- >>
- FALSE
វីដេអូសម្ដែងជាអាបស៊ីត្រីកំពុងបង្កការភាន់ច្រឡំក្នុងចំណោមអ្នកប្រើប្រាស់បណ្ដាញសង្គម
ខណៈដែលអបិយជំនឿកំពុងតែគ្របដណ្ដប់លើបណ្ដាញសង្គមហ្វេសប៊ុកអស់រយៈជាច្រើនសប្ដាហ៍មកហើយនោះ វីដេអូមួយដែលមានរូបភាពអាបហោះស៊ីត្រីនៅក្នុងអាងចិញ្ចឹមត្រីនៅមុខផ្ទះមួយនោះ ត្រូវបានគេបង្ហោះលើបណ្ដាញសង្គមជាមួយការរៀបរាប់ថា ជាអាបពិតប្រាកដដែលថតបានដោយកាមេរ៉ាសុវត្ថិភាព។ វីដេអូនេះ ត្រូវបានចែករំលែកបន្តព្រោងព្រាត ហើយមានអ្នកប្រើប្រាស់ហ្វេសប៊ុកជាច្រើន បានបញ្ចេញមតិយោបល់ដែលជឿថា ជាអាបពិតប្រាកដ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងបែបនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលផុសផុលនៅលើបណ្ដាញសង្គមកាលពីសប្ដាហ៍កន្លងមកនេះ បានលើកឡើងថា អាបត្រូវបានថតជាប់នៅក្នុងកាមេរ៉ាសុវត្ថិភាពរបស់គ្រួសារកម្ពុជាមួយ ដែលបានបង្ហោះវីដេអូនោះនៅលើបណ្ដាញសង្គមផងដែរ។
ការអះអាងនេះ បានបង្ហោះមកជាមួយនូវវីដេអូដែលថតចេញពីកាមេរ៉ាសុវត្ថិភាពនៃគេហដ្ឋានមួយ ដែលបង្ហាញឱ្យឃើញនារីម្នាក់មានតែក្បាល និងពោះវៀនមានពន្លឺបៃតងហោះទៅក្បែរអាងចិញ្ចឹមត្រីមួយ។
វីដេអូនេះ ត្រូវបានចែករំលែកបន្តដល់ទៅរាប់ពាន់ដង និងមានអ្នកប្រើហ្វេសប៊ុកនិយាយភាសាខ្មែរជាច្រើនបានចូលទៅបញ្ចេញមតិចម្រុះបែប ក្នុងនោះមានអ្នកប្រើបណ្ដាញសង្គមមួយចំនួនជឿថាជាការពិត។
ខាងក្រោមនេះ គឺជាវីដេអូទាំងស្រុងដែលបង្ហោះលើបណ្ដាញសង្គមកាលពីថ្ងៃទី២០ ខែធ្នូ ឆ្នាំ២០២៣ ជាមួយសំណេររៀបរាប់ថា «អាបមានពិត ថតជាប់ដោយកាមេរ៉ាសុវត្ថិភាពយប់មិញ»។
វីដេអូដដែលនេះ ក៏ត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរ ដែលនាំឱ្យមានការចែករំលែកបន្តរាប់រយដង និងមតិយោបល់ជាច្រើន។
ខាងក្រោមនេះ គឺជាវីដេអូដែលបង្ហោះដោយអ្នកប្រើប្រាស់ហ្វេសប៊ុកមួយកាលពីថ្ងៃទី១៩ ខែធ្នូ ឆ្នាំ២០២៣ ជាមួយសំណេររៀបរាប់ថា «ញាក់សាច់កាមេរ៉ាសុវត្ថិភាពថតជាប់អាបចាប់ត្រីស៊ីក្នុងអាង»។
ការអះអាងក្នុងន័យដូចគ្នានេះ ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរ ហើយក៏ទទួលបានការចែករំលែកបន្ត និងមតិយោបល់ចម្រុះបែបពីអ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងដដែលនេះ ដែលត្រូវបានបង្ហោះចូលក្នុងក្រុមបណ្ដាញសង្គមមួយកាលពីថ្ងៃទី២១ ខែធ្នូ ឆ្នាំ២០២៣។
