បន្ទាប់ពីការបោះឆ្នោតឃុំសង្កាត់ឆ្នាំ២០២២បានបញ្ចប់ទៅ ការអះអាងមួយនៅលើបណ្ដាញសង្គម បាននិយាយថា បេក្ខនារីគណបក្សភ្លើងទៀន អ្នកនាង សុខ ស្រីនួន បានជាប់ជាមេឃុំថ្មីនៃឃុំព្រះធាតុ ស្ថិតក្នុងខេត្តត្បូងឃ្មុំ។ ការអះអាងនេះ ត្រូវបានចែករំលែកយ៉ាងព្រោងព្រាតនៅលើបណ្ដាញសង្គមហ្វេសប៊ុក ហើយអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញមតិអបអរសាទរឆ្លើយតបនឹងការអះអាងនេះ។ ទោះជាយ៉ាងណា បន្ទាប់ពីការផ្ទៀងផ្ទាត់របស់យើង យើងរកឃើញថា ការអះអាងនេះ ជាដំណឹងក្លែងក្លាយ។
ការអះអាងលើបណ្ដាញសង្គម
មួយថ្ងៃក្រោយការបោះឆ្នោតឃុំសង្កាត់បានបញ្ចប់ទៅ ការអះអាងមួយនៅលើបណ្ដាញសង្គម និយាយថា បេក្ខនារីមួយរូបរបស់គណបក្សភ្លើងទៀន បានក្លាយជាមេឃុំថ្មីនៃឃុំព្រះធាតុ ស្ថិតក្នុងស្រុកអូររាំងឪ ខេត្តត្បូងឃ្មុំ បន្ទាប់ពីគណបក្សប្រឆាំងមួយនេះឈ្នះការបោះឆ្នោតនៅឃុំព្រះធាតុ។
ការអះអាងនេះ ត្រូវបានចែករំលែកយ៉ាងព្រោងព្រាតនៅលើបណ្ដាញសង្គមហ្វេសប៊ុក ហើយអ្នកប្រើប្រាស់ហ្វេសប៊ុកជាច្រើន បានបញ្ចេញប្រតិកម្ម និងបញ្ចេញមតិអបអរសាទរផងដែរចំពោះព័ត៌មាននេះ។
ខាងក្រោមនេះ គឺជារូបភាពផ្ដាមចេញពីការអះអាងមួយនៅលើបណ្ដាញសង្គម ដែលសរសេររៀបរាប់ថា «ប្រធានឃុំព្រះធាតុ» និងសំណេរ«សូមសរសើរប្អូនស្រីក្លាយជាមេឃុំស្រុកអូររាំងឪ(ខេត្តត្បូងឃ្មុំ)។ មានទីតាំងវាយសត្រូវល្អណាស់ហោង»។
ខាងក្រោមនេះ គឺជារូបភាពផ្ដាមចេញពីការអះអាងមួយទៀតដោយអ្នកប្រើប្រាស់ហ្វេសប៊ុកមួយទៀតដែលសរសេររៀបរាប់ថា «មេឃុំភ្លើងទៀន ២០២២ប្រចាំឃុំព្រះធាតុ ស្រុកអូររាំងឪ ខេត្តត្បូងឃ្មុំ ជូនពរក្មួយសម្រេចជោគជ័យរាល់កិច្ចការបម្រើជាតិ»។
ការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកដដទៃទៀតផងដែរ ដែលមានតំណភ្ជាប់នៅទីនេះ (១, ២, ៣, ៤, ៥, ៦, ៧, ៨)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យមើលលទ្ធផលបឋមនៃការបោះឆ្នោតនៅឃុំព្រះធាតុ ដែលត្រូវបានផ្សព្វផ្សាយជាសាធារណៈដោយគណៈកម្មាធិការជាតិរៀបចំការបោះឆ្នោត (គ.ជ.ប.) និងកិច្ចសម្ភាសបន្ថែមជាមួយអ្នកនាង សុខ ស្រីនួន បេក្ខនារីឈរឈ្មោះជាតំណាងគណបក្សភ្លើងទៀននៅឃុំព្រះធាតុ ដែលនាំឱ្យយើងរកឃើញការពិតដូចខាងក្រោមនេះ។
លទ្ធផលបឋមនៃការបោះឆ្នោតឃុំសង្កាត់ឆ្នាំ២០២២ ត្រូវបានដាក់បង្ហាញជាសាធារណៈនៅលើគេហទំព័ររបស់ គ.ជ.ប.។ ដោយបានពិនិត្យមើលលទ្ធផលបោះឆ្នោតឃុំសង្កាត់នៅឆ្នាំនេះ យើងបានរកឃើញថា គណបក្សភ្លើងទៀន ទទួលបានសន្លឹកឆ្នោតគាំទ្រ ១,១៨២សំឡេងនៅឯឃុំព្រះធាតុ ស្ថិតក្នុងស្រុកអូររាំងឪ ខេត្តត្បូងឃ្មុំ ខណៈគណបក្សប្រជាជនកម្ពុជា ទទួលបានសន្លឹកឆ្នោតគាំទ្ររហូតដល់ ៤,៦០៨សំឡេង។
