តារាសម្ដែងភាពយន្តឥណ្ឌាដ៏ល្បីល្បាញ លោក Gagan Malik បានសម្រេចសាងផ្នួសជាសង្ឃមួយអង្គនៅវត្តថាតថង ស្ថិតក្នុងរាជធានីបាងកក ប្រទេសថៃ កាលពីថ្ងៃសុក្រកន្លងមកនេះ។ ដំណឹងនៃការសាងផ្នួសរបស់តារាភាពយន្តដែលបានសម្ដែងជាតួអង្គព្រះពុទ្ធក្នុងភាពយន្តពុទ្ធប្រវត្តិនោះ ត្រូវបានផ្សព្វផ្សាយព្រោងព្រាតលើបណ្ដាញសង្គម ក្នុងនោះមានអ្នកទាំងប្រើប្រាស់ហ្វេសប៊ុកនិយាយភាសាខ្មែរផងដែរ។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia បានរកឃើញថា ដំណឹងនៃការសាងផ្នួសរបស់តារាសម្ដែងភាពយន្តរូបនេះ មិនទាន់ត្រឹមត្រូវទាំងស្រុងនោះឡើយ។
ការអះអាងលើបណ្ដាញសង្គម
កាលពីថ្ងៃម្សិលមិញនេះ អ្នកប្រើប្រាស់ហ្វេសប៊ុកម្នាក់ឈ្មោះ Sovann Sculpture បានបង្ហោះរូបថតតារាសម្ដែងភាពយន្តឥណ្ឌា លោក Gagan Malik ដែលបានសម្ដែងជាតួអង្គព្រះពុទ្ធនៅក្នុងភាពយន្តរឿង «ព្រះស្រីតថាគត» ឬ «Sri Siddhartha Gauthama» ជាខ្សែភាពយន្តបរិយាយពីពុទ្ធប្រវត្តិ។
អ្នកប្រើប្រាស់ហ្វេសប៊ុកដដែលនេះ បានអះអាងថា តារាសម្ដែងឥណ្ឌារូបនេះ បានសាងផ្នួសជាសង្ឃហើយ ដែលនាំឱ្យមានការចែករំលែកបន្តជាច្រើន និងមានការបញ្ចេញមតិពីអ្នកប្រើប្រាស់ហ្វេសប៊ុកនិយាយភាសាខ្មែរផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក Sovann Scuplture ដែលសរសេររៀបរាប់ថា «តួអង្គព្រះសម្មាសម្ពុទ្ធ គាត់បានបួសហើយ គួរជាទីស្រឡាញ់ ជាទីជ្រះថ្លា អនុមោទនា»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងនេះតាមរយៈការស្វែងរកព័ត៌មានដែលរៀបរាប់ពីការសាងផ្នួសរបស់តារាសម្ដែងឥណ្ឌារូបនេះ ដែលនាំឱ្យយើងរកឃើញព័ត៌មានលម្អិតនៃការសាងផ្នួសរបស់តារាភាពយន្តឥណ្ឌារូបនេះ។
ដំណឹងនៃការសាងផ្នួសរបស់តារាភាពយន្តឥណ្ឌារូបនេះ ត្រូវបានចុះផ្សាយថ្ងៃកាលពីថ្ងៃម្សិលមិញនេះដោយសារព័ត៌មានបាងកក ប៉ុស្តិ៍។
សារព័ត៌មានថៃមួយនេះ រាយការណ៍ថា លោក Gagan Malik សាងផ្នួសជាសង្ឃនៅវត្តថាតថង នៅទីក្រុងបាងកក នៅម៉ោង ១០ព្រឹក ដើម្បីសិក្សាឈ្វេងយល់ពីពុទ្ធឱវាទសម្ដែងអំពីការត្រាស់ដឹង និងចិត្តស្ងប់។
បើតាមសារព័ត៌មានដដែលនេះ តារាសម្ដែងបូលីវូដរូបនេះ សាងផ្នួសជាព្រះសង្ឃរយៈពេលត្រឹមតែ ១៥ថ្ងៃប៉ុណ្ណោះ ពោលគឺចាប់ពីថ្ងៃទី១០ រហូតដល់ថ្ងៃទី២៤ ខែកុម្ភៈខាងមុខនេះ។
ភិក្ខុសង្ឃ Gagan Malik មានបំណងនាំយកធម៌ ឬពុទ្ធឱវាទទៅផ្សព្វផ្សាយឡើងវិញនៅប្រទេសឥណ្ឌា ដែលជាទឹកដីកំណើតរបស់ព្រះពុទ្ធ។
Bangkok Post’s Report | Archived Link
