កាលពីថ្ងៃទី២៤ ខែមេសាកន្លងមកនេះ ក្រសួងសុខាភិបាលកម្ពុជាបានប្រកាសពីការរកឃើញមនុស្សដល់ទៅ ៥១១នាក់ បានឆ្លងមេរោគកូវីដ-១៩នៅទូទាំងប្រទេសកម្ពុជា ក្នុងនោះ ៤ករណីត្រូវបានរកឃើញនៅឯក្រុងប៉ោយប៉ែត ស្ថិតនៅជាប់ព្រំដែនកម្ពុជា-ថៃ។ បើតាមសេចក្ដីប្រកាសព័ត៌មានរបស់ក្រសួងសុខាភិបាល ករណីឆ្លងថ្មីទាំង ៤ករណីនៅក្រុងប៉ោយប៉ែតនោះ ត្រូវបានរកឃើញបុរសជនជាតិឥណ្ឌូនេស៊ី ២នាក់ និងស្ត្រីជនជាតិឥណ្ឌូនេស៊ី ២នាក់ ដែលត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែក។
មួយថ្ងៃបន្ទាប់មក អ្នកប្រើហ្វេសប៊ុកម្នាក់ បានចាត់ទុកក្រុមជនជាតិឥណ្ឌូនេស៊ីទាំងនោះថា ជាប្រភពចម្លងមេរោគកូវីដ-១៩នៅទីក្រុងជាប់ព្រំដែនមួយនេះ ហើយអះអាងថា បុរសម្នាក់ក្នុងចំណោមជនជាតិឥណ្ឌូនេស៊ីទាំង ៤នាក់នោះ បានស្លាប់បាត់បង់ជីវិតដោយសារមេរោគកូវីដ-១៩ បានវាយប្រហារសួតរបស់គាត់ធ្ងន់ធ្ងរ។ ទោះជាយ៉ាងណា ការផ្ទៀងផ្ទាត់ នឹងបង្ហាញថា ការអះអាងលើនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីយប់ថ្ងៃទី២៥ ខែមេសា អ្នកប្រើបណ្ដាញសង្គមហ្វេសប៊ុកម្នាក់ បានបង្ហោះរូបថតបុរសម្នាក់ និងរូបថតសន្លឹកហ្វីលស្កេនសួតមួយផ្ទាំង ដោយអះអាងថា បុរសក្នុងរូបថតនោះ បានទទួលមរណភាពហើយ។ អ្នកប្រើហ្វេសប៊ុករូបនេះ អះអាងថា បុរសក្នុងរូបថតស្ថិតក្នុងសម្លៀកបំពាក់ផ្កាចម្រុះនោះ គឺជាប្រភពនៃការចម្លងមេរោគកូវីដ-១៩នៅក្នុងក្រុងប៉ោយប៉ែត ទីប្រជុំជនសេដ្ឋកិច្ចដ៏សំខាន់មួយរបស់កម្ពុជាស្ថិតនៅជាប់ព្រំដែនកម្ពុជា-ថៃ។
ការអះអាងរបស់អ្នកប្រើហ្វេសប៊ុករូបនេះ ត្រូវបានចែករំលែកបន្តគ្នារាប់រយដង ហើយក៏ត្រូវបានចែករំលែកទៅកាន់គ្រុបផ្សេងលើបណ្ដាញសង្គមដែលមានសមាជិករាប់រយពាន់នាក់ រួមជាមួយការបញ្ចេញមតិចម្រុះបែប។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុកនោះ សរសេរថា «បិតា ២៣ មេសា ឆ្នាំ២០២១ ក្រុងប៉ោយប៉ែត អស់សួងហើយ គាត់បានមរណៈភាព។ បញ្ជាក់ គាត់អ្នកកើតមុនគេទាំងអស់ក្រុងប៉ោយប៉ែត»។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ការពិតជុំវិញការអះអាងនេះតាមរយៈការពិនិត្យមើលការបកស្រាយពីស្ថាប័នពាក់ព័ន្ធ និងស្វែងរកការបកស្រាយពីអ្នកបង្ហោះការអះអាងបែបនេះ។
