វីដេអូកាត់តបង្ហាញស្ដេចអង់គ្លេសបើកបង្ហាញផ្ទាំងរូបថតប្រាសាទព្រះវិហាររបស់កម្ពុជា
ឆ្នាំនេះ គឺជាខួបទី១៦ នៃការដាក់ប្រាសាទព្រះវិហារជាសម្បត្តិបេតិកភណ្ឌពិភពលោក។ ទន្ទឹមគ្នានេះ វីដេអូឃ្លីបមួយដែលបង្ហាញព្រះមហាក្សត្រអង់គ្លេស ឆាលស៍ទី៣ បើកបង្ហាញរូបថតអបអរសាទរខួប១៦ឆ្នាំនៃការចុះបញ្ជីប្រាសាទនេះ ត្រូវបានបង្ហោះនៅលើបណ្ដាញសង្គម។ ការបង្ហោះវីដេអូខាងលើ បានចែកចាយបន្ដជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា វីដេអូបង្ហោះខាងលើ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៧ ខែកក្កដា ឆ្នាំ២០២៤កន្លងទៅថ្មីៗនេះ វីដេអូឃ្លីបមួយដែលបង្ហាញព្រះមហាក្សត្រអង់គ្លេស ឆាលស៍ ទី៣ ឈរបង្ហាញផ្ទាំងរូបថតនៃការអបអរសាទរខួប ១៦ឆ្នាំនៃការចុះបញ្ជីប្រាសាទព្រះវិហារក្នុងបញ្ជីបេតិកភណ្ឌពិភពលោកនោះ ត្រូវបានបង្ហោះនៅលើបណ្ដាញសង្គម។
វីដេអូឃ្លីបនេះ ត្រូវបានចែករំលែកបន្ដជាច្រើនដង រួមជាមួយការបញ្ចេញមតិយោបល់ និងប្រតិកម្មចម្រុះបែបពីអ្នកប្រើប្រាស់បណ្ដាញសង្គមនិយាយភាសាខ្មែរ ក្នុងអ្នកប្រើប្រាស់ហ្វេសប៊ុកមួយចំនួនជឿថា វីដេអូនេះជាការពិត។
ខាងក្រោមនេះ គឺជាវីដេអូឃ្លីបទាំងស្រុង ត្រូវបានបង្ហោះនៅលើបណ្ដាញសង្គមជាមួយសំណេររៀបរាប់ថា «ប្រាសាទព្រះវិហារ ត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
វីដេអូឃ្លីបដែលមានទិដ្ឋភាព និងទម្រង់ដូចគ្នាទាំងស្រុង ត្រូវបានផ្សព្វផ្សាយដោយ AP ក្នុងគេហទំព័រវីដេអូ YouTube កាលពីថ្ងៃទី១៥ ខែឧសភា ឆ្នាំ២០២៤កន្លងទៅ។ គេហទំព័រដដែលខាងលើ ពុំបានបញ្ជាក់ថានោះ គឺជាទិដ្ឋភាពព្រះអង្គម្ចាស់ឆាលស៍ ទី៣ ឈរបង្ហាញរូបថតប្រាសាទព្រះវិហារ កាលពីពេលថ្មីៗនោះឡើយ។
ផ្ទុយទៅវិញ នោះគឺជាទិដ្ឋភាពរូបគំនូររបស់ទ្រង់ ក្នុងឈុតឯកសណ្ឋានពណ៌ក្រហម ដែលត្រូវបានគូរដោយវិចិត្រករលោក Jonathan Yeo នៅឯរាជវាំង Buckingham។
ខាងក្រោមនេះ គឺជាវីដេអូឃ្លីបទាំងស្រុង ដែលត្រូវបានរាយការណ៍ដោយគេហទំព័រសារព័ត៌មាន AP។
ដូចគ្នានេះ ការបង្ហាញផ្ទាំងរូបថតខាងលើ ក៏ត្រូវបានរាយការណ៍ និងផ្សព្វផ្សាយដោយគេហទំព័រសារព័ត៌មាន ABC ផងដែរ កាលពីថ្ងៃទី១៥ ខែឧសភា ឆ្នាំ២០២៤កន្លងទៅ ដោយពុំបានបង្ហាញទិដ្ឋភាពរបស់ព្រះអង្គម្ចាស់ឆាលស៍ ទី៣ រូបនេះ បានឈរបង្ហាញផ្ទាំងរូបថតដែលមានប្រាសាទព្រះវិហាររបស់កម្ពុជានោះឡើយ។
ខាងក្រោមនេះ គឺជារូបភាពផ្ដាមចេញពីគេហទំព័រសារព័ត៌មានខាងលើ ដែលបានសរសេររៀបរាប់ថា «ផ្ទាំងគំនូររបស់ព្រះអង្គម្ចាស់ឆាលស៍ ទី៣ របស់វិចិត្រករ Jonathan Yeo បានដាក់បង្ហាញនៅក្នុងរាជវាំង Buckingham»។
ABC News Report | Archived Link
ខាងក្រោមនេះ គឺជាការប្រៀបធៀបរវាងរូបថតផ្តាមនៅក្នុងវីដេអូឃ្លីបខាងលើដែលត្រូវបានកាត់ត។
ករណីស្រដៀងគ្នានេះ ក៏ធ្លាប់ត្រូវបានក្រុមការងាររបស់ Fact Crescendo Cambodia ត្រួតពិនិត្យការពិត កាលពីថ្ងៃទី២៥ ខែវិចិ្ឆកា ឆ្នាំ២០២៣កន្លងទៅ ដោយបានបង្ហាញអតីតប្រធានាធិបតីអាមេរិកលោក អូបាម៉ា បានឈរបង្ហាញផ្ទាំងរូបថត ដែលមានប្រាសាទអង្គរវត្តផងដែរ។ អានព័ត៌មានលម្អិតនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបនេះ គឺជាទិដ្ឋភាពព្រះអង្គម្ចាស់ឆាលស៍ ទី៣ បានឈរបង្ហាញផ្ទាំងរូបថតរបស់ទ្រង់ ក្នុងឈុតឯកសណ្ឋានពណ៌ក្រហម ដែលត្រូវបានគូរដោយវិចិត្រករលោក Jonathan Yeo។
Title:វីដេអូកាត់តបង្ហាញស្ដេចអង់គ្លេសបើកបង្ហាញផ្ទាំងរូបថតប្រាសាទព្រះវិហាររបស់កម្ពុជា
Fact Check By: Kakada SimResult: Altered
