តើកម្ពុជាមានពលករចំណាកស្រុកច្រើនជាងគេលើពិភពលោកមែនឬទេ?

បន្ទាប់ពីកម្ពុជាបានបំបែកកំណត់ត្រារបស់សៀវភៅកំណត់ត្រាពិភពលោកហ្គីណេស (Guinness World Records)ដោយបានប្រមូលមនុស្សច្រើនបំផុតរាំចង្វាក់ភ្លេងម៉ាឌីហ្សុន និងបង្កើតបេះដូងក្រដាសច្រើនគេកាលពីខែមេសានោះមក ការអះអាងមួយបានលើកឡើងថា កម្ពុជាក៏ជាប់កំណត់ត្រាជាប្រទេសមានពលរដ្ឋចំណាកស្រុកច្រើនជាងគេនៅលើពិភពលោកផងដែរ។ ការអះអាងនេះ ត្រូវបានចែករំលែកបន្តជាច្រើនដងនៅលើបណ្ដាញសង្គម និងមានការបញ្ចេញមតិយោបល់ផ្សេងផងដែរ។ ទោះជាយ៉ាងណា ការផ្ទៀងផ្ទាត់របស់យើងរកឃើញថា ការអះអាងនេះ មិនត្រឹមត្រូវនោះឡើយ។

ការអះអាងលើបណ្ដាញសង្គម

ការអះអាងមួយនៅលើបណ្ដាញសង្គម បានលើកឡើងថា កម្ពុជាបានជាប់នៅក្នុងសៀវភៅកំណត់ត្រាពិភពលោក Guinness World Records ក្នុងនាមជាប្រទេសមានប្រជាជនចំណាកស្រុកច្រើនជាងគេនៅលើពិភពលោក។

ការអះអាងនេះដែលភ្ជាប់មកជាមួយរូបថតមនុស្សដ៏ច្រើនកុះករលីកញ្ចប់ឥវ៉ាន់នៅលើស្មានោះ ត្រូវបានចែករំលែកបន្តជាច្រើនដង ខណៈដែលមានការបញ្ចេញមតិផ្សេងៗ និងប្រតិកម្មចម្រុះបែបពីសំណាក់អ្នកប្រើប្រាស់បណ្ដាញសង្គមហ្វេសប៊ុក។

ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីខែមេសាកន្លងមក ដែលរៀបរាប់ថា «កំណត់ត្រាពិភពលោកដែលកម្ពុជាទទួលបានក្នុងរបប ហ៊ុន សែន

ប្រទេសតូច ពលរដ្ឋតិច តែមានពលករចំណាកស្រុកច្រើនជាងគេលើលោក
ប្រទេសតូចពលរដ្ឋតិច តែមានឯកឧត្ដម លោកជំទាវច្រើនជាងគេលើលោក
ប្រទេសតូច ពលរដ្ឋតិច តែមានបណ្ឌិតចាប់ឆាយ និងឧកញ៉ាស៊ីឈ្នួលច្រើនជាងគេលើលោក
ប្រទេសតូច ពលរដ្ឋតិច តែមានអ្នករងគ្រោះដោយអំពើអយុត្តិធម៌ច្រើនជាងគេលើលោក
ប្រទេសតូច ពលរដ្ឋតិច ក្រីក្រច្រើន តែមេដឹកនាំបែរជាមានទ្រព្យជាងមេដឹកនាំប្រទេសដទៃលើលោក។

***នៅមានច្រើនទៀត សូមជួយបន្ថែម***»។

Facebook Post | Archived Link

ការអះអាងដដែលនេះ ក៏ត្រូវបានលើកឡើងជាភាសាថៃផងដែរ និងត្រូវបានចែករំលែកបន្តទៅក្នុងក្រុមបណ្ដាញសង្គម Amazing World Culture Club ដែលមានគណនីបណ្ដាញសង្គមជិត ៥ម៉ឺនជាសមាជិកនៅក្នុងក្រុមនេះ។

ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមកាលពីថ្ងៃទី២៧ ខែមេសា ឆ្នាំ២០២៣ ជាមួយសំណេររៀបរាប់ជាភាសាថៃថា «กัมพูชาได้ลงบันทึกสถิติโลก ว่ามีแรงงานข้ามชาติมากที่สุดในโลก Cambodia» ឬអាចប្រែសម្រួលជាភាសាខ្មែរថា កម្ពុជាបានជាប់ក្នុងកំណត់ត្រាស្ថិតិពិភពលោកជាប្រទេសមានពលករចំណាកស្រុកច្រើនជាងគេនៅលើពិភពលោក។

