Fact-Check: តើ​ផ្ទះ​ក្នុង​រូបថត​នេះ​សាង​សង់​សម្រាប់​ជន​អន្តោ​ប្រវេសន៍​វៀតណាម​នៅ​កម្ពុជា​មែន​ឬទេ?

False Social

ខណៈ​ដែល​អាជ្ញាធរ​រាជ​ធានី​ភ្នំពេញ​សម្រេច​បញ្ជា​ឱ្យ​រុះ​រើ​សំណង់​បណ្ដែត​ទឹក​ទាំង​ឡាយរបស់​ជន​ជាតិ​វៀតណាម​​ចេញ​ពី​ផ្ទៃ​ទឹក​ទន្លេ​នៅ​ក្នុង​ភូមិសាស្ត្រ​នៃ​រាជធានី​ភ្នំពេញ​នោះ រូបថត និង​វីដេអូ​ជាច្រើន ត្រូវ​បាន​បង្ហោះ​នៅ​លើ​បណ្ដាញ​សង្គម​​ ដែល​បង្ហាញ​នូវ​ប្រតិកម្ម​ផ្សេងៗ​ទៅ​នឹង​សហគមន៍​ជន​ជាតិ​វៀតណាម​រស់​នៅ​ក្នុង​ប្រទេស​កម្ពុជា។

ក្នុង​ចំណោម​នោះ រូបថត​មួយ​សន្លឹក​ដែល​លំនៅឋាន​ដូចៗ​គ្នា ត្រូវ​បាន​គេ​អះ​អាង​ថា ជា​សំណង់​ផ្ទះ​សម្រាប់​ជន​ជាតិ​វៀតណាម ដែល​ត្រូវ​បាន​បណ្ដេញ​ចេញ​ពី​ផ្ទៃ​ទឹក​ទន្លេ ឱ្យ​ទៅ​រស់នៅ​លើ​ផ្ទៃ​ដី​ទំហំ ៤០​ហិកតា ស្ថិត​នៅ​ក្នុង​ខេត្ត​កំពង់ឆ្នាំង។

រូបថត​ជាមួយ​នឹង​ការ​អះ​អាង​បែប​នេះ ត្រូវ​បាន​ចែក​រំលែក​តៗ​គ្នា​ដល់​ទៅ​រាប់​ពាន់​ដង​រួម​ជាមួយ​ការ​បញ្ចេញ​ប្រតិកម្ម និង​មតិ​ចម្រុះ​បែប​ផង​ដែរ។

ទោះជាយ៉ាងណា ការ​ផ្ទៀង​ផ្ទាត់​ការ​ពិត​រក​ឃើញ​ថា រូបថត​ជាមួយ​នឹង​ការ​អះ​អាង​បែប​នេះ មិន​ត្រឹម​ត្រូវ​នោះ​ឡើយ។

ការ​អះ​អាង​លើ​បណ្ដាញ​សង្គម

កាល​ពី​ថ្ងៃ​ទី​១២ ខែ​មិថុនា ឆ្នាំ​២០២១ ទំព័រ​ហ្វេសប៊ុក​មួយ​បាន​បង្ហោះ​រូបថត​មួយ​សន្លឹក​ដែល​បង្ហាញ​ផ្ទះ​មាន​រូប​រាង​ដូច​ៗ​គ្នា ហើយ​​​អះ​អាង​ថា ផ្ទះ​ទាំង​នេះ គឺ​ជា​លំនៅឋាន​ដែល​ត្រូវ​បាន​សាង​សង់​សម្រាប់​ជន​ជាតិ​វៀតណាម ដែល​ត្រូវ​បាន​ជម្លៀស​ចេញ​ពី​រស់​នៅ​លើ​ផ្ទៃ​ទឹក​ទន្លេ ទៅ​រស់​នៅ​លើ​ផ្ទៃ​ដី​គោក​វិញ។

រូបថត​មួយ​សន្លឹក​រួម​ជាមួយ​ការ​អះ​អាង​បែប​នេះ ត្រូវ​បាន​ចែក​រំលែក​ដល់​ទៅ​រាប់​ពាន​ដង និង​មាន​ការ​បញ្ចេញ​ប្រតិកម្ម និង​មតិ​ចម្រុះ​បែប​ជាច្រើន​ពី​សំណាក់​អ្នក​ប្រើ​ហ្វេសប៊ុក​និយាយ​ភាសា​ខ្មែរ​ផង​ដែរ។

រូបភាព​ផ្ដាម​ចេញ​ពី​ប៉ុស្តិ៍​នៃ​ទំព័រ​ហ្វេសប៊ុក​នោះ​រៀបរាប់​ថា «គិតៗ​ទៅ​គួរ​ឱ្យ​ច្រណែន​យួន​ណាស់ មាន​ផ្ទះ មាន​ដី មើល​ទៅ​គួរ​ឱ្យ​ចង់​រស់​នៅ​ណាស់​បង​ប្អូន សង់​យ៉ាង​មាន​របៀប​រៀប​រយ ដី​ធំ​ទូលាយ​ល្អ​ណាស់។ ចំណែក​ខ្ញុំ​វិញ អាយុ​ជាង ៣០​ឆ្នាំ​ហើយ មិន​ទាន់​មាន​ដី​មួយ​ម៉ែត្រ​ការ៉េ​នៅ​ឡើយ​ទេ ច្រណែន​ផង អន់​ចិត្ត​ផង និង​ខ្មាស់​ខ្លួន​ឯង​ផង»។

