វីដេអូចាស់អំពីស្ត្រីមានវិបត្តិផ្លូវចិត្តត្រូវបានបង្ហោះដោយមិនត្រឹមត្រូវលើបណ្ដាញសង្គម
បន្ទាប់ពីទីក្រុងឌូបៃរបស់ប្រទេសអារ៉ាប់រួមលិចលង់ដោយជំនន់ទឹកភ្លៀងនាពេលថ្មីៗនេះ ការអះអាងមួយនៅលើបណ្ដាញសង្គម បានផ្សព្វផ្សាយថា មានត្រីឆ្លាមជាច្រើនជាប់នៅក្នុងផ្សារទំនើបមួយនៃទីក្រុងឌូបៃ ក្រោយទឹកជំនន់ស្រកទៅវិញ។ ការអះអាងនេះ ត្រូវបានចែករំលែកបន្តយ៉ាងច្រើន ហើយក៏មានការបញ្ចេញមតិចម្រុះផងដែរ។ ទោះជាយ៉ាងណា បន្ទាប់ពីផ្ទៀងផ្ទាត់ទៅលើរូបភាពនេះ យើងរកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូមួយមានរយៈពេល ៤នាទី ដែលបង្ហាញស្ត្រីម្នាក់ត្រូវបានដាក់ខ្នោះដៃជើងភ្ជាប់ជាមួយគ្រែមួយពីសំណាក់មនុស្សមួយក្រុមស្ថិតក្នុងសម្លៀកបំពាក់ជាសមត្ថកិច្ចប្រដាប់ដោយអាវុធផងនោះ ត្រូវបានបង្ហោះនៅលើបណ្ដាញសង្គមនៅថ្ងៃនេះ។
វីដេអូនោះ ត្រូវបានគេអះអាងថា វាគឺជាការដាក់ទោសទៅលើស្ត្រីអាមេរិកម្នាក់ដែលទុកកូនតូចអាយុ ១៦ខែ នៅផ្ទះរហូតដល់ស្លាប់ ដោយនាងចេញទៅដើរលេងជាមួយមិត្តប្រុសនៅក្រៅប្រទេសរហូតដល់ ១០ថ្ងៃ។
វីដេអូជាមួយសំណេរបែបនេះ ត្រូវចែករំលែកដល់ទៅរាប់រងដងពីសំណាក់អ្នកប្រើប្រាស់បណ្ដាញសង្គមក្នុងរយៈពេលតែប៉ុន្មានម៉ោងប៉ុណ្ណោះបន្ទាប់ពីវាត្រូវបានបង្ហោះនៅលើបណ្ដាញសង្គម ហើយក៏មានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញប្រតិកម្ម និងមតិយោបល់ទៅនឹងវីដេអូនេះ។
ខាងក្រោមនេះ គឺជារូបភាពផ្ដាមចេញពីព័ត៌មានដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០១ ខែឧសភា ឆ្នាំ២០២៤ ដែលសរសេររៀបរាប់ថា “ម្ដាយបានធ្វើដំណើរកម្សាន្តជាមួយប្រុសដោយទុកកូនរបស់គាត់នៅផ្ទះតែម្នាក់ឯង។ ពេលមកវិញ កូនដេកស្លាប់ រដ្ឋាភិបាលប្រទេសនោះកំពុងដាក់ទណ្ឌកម្មគាត់”។
វីដេអូនេះក៏ត្រូវបានបង្ហោះនៅលើបណ្ដាញសង្គមដទៃទៀតផងដែរជាមួយសំណេររៀបរាប់ថា វាគឺជាវីដេអូនៃការដាក់ទោសទណ្ឌធ្ងន់ធ្ងរទៅលើស្ត្រីម្នាក់ដែលទុកកូនខ្លួនឯងចោលនៅផ្ទះរហូតដល់ទៅ ១០ថ្ងៃ បណ្ដាលឱ្យស្លាប់ ហើយស្ត្រីនោះចេញទៅដើរលេងឆ្ងាយផ្ទះ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើឆាណែល YouTube មួយកាលពីថ្ងៃទី២០ ខែមេសា ឆ្នាំ២០២៤ ជាមួយសំណេររៀបរាប់ជាភាសាហិណ្ឌី និងភាសាអង់គ្លេស។
សម្រាប់វីដេអូដូចគ្នានេះ គេអាចរកមើលបានតាមរយៈតំណភ្ជាប់មាននៅទីនេះ ឬតំណភ្ជាប់មួយទៀតនៅទីនេះ ឬតំណភ្ជាប់មួយទៀតនៅទីនេះ និងតំណភ្ជាប់មួយទៀតនៅទីនេះ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញវីដេអូដូចគ្នានេះ ដែលត្រូវបានផ្សព្វផ្សាយដោយសារព័ត៌មានអន្តរជាតិនានា លើបណ្ដាញ YouTube និងបណ្ដាញសង្គមកាលពីប៉ុន្មានឆ្នាំមុន។