Facebook Post | Archived Link

ការអះអាងដដែលនេះ ក៏ត្រូវបានអ្នកប្រើប្រាស់បណ្ដាញសង្គមដទៃទៀតយកទៅបង្ហោះ និងចែករំលែកបន្តផងដែរ។ សូមមើលតាមរយៈតំណភ្ជាប់មាននៅទីនេះ (archived)។

ការត្រួតពិនិតុ្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលកំណត់ត្រារបស់កម្ពុជានៅក្នុងសៀវភៅ Guinness World Records និងការពិនិត្យមើលរបាយការណ៍នានាស្ដីពីរបាយប្រជាជនចំណាកស្រុកនៅតាមបណ្ដាប្រទេសនានា ដែលនាំឱ្យយើងបានរកឃើញការពិតដូចខាងក្រោមនេះ។

នៅក្នុងគេហទំព័រ Guinness World Records យើងបានរកឃើញកំណត់ត្រាជាច្រើនដែលកម្ពុជាបំបែកបាន ឬក៏ត្រូវបានកត់ត្រាទុកនៅក្នុងសៀរភៅលំដាប់ពិភពលោកមួយនេះ។

កំណត់ត្រាថ្មីបំផុតដែលកម្ពុជាបំបែកបាននៅក្នុងឆ្នាំ២០២៣នេះ គឺការប្រមូលផ្ដុំមនុស្សដ៏ច្រើនបំផុតរហូតដល់ ៤,៩៩៩នាក់ ដើម្បីរាំចង្វាក់ម៉ាឌីហ្សុន កាលពីថ្ងៃទី១៥ ខែមេសា នៅឯខេត្តសៀមរាប ដែលរៀបចំឡើងដោយសហភាពសហព័ន្ធយុវជនកម្ពុជា។ សូមមើលខ្លឹមសារទាំងស្រុងនៅទីនេះ (archived)។

៤ថ្ងៃមុនកម្ពុជាបង្កើតបានកំណត់ត្រាខាងលើនេះ កម្ពុជាក៏បង្កើតបានកំណត់ត្រាមួយរួចទៅហើយ ដោយកម្ពុជាបានបង្កើតបេះដូងក្រដាសរហូតដល់ជិត ៤លានសន្លឹកដាក់បង្ហាញនៅប្រាសាទអង្គរវត្ត ដែលនេះគឺជាការតាំងបង្ហាញបេះដូងក្រដាសច្រើនជាងគេបំផុតនៅលើពិភពលោក។ សូមមើលខ្លឹមសារទាំងស្រុងនៅទីនេះ (archived)។

ក្រៅពីកំណត់ត្រាទាំងពីរខាងលើនេះ សហភាពសហព័ន្ធយុវជនកម្ពុជា ក៏បានបង្កើតឱ្យមានរួចមកហើយនូវកំណត់ត្រាផ្សេងៗទៀតនៅក្នុងរយៈពេល ១០ឆ្នាំចុងក្រោយនេះ។

កាលពីអំឡុងពិធីសង្ក្រាន្តនៅក្នុងខែមេសា ឆ្នាំ២០១៥កន្លងមក សហភាពសហព័ន្ធយុវជនកម្ពុជា បានគៀងគរមនុស្សឱ្យចូលរួមធ្វើនំអន្សមធំជាងគេនៅលើពិភពលោក ដែលផលិតពីអង្ករដំណើបមានទម្ងន់ដល់ទៅជាង ៤តោន។ សូមមើលខ្លឹមសារទាំងស្រុងនៅទីនេះ (archived)។

នៅក្នុងឆ្នាំ២០១៧កន្លងមក ក្រសួងអប់រំ យុវជន និងកីឡា បានបង្កើតកំណត់ត្រាថ្មីមួយសម្រាប់កម្ពុជាដោយបង្កើតនូវសិក្ខាសាលាធំបំផុតនៅលើពិភពលោក ដែលមានអ្នកចូលរួមរហូតដល់ ២,៣០៤នាក់ កាលពីថ្ងៃទី២៤ ខែសីហា។ សូមមើលខ្លឹមសារទាំងស្រុងនៅទីនេះ (archived)។