ដំណឹងនៃការសាងផ្នួសរបស់តារាសម្ដែងឥណ្ឌារូបនេះ ក៏ត្រូវបានផ្សព្វផ្សាយព្រោងព្រាតនៅលើបណ្ដាញសង្គមហ្វេសប៊ុកផងដែរ ដោយការផ្សព្វផ្សាយមួយចំនួន មិនបានផ្ដល់ព័ត៌មានគ្រប់ជ្រុងជ្រោយនោះឡើយ ដែលនាំឱ្យមានការយល់ច្រឡំថា តារាសម្ដែងរូបនេះសាងផ្នួស។
ក្រុមការងារនៃស្ថាប័នត្រួតពិនិត្យព័ត៌មានក្លែងក្លាយ Fact Crescendo នៅក្នុងប្រទេសស្រីលង្កា ក៏បានផ្ទៀងផ្ទាត់ព័ត៌មាននេះផងដែរកាលពីថ្ងៃម្សិលមិញនេះ តាមរយៈពិនិត្យមើលទៅការរៀបរាប់នៅលើហ្វេសប៊ុករបស់សាមីខ្លួនដោយផ្ទាល់។
លោក Gagan Malik មានឈ្មោះល្បីល្បាញ បន្ទាប់ពីបានសម្ដែងជាតួអង្គព្រះរាមនៅក្នុងខ្សែភាពយន្តរាមកេរ្តិ៍ ឬ «Ramayana» ដែលខ្សែភាពយន្តនេះទទួលបានពានរង្វាន់ជាច្រើននៅឯវេទិកាភាពយន្តអន្តរជាតិទីក្រុងដេលី។
លោក Malik ក៏បានសាងកេរ្តិ៍ឈ្មោះល្បីល្បាញផងដែរ បន្ទាប់ពីសម្ដែងជាតួអង្គព្រះពុទ្ធនៅក្នុងភាពយន្ត«ស្រីសត្ថាគត» ឬ «Sri Siddhartha Gautama» ដែលជួយឱ្យលោកដណ្ដើមបានពានរង្វាន់ជាតារាងសម្ដែងល្អជាងគេនៅក្នុងព្រឹត្តិការណ៍ភាពយន្តពុទ្ធសាសនាអន្តរជាតិ ដែលរៀបចំឡើងដោយអង្គការសហប្រជាជាតិនៅឆ្នាំ២០១៤។
នៅក្នុងឆ្នាំ២០១៤នោះដែរ តារាងសម្ដែងឥណ្ឌារូបនេះ បានប្រែក្លាយមកជាពុទ្ធសាសនិកនៅក្នុងប្រទេសស្រីលង្កា។
ប្រទេសស្រីលង្កា ក៏គោរពព្រះពុទ្ធសាសនាផងដែរ ដែលជាហេតុនាំឱ្យមានការចោទសួរថា ហេតុអ្វីបានជាតារាសម្ដែងបូលីវូដរូបនេះ មិនសាងផ្នួសនៅទីនោះ។
នៅក្នុងអត្ថបទផ្ទៀងផ្ទាត់របស់ខ្លួន ក្រុមការងារ Fact Crescendo នៅក្នុងប្រទេសស្រីលង្កា បានបញ្ជាក់ថា ពុទ្ធសាសនានៅប្រទេសមួយនេះ មិនទទួលសាងផ្នួសរយៈពេលខ្លីឡើយ។
ព្រះពុទ្ធសាសនានៅកម្ពុជា និងថៃ អនុញ្ញាតឱ្យបុរសសាងផ្នួសរយៈពេលខ្លី ដើម្បីតបស្នងសងគុណគ្រួសារ និងបុព្វបុរស ឬក៏មនុស្សប្រុសធំពេញវ័យ។
គេអាចអានខ្លឹមសារលម្អិតនៃអត្ថបទត្រួតពិនិត្យការពិតរបស់ Fact Crescendo នៅប្រទេសស្រីលង្កា នៅក្នុងតំណភ្ជាប់មាននៅទីនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចបានរៀបរាប់ខាងលើនេះ មិនទាន់ត្រឹមត្រូវនោះឡើយ។ តារាភាពយន្តឥណ្ឌា លោក Gagan Malik ដែលបានសម្ដែងជាតួអង្គព្រះពុទ្ធក្នុងភាពយន្ត «ស្រីសត្ថាគត» ឬ «Sri Siddhartha Gautama» បានសាងផ្នួសជាព្រះសង្ឃនៅក្នុងប្រទេសថៃត្រឹមតែ ១៥ថ្ងៃប៉ុណ្ណោះ មិនមែនជាបួសរហូតនោះឡើយ។
Title:តារាភាពយន្តឥណ្ឌាសម្ដែងជាតួអង្គព្រះពុទ្ធ សាងផ្នួស ១៥ថ្ងៃនៅក្នុងប្រទេសថៃ
Fact Check By: Jay UdomResult: Missing Context
