ខណៈពេលកម្ពុជាបាននឹងកំពុងទទួលរៀបចំ និងស្វាគមន៍កីឡាករ និងកីឡាករនី ដើម្បីចូលរួមក្នុងព្រឹត្តិការណ៍ប្រកួតស៊ីហ្គេមលើកទី៣២ ដែលនឹងចាប់ផ្ដើមនៅថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ខាងមុខនេះ រូបថតកំពូលកីឡាករប្រដាល់ថៃ ប៊ូខាវ ត្រូវបានបង្ហោះដោយទំព័រហ្វេសប៊ុកមួយ ដែលបានអះអាងថា លោកបានអញ្ជើញមកដល់ប្រទេសកម្ពុជាយើងហើយ។ ការបង្ហោះនេះ ត្រូវបានចែកចាយ និងបញ្ចេញប្រតិកម្មចម្រុះពីសំណាក់អ្នកប្រើប្រាស់ជាច្រើនដង។ទោះជាយ៉ាងណា Fact Crescendo Cambodia រកឃើញថា ការផ្សព្វផ្សាយខាងលើ គឺធ្វើឱ្យមានការយល់ច្រឡំ។
ការអះអាងលើបណ្តាញសង្គម
កាលពីថ្ងៃទី២៨ ខែមេសា ឆ្នាំ២០២៣ថ្មីៗនេះ ទំព័រហ្វេសប៊ុកមួយ ដែលមានឈ្មោះថា «31Sports» បានចែកចាយរូបថតមួយសន្លឹក បង្ហាញទិដ្ឋភាពលោក Buakaw Banchamek (ប៊ូខាវ) ភ្ជាប់ជាមួយនឹងការអះអាងថា លោកបានអញ្ជើញមកដល់ប្រទេសកម្ពុជាហើយ។ ការបង្ហោះនេះ បានកើតឡើងស្របពេលកីឡាគុនខ្មែរ និងកីឡាមួយថៃ បានក្លាយជាប្រធានបទនៃការជជែកដេញដោល និងបញ្ចេញមតិជារឿយៗនៅលើបណ្ដាញសង្គមពីសំណាក់ប្រជាពលរដ្ឋទាំងសងខាង។
ការផ្សព្វផ្សាយខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានរៀបរាប់ភ្ជាប់ថា «ប៊ូខាវ បានមកដល់ប្រទេសកម្ពុជាយើងហើយ 🇰🇭»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មានក្នុងស្រុក BTV News កាលពីថ្ងៃទី០៤ ខែកក្កដា ឆ្នាំ២០២២កន្លងទៅ។ នៅក្នុងអត្ថបទសារព័ត៌មានខាងលើនេះ បានបញ្ជាក់ថា កីឡាករប្រដាល់លោក ប៊ូខាវ បានធ្វើដំណើរមកដល់ប្រទេសកម្ពុជាយើង កាលពីល្ងាចថ្ងៃទី០៣ ខែកក្កដា ដើម្បីចូលរួមប្រកួតនៅក្នុងកម្មវីធីប្រដាល់ World Fight ដែលនឹងប្រារព្ធធ្វើឡើងនៅថ្ងៃទី០៦ ខែកក្កដា នាពហុកីឡដ្ឋានជាតិមរតកតេជោ។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានបង្ហាញទិដ្ឋភាពលោក ប៊ូខាវ នៅអាកាសយានដ្ឋានអន្តរជាតិភ្នំពេញ។
BTV News Report | Archived Link
ដូចគ្នានេះ វីដេអូឃ្លីប ដែលមានទម្រង់ និងសណ្ឋានដូចគ្នាទាំងស្រុង ក៏ត្រូវបានរកឃើញ និងបង្ហោះនៅលើគេហទំព័រហ្វេសប៊ុក BTV Cambodia កាលពីថ្ងៃទី០៤ ខែកក្កដា ឆ្នាំ២០២២ផងដែរ។ វីដេអូខាងក្រោម បានបង្ហាញទិដ្ឋភាពការមកដល់ប្រទេសកម្ពុជា របស់កីឡាករប្រដាល់មួយថៃលោក Buakaw Banchamek (ប៊ូខាវ) ដើម្បីបង្ហាញខ្លួនក្នុងកម្មវិធីប្រកួត «សង្វៀនគុនខ្មែរជើងឯកពិភពលោក ឬ World Fight Tournament 2022» នៅថ្ងៃទី០៦ ខែកក្កដា នាពហុកីឡដ្ឋានជាតិមរតកតេជោ។ ព័ត៌មាននៃការមកដល់របស់លោក គឺជាព័ត៌មានចាស់ ដែលបានកើតឡើងតាំងពីឆ្នាំមុនមកម្ល៉េះ។
ការមកដល់ប្រទេសកម្ពុជាពីសំណាក់កំពូលកីឡាករប្រដាល់លោក ប៊ូខាវ កាលពីខែកក្កដា ឆ្នាំ២០២២ ក៏ត្រូវបានផ្សព្វផ្សាយ និងបង្ហោះនៅតាមបណ្ដាគេហទំព័រសារព័ត៌មាននានាផងដែរ។ សូមអានព័ត៌មានលម្អិតនៅទីនេះ ឬនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការលើកឡើងដូចដែលត្រូវបានរៀបរាប់ខាងលើនេះ គឺធ្វើឱ្យមានការយល់ច្រឡំ។ ការពិត រូបថតនោះ គឺជាទិដ្ឋភាពកីឡាករប្រដាល់ថៃលោក ប៊ូខាវ មកដល់ប្រទេសកម្ពុជាកាលពីខែកក្កដា ឆ្នាំ២០២២កន្លងទៅ ដើម្បីចូលរួមប្រកួតក្នុងកម្មវិធី «សង្វៀនគុនខ្មែរជើងឯកពិភពលោក ឬ World Fight Tournament 2022»។
Title:រូបថតលោក ប៊ូខាវ មកកាន់ប្រទេសកម្ពុជាកាលពីឆ្នាំមុន ត្រូវបានផ្សាយឡើងវិញ
Fact Check By: Kakada SimResult: Misleading
