បើទោះបីជាអតីតព្រះមហាក្សត្រកម្ពុជា ព្រះករុណា នរោត្ដម សីហនុ បានសោយទិវង្គតអស់រយៈពេលជាង ១០ឆ្នាំហើយក្ដី ទ្រង់នៅតែរងការរិះគន់ និងការអះអាងផ្សេងៗ។ កាលពីខែកុម្ភៈកន្លងមកនេះ រូបថតមួយសន្លឹកដែលបង្ហាញអតីតព្រះមហាក្សត្រ និងព្រះមហេសីទ្រង់គ្រងឈុតប្រពៃណីបរទេសនោះ ត្រូវបានគេបង្ហោះលើបណ្ដាញសង្គមជាមួយការអះអាងថា ទ្រង់ទាំងពីរព្រះអង្គគ្រងឈុតប្រពៃណីវៀតណាមនៅថ្ងៃរៀបមង្គលការ។ ការអះអាងលើរូបថតនេះ ទទួលបានការចែករំលែកជាច្រើនដង និងការបញ្ចេញមតិចម្រុះបែបពីអ្នកប្រើប្រាស់បណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងលើរូបថតមួយសន្លឹកនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញអតីតព្រះមហាក្សត្រកម្ពុជា សម្ដេចព្រះ នរោត្ដម សីហនុ និងព្រះមហេសីរបស់ទ្រង់ ស្ថិតក្នុងឈុតសម្លៀកបំពាក់បរទេសនោះ ត្រូវបានគេបង្ហោះនៅលើបណ្ដាញសង្គមជាមួយការរៀបរាប់ថា ព្រះអង្គទាំងពីរស្លៀកពាក់ឈុតរៀបការតាមប្រពៃណីវៀតណាម។
រូបថតមួយសន្លឹកនេះ ត្រូវបានគេចែករំលែកជាច្រើនដង ហើយក៏មានអ្នកប្រើប្រាស់បណ្ដាញសង្គមហ្វេសប៊ុកមួយចំនួន បានបញ្ចេញមតិផ្សេងៗផងដែរ។
ខាងក្រោមនេះ គឺរូបភាពផ្ដាមចេញពីការបង្ហោះរូបថតលើបណ្ដាញសង្គមដែលមានសរសេររៀបរាប់ថា «កម្រងរូបថតអនុស្សាវរីយ៍ដ៏កម្របានឃើញ និងជួបប្រទះរបស់សម្ដេចតាសម្ដេចយាយបានរៀបការតាមរបៀបប្រពៃណីជនជាតិក្រុងហាណូយ»។
រូបថតមួយសន្លឹកជាមួយសំណេរបែបនេះ ត្រូវបានគេបង្ហោះលើបណ្ដាញសង្គមជាបន្តបន្ទាប់ចាប់តាំងពីឆ្នា២០១៧មក។ សូមមើលរូបថតដដែលនេះនៅលើបណ្ដាញសង្គមតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹកដែលបង្ហាញអតីតព្រះមហាក្សត្រកម្ពុជា សម្ដេចព្រះ នរោត្ដម សីហនុ និងព្រះមហេសីរបស់ទ្រង់ស្ថិតក្នុងឈុតសម្លៀកបំពាក់បរទេសនេះ ត្រូវបានរកឃើញនៅក្នុងវេបសាយមួយឈ្មោះថា Free We Chat កាលពីខែកញ្ញា ឆ្នាំ២០១៦កន្លងមក។
ខ្លឹមសារចុះផ្សាយដោយវេបសាយនេះ បានឱ្យដឹងថា រូបថតមួយសន្លឹកនេះ គឺជារូបថតសម្ដេចព្រះ នរោត្ដម សីហនុ និងព្រះមហេសីរបស់ទ្រង់ ស្ថិតក្នុងឈុតសម្លៀកបំពាក់បែបប្រពៃណីម៉ុងហ្គោល។
វេបសាយដដែលនេះ បញ្ជាក់ថា អតីតព្រះមហាក្សត្រកម្ពុជាអង្គនេះ និងព្រះមហេសីរបស់ទ្រង់ ស្ថិតនៅក្នុងចំណោមមេដឹកនាំបណ្ដាប្រទេសដទៃទៀត ដែលធ្លាប់គ្រងសម្លៀកបំពាក់បែបប្រពៃណីជនជាតិម៉ុងហ្គោល។
ខាងក្រោមនេះ គឺជារូបភាពផ្ដាមចេញពីវេបសាយខាងលើជាមួយសំណេររៀបរាប់ក្រោមរូបថតជាភាសាអង់គ្លេស ដែលអាចប្រែសម្រួលបានថា «ព្រះអង្គម្ចាស់ នរោត្ដម សីហនុ និងព្រះមហាក្សត្រីយ៍ នរោត្ដម មុនីនាថ សីហនុ ស្ថិតក្នុងឈុតសម្លៀកបំពាក់ម៉ុងហ្គោល»។
ក្រៅពីខ្លឹមសារដូចដែលត្រូវបានរកឃើញខាងលើនេះ Fact Crescendo Cambodia រកមិនឃើញព័ត៌មានលម្អិតផ្សេងទៀតអំពីរូបថតមួយសន្លឹកនេះឡើយ។
Fact Crescendo Cambodia បានស្នើសុំការបញ្ជាក់បន្ថែមពីព្រះអង្គម្ចាស់ ស៊ីសុវត្ថិ ធម្មិកោ អតីតព្រះរាជលេខាផ្ទាល់របស់អតីតព្រះមហាក្សត្រ សម្ដេចព្រះ នរោត្ដម សីហនុ ប៉ុន្តែ ពុំទាន់ទទួលបានការឆ្លើយតបនៅឡើយទេរហូតដល់ពេលចេញផ្សាយអត្ថបទសារព័ត៌មាននេះ។
សន្និដ្ឋាន
Fact Crescendo Cambodia បានរកឃើញថា ការអះអាងទៅលើរូបថតមួយសន្លឹកដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សម្លៀកបំពាក់ដែលគ្រងដោយអតីតព្រះមហាក្សត្រកម្ពុជា ព្រះករុណាព្រះបាទ នរោត្ដម សីហនុ និងព្រះមហេសីរបស់ទ្រង់នោះ មិនមែនជាឈុតប្រពៃណីវៀតណាមនោះឡើយ។ រូបថតមួយសន្លឹកនេះ បង្ហាញឱ្យឃើញព្រះករុណា នរោត្ដម សីហនុ និងព្រះមហេសី នរោត្ដម មុនីនាថ គ្រងឈុតសម្លៀកបំពាក់ប្រពៃណីម៉ុងហ្គោល។
Title: ការអះអាងមិនត្រឹមត្រូវថា អតីតព្រះមហាក្សត្រកម្ពុជាគ្រងឈុតប្រពៃណីវៀតណាម
Fact Check By: Jay UdomResult: Misleading
