បញ្ហាជាច្រើននៅឯប្រទេសនានាជុំវិញពិភពលោក ត្រូវបានលើកឡើង និងចែករំលែកនៅក្នុងចំណោមអ្នកប្រើប្រាស់បណ្ដាញសង្គមនិយាយភាសាខ្មែរ ដោយពុំមានព័ត៌មានជាក់លាក់នោះឡើយ។ ក្នុងចំណោមនោះ រូបថតមួយសន្លឹកត្រូវបានបង្ហោះលើបណ្ដាញសង្គម ជាមួយនឹងសំណេរថា សមាជិកសភាមួយរូបរបស់ប្រទេសម៉ិកស៊ិក បានថ្លែង «អ្នកខ្មាស់អៀនដែលឃើញខ្ញុំអាក្រាត ប៉ុន្តែ អ្នកមិនខ្មាស់អៀន ពេលឃើញប្រជាជនរបស់អ្នកនៅតាមផ្លូវអាក្រាតកាយគ្មានទីពឹង គ្មានការងារធ្វើ និងស្រេកឃ្លាន បន្ទាប់ពីអ្នកបានយកលុយ និងទ្រព្យសម្បត្តិទាំងអស់របស់ពួកគេ»។
រូបថតជាមួយនឹងខ្លឹមសារបែបនេះ ត្រូវបានចែករំលែកបន្តជាច្រើនដឹងពីសំណាក់អ្នកប្រើប្រាស់បណ្ដាញសង្គមហ្វេសប៊ុក។ ទោះជាយ៉ាងណា ការត្រួតពិនិត្យការពិត រកឃើញថា ខ្លឹមសារសរសេរនៅលើរូបថតនោះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២១ ខែកក្កដា ឆ្នាំ២០២១ អ្នកប្រើប្រាស់ហ្វេសប៊ុក Vireak Stöñe បានបង្ហោះរូបថតបុរសម្នាក់ ដែលឈរថ្លែងទាំងអាក្រាតកាយនៅសល់តែខោលីអូ។ រូបថតនោះ បានភ្ជាប់ជាមួយព័ត៌មានសរសេរថា បុរសរូបនោះ គឺជាសមាជិកសភាម៉ិកស៊ិកមួយ ដែលបានថ្លែងថា «អ្នកខ្មាស់អៀនដែលឃើញខ្ញុំអាក្រាត ប៉ុន្តែ អ្នកមិនខ្មាស់អៀន ពេលឃើញប្រជាជនរបស់អ្នកនៅតាមផ្លូវអាក្រាតកាយគ្មានទីពឹង គ្មានការងារធ្វើ និងស្រេកឃ្លាន បន្ទាប់ពីអ្នកបានយកលុយ និងទ្រព្យសម្បត្តិទាំងអស់របស់ពួកគេ»។
រូបថតជាមួយសំណេរបែបនេះ ត្រូវបានចែករំលែកជាច្រើនដងពីសំណាក់អ្នកប្រើប្រាស់បណ្ដាញសង្គម រួមជាមួយការបញ្ចេញមតិ និងប្រតិម្មជាច្រើនផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក ដែលបង្ហោះរូបថតបុរសម្នាក់ភ្ជាប់ជាមួយសំណេរសម្រង់សម្ដីរបស់គាត់។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតជាមួយសម្រង់សម្ដីមួយនេះតាមរយៈកម្មវិធីស្វែងរករូបថតនៅលើ Google ដែលនាំឱ្យយើងរកឃើញរូបថត និងព័ត៌មានអំពីរូបថតនេះ ដែលត្រូវបានផ្ទៀងផ្ទាត់ដោយស្ថាប័នត្រួតពិនិត្យអន្តរជាតិនានា។
រូបថតនេះ ត្រូវបានរកឃើញស្ថិតនៅក្នុងផ្នែកមួយនៃវីដេអូព័ត៌មានចេញផ្សាយដោយសារព័ត៌មាន BBC កាលពីថ្ងៃទី១៣ ខែធ្នូ ឆ្នាំ២០១៣ ដែលបានរៀបរាប់ថា លោក Antonio Garcia Conejo សមាជិកសភាមួយរូបរបស់ប្រទេសម៉ិកស៊ិក បានដោះសម្លៀកបំពាក់របស់លោកទាំងអស់ចោលទៅលើកម្រាលថ្ម និងបន្សល់ទុកត្រឹមតែខោលីអូតែប៉ុណ្ណោះ។
បើតាមសារព័ត៌មាន BBC សមាជិកសភារបស់ប្រទេសម៉ិកស៊ិករូបនេះ បានធ្វើបែបនេះដើម្បីបង្ហាញការជំទាស់របស់លោកទៅនឹងច្បាប់ថ្មីស្ដីពីថាមពល ដែលប្រទេសនេះបានអនុញ្ញាតឱ្យក្រុមហ៊ុនឧស្ម័ន និងប្រេងឯកជន ខួងយកប្រេង និងឧស្ម័នជាមួយក្រុមហ៊ុនរដ្ឋ Pemex ក្នុងលក្ខណៈការដោះដូរចំណែកនៃប្រាក់ចំណេញ។
