រូបថត​គម្រប​ខ្សែ​ភាពយន្ត​ប្រេស៊ីល​មួយ ត្រូវ​បាន​អះអាង​មិន​ត្រឹម​ថា​ជា​កុមារ​កំព្រា​នៅ​ស៊ីរី

International Misleading

ស៊ីរី​បាន​ធ្លាក់​ចូល​ក្នុង​ភ្លើង​សង្គ្រាម​ស៊ីវិល និង​ភាព​វឹក​វរ​អស់​រយៈ​ពេល​ជាង ១​ទសវត្សរ៍​ហើយ ដែល​នាំ​ឱ្យ​មាន​ពាក្យ​ចចាម​អារ៉ាម និង​ការ​អះអាង​នានា​ភ្ជាប់​នឹង​ស្ថានការណ៍ និង​បញ្ហា​របស់​ប្រទេស​មួយ​នេះ ត្រូវ​បាន​ផ្សព្វផ្សាយ​នៅ​លើ​បណ្ដាញ​សង្គម។

ក្នុង​ចំណោម​នោះ ការ​អះ​អាង​មួយ​បាន​និយាយថា ក្មេង​ស្រី​ម្នាក់​ដែល​ដេក​នៅ​ក្នុង​គំនូរ​ដៃ​ម្ដាយ គឺ​ជា​កុមារ​កំព្រា​នៅ​ទីក្រុង​អាឡិបប៉ូ (Aleppo) ប្រទេស​ស៊ីរី។ ការ​អះ​អាង​នេះ ត្រូវ​បាន​ផ្សព្វផ្សាយ​យ៉ាង​ព្រោង​ព្រាត​នៅ​លើ​បណ្ដាញ​សង្គម​ហ្វេសប៊ុក ជាមួយក​ារ​បញ្ចេញ​មតិ និង​ប្រតិកម្ម​យ៉ាង​ច្រើន​សន្ធឹក​សន្ធាប់។ ទោះជាយ៉ាងណា បន្ទាប់​ពី​ផ្ទៀង​ផ្ទាត់​ហើយ យើង​បាន​រក​ឃើញ​ថា ការ​អះ​អាង​នេះ មិន​ត្រឹម​ត្រូវ​នោះ​ទេ។

ការ​អះ​អាង​លើ​បណ្ដាញ​សង្គម

ទំព័រ​ហ្វេសប៊ុក​មួយ បាន​បង្ហោះ​រូបថត​មួយ​សន្លឹក​ដែល​បង្ហាញ​ក្មេង​ស្រី​ម្នាក់​ដេក​នៅ​ក្នុង​គំនូរ​ដៃ​ម្ដាយ។ ទំព័រ​ហ្វេសប៊ុក​ដដែល​នេះ អះ​អាង​ថា ក្មេង​ស្រី​នោះ គឺ​ជា​កុមារ​កំព្រា​នៅ​ទីក្រុង​អាឡិបប៉ូ ប្រទេស​ស៊ីរី។ រូបថត​នេះ ត្រូវ​បាន​ចែករំលែក​តៗ​គ្នា​យ៉ាង​ព្រោង​ព្រាត​នៅ​លើ​បណ្ដាញ​សង្គម ដោយ​មាន​ការ​បញ្ចេញ​មតិ​យោបល់ និង​ប្រតិកម្ម​យ៉ាង​ច្រើន។

ខាង​ក្រោម​នេះ គឺ​ជារូបភាព​ផ្ដាម​ចេញ​ការ​អះ​អាង​របស់​ទំព័រ​ហ្វេសប៊ុក​ដែល​សរសេរ​ថា​៖ «Sleeping in mama’s arms picture taken in an orphanage in Aleppo.» ឬ​អាច​ប្រែ​សម្រួល​ជា​ភាសា​ខ្មែរ​ថា៖ «គេង​នៅ​ក្នុង​ដៃ​ម្ដាយ រូបថត​ថត​នៅ​ក្នុង​មណ្ឌល​កុមារ​មួយ​នៅ​ទីក្រុង​អាឡិបប៉ូ»។

Facebook Post | Archived Link

អ្នក​ប្រើ​ប្រាស់​បណ្ដាញ​សង្គម​មួយ​ទៀត​ឈ្មោះ Saikat & Satabdi ក៏​បាន​​បង្ហោះ​វីដេអូ​ខ្លី​មួយ​ដែល​ផលិត​ចេញ​ពី​រូបថត​នេះ​ផង​ដែរ ដោយ​មាន​ការ​អះ​អាង​ដូច​គ្នា​ថា « Sleeping in Mama’s Arms picture taken in an orphanage in Aleppo, Syria»។ ឃ្លីប​វីដេអូ​ខ្លី​មួយ​នេះ ត្រូវ​បាន​អ្នក​ប្រើ​ប្រាស់​បណ្ដាញ​សង្គម​មើល​ដល់​ទៅ​ជាង ១៩,០០០​ដង ហើយ​មាន​ការ​បញ្ចេញ​មតិ និង​ប្រតិកម្ម​ចម្រុះ​បែប​ផង​ដែរ។

Facebook Post | Archived Link

ការ​ត្រួត​ពិនិត្យ​ការ​ពិត

Fact Crescendo Cambodia បាន​ចាប់​ផ្ដើម​ផ្ទៀង​ផ្ទាត់​​ទៅ​លើ​ការ​អះ​អាង​នេះ​តាម​រយៈ​ការ​ដំណើរការ Google Reverse Image ដែល​នាំ​​ឱ្យ​យើង​បាន​ជួប​នឹង​ការ​ពិត​ដូច​ខាង​ក្រោម​នេះ។

