ជារឿយៗ ការកសាងផ្លូវថ្នល់នៅក្នុងរាជធានីភ្នំពេញ បានក្លាយជាប្រធានបទនៃការជជែក និងចែករំលែកនៅលើបណ្ដាញសង្គមពីសំណាក់មហាជនកម្ពុជា ដែលចោទសួរអំពីគុណភាព និងភាពយូរអង្វែងនៃសំណង់សាធារណៈទាំងឡាយ។
ទន្ទឹមគ្នានេះ រូបថតពីរសន្លឹកដែលបង្ហាញពីការកសាងបំពង់បង្ហូរទឹកនៅតាមផ្លូវមួយខ្សែ ត្រូវបានបង្ហោះលើបណ្ដាញសង្គមជាមួយនឹងការអះអាងថា ការកសាងបំពង់បង្ហូរទឹកនេះ កើតឡើងនៅរាជធានីភ្នំពេញ។
ការបង្ហោះរូបថតជាមួយនឹងការអះអាងបែបនេះ ត្រូវបានអ្នកប្រើបណ្ដាញសង្គមនិយាយភាសាខ្មែរចែករំលែកបន្ត និងការបញ្ចេញប្រតិកម្មរហូតដល់ទៅរាប់ពាន់ដង។
ទោះជាយ៉ាងណា ការផ្ទៀងផ្ទាត់ការពិតរបស់ Fact Crescendo Cambodia រកឃើញថា ការអះអាងបែបនេះ មិនត្រឹមត្រូវនោះទេ។
ការអះអាងលើបណ្ដាញសង្គម
កាលពីថ្ងៃទី០៦ ខែមិថុនា ឆ្នាំ២០២១ អ្នកប្រើហ្វេសប៊ុកមួយ បានបង្ហោះរូបថតពីរសន្លឹកត្រូវបង្ហាញនូវការសាងសង់បំពង់បង្ហូរទឹកនៅតាមផ្លូវចាក់បេតុងមួយកន្លែង។ សំណេររបស់អ្នកប្រើហ្វេសប៊ុកមួយនេះ មិនបានបញ្ជាក់ពីទីតាំងជាក់លាក់នោះឡើយ ប៉ុន្តែ ហាក់បង្ហាញថា សំណង់បំពង់ទុយោបង្ហូរទឹកនេះ ត្រូវបានធ្វើឡើងនៅក្នុងរាជធានីភ្នំពេញ។
ការបង្ហោះរូបថតជាមួយនឹងការអះអាងបែបនេះ ត្រូវបានចែករំលែកតៗគ្នារហូតដល់ទៅជាង ៦ ៥០០ដងពីសំណាក់អ្នកប្រើបណ្ដាញសង្គមហ្វេសប៊ុក ព្រមទាំងការបញ្ចេញប្រតិកម្ម និងមតិចម្រុះបែបផងដែរ។
ក្នុងប្រអប់បញ្ចេញមតិ អ្នកប្រើហ្វេសប៊ុកម្នាក់ បានសួរថា តើរូបថតនៃការសងសង់បំពង់បង្ហូរទឹកនេះ ស្ថិតនៅក្នុងប្រទេសកម្ពុជា ឬនៅក្នុងប្រទេសថៃ ហើយបន្ទាប់មកអ្នកប្រើហ្វេសប៊ុកខាងលើបានតបថា «នៅគេទេបាទ»។
រូបភាពផ្ដាមចេញពីប៉ុស្តិ៍របស់គណនីហ្វេសប៊ុកនោះ រៀបរាប់ថា «តិចច្រឡំគេផ្លុងដាក់ត្រីឥវិនទៅ ស៊ីហ្វុងរំដោះទឹកលូឆ្មោះ។ ខ្ញុំមិននឹកស្មានថា វិស្វករខ័ណ្ឌ+វិស្វករសង្កាត់ គាត់ធ្វើបាន តិចលចៅហ្វាយខ័ណ្ឌ និងចៅសង្កាត់ធ្លាប់ចេញពីវិមានទិព្វទៅ។ ទឹកជំនន់ ៥០០មេក៏មិនលិចដែរលូរ លិចតែផ្លូវ និងផ្ទះប៉ុណ្ណោះ។ មិនជឿកុំប្រមាថ។ សុំភ័យទោស មិនទើសទេ តែនេះជា High experience ត្រូវរៀនសូត្រតាម Note»។
ការពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើរូបថតតាមរយៈកម្មវិធីស្វែងរករូបថតរបស់ Google ដែលនាំឱ្យយើងឈានទៅរូបថត និងព័ត៌មានលម្អិតនៃរូបថតនេះ។
រូបថតពីរសន្លឹកនេះ ហើយរូបថតជាច្រើនមុំទៀត ត្រូវបានចុះផ្សាយព្រោងព្រាតដោយប្រព័ន្ធផ្សព្វផ្សាយនៅក្នុងប្រទេសថៃ បន្ទាប់ពីរូបថតទាំងពីរសន្លឹកនេះ ត្រូវបានបង្ហោះនៅលើបណ្ដាសង្គមហ្វេសប៊ុក។
