ការប្រកាសជាសាធារណៈពីសំណាក់លោក ហ៊ុន សែន គាំទ្រកូនប្រុសរបស់ខ្លួន គឺលោក ហ៊ុន ម៉ាណែត ឲ្យធ្វើជានាយករដ្ឋមន្ត្រីបន្តពីលោក បានធ្វើឲ្យមានការចេញសារគាំទ្របន្តបន្ទាប់គ្នា ពីគ្រប់ស្ថាប័នរដ្ឋ និងឯកជន។ ការប្រកាសនេះ ក៏បានធ្វើឲ្យមានការរិះគន់ជាច្រើនពីសំណាក់អ្នកគាំទ្រ និងមេដឹកនាំរបស់គណបក្សប្រឆាំងយ៉ាងផុសផុលនៅតាមបណ្តាញសង្គមនានាផងដែរ។
ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពលោក ហ៊ុន ម៉ាណែត ពាក់មួកកងទ័ពវៀតណាម។ រូបថតមួយសន្លឹកនេះ ត្រូវបានចែកចាយ និងប្រតិកម្មចម្រុះពីសំណាក់អ្នកប្រើប្រាស់ហ្វេសប៊ុក។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកាត់ត។
ការអះអាងលើបណ្តាញសង្គម
កាលពីថ្ងៃទី២៤ ខែមករា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះរូបថតមួយសន្លឹក បង្ហាញអំពីទិដ្ឋភាពកូនប្រុសរបស់លោកនាយករដ្ឋមន្ត្រី ហ៊ុន សែន លោក ហ៊ុន ម៉ាណែត ដោយពាក់មួកកងទ័ពវៀតណាម។ រូបថតនេះ ត្រូវបានភ្ជាប់ជាមួយនឹងឃ្លាថា «ជនផ្តាច់ការចូលម្លប់»។
រូបថតភ្ជាប់ដោយសំណេរអះអាងមួយនេះ ត្រូវបានប្រតិកម្មចម្រុះពីសំណាក់អ្នកប្រើប្រាស់ និងចែកចាយតៗគ្នាជាច្រើនដង នៅលើបណ្តាញសង្គមហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុក បានសរសេររៀបរាប់នៅក្នុងសំណេររបស់ខ្លួនថា «កូនយួនកំពុងអុកឡុកនគរខ្មែរ សម្លាប់ខ្មែរ បំផ្លាញខ្មែរ បំបែកបំបាក់ខ្មែរគ្រប់រូបភាព ហ៊ុនម៉ាណែត មិនត្រឹមតែបោសសម្អាតតែបក្សប្រឆាំងទេ សូម្បីអ្នកក្នុងបក្សវា ក៍វាបោសសម្អាតដែរ ក្នុងនោះដូចជា អតីតបក្សជាស៊ីម បក្សហេងសំរិន បក្សស ខេង គឺជាមុខសញ្ញាដែលវាត្រូវកម្ទេចទាំងអស់»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈ ការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតមួយសន្លឹកដែលមានទម្រង់ និងសណ្ឋានដូចគ្នានេះ ត្រូវបានរកឃើញនៅលើទំព័រហ្វេសប៊ុកផ្លូវការ របស់លោក ហ៊ុន ម៉ាណែត ដែលបានបង្ហោះឡើងកាលពីថ្ងៃទី២៧ ខែតុលា ឆ្នាំ២០១៥កន្លងទៅនេះ។ លោក ហ៊ុន ម៉ាណែត ត្រូវបានគេស្គាល់ជាទូទោថា គឺជាអគ្គមេបញ្ជាការរង នៃកងយោធពលខេមរភូមិន្ទ និងជាបេក្ខភាពនាយករដ្ឋមន្ត្រីរបស់គណបក្សប្រជាជនកម្ពុជានាពេលអនាគតខាងមុខនេះ។
ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុកខាងលើ ដោយពុំបានបង្ហាញទិដ្ឋភាពរបស់លោក បានពាក់មួកកងទ័ពវៀតណាមនោះទេ។
ដូចគ្នានេះ តាមរយៈគេហទំព័រសារព័ត៌មាន Grand News Asia ផ្សព្វផ្សាយកាលពីថ្ងៃទី២០ ខែតុលា ឆ្នាំ២០១៦កន្លងទៅ ក៏បានបង្ហាញនូវទិដ្ឋភាពរូបថតដែលមានទម្រង់ និងសណ្ឋានដូចគ្នាផងដែរ។ គេហទំព័រដដែលនេះ ពុំបានបង្ហាញទិដ្ឋភាពលោក ហ៊ុន ម៉ាណែត ពាក់មួកកងទ័ពវៀតណាមនោះឡើយ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ បានសរសេររៀបរាប់ថា «លោក ហ៊ុន ម៉ាណែត ថ្លែងអំណរគុណដល់លោកឳពុក និងអ្នកម្តាយចំពោះអ្វីគ្រប់យ៉ាងដែលលោកមានសព្វថ្ងៃនេះ»។
Grand News Asia | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើ គឺពិតជាមិនត្រឹមត្រូវទេ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ ពុំបានបង្ហាញទិដ្ឋភាពលោក ហ៊ុន ម៉ាណែត ពាក់មួកកងទ័ពវៀតណាមនោះឡើយ។ រូបថតនេះ ត្រូវបានបង្ហោះឡើងកាលពីថ្ងៃទី២៧ ខែតុលា ឆ្នាំ២០១៥កន្លងទៅ នៅក្នុងទំព័រហ្វេសប៊ុកផ្លូវការរបស់លោក។
Title:រូបថតបង្ហាញលោក ហ៊ុន ម៉ាណែត ពាក់មួកកងទ័ពវៀតណាម ជារូបថតកាត់ត
Fact Check By: Kakada SimResult: ALtered
