ខណៈដែលគេដឹងថា លោក ហ៊ុន ម៉ាណែត ដែលជាមេបញ្ជាការកងទ័ពជើងគោក គឺជាបេក្ខភាពនាយករដ្ឋមន្ត្រីនាពេលអនាគតបន្តពីឪពុករបស់លោកនោះ រូបថតមួយសន្លឹកដែលបង្ហាញលោកថតរូបខ្លួនឯងជាមួយអ្នកនាង ចេវ សុវឌ្ឍនា ត្រូវបានបង្ហោះនៅលើបណ្ដាញសង្គមហ្វេសប៊ុក។ រូបភាពមួយសន្លឹកនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ រួមជាមួយការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា តាមរយៈការដំណើរការ Google Reverse Image Search យើងបានរកឃើញថា រូបថតមួយសន្លឹកនេះ គឺជារូបភាពកាត់តតែប៉ុណ្ណោះ។
ការអះអាងលើបណ្ដាញសង្គម
ទំព័រហ្វេសប៊ុកមួយឈ្មោះ ភ្លេងមច្ចុរាជ បានបង្ហោះរូបថតមួយសន្លឹកកាលពីថ្ងៃពុធសប្ដាហ៍មុន ដែលបង្ហាញឱ្យឃើញលោក ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី ហ៊ុន សែន បានថតរូបខ្លួនឯងជាមួយសពស្ត្រីម្នាក់ ដែលបានធ្វើអត្តឃាតខ្លួនឯង។
រូបថតមួយសន្លឹកនេះ ត្រូវបានចែករំលែកជាច្រើនដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ រួមជាមួយការបញ្ចេញប្រតិកម្ម និងមតិចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍មួយនៃទំព័រហ្វេសប៊ុក ភ្លេងមច្ចុរាជ កាលពីថ្ងៃទី០៦ ខែកក្កដា ឆ្នាំ២០២២។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលបង្ហាញលោក ហ៊ុន ម៉ាណែត ថតរូបខ្លួនឯងនេះ ត្រូវបានរកឃើញចុះផ្សាយនៅលើវេបសាយនៃសារព័ត៌មាននគរវត្ត កាលពីឆ្នាំ២០១៨កន្លងមក។ សារព័ត៌មានក្នុងស្រុកមួយនេះ បានផ្សាយរូបថតនេះជាមួយអត្ថបទព័ត៌មានមួយ ដែលនិយាយថា លោកនាយករដ្ឋមន្ត្រី ហ៊ុន សែន រំលឹកដល់ប្រវត្តិកំណើតរបស់កូនប្រុសច្បងលោកកាលពី ៣៩ឆ្នាំមុន(១៩៧៧-២០១៦)។
ខាងក្រោមនេះ គឺជារូបថតដែលត្រូវបានផ្ដាមចេញពីអត្ថបទព័ត៌មានមួយដែលចុះផ្សាយដោយសារព័ត៌មាននគរវត្តកាលពីថ្ងៃទី២០ ខែតុលា ឆ្នាំ២០១៦កន្លងមក។
រូបថតកូនប្រុសលោក ហ៊ុន សែន មួយសន្លឹកនេះ ត្រូវបានបង្វិសទិសដែលធ្វើឱ្យមើលឃើញលោក ហ៊ុន ម៉ាណែត ថតរូបខ្លួនឯងដោយប្រើដៃឆ្វេង។ សូមមើលការប្រៀបធៀបគ្នារវាងរូបថតច្បាប់ដើម និងរូបថតដែលត្រូវបានកាត់ត ឬបង្វិលទិស។
យើងក៏បានរកឃើញរូបថតមួយសន្លឹកទៀតដែលបង្ហាញស្ត្រីវ័យកណ្ដាលម្នាក់ ដែលស្ថិតក្នុងលក្ខណៈព្យួរកខ្លួនឯងនៅនឹងជញ្ជាំងផ្ទះ។ រូបថតមួយសន្លឹកនេះ ត្រូវបានរកឃើញនៅក្នុងចំណោមរូបថតផ្សេងទៀត ដែលនិយាយអំពីការស្លាប់របស់អ្នកនាង ចេវ សុវឌ្ឍនា កាលពីឆ្នាំ២០១៨កន្លងមក។
អ្នកនាង ចេវ សុវឌ្ឍនា ត្រូវបានរកឃើញព្យួរកនៅនឹងជញ្ជាំងនៅក្នុងផ្ទះជួលមួយកន្លែងស្ថិតនៅក្នុងក្រុងដូនកែវ ខេត្តតាកែវ កាលពីចុងខែមករា ឆ្នាំ២០១៨កន្លងមក។ លោក ឡាយ វណ្ណៈ ដែលជាអភិបាលខេត្តតាកែវនាពេលនោះ ត្រូវបានចាប់ខ្លួនជាមួយមនុស្សមួយចំនួនទៀត បន្ទាប់ពីត្រូវបានសង្ស័យជាប់ពាក់ព័ន្ធនឹងការស្លាប់របស់ស្ត្រីរូបនេះ។ អតីតអភិបាលខេត្តតាកែវរូបនេះ និងបងប្រុសរបស់គាត់ ត្រូវបានតុលាការរាជធានីភ្នំពេញ កាត់ទោសឱ្យជាប់ពន្ធនាគាររយៈពេលជាង ១០ឆ្នាំពាក់ព័ន្ធនឹងឃាតកម្មមួយនេះ។
សន្និដ្ឋាន
Fact Crescendo Cambodia រកឃើញថា រូបថតដូចដែលត្រូវបានរៀបរាប់ពីខាងលើនេះ មិនត្រឹមត្រូវនោះឡើយ។ រូបថតដែលបង្ហាញលោក ហ៊ុន ម៉ាណែត ថតរូបខ្លួនឯង ឬថតស៊ែលហ្វីជាមួយសពស្ត្រីម្នាក់ព្យួរកនៅនឹងជញ្ជាំងនោះ ត្រូវបានកាត់ត។ រូបថតច្បាប់ដើម គឺបង្ហាញឱ្យឃើញលោក ហ៊ុន ម៉ាណែត ថតរូបខ្លួនឯងនៅឯទីវាលមានទេសភាពវាលស្មៅ និងភ្នំ។ ចំណែកឯរូបថតស្ត្រីព្យួរកនៅនឹងជញ្ជាំងនោះ គឺជាសពអ្នកនាង ចេវ សុវឌ្ឍនា ដែលត្រូវបានរកឃើញស្លាប់នៅក្នុងផ្ទះជួលមួយកន្លែងស្ថិតនៅក្នុងក្រុងដូនកែវ កាលពីដើមឆ្នាំ២០១៨កន្លងមក។
Title:លោក ហ៊ុន ម៉ាណែត ថតរូបស៊ែលហ្វីជាមួយសពអ្នកនាង ចេវ សុវឌ្ឍនា គឺជារូបភាពកាត់ត
Fact Check By: Jay UdomResult: Altered