Facebook Post | Archived Link

រូបថត​មួយ​សន្លឹក​នេះ ក៏​ត្រូវ​បាន​ចែក​រំលែក​ដោយ​អ្នក​ប្រើ​ហ្វេសប៊ុក​ដទៃ​ទៀត ដែល​នាំ​ឱ្យ​មាន​ការ​ចែក​រំលែក​បន្ត​ជា​ច្រើន​ដង​ថែម​ទៀត​ពី​សំណាក់​អ្នក​ប្រើ​បណ្ដាញ​សង្គម។

Facebook Post | Archived Link

រូបថត​បង្ហាញ​ផ្ទះ​បែប​នេះ ក៏​ត្រូវ​បាន​បង្ហោះ​លើ​បណ្ដាញ​សង្គម​ពី​សំណាក់​ទំព័រ​ហ្វេសប៊ុក​មួយ​កាល​ពី​ខែ​កក្កដា ឆ្នាំ​២០២០​កន្លង​ផង​ដែរ ជាមួយ​ការ​អះ​អាង​ថា ជន​ជាតិ​វៀតណាម ទទួល​បាន​ដី ៤០​ហិកតា ហើយ​ក៏​ទទួល​បាន​ផ្ទះ​ផង​ដែរ។

ការ​បង្ហោះ​រូបថត​ជាមួយ​ការ​អះ​អាង​បែប​នេះ ត្រូវ​បាន​ចែក​រំលែករហូត​ដល់​ជាង ៥០០​ដង​ និង​មាន​ការ​បញ្ចេញ​ប្រតិកម្ម​ និង​មតិ​ចម្រុះ​បែប​ពី​សំណាក់​អ្នក​ប្រើ​ហ្វេសប៊ុក​និយាយ​ភាសា​ខ្មែរ​ផង​ដែរ។

រូបភាព​ផ្ដាម​ចេញ​​ប៉ុស្តិ៍​នៃ​ទំព័រ​ហ្វេសប៊ុក​​រៀប ​រាប់​ថា «ឱ្យដី៤០ហិតតា១០ដង ឬ១០០ដង , ១០០០ដងទៀតក៏មិនអស់យួនពីទន្លេសាបដែរ.. បានទាំងដី៤០ហិកតា បានទាំងផ្ទះយ៉ាងសមរមប្រណិត! ប៉ុន្តែ ឥឡូវបណ្តែតចូលមកថ្មីៗ ណែនណាន់តាន់តាមវិញដដែល។ តើ ៤០ហិកតាប៉ុន្មានដងទៀត​ទើបអស់យួនពីទន្លេសាប? បើចៅហ្វាយធំចេះតែ​បញ្ចូលមកជារៀងរហូតបែបនេះ តាំងពី ១៩៧៩ ទល់នឹងបច្ចុប្បន្ន? #តើដល់ពេលណាទើបខ្មែរភ្ញាក់ខ្លួន?»។

Facebook Post | Archived Link

ការ​ពិនិត្យ​ការ​ពិត

Fact Crescendo Cambodia បាន​ចាប់​ផ្ដើម​ផ្ទៀង​ផ្ទាត់​​លើ​រូបថត​នេះ​តាម​រយៈ​កម្មវិធី​ស្វែង​រក​រូបថត​របស់ Google ដែល​នាំ​​ទៅ​ដល់​រូបថត​ដើម និង​ខ្លឹមសារ​នៃ​រូបថត​នេះ។

រូបថត​ដូច​គ្នា​ទាំង​ស្រុង​ ត្រូវ​បាន​រក​ឃើញ​ក្នុង​អត្ថបទ​ព័ត៌មាន​របស់​​ទស្សនាវដ្ដី​សំណង់ និង​អចលន​ទ្រព្យ កាល​ពី​ដើម​ឆ្នាំ​២០១៨​កន្លង​មក​ ដែល​និយាយ​​អំពី​ដំណើរការ​នៃ​គម្រោង​សាង​សង់​លំនៅឋាន​ជូន​អតីត​យុទ្ធជន និង​គ្រួសារ​កង​ទ័ព​កម្ពុជា​។

