ត្រឹមតែពីរបីថ្ងៃប៉ុណ្ណោះក្រោយហេតុការណ៍អគ្គិភ័យឆាបឆេះព្រះរាជដំណាក់របស់ព្រះបរមរតនកោដ្ឋនៅឯខេត្តសៀមរាបមក ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា ហេតុការណ៍អគ្គិភ័យនេះ ត្រូវបានគេរៀបចំឡើងដើម្បីយកដីលក់យកលុយចែកគ្នា។ ការអះអាងនេះ ទទួលបានការចែករំលែកយ៉ាងច្រើន និងមានការបញ្ចេញមតិចម្រុះបែបផងដែរ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយនៅលើបណ្ដាញសង្គម បានលើកឡើងថា ព្រះរាជដំណាក់មួយកន្លែងរបស់អតីតព្រះមហាក្សតកម្ពុជា សម្ដេចព្រះ នរោត្ដម សីហនុ នៅក្នុងខេត្តសៀមរាប ត្រូវបានគេលួចដុត ដើម្បីយកដីលក់ដូរយកលុយចែកគ្នា។
ការអះអាងនេះ ត្រូវបានចែករំលែកជាច្រើនដងនៅលើបណ្ដាញសង្គម ហើយក៏ទទួលបានការបញ្ចេញមតិជាច្រើន និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមដែលរៀបរាប់ថា «ដុតវាំងស្ដេចមួយចោល យកដីលក់ចែកលុយគ្នាចាយ រឿងនេះយើងមិនពិបាកយល់នោះទេ ល្បិចក្រយ៉ៅពួកនេះ រត់លែងរួចពីយើងហើយ»។
ការអះអាងដូចគ្នានេះ ក៏ត្រូវបានបង្ហោះលើបណ្ដាញសង្គមដោយគណនីហ្វេសប៊ុកមួយទៀតផងបដែរកាលពីថ្ងៃទី១៤ ខែមីនា ពោលគឺ ២ថ្ងៃក្រោយព្រះរាជដំណាក់នៅឯខេត្តសៀមរាប ត្រូវភ្លើងឆាបឆេះ។
អ្នកប្រើប្រាស់ហ្វេសប៊ុកមួយទៀត ក៏បានបង្ហោះការអះអាងប្រហាក់ប្រហែលគ្នានេះផងដែរកាលពីថ្ងៃទី១៣ ខែមីនា។ សូមមើលខ្លឹមសារទាំងស្រុងនៅទីនេះ ឬតំណភ្ជាប់ដែលត្រូវបានរក្សាទុកនៅទីនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យមើលសេចក្ដីរាយការណ៍ចុះផ្សាយដោយសារព័ត៌មានគួរឱ្យទុកចិត្តបានមួយចំនួន ដែលនាំឱ្យយើងរកឃើញការពិតដូចខាងក្រោមនេះ។
ក្នុងសេចក្ដីរាយការណ៍របស់ខ្លួនកាលពីថ្ងៃទី១៣ ខែមីនា វិទ្យុអាស៊ីសេរី (RFA) បានដកស្រង់សេចក្ដីប្រកាសព័ត៌មានរបស់ក្រសួងព្រះបរមរាជវាំង ដែលនិយាយថា រាជដំណាក់តូចនៃព្រះរាជដំណាក់ព្រះរតនកោដ្ឋនៅខេត្តសៀមរាប បានរងភ្លើងឆាបឆេះដោយសារតែឆ្លងចរន្តអគ្គិសនី។ សូមអានខ្លឹមសារទាំងស្រុងនៅទីនេះ ឬតំណភ្ជាប់ដែលត្រូវបានរក្សាទុកនៅទីនេះ។
បើតាមការផ្សាយរបស់ទូរទស្សន៍រដ្ឋ ទទក នៅ១ថ្ងៃក្រោយកើតហេតុការណ៍ភ្លើងឆេះរាជដំណាក់តូចនោះមក លោក គង់ សំអុល រដ្ឋមន្ត្រីក្រសួងព្រះបរមរាជវាំង បានដឹកនាំពិធីក្រុងពាលីរុះរើ និងជួសជុលឡើងវិញនូវរាជដំណាក់តូចនោះ។
បើតាមការចុះផ្សាយរបស់សារព័ត៌មានភ្នំពេញ ប៉ុស្តិ៍ លោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍កន្លងមកនេះ បានជំរុញដំណើរការជួសជុលរាជដំណាក់តូចនេះឱ្យបានឆាប់រហ័ស បើទោះបីជាត្រូវចំណាយថវិកាច្រើនប៉ុណ្ណាក៏ដោយ។
ប្រមុខរាជរដ្ឋាភិបាលកម្ពុជារូបនេះ ក៏បានអំពាវនាវទៅសាធារណជនកុំឱ្យមានការយល់ច្រឡំទៅលើហេតុការណ៍អគ្គិភ័យនេះ និងកុំបកស្រាយលើសពីការពិត។ សូមអានខ្លឹមសារទាំងស្រុងនៅទីនេះ ឬតំណភ្ជាប់ដែលត្រូវបានរក្សាទុកនៅទីនេះ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ព្រះរាជដំណាក់របស់ព្រះបរមរតនកោដ្ឋស្ថិតនៅក្នុងខេត្តសៀមរាប មិនត្រូវបានដោះដូរនោះឡើយ បន្ទាប់ពីអគ្គិភ័យបានឆាបឆេះរាជដំណាក់តូចកាលពីថ្ងៃទី១២ ខែមីនាកន្លងមកនេះ។ ព្រះបរមរាជវាំងបានចាប់ផ្ដើមរៀបចំរុះរើ និងជួសជុលឡើងវិញនូវរាជដំណាក់តូច តែ ១ថ្ងៃប៉ុណ្ណោះក្រោយអគ្គិភ័យបានកើតឡើង។
Title:ព្រះរាជដំណាក់នៅខេត្តសៀមរាបត្រូវបានជួសជុលឡើងវិញមួយថ្ងៃក្រោយភ្លើងឆាបឆេះ
Fact Check By: Jay UdomResult: False
