កាលពីថ្ងៃទី២៤ ខែមេសា កន្លងទៅនេះ អាស៊ានបានបើកកិច្ចប្រជុំពិសេសមួយរបស់ខ្លួនដែលបានធ្វេីឡេីងនៅក្នុង ទីក្រុងហ្សាកាតា ប្រទេសឥណ្ឌូនេសុី។ កិច្ចប្រជុំពិសេសមួយនេះ ត្រូវបានចូលរួមពីសំណាក់ថ្នាក់ដឹកនាំនៃប្រទេស ជាសមាជិកអាស៊ាននីមួយៗ ដែលក្នុងនោះក៏មានការចូលរួមពីលោកនាយករដ្ឋមន្ត្រីកម្ពុជា លោក ហ៊ុន សែន ផងដែរ។
ទន្ទឹមគ្នានេះ អវត្តមានរបស់លោកនៅក្នុងប្រទេសកម្ពុជា បាននាំឱ្យមានការចោទសួរថា តើលោកចុះហត្ថលេខាទៅលើសេចក្ដីសម្រេចបើកឱ្យមានការធ្វើដំណើរឆ្លងខេត្តឡើងវិញដោយរបៀបណា? ទោះយ៉ាងណា ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាងនេះ គឺមិនត្រឹមត្រូវទេ។
ការអះអាងលើបណ្តាញសង្គម
កាលពីថ្ងៃទី២៥ ខែមេសា ឆ្នាំ២០២១នេះ ទំព័រហ្វេសប៊ុកមួយ បានអះអាងថា លោកនាយករដ្ឋមន្ត្រី ហ៊ុន សែន បាន ហើយចោទសួរថា តើលោក ហ៊ុន សែន ចុះហត្ថលេខានៅលើសេចក្តីសម្រេចបញ្ជប់ការហាមឃាត់ការធ្វើដំណើរឆ្លងខេត្តបានដោយរបៀបណា។
ការអះអាងថា លោក ហ៊ុន សែន បានចុះហត្ថលេខាលើសេចក្តីសម្រេចទាំងខ្លួននៅក្រៅប្រទេសនេះ បានកើតឡើងនៅ ១ថ្ងៃក្រោយលោក ហ៊ុន សែន បានចាកចេញពីកម្ពុជាទៅកាន់ទីក្រុងហ្សាកាតា ដើម្បីចូលរួមកិច្ចប្រជុំពិសេសអាស៊ាន។
រូបភាពផ្ដាមចេញពីទំព័រហ្វេកប៊ុក បានសរសេររៀបរាប់ថា «ហ៊ុន សែន នៅប្រទេសក្រៅ ហេតុអីហត្ថលេខាកើត?»។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ការពិតជុំវិញការអះអាងនេះតាមរយៈការពិនិត្យមើលលំដាប់លំដោយនៃព្រឹត្តិការណ៍ពីរ មានដំណើររបស់លោកនាយករដ្ឋមន្ត្រី ហ៊ុន សែន នៅកាន់ប្រទេសឥណ្ឌូនេស៊ ដើម្បីចូលរួមកិច្ចប្រជុំអាស៊ាន និងការបើកឱ្យមានការធ្វើដំណើរឆ្លងខេត្តឡើងវិញ។
កាលពីដំបូងឡើយ ដំណើររបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសឥណ្ឌូនេស៊ី ត្រូវបានគ្រោងធ្វើឡើងនៅថ្ងៃទី២៤ ខែមេសា ប៉ុន្តែ ក្រោមហេតុផលវិធានការបង្ការការឆ្លងមេរោគកូវីដ-១៩ មេដឹកនាំកម្ពុជារូបនេះ បានផ្លាស់ប្ដូរថ្ងៃចេញដំណើរទៅថ្ងៃទី២៣ ខែមេសាវិញ។
ទំព័រហ្វេសប៊ុកផ្លូវការរបស់គាត់ បង្ហាញថា លោក ហ៊ុន សែន បានចាកចេញពីប្រទេសកម្ពុជានៅថ្ងៃទី២៣ ខែមេសា តាមជើងហោះហើរមួយ ដើម្បីចូលរួមកិច្ចប្រជុំកំពូលអាស៊ាន។ សំណេរលើទំព័រហ្វេសប៊ុកនោះ រៀបរាប់ថា «ខ្ញុំនឹងវិលត្រឡប់មកកម្ពុជាវិញនៅល្ងាចថ្ងែទី២៤ មេសា»។
(រូបភាពផ្ដាមចេញពីទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ដែលរៀបរាប់ថា លោកចាកចេញពីកម្ពុជានៅថ្ងៃទី២៣ ខែមេសា ឆ្នាំ២០២១ ហើយវិលត្រឡប់មកវិញនៅថ្ងៃទី២៤ ខែមេសា ក្រោយបញ្ចប់កិច្ចប្រជុំកំពូលអាស៊ាន)
