី Zeng Zhiying អាយុ ៥៨ឆ្នាំ បានចូលរួមប្រកួតវិញ្ញាសាវាយកូនបាល់លើតុនៅព្រឹត្តិការណ៍អូឡាំពិកនៅទីក្រុងប៉ារីសឆ្នាំនេះ ដោយធ្វើជាតំណាងប្រទេសឈីលី បន្ទាប់ពីអ្នកស្រីខកខានបង្ហាញខ្លួនតំណាងប្រទេសចិននៅក្នុងព្រឹត្តិការណ៍អូឡាំពិកឆ្នាំ១៩៨៤។ (Source)

ស្រដៀងនៅនឹងករណីខាងលើនេះដែរ ក្រុមកីឡាវាយកូនបាល់លើតុជម្រើសជាតិអាល្លឺម៉ង់ មានសមាជិក ២រូបមានដើមកំណើត ឬជាប់ខ្សែស្រឡាញចិន។

មានអាយុ ២៧ឆ្នាំ និងកើតនៅអាល្លឺម៉ង់ កីឡាការិនី WAN Yuan មានឪពុកឈ្មោះ Wan Guohui ដែលជាម្ចាស់ជើងឯក ៤សម័យនៃកីឡាវាយកូនបាល់លើតុប្រចាំប្រទេសចិន។ (Source)

ចំណែកឯកីឡាការិនី SHAN Xiaona អាយុ ៤១ឆ្នាំ មានស្រុកកំណើតនៅប្រទេសចិន ហើយបានផ្លាស់ទៅរសនៅប្រទេសអាល្លឺម៉ង់នៅក្នុងឆ្នាំ២០០៥។ (Source)

កីឡាវាយកូនបាល់លើតុ គឺស្ថិតនៅក្នុងចំណោមកីឡា ៦ប្រភេទដែលប្រទេសចិនតែងតែមានប្រៀបលើបណ្ដាប្រទេសដទៃទៀតនៅលើពិភពលោក។ កីឡាទាំង ៦ប្រភេទនោះ មានកីឡាវាយកូនបាល់លើតុ កីឡាបាញ់កាំភ្លើង កីឡាលោតទឹក កីឡាវាយសី កីឡារបាំកាយសម្ព័ន្ធ (gymnastics) និងកីឡាលើកទម្ងន់។ (Source)

សន្និដ្ឋាន

Fact Crescendo រកឃើញថា ការអះអាងថា ក្រុមកីឡាការិនីវាយកូនបាល់លើតុជម្រើសជាតិអាមេរិកឈ្នះលើក្រុមកីឡាការិនីជម្រើសជាតិចិននោះ គឺជាព័ត៌មានមិនត្រឹមត្រូវនោះឡើយ។ ក្រុមកីឡាការិនីជម្រើសជាតិអាមេរិក បានធ្លាក់ចេញពីព្រឹត្តិការណ៍កីឡាអូឡាំពិកឆ្នាំ២០២៤ហើយ បន្ទាប់ពីចាញ់ក្រុមកីឡាការិនីជម្រើសជាតិអាល្លឺម៉ង់។ ចំណែកឯក្រុមកីឡាការិនីវាយកូនបាល់លើតុរបស់ជម្រើសជាតិចិន កំពុងឈានទៅដល់ការប្រកួតវគ្គផ្ដាច់ព្រ័ត្រដណ្ដើមមេដាយមាសជាមួយក្រុមកីឡាការិនីជម្រើសជាតិជប៉ុន។