៣ឆ្នាំក្រោយមក កម្ពុជាបានបង្កើតកំណត់ត្រាថ្មីមួយទៀត ដោយសហភាពសហព័ន្ធយុវជនកម្ពុជាខេត្តព្រៃវែងបានបង្កើតទូកងវែងជាងគេនៅលើពិភពមានប្រវែងរហូតដល់ ៨៧.៣ម៉ែត្រកាលពីខែវិច្ឆិកា ឆ្នាំ២០១៨កន្លងមក។ សូមមើលខ្លឹមសារទាំងស្រុងនៅទីនេះ (archived)។

កាលពីឆ្នាំ២០២១កន្លងមក កម្ពុជាបានបង្កើតកំណត់ត្រាថ្មីមួយទៀតដោយអង្គការហ្វាពន្លឺសិល្បៈបានសម្បែងសៀករហស្សកម្មបានយូរជាងគេបំផុតរហូតដល់ជាង ២៤ម៉ោង នៅឯខេត្តបាត់ដំបង ចន្លោះពីថ្ងៃទី០៧ ដល់ថ្ងៃទី០៨ ខែមីនា។ សូមមើលខ្លឹមសារទាំងស្រុងនៅទីនេះ (archived)។

ទាំងនេះ គឺជាកំណត់ត្រាមួយចំនួនដែលយើងបានរកឃើញនៅក្នុងគេហទំព័រ Guinness World Records នៅត្រឹមថ្ងៃទី១៣ ខែមិថុនា ឆ្នាំ២០២៣នេះ។

ទោះជាយ៉ាងណា នៅក្នុងចំណោមកំណត់ត្រាទាំងឡាយនៅលើគេហទំព័រ Guinness World Records យើងរកមិនឃើញកំណត់ត្រាណាមួយដែលបញ្ជាក់ថា កម្ពុជាជាប់ក្នុងកំណត់ត្រាជាប្រទេសមានប្រជាជនចំណាកស្រុកច្រើនជាងនៅលើពិភពលោកនោះឡើយ។

តើកម្ពុជាមានប្រជាជនចំណាកស្រុកច្រើនជាងគេនៅលើពិភពលោកមែនឬទេ?

របាយការណ៍របស់អង្គការពលកម្មអន្តរជាតិ (ILO) បានឱ្យដឹងថា ពលករចំណាកស្រុកនៅទូទាំងពិភពលោក មានចំនួនដល់ទៅ ១៦៩លាននាក់នៅក្នុងចំណោមពលរដ្ឋចំណាកស្រុក ២៧២លាននាក់គិតត្រឹមឆ្នាំ២០១៩កន្លងមកនេះ។

របាយការណ៍របស់អង្គការដដែលនេះ បានឱ្យដឹងទៀតថា តំបន់អឺរ៉ុបផ្នែកខាងជើង ខាងលិច និងខាងត្បូង មានពលករចំណាកស្រុកអន្តរជាតិរហូតដល់ ២៤.២ភាគរយ ហើយតំបន់អាមេរិកខាងជើង មានពលករចំណាកស្រុកអន្តរជាតិ ២២.១ភាគរយ ខណៈដែលតំបន់អាស៊ីអាគ្នេយ៍ និងប៉ាស៊ីហ្វិក មានពលករចំណាកស្រុកត្រឹមតែ ៧.២ភាគរយប៉ុណ្ណោះ បើធៀបទៅនឹងចំនួនពលករចំណាកស្រុកអន្តរជាតិ ១៦៩លាននាក់។ សូមអានខ្លឹមសារទាំងស្រុងនៅទីនេះ។

ចំណែកឯអង្គការអន្តោប្រវេសន៍អន្តរជាតិ (International Migration Organization) បង្ហាញថា ប្រទេសមានចំនួនប្រជាជនច្រើនជាងគេនៅតំបន់អាស៊ី សុទ្ធតែមានចំនួនពលករចំណាកស្រុកទៅធ្វើការនៅក្រៅប្រទេសច្រើនជាងគេផងដែរ។ បើតាមរបាយការណ៍របស់អង្គការនេះ ឥណ្ឌា គឺជាប្រទេសមានប្រជាជនច្រើនជាងគេចេញទៅធ្វើការជាពលករចំណាកស្រុកនៅឯក្រៅប្រទេស និងតាមពីក្រោយដោយប្រទេសម៉ិកស៊ិក និងរុស្ស៊ី។

សម្រាប់តំបន់អាស៊ីទាំងមូល របាយការណ៍អង្គការមួយនេះ បង្ហាញថា ប្រទេសឥណ្ឌាមានចំនួនប្រជាពលរដ្ឋជាពលករចំណាកស្រុកធ្វើការនៅក្រៅប្រទេសច្រើនជាងគេ តាមពីក្រោយដោយប្រទេសចិន បង់ក្លាដែស ហ្វីលីពីន និងអាហ្វហ្កានីស្ថាន។ សូមមើលរបាយការណ៍លម្អិតនៅទីនេះ (archived)។

