Fact-Check: នារីម្នាក់យំសោកក្នុងពិធីមង្គលការ គឺជាឈុតឆាកក្នុងវីដេអូចម្រៀង
រូបថត និងវីដេអូគូស្វាមីភរិយាទើបរៀបការថ្មី តែងតែត្រូវបានបង្ហោះនៅលើបណ្ដាញសង្គម ប៉ុន្តែ រូបថត និងវីដេអូមួយចំនួន មិនត្រូវបានគេដឹងព័ត៌មានច្បាស់លាស់នោះឡើយ។ ក្នុងនោះរូបថតមួយសន្លឹកដែលបង្ហាញនារីម្នាក់អង្គុយយំសោកនៅមុខពិធីមង្គលការគូស្វាមីភរិយាថ្មីថ្មោងមួយគូ ត្រូវបានគេបង្ហោះលើបណ្ដាញសង្គមហ្វេសប៊ុក ដោយអះអាងថា នារីរូបនោះ យំសោក ក្រោយពីបុរសដែលនាងបដិសេធរៀបការនោះ បានសម្រេចចិត្តទៅរៀបការជាមួយនារីផ្សេងវិញ។ រូបថតរួមជាមួយការអះអាងបែបនេះ ត្រូវបានចែករំលែករហូតដល់ជិត ៣ពាន់ដង ហើយក៏ត្រូវបានអ្នកប្រើប្រាស់បណ្ដាញសង្គមនិយាយភាសាថៃ និងឡាវ យកទៅចែករំលែកបន្តផងដែរ។ ទោះជាយ៉ាងណា ក្រោយពីត្រួតពិនិត្យការពិតហើយ យើងរកឃើញថា ការអះអាងទៅលើរូបថតនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២១ ខែវិច្ឆិកាកន្លងមកថ្មីៗនេះ ទំព័រហ្វេសប៊ុក RFN Really Fresh News បានបង្ហោះរូបថតមួយសន្លឹក ដែលបង្ហាញនារីម្នាក់អង្គុយយំសោកនៅមុខពិធីមង្គលការគូស្វាមីភរិយាមួយគូ។
ទំព័រហ្វេសប៊ុកដដែលនេះ បានរៀបរាប់ថា នារីក្នុងរូបថតនេះ បានយំសោក បន្ទាប់ពីបុរសម្នាក់បានសម្រេចចិត្តរៀបការជាមួយនារីផ្សេង បន្ទាប់ពីនាងបដិសេធសំណើសុំរៀបការរបស់បុរសម្នាក់នោះ។
រូបថតជាមួយសំណេរបែបនេះ ត្រូវបានអ្នកប្រើប្រាស់ហ្វេសប៊ុកចែករំលែករហូតដល់ជិត ៣ពាន់ដង និងមានការបញ្ចេញមតិ និងប្រតិកម្មយ៉ាងច្រើនផងដែរ ក្នុងនោះមានអ្នកប្រើប្រាស់ហ្វេសប៊ុកជាច្រើន បានគិតថា រូបថតនេះ គឺជារឿងរ៉ាវពិតប្រាកដ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ទំព័រហ្វេសប៊ុក RFN Really Fresh News ដែលរៀបរាប់ថា «នេះហើយលទ្ធផលមនុស្សស្រីធ្វើចរឹតមាន់ គេសួរត្រឹមត្រូវ សុទ្ធតែមិនទាន់ចង់បានប្ដីទេ ដល់តែគេទៅរៀបការជាមួយអ្នកផ្សេង ធ្វើឯងទឹកភ្នែក ក្លាយជាជនរងគ្រោះ។ នេះជាមេរៀនសម្រាប់មនុស្សមួយចំនួន គេខំតាមស្រឡាញ់ហើយធ្វើចរឹតមេមាន់»។
រូបថតមួយសន្លឹកនេះ ក៏ត្រូវបានទំព័រហ្វេសប៊ុកមួយជាភាសាឡាវឈ្មោះថា ມີແຕ່ໃຈ ໃຜຈີມັກ យកទៅផ្សព្វផ្សាយបន្ត ដែលនាំឱ្យមានការចែករំលែកបន្តរឹតតែច្រើនថែមទៀត និងមានការបញ្ចេញមតិយ៉ាងច្រើនពីសំណាក់អ្នកប្រើប្រាស់ហ្វេសប៊ុកនិយាយភាសាឡាវ ដែលគិតថា រូបថតនេះ គឺជារឿងរ៉ាវកើតឡើងពិតប្រាកដ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍នៃទំព័រហ្វេសប៊ុកជាភាសាឡាវ ដែលបានបង្ហោះរូបថតមួយសន្លឹកនេះកាលពីថ្ងៃទី១៨ ខែកញ្ញា ឆ្នាំ២០២០កន្លងមក។