វីដេអូនេះជាមួយសំណេរក្នុងន័យថា មានអាបពិតប្រាកដថតជាប់នៅក្នុងកាមេរ៉ាសុវត្ថិភាពនោះ ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកផ្សេងៗទៀត។ សូមមើលវីដេអូនោះតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ ឬតំណភ្ជាប់មួយទៀតនៅទីនេះ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធី Image Reverse Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈកម្មវិធី Image Reverse Search យើងបានរកឃើញវីដេអូដូចគ្នាទាំងស្រុងដែលត្រូវបានបង្ហោះនៅលើបណ្ដាញសង្គមដោយអ្នកបង្កើតមាតិកាសង្គមឈ្មោះ «Puly TV» ដែលបញ្ជាក់ថា ជាវីដេអូសម្ដែងក្នុងគោលបំណងដើម្បីការកម្សាន្តតែប៉ុណ្ណោះ។
ខាងក្រោមនេះ គឺជាវីដេអូទាំងស្រុងដែលបង្ហោះនៅលើទំព័រហ្វេសប៊ុក Puly TV កាលពីថ្ងៃទី១៩ ខែធ្នូ ឆ្នាំ២០២៣ ដែលសរសេររៀរាប់ថា «អាបមានពិត ថតជាប់តាមកាមេរ៉ាសុវត្ថិភាពយប់មិញ… សម្ដែង។ This video is made for entertainment purpose only»។
៣ថ្ងៃក្រោយមក ទំព័រហ្វេសប៊ុកដដែលនេះ បានចេញវីដេអូមួយទៀតដែលបង្ហាញការរាយមែកឫស្សីដើម្បីចាប់អាបហោះទៅស៊ីត្រី ប៉ុន្តែ ទំព័រហ្វេសប៊ុកដដែលនេះ បានបញ្ជាក់ទៀតថា វីដេអូនេះគ្រាន់តែជាការសម្ដែងដើម្បីជាការកម្សាន្តតែប៉ុណ្ណោះ។
ខាងក្រោមនេះ គឺជាវីដេអូទាំងស្រុងដែលបង្ហោះដោយទំព័រហ្វេសប៊ុក Puly TV កាលពីថ្ងៃទី២២ ខែធ្នូ ឆ្នាំ២០២៣ ដែលសរសេររៀបរាប់ថា «អាបមានពិត! ដាក់បន្លាជាប់ពោះវៀនមែនទែន! … សម្ដែងទេ»។
ដោយពិនិត្យទៅលើវីដេអូដែលត្រូវបានបង្ហោះនៅបណ្ដាញសង្គមបន្តបន្ទាប់គ្នា យើងបានរកឃើញចំណុចមួយចំនួនដែលបញ្ជាក់បន្ថែមថា វីដេអូទាំងពីរ មានកាលបរិច្ឆេទ និងម៉ោងពេលដូចគ្នា ដែលបញ្ជាក់ថា វាជាវីដេអូតែមួយដែលត្រូវបានប្រើប្រាស់សម្រាប់កាត់តបញ្ចូលរូបភាពអាប។
សូមពិនិត្យមើលរូបភាពដែលត្រូវបានផ្ដាមចេញពីវីដេអូទាំងពីរ ដែលកាលបរិច្ឆេទតែមួយត្រូវបានបង្ហាញនៅក្នុងរង្វង់ក្រហមក្នុងរូបភាពទាំងពីរនេះ។
Fact Crescendo Cambodia ក៏បានស្នើសុំការបកស្រាយពីម្ចាស់ទំព័រហ្វេសប៊ុក Puly TV តាមរយៈប្រព័ន្ធផ្ញើសារបណ្ដាញសង្គមផងដែរ ប៉ុន្តែ ពុំទទួលបានការឆ្លើយតបនោះឡើយរហូតមកដល់ថ្ងៃចេញផ្សាយអត្ថបទនេះ។
ទំព័រហ្វេសប៊ុក Puly TV បានណែនាំខ្លួនឯងថា ជាអ្នកបង្កើតមាតិកាជាវីដេអូដែលផ្ដោតលើការចម្អិនម្ហូបអាហារ ការបង្កើតរឿងសប្បាយៗ និងការច្នៃប្រតិដ្ឋ។
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ វីដេអូដែលមានរូបភាពអាបថតជាប់នៅក្នុងកាមេរ៉ាសុវត្ថិភាពនោះ មិនមែនជាការពិតជាក់ស្ដែងនោះឡើយ។ វីដេអូនេះ ត្រូវបានបង្កើតឡើងដោយអ្នកបង្កើតមាតិកាលើបណ្ដាញសង្គម ដើម្បីទាក់ទាញការចាប់អារម្មណ៍តែប៉ុណ្ណោះ។
Title:វីដេអូសម្ដែងជាអាបស៊ីត្រីកំពុងបង្កការភាន់ច្រឡំក្នុងចំណោមអ្នកប្រើប្រាស់បណ្ដាញសង្គម
Written By: Jay UdomResult: False
