- >>
- FALSE
ព័ត៌មានមិនពិតថា មន្ត្រីយោធាបាត់ខ្លួនជាមួយឧទ្ធម្ភាគចក្រ នៅរស់ទាំងពីរ
បន្ទាប់ពីការរកឃើញឧទ្ធម្ភាគចក្រយោធាដែលបាត់ខ្លួនជាច្រើនថ្ងៃនោះ ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា មន្ត្រីយោធាពីរនាក់ដែលធ្វើដំណើរតាមឧទ្ធម្ភាគចក្រនេះ នៅរស់រានមានជីវិតទាំងពីរនាក់។ ទោះជាយ៉ាងណា យើងបានផ្ទៀងផ្ទាត់រកឃើញថា ការអះអាងនេះមិនត្រឹមត្រូវនោះឡើយ។
ទន្ទឹមនឹងមានការរកឃើញឧទ្ធម្ភាគចក្រ ដែលបានបាត់នៅជួរភ្នំក្រវាញ ក្នុងនោះ មានសំណេរអះអាងបានបង្ហោះ និងចែកចាយជាច្រើនដងដោយអ្នកប្រើប្រាស់ បានលើកឡើងថាជនងគ្រោះនៃការធ្លាក់ឧទ្ធម្ភាគចក្រ បាត់កាលពី១៧ថ្ងៃមុននោះ គឺត្រូវបានរកឃើញ និងនៅរស់រានមានជីវិតទាំងអស់។ ការផ្សព្វផ្សាយព័ត៌មានបែបនេះ ត្រូវបានចែករំលែក និងប្រតិកម្មយ៉ាងផុសផុល។ ទោះជាយ៉ាងណា យើងរកឃើញថា ការអះអាងខាងលើនេះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងដ៏ផុសផុលមួយនៅលើបណ្ដាញសង្គមម្សិលមិញនេះ បានលើកឡើងថា មន្ត្រីយោធាកម្ពុជាពីរនាក់ដែលបាត់ខ្លួនជាមួយឧទ្ធម្ភាគចក្រមួយគ្រឿងអស់រយៈពេលជាងពីរសប្ដាហ៍មកហើយនោះ នៅរស់រានមានជីវិតទាំង២រូប។
ទំព័រហ្វេសប៊ុកដដែលខាងលើ បង្ហោះសារមួយនេះ ក្រោយពីមានការប្រកាសរកឃើញនូវទីតាំងធ្លាក់ឧទ្ធម្ភាគចក្រ ដែលបានបាត់ទៅកាលពី ១៧ថ្ងៃមុន។ ការអះអាងខាងលើ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «បងៗធ្លាក់យន្តហោះបានរកឃើញហើយ នៅតំបន់ភ្នំយ៉ាវយ៉ៃ គឺនៅរស់ទាំង២»។
ការអះអាងស្រដៀងគ្នានេះ ក៏ត្រូវបានរកឃើញ និងបង្ហោះទំព័រហ្វេសប៊ុកមួយផ្សេងទៀតផងដែរ ដោយបានបញ្ជាក់ថា ជនរងគ្រោះទាំង២នាក់ នៅរស់រានមានជីវិត។
ខាងក្រោមនេះ គឺជាសំណេរទាំងស្រុងដែលបានផ្ដាមចេញពីទំព័រហ្វសប៊ុកខាងលើដែលរៀបរាប់ថា “ព័ត៌មានក្ដៅ៖ តាមរយៈហ្វេសប៊ុកឈ្មោះ Sonita Nov បានសរសេរ Caption ថា៖ បងធ្លាក់ឧទ្ធម្ភាគចក្រនៅតំបន់ភ្នំយ៉ាវយ៉ៃ គឺនៅរស់ទាំង២នាក់ ចម្លើយពីបងប្រុសបង្កើតរបស់គាត់”។
Facebook Post | Archived Link
ដូចគ្នានេះ ព័ត៌មានអះអាងខាងលើ ក៏ត្រូវបានផ្សព្វផ្សាយយ៉ាងទូលំទូលាយ ក្នុងចំណោមអ្នកប្រើប្រាស់បណ្ដាញសង្គមដទៃទៀតផងដែរ។
ការត្រួតពិនិត្យការពិត
Fact Crescendo Cambodia បានធ្វើការត្រួតពិនិត្យ និងផ្ទៀងផ្ទាត់ការពិតរបស់ខ្លួន តាមរយៈព័ត៌មានថ្មីៗចុងក្រោយ និងការប្រកាសជូនដំណើរពិក្រសួងការពារជាតិផ្ទាល់។
