ការវាយប្រហារជាពាក្យសម្ដី និងការរិះគន់ចម្រុះយ៉ាងចំៗទៅលើពិធីករទូរទស្សន៍បាយ័នលោក អេង រិទ្ធី ពីសំណាក់អ្នកប្រើប្រាស់បណ្តាញសង្គម បានធ្វើឡើងជារឿយៗ ជាពិសេសក្រោយពេលដែលលោកធ្លាប់បានលើកឡើងជាសាធារណៈថា នៅស្រុកខ្មែរយើងនេះគ្មានបងប្អូនជនជាតិវៀតណាមនោះទេ។
នៅក្នុងចំណោមនោះ មានរូបថតមួយសន្លឹកបង្ហាញលោក អេង រិទ្ធី អង្គុយអានសៀវភៅមួយដែលមានគម្របរូបលោក ខឹម វាសនា ត្រូវបានអ្នកប្រើប្រាស់ហ្វេសប៊ុកម្នាក់បង្ហោះនៅតាមបណ្តាញសង្គមនាពេលថ្មីៗនេះ។
ទោះជាយ៉ាងណា ការត្រួតពិនិត្យការពិត និងផ្ទៀងផ្ទាត់របស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមហ្វេសប៊ុកនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃទី១១ ខែសីហា ឆ្នាំ២០២១ថ្មីៗកន្លងទៅនេះ អ្នកប្រើប្រាស់ហ្វេសប៊ុកម្នាក់បានបង្ហោះរូបថតមួយសន្លឹក ចូលទៅក្នុងក្រុមហ្វេសប៊ុក ប្រជុំកំពូលអ្នកនយោបាយ ដោយបានបង្ហាញរូបថតរបស់លោក អេង រិទ្ធី ពិធីករដ៏ល្បីឈ្មោះមួយរូបរបស់ទូរទស្សន៍បាយ័នកំពុងតែអង្គុយអានសៀវភៅ។ សៀវភៅដែលលោកកំពុងអាននោះ មានចំណងជើងថា «វិធីក្លាយជាព្រំជេរម៉ែលោក» ដោយភ្ជាប់ជាមួយនឹងរូបថតលោក ខឹម វាសនា ផ្តាមពីលើគម្របសៀវភៅផងដែរ។ លោក ខឹម វាសនា ត្រូវបានស្គាល់ជាទូទៅថា គឺជាមេដឹកនាំគណបក្សប្រឆាំងមួយរូបនៅក្នុងប្រទេសកម្ពុជា។
រូបថតនេះក៏ត្រូវបានប្រតិកម្ម និងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរជាច្រើនផងដែរ។
រូបភាពផ្តាមចេញពីក្រុមហ្វេសប៊ុក ប្រជុំកំពូលអ្នកនយោបាយ បានសរសេររៀបរាប់ថា «អានហើយចេះបោក»។
ការត្រួតពិនិត្យការពិត
ក្រុមការងារ Fact Crescendo Cambodia បានចាប់ផ្តើមប្រៀបធៀបរូបថតខាងលើតាមរយៈការត្រួតពិនិត្យ និងផ្ទៀតផ្ទាត់រូបថតច្បាប់ដើមនៅក្នុងគណនីហ្វេសប៊ុកផ្លូវការរបស់លោក អេង រិទ្ធី ទៅនឹងរូបថតដែលអ្នកប្រើប្រាស់យកមកបង្ហោះនៅលើបណ្តាញសង្គម។
រូបថតមួយសន្លឹកដែលមានទម្រង់ដូចគ្នាទាំងស្រុងរបស់ពិធីកររូបនេះ ត្រូវបានរកឃើញឡើងនៅលើគណនីហ្វេសប៊៊ុកផ្ទាល់របស់លោក អេង រិទ្ធី ដែលលោកបានបង្ហោះនៅលើបណ្តាញសង្គមកាលពីថ្ងៃទី០៩ ខែមិថុនា ឆ្នាំ២០២១កន្លងទៅ។ រូបថតដដែលនេះ បានបង្ហាញទិដ្ឋភាពរូបលោកអង្គុយអានសៀវភៅមួយដែលមានឈ្មោះថា «ចំណុចចាប់ផ្តើមរបត់ប្រវត្តិសាស្ត្រកម្ពុជា» ដោយក្នុងនោះក៏មានរូបថតលោកនាយករដ្ឋមន្ត្រី ហ៊ុន សែន ផ្តាមពីលើគម្របសៀវភៅផងដែរ។ ពិធីករប្រចាំទូរទស្សន៍បាយ័នរូបនេះ ត្រូវបានគេស្គាល់ឈ្មោះដើមថា «ម៉ែន អេង» ជាមន្ត្រីឧត្ដមសេនីយ៍ត្រីផ្កាយ១ និងជាតារាសម្ដែងភាពយន្តមួយរូបផងដែរ។
ខាងក្រោមនេះ គឺជារូបភាពផ្តាមពិតចេញពីគណនីហ្វេសប៊ុករបស់លោក អេង រិទ្ធី ដែលសៀវភៅលោកកំពុងកាន់អាននោះ ពុំមានរូបរបស់មេដឹកនាំគណបក្សប្រឆាំងលោក ខឹម វាសនា នោះឡើយ។
សន្និដ្ឋាន
Fact Crescendo Cambodia បានរកឃើញថារូបថតដូចដែលបានរៀបរាប់ខាងលើត្រូវបានកាត់ត មុននឹងចែករំលែកនៅលើបណ្ដាញសង្គមហ្វេសប៊ុក។ ច្បាប់ដើមនៃរូបថតរបស់លោក អេង រិទ្ធី ពុំបានកាន់សៀវភៅមានផ្តាមរូបរបស់លោក ខឹម វាសនា នៅលើគម្របនោះឡើយ។ ការពិតរូបថតនេះ លោក អេង រិទ្ធី អង្គុយកាន់សៀវភៅដែលមានចំណងថា «ចំណុចចាប់ផ្តើមរបត់ប្រវត្តិសាស្ត្រកម្ពុជា» ដោយមានរូបថតលោកនាយករដ្ឋមន្ត្រី ហ៊ុន សែន ផ្តាមនៅពីលើគម្របសៀវភៅ។
