បន្ទាប់ពីទីក្រុង Los Angeles បានរងមហន្តរាយដោយសារភ្លើងឆេះព្រៃកាលពីសប្ដាហ៍មុនមក រូបថត និងវីដេអូឃ្លីបជាច្រើនអំពីគ្រោះមហន្តរាយនេះ ត្រូវបានចែករំលែកព្រោងព្រាតនៅលើបណ្ដាញសង្គម។ ក្នុងនោះ រូបថតពីរបីសន្លឹកដែលបង្ហាញពីអ្នកពន្លត់អគ្គីភ័យជួយសង្គ្រោះសត្វចិញ្ចឹមពីភ្លើងកំពុងឆេះ ត្រូវបានបង្ហោះ និងចែកចាយឡើងយ៉ាងផុសផុលនៅលើបណ្ដាញសង្គម។ ទោះជាយ៉ាងណា ការត្រួតពិនិត្យការពិតរបស់ Fact Crescendo រកឃើញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយនៅលើបណ្ដាញសង្គម បានលើកឡើងថា ក្រុមពន្លត់អគ្គិភ័យដែលបណ្ដាលមកពីភ្លើងឆេះព្រៃនៅរដ្ឋ California បានជួយសង្គ្រោះកូនឆ្មាតូចៗជាច្រើនក្បាលអំឡុងពេលពួកគេប្រតិបត្តិការពន្លត់អគ្គិភ័យនៅទីក្រុង Los Angeles។
ការអះអាងនេះក៏បានបង្ហោះមកជាមួយនូវរូបថតមួយសន្លឹកដែលបង្ហាញកូនឆ្មាតូចៗត្រូវបានក្រុមអ្នកពន្លត់អគ្គិភ័យប្រមូលយកចេញពីទីកន្លែងរងអគ្គិភ័យមួយកន្លែង។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេរថា «[…] ក្រុមបានចូលទៅក្នុងហើយបានរកឃើញកូនឆ្មាតូចបីក្បាល ប្រធានក្រុម James បានយកពួកគេឡើងហើយប្រគល់ឱ្យមិត្តភក្តិរបស់គាត់ Emily […]»។
រូបថតស្រដៀងគ្នានេះ ក៏ត្រូវបានបង្ហោះព្រោងព្រាតនៅលើបណ្ដាញសង្គមហ្វេសប៊ុកដោយអ្នកប្រើប្រាស់ដទៃទៀតផងដែរ ដោយបានបង្ហាញទិដ្ឋភាពអ្នកពន្លត់អគ្គីភ័យបានជួយសង្គ្រោះសត្វឆ្មាមួយក្បាល។
រូបថតប្រហាក់ប្រហែលនេះ ក៏ត្រូវបានរកឃើញ និងចែកចាយនៅលើបណ្ដាញសង្គម X ផងដែរ កាលពីថ្ងៃទី១២ ខែមករា ឆ្នាំ២០២៥ ដោយបានបង្ហាញទិដ្ឋភាពអ្នកពន្លត់អគ្គីភ័យបានឈរកាន់សត្វឆ្មានៅលើដៃរបស់គាត់។
សម្រាប់ការអះអាងប្រហាក់ប្រហែលគ្នានេះដែរ ត្រូវបានបង្ហោះរំលែកលើបណ្ដាញសង្គមដោយអ្នកប្រើប្រាស់ដទៃទៀត សូមចូលទៅមើលតាមរយៈតំណភ្ជាប់មាននៅទីនេះ៖ Link 1 (archived), Link 2 (archived), និង Link 3 (archived)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search និងកម្មវិធីផ្ទៀងផ្ទាត់ (AI) ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការបញ្ជូលរូបថតផ្ដាម ទៅក្នុងគេហទំព័រ Hive Moderation យើងបានរកឃើញថា រូបថតនោះ គឺមិនមែនជារូបថតពិតប្រាកដនោះឡើយ។ ផ្ទុយទៅវិញ រូបភាពផ្ដាមខាងក្រោមនេះ គឺបានបង្ហាញ រូបថតទាំងឡាយខាងលើ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
ខាងក្រោមនេះ គឺជារូបភាពបង្ហាញពីលទ្ធផលវិភាគដោយកម្មវិធី Hive ដែលបង្ហាញថា រូបភាពនេះត្រូវបានបង្កើតឡើងដោយកម្មវិធីបញ្ញាសិប្បនិម្មិត។
ខាងក្រោមនេះ គឺជារូបភាពមួយទៀតបង្ហាញពីលទ្ធផលវិភាគដោយកម្មវិធី Hive ដែលបង្ហាញថា រូបភាពនេះត្រូវបានបង្កើតឡើងដោយកម្មវិធីបញ្ញាសិប្បនិម្មិត។
ខាងក្រោមនេះ គឺជារូបភាពមួយទៀតបង្ហាញពីលទ្ធផលវិភាគដោយកម្មវិធី Hive ដែលបង្ហាញថា រូបភាពនេះត្រូវបានបង្កើតឡើងដោយកម្មវិធីបញ្ញាសិប្បនិម្មិត។
Hive Moderation Link | Archived Link
ដូចគ្នានេះដែរ គេហទំព័រ AI Detect Content ដែលជាគេហទំព័រមួយទៀត និងជាកម្មវិធីផ្ទៀងផ្ទាត់អត្ថបទ ឬរូបភាពទាំងឡាយណា ផលិតឡើងដោយបចេ្ចកវិទ្យាបញ្ញាសិប្បនិម្មិត ក៏បានបង្ហាញនូវលទ្ធផលបញ្ជាក់ថាទិដ្ឋភាពនោះ គឺលើសពី៦០ភាគរយ ដែលបង្កើតដោយកម្មវិធី (AI)។
AI Detect Content | Archived Link
ករណីរូបភាព និងវីដេអូឃ្លីប ដែលត្រូវបានបង្ហោះឡើងទាក់ទងទៅនឹងគ្រោះមហន្តរាយភ្លើងឆេះព្រៃនៅក្នុងទីក្រុង Los Angeles នេះ តែងតែត្រូវបានត្រួតពិនិត្យ និងផ្ទៀងផ្ទាត់ការពិតដោយក្រុមការងាររបស់ Fact Crescendo Cambodia ផងដែរកាលពីពេលថ្មីៗនេះ។
លោកអ្នកអាចស្វែងរក និងអានព័ត៌មានបន្ថែមតាមរយៈតំណភ្ជាប់ខាងក្រោម៖
- ផ្ទះដំបូលក្រហមរួចផុតពីអណ្ដាតភ្លើងជាហេតុការណ៍ឆ្នាំ២០២៣កើតនៅរដ្ឋហាវ៉ៃ (archived link)
- False Claim Spread: Iconic Hollywood Sign on Fire (archived link)
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook | Twitter | Telegram | Google News | TikTok | WhatsApp
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតទាំងឡាយនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
Title:រូបថតបង្ហាញពីអ្នកពន្លត់អគ្គីភ័យជួយសង្គ្រោះសត្វចិញ្ចឹមនៅអាមេរិក គឺជារូប AI
Fact Check By: Kakada SimResult: Altered