បើតាមការចុះផ្សាយរបស់សារព័ត៌មានថៃ Siam News រូបថតទាំងពីរសន្លឹកនេះ ត្រូវបានបង្ហោះលើទំព័រហ្វេសប៊ុក មែមពោធិ៍ដាំ (แหม่มโพธิ์ดำ) កាលពីថ្ងៃទី០៧ ខែមិថុនាកន្លងមកនេះ ដែលបានរៀបរាប់ថា វាគឺជាការកសាងបំពង់បង្ហូរទឹកដែចំណាយថវិកា ១០លានបាតសម្រាប់ចម្ងាយ ១គីឡូម៉ត្រ។
រូបភាពផ្ដាមចេញពីសារព័ត៌មាន Siam News សរសេរថា «เผยภาพท่อระบายน้ำทิพย์ หลังใช้งบประมาณ 10 ล้านบาท» ដែលអាចប្រែជាភាសាខ្មែរថា «បង្ហាញរូបថតបំពង់បង្ហូរទឹកស្អុយ ក្រោយប្រើប្រាស់ថវិកា ១០លានបាត»។
ប៉ុន្តែ ទំព័រហ្វេសប៊ុកខាងលើនេះ បានបញ្ជាក់ថា រូបថតនេះ ត្រូវបានយកពីប៉ុស្តិ៍របស់អ្នកប្រើហ្វេសប៊ុក Watchgodth Act។ អ្នកប្រើហ្វេសប៊ុក Watchdogth Act បានបង្ហោះរូបថតនេះកាលពីថ្ងៃទី០៦ ខែមិថុនា ឆ្នាំ២០២១ ជាមួយនឹងការសំណេររៀបរាប់ជាភាសាថៃថា «ท่อน้ำทิพย์ ระบายน้ำในหมู่บ้านแห่งหนึ่ง ใครทราบที่ไหนบอกด้วย» ដែលអាចប្រែសម្រួលជាភាសាខ្មែរថា «បំពង់បង្ហូរទឹកនៃភូមិមួយ នរណាដឹងថានៅទីណា សូមជួយប្រាប់ផង»។
ដោយបានសម្ភាសជាមួយមន្ត្រីមូលដ្ឋាន សារព័ត៌មានថៃ MGR ONLINE បានចុះផ្សាយនូវសេចក្ដីរាយការណ៍មួយនៅថ្ងៃទី១០ ខែមិថុនា ដែលបានឱ្យដឹងថា ការកសាងបំពង់បង្ហូរទឹកនេះ ត្រូវបានធ្វើឡើងនៅភូមិក្លាង ឃុំក្លាង ស្ថិតក្នុងស្រុកតេជឧត្ដម ខេត្តអ៊ូប៊ុនរ៉ាត់ថានី ជាខេត្តស្ថិតនៅភាគខាងឦសានប្រទេសថៃ ដែលមានព្រំដែនជាប់នឹងខេត្តព្រះវិហាររបស់កម្ពុជា។
ក្នុងសេចក្ដីរាយការណ៍នោះ នាយករដ្ឋបាលឃុំបានក្លាង លោក ថៈនុងស័ក្តិ ឡាផាផាន់ បាននិយាយថា មូលហេតុដែលនាំឱ្យដាក់បំពង់បង្ហូរទឹកបែបនេះ គឺដើម្បីរំដោះទឹកចេញពីមុខផ្ទះប្រជាជននៅពេលមានភ្លៀងធ្លាក់ដោយប្រើបំពង់បង្ហូរទឹកនេះបង្ហូរទឹកចូលទៅក្នុងលូទឹកស្ថិតនៅខាងក្រោមថ្នល់នោះ។
រូបភាពផ្ដាមចេញពីការចេញផ្សាយសេចក្ដីរាយការណ៍របស់សារព័ត៌មាន MGR ONLINE កាលពីថ្ងៃទី១០ ខែមិថុនា ឆ្នាំ២០២១។
សន្និដ្ឋាន
Fact Crescendo Cambodia បានរកឃើញថា ការបង្ហោះរូបថតព្រមជាមួយការអះអាងដូចបានរៀបរាប់ខាងលើនេះ មិនត្រឹមត្រូវនោះឡើយ។ ការកសាងបំពង់បង្ហូរទឹកនេះ មិនមែនត្រូវបានធ្វើឡើងដោយរដ្ឋបាលមូលដ្ឋាននៅក្នុងរាជធានីភ្នំពេញនោះឡើយ។ ការកសាងបំពង់បង្ហូរទឹកនេះ ត្រូវបានធ្វើឡើងនៅក្នុងភូមិក្លាង ឃុំក្លាង ស្រុកតេជៈឧត្ដម ខេត្តអ៊ូប៊ុនរ៉ាត់ថានី ប្រទេសថៃ។
Title:តើបំពង់បង្ហូរទឹកក្នុងរូបថតនេះត្រូវបានសាងសង់ដោយអាជ្ញាធររាជធានីភ្នំពេញមែនទេ?
Fact Check By: Jay UdomResult: Misleading