Construction & Property Magazine | Archived Link

រូបថត​ដែល​បង្ហាញ​ផ្ទះ​មាន​រចនាបថ ឬ​ទម្រង់​ដូចៗ​គ្នា​ស្ថិត​នៅ​ជា​ជួរ​នោះ ត្រូវ​បាន​រក​ឃើញ​ចុះ​ផ្សាយ​នៅ​ក្នុង​អត្ថបទ​ព័ត៌មាន​នៃ​សារព័ត៌មាន​ហ្វ្រេស​ញូវស៍ (Fresh News) ផង​ដែរ​កាល​ពី​ចុង​ឆ្នាំ​២០១៧​កន្លង​មក។ តាម​រយៈ​អត្ថបទ​ព័ត៌មាន​របស់​គេហ​ទំព័រ​សារព័ត៌មាន​​​ហ្វ្រេស​ញូវស៍ រូបថត​ផ្ទះ​ដូចៗ​គ្នា​នេះ គឺ​ជា​លំនៅឋាន​ដែល​រាជ​រដ្ឋាភិបាល​កម្ពុជា​សាង​សង់​​ឡើង និង​ផ្ដល់​ទៅ​គ្រួសារ​អតីត​យុទ្ធជន​កម្ពុជា។ លំនៅឋាន​​ចំនួន ២០០​ខ្នង​នេះ ត្រូវ​បាន​សាង​សង់​ឡើង​នៅ​ឯ​ស្រុក​រមាសហែក ស្ថិត​ក្នុង​ខេត្ត​ស្វាយរៀង។

Fresh News’s report | Archived Link

រូបថត​មួយ​សន្លឹក​នេះ ក៏​ត្រូវ​បាន​រក​ឃើញ​ផង​ដែរ​នៅ​ក្នុង​ចំណោម​រូបថត​ដទៃ​ទៀត​នៃ​ប៉ុស្តិ៍​មួយ​នៅ​លើ​ទំព័រ​ហ្វេសប៊ុក​របស់​លោក ជា សុផារ៉ា រដ្ឋ​មន្ត្រី​ក្រសួង​រៀបចំដែន​ដី នគរូបនីយកម្ម និង​សំណង់ កាល​ពី​ខែ​កុម្ភៈ ឆ្នាំ​២០១៨​កន្លង​មក។

Facebook Post | Archived Link

ទំព័រ​ហ្វេសប៊ុក​របស់​លោក ជា សុផារ៉ា បញ្ជាក់ថា លំនៅឋាន​សម្រាប់​គ្រួសារ​អតីត​យោធិន​នេះ ស្ថិត​នៅ​ក្នុង​ភូមិ​ជីកដី ឃុំ​អណ្ដូងត្របែក នៅ​ក្នុង​ស្រុក​រមាសហែក ខេត្ត​ស្វាយរៀង។

Facebook Post | Archived Link

Google Map | Archived Link

ទំព័រ​ហ្វេសប៊ុក​រដ្ឋបាល​ខេត្ត​ស្វាយរៀង ក៏​បាន​ច្រាន​ចោល​នូវ​ការ​អះ​អាង​នៅ​លើ​បណ្ដាញ​សង្គម​បែប​នេះ​ផង​ដែរ ដោយ​បញ្ជាក់​ថា ផ្ទះ​ចំនួន ៤០០​ខ្នង ត្រូវ​បាន​រដ្ឋាភិបាល​សាង​សង់​ផ្ដល់​ជូន​យោធិន ជន​ពិការ និង​មន្ត្រី​យោធា​ចូល​និវត្តន៍ ស្ថិត​នៅ​ក្នុង​ភូមិ​ជីកដី ក្នុង​ស្រុក​រមាសហែក។

Facebook Post | Archived Link

សន្និដ្ឋាន

Fact Crescendo Cambodia រក​ឃើញ​ថា ការ​បង្ហោះ​រូបថត​ជាមួយ​នឹង​ការ​អះ​អាង​ដូច​បាន​រៀបរាប់​ខាង​លើ​នេះ មិន​ត្រឹម​ត្រូវ​នោះ​ឡើយ។ ផ្ទះ​សម្បែង​នៅ​ក្នុង​រូបថត​នេះ មិន​មែន​ជា​សំណង់​លំនៅឋាន​ដែល​ត្រូវ​បាន​សាង​សង់​សម្រាប់​ជន​ជាតិ​វៀតណាម ដែល​ត្រូវបាន​​ជម្លៀស​ចេញ​ពី​ការ​រស់​នៅ​លើ​ផ្ទៃ​ទឹក​បឹង​ទន្លេ​សាប​នៅ​ខេត្ត​កំពង់ឆ្នាំង ឱ្យ​ទៅ​រស់នៅ​លើ​ផ្ទៃ​ដី​ ៤០​ហិកតា​នោះ​ឡើយ។ លំនៅឋាន​ទាំង​នេះ ត្រូវ​បាន​រដ្ឋាភិបាល​កម្ពុជា​សាង​សង់​សម្រាប់​យោធិន និង​គ្រួសារ​កង​ទ័ព ស្ថិត​នៅ​ក្នុង​ភូមិ​​ជីកដី ឃុំ​អណ្ដូងត្របែក ស្រុក​រមាសហែក ខេត្ត​ស្វាយរៀង។

Avatar

Title:តើ​ផ្ទះ​ក្នុង​រូបថត​នេះ​សាង​សង់​សម្រាប់​ជន​អន្តោ​ប្រវេសន៍​វៀតណាម​នៅ​កម្ពុជា​មែន​ឬទេ?

Fact Check By: Jay Udom 

Result: False

Leave a Reply

Your email address will not be published.