ថ្មីៗនេះ ទារកតូចមួយត្រូវបានគេបង្ហោះនៅលើបណ្ដាញសង្គមហ្វេសប៊ុក ដែលនាំឱ្យអ្នកប្រើប្រាស់បណ្ដាញសង្គមបង្ហាញក្ដីអាណិតអាសូរដល់ទារកតូចនោះ។ អ្នកប្រើប្រាស់បណ្ដាញសង្គមមួយចំនួន បានបញ្ចេញមតិទៅលើរូបថតនោះ ដែលបង្ហាញថា ពួកគេជឿថា ការបោះបង់ចោលទារកនោះ កើតឡើងនៅក្នុងប្រទេសកម្ពុជា។ បន្ទាប់ពីផ្ទៀងផ្ទាត់លើរូបថតនេះ យើងបានរកឃើញថា ហេតុការណ៍បោះបង់ទារកតូចនោះ មិនមែនកើតឡើងនៅក្នុងផ្នែកណាមួយនៃប្រទេសកម្ពុជាទេ។
ការអះអាងលើបណ្ដាញសង្គម
កាលពីថ្ងៃទី១៦ ខែកក្កដា ឆ្នាំ២០២១ ទំព័រហ្វេសប៊ុកសប្បាយកោស១៦៨ បានបង្ហោះរូបថតចំនួន ៤សន្លឹក ដែលបង្ហាញទារកតូចមួយ ត្រូវបានត្រូវបានគេជួយសង្គ្រោះ បន្ទាប់ពីរកឃើញនៅលើភ្លឺស្រែមួយកន្លែង។
ខាងក្រោមនេះ គឺរូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកខាងលើដែលរៀបរាប់ថា«អាណិតណាស់» ប៉ុន្តែ គ្មានព័ត៌មានលម្អិតបន្ថែមទៀតឡើយ។
រូបថតនៃទារកដែលត្រូវបានគេបោះបង់ចោលនេះ ត្រូវបានគេចែករំលែកតៗគ្នាដល់ទៅរាប់រយដងនៅលើបណ្ដាញសង្គមហ្វេសប៊ុក ហើយក៏ត្រូវបានចែករំលែកទៅកាន់ក្រុមបណ្ដាញសង្គមហ្វេសប៊ុកផងដែរ។
ខណៈដែលគ្មានព័ត៌មានលម្អិតជាក់លាក់នោះ ប៉ុស្តិ៍នេះ បាននាំឱ្យមានការយល់ថា ការបោះបង់ចោលទារកនៅឯវាលស្រែនេះ បានកើតឡើងនៅក្នុងផ្នែកណាមួយនៃប្រទេសកម្ពុជា ហើយអ្នកប្រើប្រាស់ហ្វេសប៊ុកមួយចំនួន ថែមទាំងស្នើរកព័ត៌មានបន្ថែមអំពីទារកនោះ ដើម្បីសុំយកមកចិញ្ចឹមផងដែរ។
ការពិនិត្យការពិត
Fact Crescendo Cambodia ចាប់ផ្ដើមផ្ទៀងផ្ទាត់លើរូបថតនេះតាមរយៈការដំណើរការកម្មវិធីស្វែងរករូបថតនៅលើ Google ដែលនាំឱ្យឃើងជួបប្រទះរូបថតដូចគ្នា និងមានព័ត៌មានលម្អិតផងដែរ។
រូបថតទារកនេះ ត្រូវបានរកឃើញនៅលើទំព័រហ្វេសប៊ុក ຂ່າວວັນນີ້ / News Today ដែលបានបង្ហោះរូបថតទាំងនេះជាមួយព័ត៌មានលម្អិតជាភាសាឡាវកាលពីថ្ងៃទី១២ ខែកក្កដា ឆ្នាំ២០២១នេះ។
តាមរយៈកម្មវិធីបកប្រែភាសារបស់ Google យើងបានដឹងព័ត៌មានថា ទារកនេះ ត្រូវបានគេរកឃើញនៅលើភ្លឺស្រែនៅជិតភូមិតាបែង ស្រុកផនថង ខេត្តចំប៉ាសាក់ នៅម៉ោង ១០:២៥នាទីព្រឹកថ្ងៃទី១២ ខែកក្កដា ឆ្នាំ២០២១។
សន្និដ្ឋាន
Fact Crescendo Cambodia បានរកឃើញថា រូបថតនេះដូចដែលបានរៀបរាប់ខាងលើនេះ បាននាំឱ្យមានការភ័ន្តច្រឡំ។ រូបថតទារកដែលត្រូវបានគេបោះបង់ចោលនៅឯវាលស្រែនេះ មិនមែនកើតឡើងនៅក្នុងផ្នែកណាមួយនៃប្រទេសកម្ពុជាទេ។ ទារកនេះ ត្រូវបានរកឃើញនៅឯភ្លឺស្រែមួយស្ថិតនៅក្នុងស្រុកផនថង ខេត្តចំប៉ាសាក់ ប្រទេសឡាវ នៅព្រឹកថ្ងៃទី១២ ខែកក្កដា ឆ្នាំ២០២១។
Title:ហេតុការណ៍រកឃើញទារកនៅលើភ្លឺស្រែមិនមែនកើតឡើងនៅកម្ពុជាទេ
Fact Check By: Jay UdomResult: Missing Context
