វីដេអូកកស្ទះចរាចរណ៍លើផ្លូវល្បឿនលឿនឆ្នាំចាស់មិនមែនជាហេតុការណ៍កកស្ទះអំឡុងចូលឆ្នាំចិនទេ
ខណៈដែលប្រជាពលរដ្ឋជាច្រើនបានដើរលេងកម្សាន្តទៅកាន់តំបន់ឆ្នេរសមុទ្រខេត្តព្រះសីហនុអំឡុងបុណ្យចូលឆ្នាំចិននោះ វីដេអូមួយដែលបង្ហាញទិដ្ឋភាពការកកស្ទះនៅលើផ្លូវល្បឿនលឿនភ្នំពេញ-ព្រះសីហនុ ត្រូវបានបង្ហោះនៅលើបណ្ដាញសង្គមដោយមានការអះអាងថា ស្ថានភាពកកស្ទះក្នុងអំឡុងពិធីបុណ្យចូលឆ្នាំចិនថ្មីៗនេះ។ ការអះអាងនេះ ត្រូវបានចែកចាយ និងបញ្ចេញមតិប្រតិកម្មចម្រុះយ៉ាងផុសផុលពីសំណាក់អ្នកប្រើប្រាស់បណ្ដាញសង្គមហ្វេសប៊ុកកម្ពុជា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២២ ខែមករា ឆ្នាំ២០២៣ ទំព័រហ្វេសប៊ុកមួយដែលមានឈ្មោះថា «KimSrun - គីមស្រ៊ុន» បានបង្ហោះវីដេអូឃ្លីបមួយ ដែលបានបង្ហាញទិដ្ឋភាពការកកស្ទះចរាចរណ៍យ៉ាងខ្លាំងនៅលើបណ្តាផ្លូវល្បឿនលឿនភ្នំពេញ-ព្រះសីហនុ អំឡុងពិធីបុណ្យចូលឆ្នាំប្រពៃណីចិន។
ការអះអាង ដោយភ្ជាប់ទៅនឹងវីដេអូខាងលើនេះ ត្រូវបានចែកចាយ និងបញ្ចេញមតិចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុកជាច្រើននាក់។
ខាងក្រោមនេះ គឺជាវីដេអូឃ្លីបទាំងស្រុង បង្ហោះដោយទំព័រហ្វេសប៊ុកខាងលើ ដែលបានសរសេរថា «បងប្អូនដែលជិះតាមផ្លូវល្បឿនលឿនប្រហែលជាតឹងទ្រូង ធ្លាយនិយាយលែងចេញ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើវីដេអូ និងការអះអាងខាងលើ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីបដូចគ្នាទាំងស្រុងនេះ ត្រូវបានរកឃើញ និងបង្ហោះនៅលើប៉ុស្តិ៍របស់អ្នកប្រើប្រាស់ហ្វេសប៊ុកម្នាក់ ដែលមានឈ្មោះថា «គិន សុគន្ធ» កាលពីថ្ងៃទិ០៧ ខែវិច្ឆិកា ឆ្នាំ២០២២កន្លងទៅនេះ។ ការបង្ហោះវីដេអូឃ្លីបមួយនេះ បានបង្ហាញ និងបញ្ជាក់ច្បាស់ថា ទិដ្ឋភាពការកកស្ទះ ដែលទំព័រហ្វេសប៊ុកខាងលើ បានបង្ហោះ និងអះអាងថាជាទិដ្ឋភាពកកស្ទះ ក្នុងថ្ងៃចូលឆ្នាំចិននោះ គឺមិនត្រឹមត្រូវនោះឡើយ។
ដូចគ្នានេះ តាមរយៈទំព័រហ្វេសប៊ុកផ្លូវការរបស់ «ផ្លូវល្បឿនលឿនភ្នំពេញ - ព្រះសីហនុ» ផ្សព្វផ្សាយកាលពីថ្ងៃទី២២ ខែមករា ឆ្នាំ២០២៣កន្លងទៅ ក៏បានច្រានចោលនូវការអះអាង ដោយភ្ជាប់ទៅនឹងវីដេអូឃ្លីបខាងលើនោះផងដែរ។ ទំព័រហ្វេសប៊ុកដដែលខាងលើនេះ បានបង្ហោះរូបថត២សន្លឹក ដែលបានបង្ហាញទិដ្ឋភាពផ្ទាល់នៃច្រកចេញ-ចូល នៅផ្លូវល្បឿនលឿនភ្នំពេញ-ព្រះសីហនុ ដែលពុំមានការកកស្ទះចរាចរណ៍ ក្នុងអំឡុងពិធីបុណ្យចូលឆ្នាំចិននោះឡើយ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានបញ្ជាក់ថា «ក្រុមហ៊ុនយើងខ្ញុំនៅតែប្រទះឃើញមានជនខិលខូចមួយចំនួនបានយកវីដេអូ កកស្ទះចរាចរណ៍ដែលបានកើតឡើងកាលពីអតីតមកផ្សព្វផ្សាយ បណ្តាលឱ្យសាធារណៈជនមានការយល់ច្រឡំពី ទិដ្ឋភាពចរាចរណ៍ជាក់ស្តែងនៅលើផ្លូវល្បឿនលឿន»។
ខាងក្រោមនេះ គឺជាទិដ្ឋភាពចរាចរណ៍ជាក់ស្តែងនៅលើផ្លូវល្បឿនលឿន ក្នុងអំឡុងពិធីបុណ្យចូលឆ្នាំចិនកន្លងទៅ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថាវីដេអូឃ្លីប និងការលើកឡើងដោយទំព័រហ្វេសប៊ុកខាងលើនោះ គឺមិនត្រឹមត្រូវឡើយ។ ច្បាប់ដើមនៃវីដេអូឃ្លីបនេះ គឺជាទិដ្ឋភាពការកកស្ទះដែលបានកើតឡើងតាំងពីឆ្នាំមុនម្ល៉េះ ដោយពុំមានការកកស្ទះចរាចរណ៍នៅផ្លូវល្បឿនលឿនភ្នំពេញ-ព្រះសីហនុ ក្នុងអំឡុងពិធីបុណ្យចូលឆ្នាំចិននោះឡើយ។
Title:វីដេអូកកស្ទះចរាចរណ៍លើផ្លូវល្បឿនលឿនឆ្នាំចាស់មិនមែនជាហេតុការណ៍កកស្ទះអំឡុងចូលឆ្នាំចិនទេ
Fact Check By: Kakada SimResult: Missing Context
