ភ្នំមានសណ្ឋានជាសត្វខ្លាឃ្មុំ ជារូបថតកាត់ត
រូបថត និងវីដេអូទេសភាពធម្មជាតិជាច្រើន ត្រូវបានបង្ហោះ និងចែករំលែកនៅលើបណ្ដាញសង្គម ក្នុងនោះមានទាំងរូបថត និងវីដេអូក្លែងក្លាយផងដែរ។ នៅក្នុងចំណោមនោះ មានរូបថតមួយសន្លឹកបង្ហាញអំពីទិដ្ឋភាពភ្នំដែលមានទម្រង់រូបរាងជាសត្វខ្លាឃ្មុំ ត្រូវបានទំព័រហ្វេសប៊ុកមួយបានបង្ហោះ និងចែកចាយនៅលើបណ្តាញសង្គមនានាជាច្រើន។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតដែលទំព័រហ្វេសប៊ុកបានបង្ហោះនៅលើបណ្តាញសង្គមហ្វេសប៊ុកនោះ គឺជារូបថតកាត់ត។
ការអះអាងលើបណ្តាញសង្គម
កាលពីថ្ងៃទី២៤ ខែមករា ឆ្នាំ២០២២កន្លងទៅថ្មីៗនេះ ទំព័រហ្វេសប៊ុកមួយ មានឈ្មោះថា Cambodia Life បានបង្ហោះរូបថតមួយសន្លឹក បង្ហាញអំពីទិដ្ឋភាពភ្នំមួយដែលមានទម្រង់ និងសណ្ឋានដូចជាសត្វខ្លាឃ្មុំ។ រូបថតនេះ ត្រូវបានអ្នកប្រើប្រាស់ហ្វេសប៊ុកបញ្ចេញប្រតិកម្មចម្រុះ និងចែកចាយជាច្រើនម៉ឺនដងពីសំណាក់អ្នកប្រើប្រាស់នៅលើបណ្តាញសង្គមនាពេលថ្មីៗនេះ។
រូបថតខាងលើនេះ អាចនឹងត្រូវបានអ្នកប្រើប្រាស់ហ្វេសប៊ុកមួយចំនួនជឿថា ជារូបថតពិតប្រាកដ ដោយមានអ្នកប្រើប្រាស់ហ្វេសប៊ុកជាច្រើនបានបញ្ចេញមតិ និងចែករំលែកបន្ត។
ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុកខាងលើ បានសរសេររៀបរាប់ជាភាសាអង់គ្លេសថា «Beautiful! It should be called bear Island » ឬប្រែសម្រួលជាភាសាខ្មែរមានន័យថា «ស្រស់ស្អាត! វាគួរតែត្រូវបានគេហៅថាជា កោះខ្លាឃ្មុំ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាល់លើរូបភាពនេះតាមរយៈការដំណើរការកម្មវិធី ស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
រូបថតមួយសន្លឹកដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញនៅក្នុងគេហទំព័រ Amica Moda។ គេហទំព័រដដែល ក៏បានបញ្ជាក់អំពីទីតាំងនៃតំបន់មួយនេះផងដែរជាភាសាអង់គ្លេសថា «Another highlight of the place is the beautiful view of the Bear Mountain or Ayu-Dag» ឬប្រែសម្រួលជាភាសាខ្មែរមានន័យថា «ចំណុចសំខាន់មួយទៀត គឺទិដ្ឋភាពដ៏ស្រស់ស្អាតនៃភ្នំខ្លាឃ្មុំ ឬអាយូដាច»។
Amica Moda Link | Archived Link
ចំណែកឯគេហទំព័រ Across Russia ក៏បានផ្ដល់នូវព័ត៌មានលម្អិតអំពីរូបថតមួយសន្លឹកនេះផងដែរ។ រូបភាពផ្តាមចេញពីគេហទំព័រ បានសរសេររៀបរាប់ជាភាសាអង់គ្លេសថា ដែលប្រែសម្រួលជាភាសាខ្មែរមានន័យថា «ភ្នំខ្លាឃ្មុំ ឬតាមភាសាគ្រីមៀហៅថា អាយូដាច គឺជានិមិត្តសញ្ញាមួយនៅក្នុងចំណោមនិមិត្តសញ្ញា ដែលអាចស្គាល់បានបំផុតនៃឆ្នេរសមុទ្រភាគខាងត្បូងនៃតំបន់គ្រីមៀ។ ឈ្មោះនេះសំដៅទៅលើភ្នំ ដែលមានលក្ខណៈដូចខ្លាឃ្មុំដ៏ធំដោយឱនទៅសមុទ្រ និងទឹកផឹក»។
Across Russia Link | Archived Link
ករណីដូចគ្នានេះ ក៏ធ្លាប់បានផ្ទៀងផ្ទាត់ និងត្រួតពិនិត្យដោយក្រុមការងារ AFP ផងដែរកាលពីថ្ងៃទី២១ ខែមីនា ឆ្នាំ២០២០កន្លងទៅនេះ។ ខាងក្រោមនេះ គឺជាការប្រៀបធៀបរវាងរូបថតចែកចាយ ដោយអ្នកប្រើប្រាស់បណ្ដាញសង្គមហ្វេសប៊ុក និងរូបថតច្បាប់ដើមផ្សព្វផ្សាយនៅក្នុងគេហទំព័រខាងលើ។
ដូចគ្នានេះតាមរយៈគេហទំព័រ Google Map ក្រុមការងារ Fact Crescendo Cambodia បានរកឃើញថាទិដ្ឋភាពភ្នំអាយូដាចមួយនេះ គឺមានទីតាំងស្ថិតនៅក្នុងតំបន់គ្រីមៀ នៃប្រទេសរុស្ស៊ី។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដូចដែលបានរៀបរាប់ខាងលើត្រូវបានកាត់ត មុននឹងបង្ហោះ និងចែករំលែកនៅលើបណ្ដាញសង្គមហ្វេសប៊ុក។ ការពិតច្បាប់ដើមនៃរូបថតមួយសន្លឹកនេះ គឺជាទិដ្ឋភាពភ្នំអាយូដាច (Ayu-Dag) ដែលមានទីតាំងស្ថិតនៅក្នុងតំបន់គ្រីមៀ (Crimea) ប្រទេសរុស្ស៊ី។ រូបថតនេះពុំបានបង្ហាញសណ្ឋាន និងរូបរាងដូចជាសត្វខ្លាឃ្មុំនោះឡើយ។
Title:ភ្នំមានសណ្ឋានជាសត្វខ្លាឃ្មុំ ជារូបថតកាត់ត
Fact Check By: Kakada SimResult: Altered