តាមរយៈការពិនិត្យមើលការបកស្រាយពីស្ថាប័នពាក់ព័ន្ធ យើងបានជួបសេចក្ដីប្រកាសព័ត៌មានរបស់រដ្ឋបាលក្រុងប៉ោយប៉ែតនៅថ្ងៃទី២៦ ខែមេសា ដែលនិយាយថា ការអះអាងលើបណ្ដាញសង្គមនោះ ជាព័ត៌មានមិនពិត។
រដ្ឋបាលក្រុងប៉ោយប៉ែត អះអាងថា ជនជាតិឥណ្ឌូនេស៊ី លោក ជូហាន សូសាន់តូ ដែលត្រូវបានលើកឡើងនៅក្នុងការអះអាងលើបណ្ដាញសង្គមនោះ មានសុខភាពល្អប្រសើរធម្មតា និងបន្តស្ថិតក្រោមការព្យាបាលនៅមណ្ឌលសុខភាពប៉ោយប៉ែត១។
រដ្ឋបាលក្រុងប៉ោយប៉ែតក៏បានស្នើទៅសមត្ថកិច្ចឱ្យស្វែងរកចាប់ខ្លួនអ្នកប្រើហ្វេសប៊ុកដែលបានបង្ហោះព័ត៌មាននេះផងដែរ ហើយនៅរសៀលថ្ងៃដដែល នគរបាលក្រុងប៉ោយប៉ែត បានឃាត់ខ្លួនបុរសម្នាក់ ដែលបានឈរនៅក្នុងបរិវេណនៃអធិកដ្ឋាននគរបាលក្រុងប៉ោយប៉ែត។
ក្នុងវីដេអូដែលបង្ហោះដោយអ្នកប្រើហ្វេសប៊ុកម្នាក់ បុរសរូបនោះ បានទទួលស្គាល់ថា លោកជាម្ចាស់គណនីហ្វេសប៊ុកដែលបានបង្ហោះព័ត៌មានដូចរៀបរាប់ខាងលើង ហើយលោកបានស្នើសុំការអធ្យាស្រ័យពីបងប្អូនប្រជាពលរដ្ឋខ្មែរ បន្ទាប់ពីលោកបានបង្ហោះព័ត៌មានដោយមិនមានការបញ្ជាក់ច្បាស់លាស់ ដែលនាំឱ្យមានការយល់ច្រឡំ។
ចំណែកឯអ្នកប្រើហ្វេសប៊ុក បានបង្ហាញរូបថត២សន្លឹក ដែលបង្ហាញបុរសជនជាតិឥណ្ឌូនេស៊ីអង្គុយនៅលើគ្រែ និងកឈរនៅជិតគ្រែមួយនៅក្នុងបន្ទប់មួយ។
សន្និដ្ឋាន
Fact Crescendo Cambodia រកឃើញថា ការអះអាងដោយអ្នកប្រើហ្វេសប៊ុកដូចរៀបរាប់ខាងលើ មិនត្រឹមត្រូវនោះឡើយ។ សមត្ថកិច្ចក្រុងប៉ោយប៉ែត បញ្ជាក់ថា បុរសឥណ្ឌូនេស៊ីមានសុខភាពល្អធម្មតា និងកំពុងស្ថិតក្រោមការព្យាបាលជំងឺកូវីដ-១៩នៅឯមណ្ឌលសុខភាពប៉ោយប៉ែត១ ស្ថិតក្នុងក្រុងប៉ោយប៉ែត នៅថ្ងៃទី២៦ ខែមេសា ឆ្នាំ២០២១។ Fact Crescendo Cambodia នឹងបន្តធ្វើបច្ចុប្បន្នភាពនៃស្ថានភាពសុខភាពរបស់បុរសឥណ្ឌូនេស៊ីនេះបន្ថែមទៀត។
Title:បុរសឥណ្ឌនេស៊ីម្នាក់ឆ្លងមេរោគកូវីដ-១៩នៅប៉ោយប៉ែត មានសុខភាពល្អធម្មតា
Fact Check By: Jay UdomResult: False