លទ្ធផលនៃការបោះឆ្នោតនេះ បង្ហាញថា គណបក្សប្រជាជនកម្ពុជា ឈ្នះបានតំណែងមេឃុំនៅឃុំព្រះធាតុ ខណៈដែលគណបក្សភ្លើងទៀន ទទួលបានអាសនៈមួយចំនួននៅក្នុងក្រុមប្រឹក្សាឃុំមួយនេះ។
បើតាមបញ្ជីឈ្មោះបេក្ខជនឈរឈ្មោះបោះឆ្នោតឃុំសង្កាត់នៅឆ្នាំ២០២២នេះដែលផ្សព្វផ្សាយដោយ គ.ជ.ប. យើងរកឃើញថា អ្នកនាង សុខ ស្រីនួន ត្រូវបានគណបក្សភ្លើងទៀនជ្រើសរើសឱ្យឈរឈ្មោះជាបេក្ខជនលេខរៀងទី១ នៅក្នុងចំណោមបេក្ខជនសរុប ២២រូប ដែលត្រូវបានជ្រើសរើសសម្រាប់ឈរឈ្មោះប្រកួតប្រជែងការបោះឆ្នោតនៅឃុំព្រះធាតុ។
នៅក្នុងកិច្ចសម្ភាសជាមួយ Fact Crescendo Cambodia ៣ថ្ងៃក្រោយការបោះឆ្នោត អ្នកនាង សុខ ស្រីនួន អាយុ ៣៥ឆ្នាំ បានទទួលស្គាល់លទ្ធផលនៃការបោះឆ្នោតនៅឃុំព្រះធាតុ ហើយថា គណបក្សភ្លើងទៀន អាចទទួលបានត្រឹម ២អាសនៈប៉ុណ្ណោះនៅក្នុងក្រុមប្រឹក្សាឃុំព្រះធាតុ។
អ្នកនាង ស្រីនួន បញ្ជាក់បន្ថែមថា អ្នកនាងអាចទទួលបានត្រឹមតែជំនប់ទី២ នៃក្រុមប្រឹក្សាឃុំព្រះធាតុប៉ុណ្ណោះ ខណៈតំណែងមេឃុំ និងជំទប់ទី១ បានទៅបេក្ខជនរបស់គណបក្សប្រជាជនកម្ពុជា។
អ្នកនាង ស្រីនួន ក៏បានច្រានចោលផងដែរនូវការអះអាងនៅលើបណ្ដាញសង្គម ដែលផ្សព្វផ្សាយថា អ្នកនាងនឹងក្លាយជាមេឃុំថ្មីប្រចាំនៅឃុំព្រះធាតុ ហើយអ្នកនាងក៏បានចង្អុលបង្ហាញទៅសំណេរនៅលើហ្វេសប៊ុករបស់នាងនៅក្រោយការបោះឆ្នោតផងដែរ។
សំណេរមួយបង្ហោះនៅលើក្នុងគណនីហ្វេសប៊ុករបស់ខ្លួនដែលដាក់ឈ្មោះថា Bopha Meanrith នៅយប់ថ្ងៃអាទិត្យកន្លងមកនេះ អ្នកនាង ស្រីនួន បានប្រាប់ទៅដល់អ្នកគាំទ្រគណបក្សភ្លើងទៀនថា គណបក្សមួយនេះទទួលបានសំឡេងគាំទ្រត្រឹមតែ ១,១៨២សំឡេងតែប៉ុណ្ណោះ ឬទទួលបាន ២អាសនៈ ដែលអាចឱ្យអ្នកនាងបានជាប់នៅក្នុងក្រុមប្រឹក្សាឃុំព្រះធាតុ។
ខាងក្រោមនេះ គឺជារូបភាពផ្ដាមចេញពីសំណេរមួយរបស់អ្នកនាង ស្រីនួន បង្ហោះនៅលើគណនីហ្វេសប៊ុកផ្ទាល់ខ្លួននៅម៉ោងខ្ទង់ ១០កន្លះយប់ថ្ងៃទី០៥ ខែមិថុនា ឆ្នាំ២០២២។
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ គឺជាព័ត៌មានក្លែងក្លាយ។ អ្នកនាង សុខ ស្រីនួន បេក្ខភាពមេឃុំព្រះធាតុរបស់គណបក្សភ្លើងទៀន មិនបានជាប់ឆ្នោតជាមេឃុំថ្មីនោះឡើយ ប៉ុន្តែ បានជាប់ឆ្នោតនៅក្នុងក្រុមប្រឹក្សាឃុំព្រះធាតុសម្រាប់អាណត្តិថ្មីនេះ បន្ទាប់ពីគណបក្សមួយនេះ ទទួលបានសន្លឹកឆ្នោតគាំទ្រតិចជាងគណបក្សប្រជាជនកម្ពុជា។ ដូច្នេះ តំណែងមេឃុំព្រះអាធាតុសម្រាប់អាណត្តិថ្មី បានទៅបេក្ខជនមកពីគណបក្សប្រជាជនកម្ពុជា។
Title:តើបេក្ខជនបក្សភ្លើងទៀនជាប់ឆ្នោតជាមេឃុំថ្មីនៃឃុំព្រះធាតុមែនឬទេ?
Fact Check By: Jay UdomResult: False