ក្រសួងការពារជាតិនៃកម្ពុជា កាលពីថ្ងៃទី២៩ ខែកក្កដា ឆ្នាំ២០២៤ បានចេញសេចក្ដីជូនដំណឹងមួយ ពាក់ព័ន្ធទៅនឹងការធ្លាក់ឧទ្ធម្ភាគចក្រ ដែលបានបាត់នាពេលថ្មីៗនេះ ដោយបានបញ្ជាក់ថា «ក្រុមរុករក និងសង្រ្គោះរបស់ក្រសួងការពារជាតិ បានរកឃើញទីតាំងនៃការធ្លាក់នោះហើយ»។
ការបញ្ជាក់មួយបែបនេះ ត្រូវបានបង្ហោះ និងផ្សព្វផ្សាយដោយក្រសួងការពារជាតិផ្ទាល់ នៅលើបណ្ដាញសង្គមហ្វេសប៊ុករបស់ខ្លួនកាលពីប៉ុន្មានម៉ោងកន្លងទៅ។ ខាងក្រោមនេះ គឺជាសេចក្តីជូនដំណឹងអំពីការរកឃើញទីតាំងនៃការធ្លាក់ឧទ្ធម្ភាគចក្រ ដែលបានបាត់កាលពីថ្ងៃទី១២ ខែកក្កដា ឆ្នាំ២០២៤កន្លងទៅ។
ដូចគ្នានេះ អ្នកនាំពាក្យក្រសួងការពារជាតិកម្ពុជាលោក ឈុំ សុជាតិ ក៏បានបញ្ជាក់ក្រុមការងាររុករកថ្មើរជើង កំពុងធ្វើដំណើរទៅកាន់ទីតាំងដែលឧទ្ធម្ភាគចក្រយោធាដែលបាត់ខ្លួនហើយ។
ខាងក្រោមនេះ គឺជាការជូនដំណឹងពីសំណាក់អ្នកនាំពាក្យក្រសួងការពារជាតិ ដែលត្រូវបានផ្សព្វផ្សាយ នៅលើទំព័រហ្វសប៊ុករបស់សារព័ត៌មាន កម្ពុជាថ្មី។
Kampuchea Thmey Daily News Report | Archived Link
តាមរយៈគេហទំព័រសារព័ត៌មាន Fresh News ដែលបានចុះផ្សាយនាល្ងាចថ្ងៃទី២៩ ខែកក្កដា ឆ្នាំ២០២៤នេះ ក៏បានបញ្ជាក់នៅក្នុងអត្ថបទរបស់ខ្លួនថា ក្រុមអ្នករុករក បានប្រទះឃើញសាកសពអាកាសយានិកម្នាក់ឈ្មោះ ខេង ឆៃយុទ្ធ ដែលបានបាត់ខ្លួនជាមួយឧទ្ធម្ភាគចក្រ ខណៈម្នាក់ទៀតកំពុងស្វែងរក។
Fresh News Report | Archived Link
ខាងក្រោមនេះ គឺជាទិដ្ឋភាពដែលក្រុមយោធាស្វែងរកឃើញឧទ្ធម្ភាចក្រ នៅចំណុចលើខ្នងភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់។
ក្រុមការងារ Fact Crescendo Cambodia នឹងធ្វើបច្ចុប្បន្នភាពព័ត៌មាននេះបន្ថែមទៀតនៅពេលដែលមានការបំភ្លឺ និងប្រកាសជាផ្លូវការពីក្រសួងការពារជាតិកម្ពុជា។
ក្រសួងការពារជាតិបានបញ្ជាក់ថា ឧទ្ធម្ភាគចក្រយោធាមួយគ្រឿង បានបាត់ការទាក់ទងជាមួយបញ្ជារការដ្ឋានកងទ័ពជើងអាកាសកាលពីថ្ងៃទី១២ ខែកក្កដា អំឡុងពេលហោះហើរហ្វឹកហ្វឺននៅតំបន់ជួរភ្នំក្រវ៉ាញ ស្ថិតក្នុងស្រុកវាលវែង ខេត្តពោធិ៍សាត់។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ គឺមិនត្រឹមត្រូវនោះឡើយ។ គិតត្រឹមថ្ងៃចុះផ្សាយនេះ អ្នកនាំពាក្យក្រសួងការពារជាតិបញ្ជាក់ថា អាកាសយានិក ខេង ឆៃយុទ្ធ បានទទួលមរណភាពហើយ ហើយអាកាសយានិកម្នាក់ទៀតដែលរួមដំណើរដែរនោះ កំពុងតែបាត់ខ្លួននៅឡើយ។
Title:ព័ត៌មានមិនពិតផ្សាយថា អាកាសយានិកនៃឧទ្ធម្ភាគចក្រដែលធ្លាក់នៅរស់ទាំងពីរ
Written By: Kakada SimResult: False
