រូបថតបង្ហាញប្រទីបដ៏ឆើតឆាយតាមដងទន្លេ គឺជារូបភាពកម្មវិធី AI ប៉ុណ្ណោះ
ស្របពេលដែលព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប តែងត្រូវបានរៀបចំឡើងជារៀងរាល់ឆ្នាំនោះ រូបថតជាច្រើនសន្លឹកបង្ហាញទិដ្ឋភាពការតុបតែងទូក និងក្បួនប្រទីបយ៉ាងស្រស់ស្អាតក្នុងឱកាសបុណ្យអុំទូក ត្រូវបានបង្ហោះឡើងនៅលើបណ្ដាញសង្គម ដោយអ្នកប្រើប្រាស់ហ្វេសប៊ុកម្នាក់។ ការបង្ហោះខាងលើ ត្រូវបានចែកចាយ និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២៦ ខែវិច្ឆិកា ឆ្នាំ២០២៣កន្លងទៅ អ្នកប្រើប្រាស់ហ្វេសប៊ុកម្នាក់ បានបង្ហោះចំនួន ៤សន្លឹក បង្ហាញទិដ្ឋភាពក្បួនទូក ជាមួយក្បាច់តុបតែងបែបខ្មែរយ៉ាងស្អាតនៅតាមដងទន្លេមួយកន្លែង។ រូបថតទាំងឡាយនេះ ត្រូវបានភ្ជាប់ជាមួយនឹងការប្រារព្ធពិធីបុណ្យអុំទូក ដែលធ្វើឡើងកាលពីថ្ងៃទី២៦ ២៧ និង២៨ ខែវិច្ឆិកា ឆ្នាំ២០២៣កន្លងទៅ។
ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជារូបភាពផ្ដាមចេញពីអ្នកប្រើប្រាស់ហ្វេសប៊ុកខាងលើ ដែលបានសរសេររៀបរាប់ថា «ពិតជាស្រស់ស្អាតខ្លាំងណាស់ កម្ពុជាក្នុងសម័យសន្តិភាព ក្នុងនាមខ្ញុំជាកូនខ្មែរមួយរូប ខ្ញុំមានមោទនភាពខ្លាំងណាស់ ដែលបានឃើញកម្ពុជារីកចម្រើនបែបនេះ»។
Fact Crescendo Cambodia ក៏បានរកឃើញរូបភាពជាច្រើនសន្លឹក ត្រូវបានភ្ជាប់ និងបង្ហោះជាវីដេអូឃ្លីបនៅក្នុងគេហទំព័រ YouTube កាលពីពេលថ្មីៗនេះផងដែរ។
រូបថតបែបនេះ ក៏ត្រូវបានបង្ហោះ និងរកឃើញនៅលើគេហទំព័រ Cambodia Expats Online ផងដែរ។ សូមមើលរូបភាពផ្ដាមទាំងស្រុងខាងក្រោមនេះ។
Cambodia Expats Online Link | Archived Link
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតទិដ្ឋភាពក្បួនប្រទីបព្រះបរមរាជវាំង ក្រសួង និងសា្ថប័ននានា ត្រូវបានរកឃើញ និងបង្ហោះនៅលើទំព័រហ្វេសប៊ុករបស់លោកនាយករដ្ឋមន្ត្រីកម្ពុជា ហ៊ុន ម៉ាណែត កាលពីថ្ងៃទី២៦ ខែវិច្ឆិកា ឆ្នាំ២០២៣កន្លងទៅនេះ ដែលពុំបានបង្ហាញទិដ្ឋភាពការតុបតែងទូក និងក្បួនប្រទីបយ៉ាងស្រស់ស្អាត ក្នុងឱកាសបុណ្យអុំទូកនៅកម្ពុជាដូចការបង្ហោះខាងលើនោះឡើយ។
ខាងក្រោមនេះ គឺជាទិដ្ឋភាពក្បួនប្រទីបព្រះបរមរាជវាំង ដែលត្រូវបានប្រទានភ្លើងជ័យ និងចាប់ផ្ដើមការដង្ហែប្រទីប។
ទិដ្ឋភាពទូទៅនៃការប្រារព្ធព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប ឆ្នាំ២០២៣កន្លងទៅនេះ ក៏ត្រូវបានផ្សាយផ្ទាល់ដោយទូរទស្សន៍ជាតិកម្ពុជា ទទក ផងដែរ។
ខាងក្រោមនេះ គឺជាវីដេអូរាយការណ៍របស់សារព័ត៌មាន Fresh News ដែលបានបង្ហាញទិដ្ឋភាពទូទៅនៃការប្រារព្ធព្រះរាជពិធីបុណ្យអុំទូកកាលពីខែវិច្ឆិកាកន្លងទៅនេះ។
Fresh News Report | Archived Link
កាលពីខែវិច្ឆិកាកន្លងទៅនេះ ក្រុមការងាររបស់ Fact Crescendo Cambodia ក៏បានផ្ទៀងផ្ទាត់រួចមកហើយដែរ នូវរូបភាពលោកយាយម្នាក់ ដែលត្រូវបានបង្កើតឡើងដោយកម្មវិធី AI ប៉ុន្តែត្រូវបានអ្នកប្រើប្រាស់បណ្ដាញសង្គមមួយចំនួនយកទៅសរសេររៀបរាប់ថា វាជារូបភាពការពិត ដែលលោកយាយមានអាយុរហូតទៅដល់ ៣០០ឆ្នាំ។ សូមមើលអត្ថបទទាំងស្រុងនៅទីនេះ។
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ ដោយអ្នកប្រើប្រាស់ខាងលើនេះ គឺពិតជាមិនត្រឹមត្រូវនោះឡើយ។ រូបថតទាំងឡាយនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះឡើយ។
Title: រូបថតបង្ហាញប្រទីបដ៏ឆើតឆាយតាមដងទន្លេ គឺជារូបភាពកម្មវិធី AI ប៉ុណ្ណោះ
Written By: Kakada SimResult: Altered