រូបថត​ដើម ត្រូវ​បាន​រក​ឃើញ​នៅ​ក្នុង​វេបសាយ​រក្សា​ទុក​ព័ត៌មាន​ខ្សែ​ភាពយន្ត​ឈ្មោះ​ថា IMDb ដែល​បង្ហាញ​ថា រូបថត​នេះ គឺ​ជា​គម្រប​នៃ​ភាពយន្ត O Avental Rosa ដែល​ដឹកនាំ​ផលិត​ដោយ​ផលិតករ Jayme Monjardim។ ភាព​យន្ត​មួយ​នេះ ត្រូវ​បាន​ផលិត​ឡើង​រួម​គ្នា​​ដោយ​ក្រុមហ៊ុន Accorde Filmes និង​ក្រុមហ៊ុន Globo Filmes ហើយ​ចាក់​បញ្ចាំង​នៅ​ក្នុង​ឆ្នាំ​២០១៨​កន្លង​មក។

ខ្សែ​ភាពយន្ត​មួយ​នេះ បាន​រៀបរាប់​អំពី​ស្ត្រី​វ័យ ៥០​ម្នាក់​ឈ្មោះ Alice ដែល​ត្រូវការ​លុយ ដោយ​បាន​ធ្វើការ​ជា​អ្នក​ថែទាំ​អ្នក​ជំងឺ​នៅ​មន្ទីរ​ពេទ្យ​ឯកជន​ដ៏​ទំនើប​មួយ​កន្លែង ដើម្បី​ទទួល​បាន​ចំណូល​ខ្ពស់ ហើយ​ទន្ទឹម​គ្នា​នេះ នាង​ក៏​ធ្វើការដោយ​ស្ម័គ្រ​ចិត្ត​​នៅ​មន្ទីរ​ពេទ្យ​រដ្ឋ​មួយ​កន្លែង​ផង​ដែរ ដោយ​មិន​ទទួល​បាន​ប្រាក់​កម្រៃ​នោះ​ឡើយ។

IMDb | Archived Link

ឈុត​ខ្លីៗ​នៃ​ខ្សែ​ភាពយន្ត O Avental Rosa ឬ THE PINK APRON មាន​ផ្សព្វផ្សាយ​នៅ​លើ​ឆាណែល​ YouTube របស់​ក្រុមហ៊ុន Accorde Filmes។ គេ​អាច​មើល​ឈុត​ខ្លីៗ​នៃ​ខ្សែ​ភាពយន្ត​នេះ​បាន​តាម​រយៈ​តំណ​ភ្ជាប់​នៅ​ទីនេះ

Accorde Filmes YouTube Channel | Archived Link

ខាង​ក្រោម​នេះ គឺ​ជា​ការ​ប្រៀប​ធៀប​រវាង​រូបថត​ដែល​អះ​អាង​ដោយ​អ្នក​ប្រើ​ប្រាស់​បណ្ដាញ​សង្គម​ដូច​ដែល​រៀបរាប់​ខាង​លើ និង​គម្រប​ដើម​នៃ​ខ្សែ​ភាពយន្ត O Avental Rosa ដែល​មាន​នៅ​លើ​វេបសាយ​ IMDb។

ការ​អះ​អាង​នេះ ក៏​ត្រូវ​បាន​ស្ថាប័ន​ត្រួត​ពិនិត្យ​ការ​ពិត​មួយ​ចំនួន​បាន​ផ្ទៀង​ផ្ទាត់​រួច​ហើយ​ដែរ​ក្នុង​រយៈ​ពេល​ពីរ​បី​ខែ​កន្លង​មក​នេះ។ ស្ថាប័ន​ត្រួត​ពិនិត្យ​ការពិត​មួយ​ឈ្មោះ​ថា KONMINFO SEKDAU បាន​ផ្ទៀង​ផ្ទាត់​លើ​ការ​អះ​អាង​នេះ​កាល​ពី​ខែ​វិច្ឆិកា​ឆ្នាំ​មុន។

សន្និដ្ឋាន

Fact Crescendo Cambodia បាន​រក​ឃើញ​ថា ការ​អះ​អាង​ដូច​ដែល​បាន​រៀប​រាប់​ខាង​លើ​នេះ មិន​ត្រឹម​ត្រូវ​នោះ​ឡើយ។ រូបថត​នេះ មិន​បាន​បង្ហាញ​ទិដ្ឋភាព​កុមារី​កំព្រា​នៅ​ទីក្រុងអាឡិបប៉ូ ប្រទេស​ស៊ីរី នោះ​ឡើយ។ រូបថត​នេះ ត្រូវ​បាន​រក​ឃើញ​នៅ​លើ​គម្រប​នៃ​ខ្សែ​ភាពយន្ត O Avental Rosa ផលិត​ឡើង​ដោយ​ផលិតករ​ខ្សែ​ភាពយន្ត​ប្រេស៊ីល លោក Jayme Monjardim ហើយ​ចាក់​បញ្ចាំង​នៅ​ក្នុង​ឆ្នាំ​២០១៨។

Avatar

Title:Fact-Check: រូបថត​គម្រប​ខ្សែ​ភាពយន្ត​ប្រេស៊ីល​មួយ ត្រូវ​បាន​អះអាង​មិន​ត្រឹម​ថា​ជា​កុមារ​កំព្រា​នៅ​ស៊ីរី

Fact Check By: Jay Udom 

Result: Misleading

Leave a Reply

Your email address will not be published.