ដំណើរទៅចូលរួមកិច្ចប្រជុំកំពូលអាស៊ានរបស់លោក ហ៊ុន សែន ក៏ត្រូវបានផ្សព្វផ្សាយផងដែរដោយទីភ្នាក់ងារព័ត៌មានកម្ពុជា(AKP) ដែលជាទីភ្នាក់ងារព័ត៌មានរបស់រដ្ឋ។
Fact Crescendo Cambodia បានរកឃើញថា ទំព័រហ្វេសប៊ុកផ្លូវការរបស់គាត់ បានផ្សាយផ្ទាល់នូវដំណើរវិលត្រឡប់របស់លោកនាយករដ្ឋមន្រ្តី ហ៊ុន សែន មកដល់កម្ពុជានៅម៉ោង ៩:៥០នាទីយប់ថ្ងៃទី២៤ ខែមេសា ឆ្នាំ២០២០ បន្ទាប់ពីកិច្ចប្រជុំកំពូលអាស៊ានបានបញ្ចប់។
ទំព័រហ្វេសប៊ុកផ្លូវការរបស់គាត់ បានសរសេរថា «នៅម៉ោងប្រមាណ ៩.៥០ យប់ថ្ងៃទី២៤ ខែមេសា ឆ្នាំ២០២១ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំគណៈប្រតិភូរាជរដ្ឋាភិបល មកដល់មាតុប្រទេសវិញដោយសុវត្ថិភាពហើយ បន្ទាប់ពីអញ្ចើញចូលរួមកិច្ចប្រជុំពិសេសក្រៅផ្លូវការជាមួយមេដឹកនាំអាស៊ាន និងជំនួបទ្វេភាគីមួយចំនួនទៀតជាមួយបណ្ដាមេដឹកនាំអាស៊ាន»។
ដំណើរវិលត្រឡប់របស់លោក ហ៊ុន សែន ពីកិច្ចប្រជុំអាស៊ាននេះ ក៏ត្រូវបានផ្សាយផ្ទាល់នៅលើទំព័រហ្វេសប៊ុកផ្លូវការរបស់លោកផងដែរនៅរាត្រីថ្ងៃទី២៤ ខែមេសានោះ។
មួយថ្ងៃបន្ទាប់ពីវិលត្រឡប់មកពីកិច្ចប្រជុំកំពូលអាស៊ាន លោក ហ៊ុន សែន បានចុះហត្ថលេខាលើសេចក្ដីសម្រេចបើកឱ្យមានការធ្វើដំណើរឆ្លងខេត្តឡើងវិញ ហើយសេចក្ដីសម្រេចនោះ ក៏ត្រូវបានផ្សព្វផ្សាយនៅលើទំព័រហ្វេសប៊ុកផ្លូវការរបស់លោកផងដែរនៅម៉ោង ១១កន្លះព្រឹកថ្ងៃទី២៥ ខែមេសានោះ។
រូបភាពផ្តាមចេញប៉ុស្តិ៍នៃទំព័រហ្វេសប៊ុករបស់គាត់ បានសរសេររៀបរាប់ថា «រាជរដ្ឋាភិបាលកម្ពុជាចេញសេចក្ដីសម្រេចបញ្ចប់ការហាមឃាត់[ការ]ធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស»។
«ថ្ងៃទី២៥ ខែមេសា ឆ្នាំ២០២១»
សារព័ត៌មានភ្នំពេញ ប៉ុស្តិ៍ ក៏បានធ្វើសេចក្ដីរាយការណ៍អំពីសេចក្ដីសម្រេចមួយនេះផងដែរ ដែលមានការចុះហត្ថលេខាដោយលោកនាយករដ្ឋមន្ត្រី ហ៊ុន សែន។
Phnom Penh Post Report|Archived Link
សន្និដ្ឋាន (Conclusion)
Fact Crescendo Cambodia បានរកឃើញថា ការអះអាងថា លោកនាយករដ្ឋមន្ត្រី ហ៊ុន សែន ស្ថិតនៅក្រៅប្រទេស ហើយចោទសួរថា តើលោកចុះហត្ថលេខាលើសេចក្ដីសម្រេចបើកចរាចរណ៍ឆ្លងខេត្តឡើងវិញយ៉ាងដូចម្ដេចនោះ មិនត្រឹមត្រូវទេ។ ការពិត លោក ហ៊ុន សែន បានវិលត្រឡប់ពីកិច្ចប្រជុំកំពូលអាស៊ាននៅប្រទេសឥណ្ឌូនេស៊ី ហើយមកដល់កម្ពុជាវិញនៅថ្ងៃទី២៤ ខែមេសា ហើយនៅថ្ងៃទី២៥ ខែមេសា លោកបានចុះហត្ថលេខាលើសេចក្ដីសម្រេចបើកចរាចរណ៍ឆ្លងខេត្តឡើងវិញ។
Title:Fact Check: តើលោក ហ៊ុន សែន ចុះហត្ថលេខាលើសេចក្ដីសម្រេចបើកចរាចរណ៍ឆ្លងខេត្តឡើងវិញអំឡុងពេលលោកនៅក្រៅប្រទេសមែនឬទេ?
Fact Check By: Kakada SimResult: False