វីដេអូដូចគ្នានេះ ត្រូវបានចុះផ្សាយដោយសារព័ត៌មាន Arizona Central កាលពីចុងខែកក្កដា ឆ្នាំ២០១៩ ដែលនិយាយថា ស្ត្រីនៅក្នុងវីដេអូនេះ គឺនាង Valentina Gloria ជាអ្នកជំងឺផ្លូវចិត្តធ្ងន់ធ្ងរ ត្រូវបានគេចាប់ខ្លួនដោយសារតែនាងបានស្ដោះទឹកមាត់ដាក់អ្នកមើលថែទាំម្នាក់អំឡុងពេលនាងទទួលការព្យាបាលនៅក្នុងមន្ទីរពេទ្យមួយ។
ខាងក្រោមនេះ គឺជាអត្ថបទ និងវីដេអូទាំងស្រុងដែលចុះផ្សាយដោយវេបសាយ Arizona Central កាលពីថ្ងៃទី២៥ ខែកក្កដា ឆ្នាំ២០១៩ ដែលនិយាយអំពីអ្នកជំងឺផ្លូវចិត្តនាង Valentina Gloria។
រឿងរ៉ាវរបស់នាង Valentina Gloria ដែលត្រូវបានចាប់ខ្លួន និងដាក់ខ្នោះជាប់នឹងគ្រែនេះ ក៏ត្រូវបានចុះផ្សាយផងដែរដោយសារព័ត៌មាន Phoenix New Times កាលពីខែសីហា ឆ្នាំ២០១៩ បន្ទាប់វីដេអូនេះត្រូវបានទម្លាយនៅលើបណ្ដាញអ៊ិនធឹណិត។
បើតាមសារព័ត៌មាននេះ ហេតុការណ៍នៃការដាក់ខ្នោះនាង Valentina Gloria ភ្ជាប់ជាមួយគ្រែនៅក្នុងបន្ទប់ឃុំឃាំងនេះ បានកើតឡើងកាលពីខែធ្នូ ឆ្នាំ២០១៨។
Phoenix New Times | Archived Link
លោកអ្នកអាចមើលវីដេអូនេះដែលត្រូវបានផ្សព្វផ្សាយលើបណ្ដាញ YouTube កាលពីថ្ងៃទី០១ ខែសីហា ឆ្នាំ២០១៩កន្លងមក។
វីដេអូជាមួយការអះអាងដូចដែលត្រូវបានរៀបរាប់ខាងលើនេះ ត្រូវបានបង្ហោះនៅលើបណ្ដាញសង្គម បន្ទាប់ពីមានព័ត៌មានដ៏ផុសផុលមួយដែលចុះផ្សាយដោយសារព័ត៌មានអន្តរជាតិនានា និយាយថា ស្ត្រីម្នាក់ត្រូវបានតុលាការអាមេរិកកាត់ទោសឱ្យជាប់ទោសអស់មួយជីវិត ដោយសារតែនាងបានទុកកូនង៉ែតអាយុ ១៦ខែចោលនៅផ្ទះរហូតដល់ស្លាប់។
ការផ្សាយរបស់សារព័ត៌មាន Washington Post កាលពីខែមីនាកន្លងមកនេះ បានឱ្យដឹងថា នាង Kristel Candelario អាយុ ៣២ឆ្នាំ បានសារភាពទទួលស្គាល់ថា នាងបានបណ្ដោយឱ្យកូនស្រីខ្លួនឯងនៅផ្ទះម្នាក់ឯងរហូតដល់ស្លាប់ ខណៈពេលហ្នឹងនាងបានធ្វើដំណើរទៅដើរលេងនៅប្រទេសកាលពីខែមិថុនាឆ្នាំមុន។ សូមមើលអត្ថបទទាំងស្រុងនៅទីនេះ
រហូតមកដល់ពេលនេះ គ្មានវីដេអូនៃការដាក់ទោសលើនាង Kristel Candelario ត្រូវបានរកឃើញនៅលើបណ្ដាញសង្គម ឬលើប្រព័ន្ធអ៊ិនធឹណិតនោះឡើយ។
Fact Crescendo Cambodia នឹងធ្វើបច្ចុប្បន្នភាពអំពីរឿងនេះ ប្រសិនបើវីដេអូបែបនេះ ត្រូវបានរកឃើញនៅលើបណ្ដាញសង្គម ឬប្រព័ន្ធអ៊ិនធឹណិត។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូនេះ មិនមែនជាការដាក់ទោសទណ្ឌទៅលើស្ត្រីម្នាក់ដែលទុកកូនង៉ែតចោលនៅផ្ទះរហូតដល់ស្លាប់នោះឡើយ។ វីដេអូនេះ បង្ហាញពីការដាក់ខ្នោះទៅលើអ្នកមានវិបត្តិផ្លូវចិត្ត នាង Valentina Gloria កាលពីចុងឆ្នាំ២០១៨ នៅក្នុងរដ្ឋអារីហ្សូណា។
Title: វីដេអូចាស់អំពីស្ត្រីមានវិបត្តិផ្លូវចិត្តត្រូវបានបង្ហោះដោយមិនត្រឹមត្រូវលើបណ្ដាញសង្គម
Written By: Jay UdomResult: Misleading