សារព័ត៌មាន BBC បានរាយការណ៍ទៀតថា ច្បាប់នោះ ត្រូវបានអនុម័តហើយ មួយថ្ងៃក្រោយពីសំណើច្បាប់នោះ ត្រូវបានសភាជាន់ខ្ពស់ ឬព្រឹទ្ធសភារបស់ប្រទេសម៉ិកស៊ិក បានយល់ព្រម។
ចំណែកឯទីភ្នាក់ងារព័ត៌មានរ៉យទ័រ (Reuters) កាលពីថ្ងៃទី២១ ខែឧសភា ឆ្នាំ២០២១ បានផ្ទៀងផ្ទាត់ទៅលើសម្ដីរបស់សមាជិកសភាម៉ិកស៊ិករូបនេះផងដែរតាមរយៈវីដេអូនៃការថ្លែងការណ៍របស់លោក ហើយរកឃើញថា អ្នកនយោបាយបក្សប្រឆាំងប្រទេសម៉ិកស៊ិករូបនេះ បានថ្លែងថា រដ្ឋាភិបាលម៉ិកស៊ិកបានកែប្រែសេវាផ្គត់ផ្គង់អគ្គិសនី ព្រមទាំងធនធានប្រេងរបស់ប្រទេស ទៅឱ្យក្រុមហ៊ុនឯកជន។
ដោយសារតែរឿងមួយនេះ ត្រូវបានចែកចាយដោយអ្នកប្រើប្រាស់បណ្ដាញសង្គមនៅបណ្ដាប្រទេសផ្សេងទៀតផងដែរនោះ ក្រុមការងារត្រួតពិនិត្យការពិតនៅស្រីលង្កា ក៏បានផ្ទៀងផ្ទាត់លើរូបថត និងសម្រង់សម្ដីដែលត្រូវបានអះអាងដូចដែលបានរៀបរាប់ខាងលើផងដែរ។ អត្ថបទត្រួតពិនិត្យការពិតដោយក្រុមការងារ FC Sri Lanka មាននៅទីនេះ។
ក្រុមការងារត្រួតពិនិត្យការពិតនៅស្រីលង្កា បានរកឃើញវីដេអូនៅលើបណ្ដាញ YouTube ដែលបង្ហាញលោក Antonio Garcia Canejo ថ្លែងជាភាសាអេស្ប៉ាញ ហើយប្រហែលជា ១១នាទីក្រោយមក លោកបានបង្ហាញការតវ៉ាដោយបានដោះសម្លៀកបំពាក់ចេញ និងបន្តថ្លែងជាមួយរាងកាយអាក្រាតនៅសល់ត្រឹមតែខោលីអូ។
ប្រព័ន្ធផ្សព្វផ្សាយដទៃទៀត ក៏បានរាយការន៍អំពីរឿងរ៉ាវនេះដែរ ដែលបង្ហាញថា សមាជិកសភាបក្សប្រឆាំងប្រទេសម៉ិកស៊ិករូបនេះ បង្ហាញការតវ៉ាជំទាស់របស់គាត់ទៅនឹងច្បាប់ថាមពល ដែលអនុញ្ញាតឱ្យក្រុមហ៊ុនឯកជនវិនិយោគនៅក្នុងក្រុមហ៊ុនប្រេង និងឧស្ម័នរបស់រដ្ឋ។
លោក Antonio Garcia Canejo ថ្លែងថា «នេះគឺជារបៀបដែលលោកអ្នកកំពុងសម្រាតប្រទេសជាតិ។ តើមានប្រយោជន៍មកពីណា? គួរឱ្យខ្មាស់អៀនម៉្លេះទេ! ប៉ុន្តែ បញ្ហានេះមិនធ្វើឱ្យខ្ញុំខ្មាស់អៀនទេ។ នេះគឺជារបៀបដែលលោកអ្នកបង្ហាញទៅប្រទេសជាតិ។ តើមានប្រយោជន៍អ្វី?»។
នៅក្នុងសាររបស់លោកកាលពីខែធ្នូ ឆ្នាំ២០១៣ លោក Antonio Garcia Canejo មិនបានលើកឡើងពីអំពើពុករលួយ និងការលួចទ្រព្យសម្បត្តិជាតិរបស់មេដឹកនាំប្រទេសនោះឡើយ។
សន្និដ្ឋាន
Fact Crescendo Cambodia រកឃើញថា ខ្លឹមសារភ្ជាប់ជាមួយរូបថតដូចដែលបានរៀបរាប់ខាងលើនេះ មិនត្រឹមត្រូវនោះឡើយ។ សមាជិកសភាបក្សប្រឆាំងរបស់ប្រទេសម៉ិកស៊ិក លោក Antonio Garcia Canejo មិនបានថ្លែងដូចខ្លឹមសារភ្ជាប់នឹងរូបថតនោះឡើយ។ សមាជិកសភាបក្សប្រឆាំងប្រទេសម៉ិកស៊ិក លោក Antonio Garcia Canejo បានដោះសម្លៀកបំពាក់នៅសល់តែខោខ្លី ដើម្បីបង្ហាញការជំទាស់របស់លោកទៅនឹងសំណើច្បាប់ថាមពលកាលពីខែធ្នូ ឆ្នាំ២០១៣។
Title:តើសមាជិកសភាម៉ិកស៊ិកបានថ្លែងដូចការអះអាងលើបណ្ដាញសង្គមឬទេ?
Fact Check By: Jay UdomResult: Misleading