នៅក្នុងសេចក្ដីរាយការណ៍របស់ខ្លួន កាសែតខ្មែរ ថាមស៍ បានដកស្រង់សារកាលពីខែមេសា ឆ្នាំ២០២២ របស់លោកនាយករដ្ឋមន្ត្រី ហ៊ុន សែន ដែលលើកឡើងថា កម្ពុជាមានពលករចំណាកស្រុកទៅធ្វើការនៅក្រៅប្រទេសជាង ១.៣លាននាក់ គិតត្រឹមឆ្នាំ២០២១កន្លងមក។

កាសែតដដែលនេះ បានលម្អិតបន្ថែមថា ពលករកម្ពុជាចេញទៅធ្វើការនៅប្រទេសចំនួន ៧ ក្នុងនោះប្រទេសថៃមានចំនួនជាង ១,២២០,១៩៧នាក់ កូរ៉េខាងត្បូងមានចំនួន ៤៥,៨៦៦នាក់ ម៉ាឡេស៊ីមានចំនួន ២៣,០២៧នាក់ ជប៉ុនមានចំនួន ១១,៤៥៣នាក់ សិង្ហបុរីមានចំនួន ៨២១នាក់ ហុងកុងមានចំនួន ២០២នាក់ និងអារ៉ាប៊ីសាអ៊ូឌីតមានចំនួន ៤៣នាក់។ សូមអានខ្លឹមសារទាំងស្រុងនៅទីនេះ (archived)។

វេបសាយទិន្នន័យអន្តោប្រវេសន៍ បានបង្ហាញថា គិតត្រឹមពាក់កណ្ដាលឆ្នាំ២០២០កន្លងមក ប្រទេសហ្វីលីពីនមានប្រជាជនរហូតដល់ទៅជាង ៦លាននាក់ បានធ្វើចំណាកស្រុកទៅក្រៅប្រទេស តាមពីក្រោយដោយប្រទេសឥណ្ឌូណេស៊ីដែលមានប្រជាជនដល់ទៅជាង ៤លាននាក់ធ្វើចំណាកស្រុកទៅក្រៅប្រទេស។

វេបសាយដដែលនេះ បានឱ្យដឹងទៀតថា ប្រទេសភូមា ឬមីយ៉ាន់ម៉ា មានប្រជាជនចំណាកស្រុកទៅក្រៅប្រទេសចំនួនជាង ៣.៧លាននាក់ ខណៈដែលប្រទេសវៀតណាមស្ថិតនៅលំដាប់ទី៤ មានប្រជាជនធ្វើចំណាកស្រុកទៅក្រៅប្រទេសជាង ៣.៣លាននាក់។

ចំណែកឯប្រទេសកម្ពុជាស្ថិតនៅលំដាប់ទី៧នៅក្នុងចំណោម ១១ប្រទេសនៅក្នុងតំបន់ ដែលមានប្រជាជនចំនួនជាង ១.១លាននាក់ បានធ្វើចំណាកស្រុកទៅក្រៅប្រទេស។ សូមមើលខ្លឹមសារទាំងស្រុងនៅទីនេះ។

ខាងក្រោមនេះ គឺជាតារាងចំនួនពលរដ្ឋនៃប្រទេសក្នុងតំបន់អាស៊ីអាគ្នេយ៍ ដែលបានធ្វើចំណាកស្រុកទៅក្រៅប្រទេស គិតត្រឹមពាក់កណ្ដាលឆ្នាំ២០២០កន្លងមក។

Migration Data Portal | Archived Link

សន្និដ្ឋាន

Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ កម្ពុជាមិនជាប់ក្នុងកំណត់ត្រា Guinness World Records ក្នុងនាមជាប្រទេសមានប្រជាជនធ្វើចំណាកស្រុកទៅធ្វើការក្រៅប្រទេសច្រើនជាងគេនោះឡើយ។ បើតាមរបាយការណ៍អង្គការអន្តរជាតិនានា ប្រទេសឥណ្ឌាជាប់ចំណាក់ថ្នាក់លេខ១ ជាប្រទេសមានប្រជាជនចំណាកស្រុកទៅក្រៅប្រទេសច្រើនជាងគេបំផុត បើធៀបនឹងបណ្ដាប្រទេសដទៃទៀតនៅលើពិភពលោក។