សាលារៀននៅទូទាំងប្រទេស ទាំងសាលាឯកជន និងសាលារដ្ឋ ត្រូវបានរដ្ឋាភិបាលសម្រេចឱ្យផ្អាកដំណើរការជាច្រើនខែមកហើយ ខណៈដែលកម្ពុជាកំពុងប្រឈមមុខកាន់តែខ្លាំងទៅនឹងការឆ្លងរីករាលដាលនៃមេរោគកូវីដ-១៩នៅទូទាំងប្រទេស។
ទន្ទឹមគ្នានេះ ការអះអាងមួយលើបណ្ដាញសង្គម និយាយថា ក្រសួងអប់រំ យុវជន និងកីឡា បានសម្រេចឱ្យសាលារៀនទូទាំងប្រទេសបើកដំណើរការឡើងវិញនៅថ្ងៃទី១៩ ខែកក្កដា។ ការអះអាងនេះ ត្រូវបានចែករំលែកបន្តយ៉ាងច្រើនរួមជាមួយការបញ្ចេញប្រតិកម្ម និងមតិផ្សេងៗ។ ទោះជាយ៉ាងណា ការត្រួតពិនិត្យការពិត រកឃើញការថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយ កាលពីថ្ងៃទី១៣ ខែកក្កដា ឆ្នាំ២០២១ បានអះអាងថា ក្រសួងអប់រំ យុវជន និងកីឡា សម្រេចអនុញ្ញាតឱ្យសាលារៀននៅទូទាំងប្រទេសបើកដំណើរការឡើងវិញនៅថ្ងៃទី១៩ ខែកក្កដា ហើយសិស្សានុសិស្សក៏អាចវិលត្រឡប់ទៅសិក្សារៀនសូត្រនៅសាលារៀនជាថ្មីផងដែរ។
ការអះអាងបែបនេះ ត្រូវបានចែករំលែកដល់ទៅរាប់ដងពីសំណាក់អ្នកប្រើប្រាស់បណ្ដាញសង្គមហ្វេសប៊ុកត្រឹមតែរយៈពេលប៉ុន្មានម៉ោងប៉ុណ្ណោះ រួមជាមួយការបញ្ចេញមតិ និងប្រតិកម្មរាប់សិបដងផងដែរ។
រូបភាពផ្ដាមនៃការអះអាងលើបណ្ដាញសង្គមនោះ រៀបរាប់ថា «សេចក្ដីជូនដំណឹង ក្រសួងអប់រំ យុវជន និងកីឡា សម្រេចបើកសាលានៅថ្ងៃទី១៩ ខែកក្កដា ឆ្នាំ២០២១នេះហើយ…! ត្រៀមខ្លួនសម្រាប់ការចូលសិក្សានៅក្នុងសាលាជាថ្មី…»។
ការពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យលើការអះអាងនេះតាមរយៈពិនិត្យមើលសេចក្ដីជូនដំណឹង និងការបកស្រាយរបស់ក្រសួងអប់រំ យុវជន និងកីឡា ដែលត្រូវបានផ្សព្វផ្សាយដោយសារព័ត៌មាននានានៅថ្ងៃទី១៣ ខែកក្កដា ឆ្នាំ២០២១។
នៅលើទំព័រហ្វេសប៊ុកផ្លូវការរបស់ខ្លួន ក្រសួងអប់រំ យុវជន និងកីឡា ពុំបានផ្សព្វផ្សាយនូវសេចក្ដីជូនដំណឹងស្ដីពីការអនុញ្ញាតឱ្យបើកដំណើរការសាលារៀននៅទូទាំងប្រទេសឡើងវិញនោះឡើយ។
ផ្ទុយទៅវិញ ទំព័រហ្វេសប៊ុកក្រសួងបានផ្សព្វផ្សាយវីដេអូនៃការបង្រៀនតាមប្រព័ន្ធអនឡាញសម្រាប់សិស្សានុសិស្សថ្នាក់ទី១២ ដែលជាថ្នាក់ចុងក្រោយនៃកម្រិតចំណេះដឹងទូទៅ និងកិច្ចប្រជុំរបស់ថ្នាក់ដឹកនាំក្រសួង នៅក្នុងរយៈពេល ២៤ម៉ោងចុងក្រោយ។
ចំណែកឯគេហទំព័ររបស់ក្រសួងអប់រំ យុវជន និងកីឡា យើងរកមិនឃើញនូវសេចក្ដីជូនដំណឹងអំពីការសម្រេចឱ្យបើកសាលារៀននៅទូទាំងប្រទេសឡើងវិញនោះឡើយ។
ជាងនេះទៀត លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡា បានច្រានចោលនូវការអះអាងលើបណ្ដាញសង្គមនេះ ដោយចាត់ទុកជា«ព័ត៌មានមិនពិត» នេះបើតាមការចុះផ្សាយរបស់ទីភ្នាក់ងារព័ត៌មានកម្ពុជា (AKP)។
សន្និដ្ឋាន
Fact Crescendo Cambodia រកឃើញថា ការអះអាងដូចបានរៀបរាប់ខាងលើនេះ មិនត្រឹមត្រូវនោះឡើយ។ ក្រសួងអប់រំ យុវជន និងកីឡា មិនបានជូនដំណឹងអំពីការសម្រេចអនុញ្ញាតឱ្យបើកដំណើរការសាលារៀននៅទូទាំងប្រទេសនៅថ្ងៃទី១៩ ខែកក្កដា ឆ្នាំ២០២១នោះឡើយ។ ក្រសួងអប់រំ នៅតែអនុញ្ញាតឱ្យអនុវត្តការបង្រៀន និងការសិក្សារៀនសូត្រពីចម្ងាយតាមប្រព័ន្ធអនឡាញដដែល ដោយសារតែកម្ពុជាកំពុងបន្តប្រឈមមុខនឹងការឆ្លងរីករាលដាលនៃមេរោគកូវីដ-១៩យ៉ាងខ្លាំងនៅឡើយ។
Title:ក្រសួងអប់រំនៅមិនទាន់អនុញ្ញាតឱ្យសាលារៀនទូទាំងប្រទេសបើកដំណើរការឡើងវិញទេ
Fact Check By: Jay UdomResult: False