រូបថតមួយសន្លឹកនេះ ក៏ត្រូវបានគេហទំព័រជាភាសាថៃយកទៅចុះផ្សាយបន្តផងដែរ ដោយរៀបរាប់ថា នារីនៅក្នុងរូបថតនេះ ប្រុងទៅផ្ដួលរលំរោងពិធីមង្គលការរបស់បុរសជាប្ដីនាង ប៉ុន្តែ នាងបែបជាជួបរឿងឈឺចាប់លើសដើម។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើរូបថតនេះតាមរយៈការដំណើរការកម្មវិធីស្វែងរករូបថត Google Reverse Image ដែលនាំឱ្យយើងបានជួបប្រទះវីដេអូដែលបង្ហាញទិដ្ឋភាពបែបនេះ។
រូបថតមួយសន្លឹកនេះ ត្រូវបានរកឃើញនៅលើទំព័រហ្វេសប៊ុកផលិតកម្មចម្រៀងមួយឈ្មោះ Bee Production ដែលបានបង្ហោះរូបថតនេះកាលពីថ្ងៃទី១៨ ខែកញ្ញា ឆ្នាំ២០២០កន្លងមក។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ផលិតកម្ម Bee Production ដែលបានសរសេររៀបរាប់ថា «សរសើរគាត់ក្លាហានហ៊ានទៅតតាំងសួរនាំឱ្យអស់ចិត្ត តែអ្នកខ្លះមិនហ៊ានទេ បានត្រឹមឈឺចិត្ត នេះហើយជាមេរៀនដល់នារីគ្រប់គ្នា កុំងាយជឿគេពេក សូមរង់ចាំទស្សនាភាគបន្ត»។
រូបថតមួយសន្លឹកនេះ គឺជាផ្នែកមួយនៃការសម្ដែងនៅក្នុងបទចម្រៀងវីដេអូមួយមានចំណងជើងថា «បើមិនច្បាស់លាស់ម្ដេចឱ្យចាំ» ដែលច្រៀងដោយតារាចម្រៀង អ្នកនាង សូ សុផលីន ហើយផលិតឡើងដោយផលិតកម្ម Bee Production។
វីដេអូចម្រៀងមួយនេះ អាចមើលបានទាំងស្រុងនៅលើឆាណែល YouTube របស់ផលិតកម្ម Bee Production ដែលបានបង្ហោះតាំងពីថ្ងៃទី១៤ ខែកញ្ញា ឆ្នាំ២០២០កន្លងមក។
Bee Production | Archived Link
សន្និដ្ឋាន
Fact Crescendo Cambodia រកឃើញថា រូបថតមួយសន្លឹកនេះ និងការអះអាងដូចបានរៀបរាប់ខាងលើ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជារឿងរ៉ាវពិតប្រាកដរបស់ស្ត្រីម្នាក់យំសោកស្ដាយបុរសម្នាក់ដែលរៀបការជាមួយនារីផ្សេង ដោយសារតែនាងបដិសេធសំណើសុំរៀបការរបស់បុរសនោះឡើយ។ រូបថតនេះ គឺជាផ្នែកមួយនៃឈុតសម្ដែងកាយវិការនៃវីដេអូចម្រៀងរបស់ផលិតកម្ម Bee Production កាលពីឆ្នាំមុន៕
Title:នារីម្នាក់យំសោកក្នុងពិធីមង្គលការ គឺជាឈុតឆាកក្នុងវីដេអូចម្រៀង
Fact Check By: Jay UdomResult: Misleading