ព្រះឆាយាល័ក្ខព្រះបាទជ័យជេដ្ឋាទី២ តើជាការពិតមែនឬទេ?

ខណៈដែលប្រវត្តិសាស្ត្រកម្ពុជាជាមួយប្រទេសវៀតណាម នៅតែជាប្រធានបទនៃការជជែក និងចែករំលែកនៅលើបណ្ដាញសង្គមជារឿយៗ រូបថតមួយសន្លឹកដែលបង្ហាញបុរសម្នាក់ក្នុងឈុតសម្លៀកបំពាក់ជារាជវង្សវៀតណាមនោះ ត្រូវបានគេអះអាងថា ជាព្រះបាទជ័យជេដ្ឋាទី២ ដែលបានធ្វើឱ្យមានការបាត់បង់ទឹកដីព្រៃនគរ (កម្ពុជាក្រោម) ទៅប្រទេសវៀតណាម។ ការអះអាងនេះ ត្រូវបានបង្ហោះនៅលើគណនីហ្វេសប៊ុករបស់អ្នកប្រើប្រាស់ម្នាក់ ដោយមានការចែកចាយ និងប្រតិកម្មជាច្រើនដង។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងទៅលើរូបថតនេះ មិនត្រឹមត្រូវនោះឡើយ។

ការអះអាងលើបណ្ដាញសង្គម

កាលពីថ្ងៃទី០១ ខែមិថុនា ឆ្នាំ២០២៣កន្លងទៅ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបង្ហាញបុរសម្នាក់ស្ថិតក្នុងសម្លៀកបំពាក់អ្នកមានបុណ្យស័ក្តិ និងពាក់ដួន ដោយបានភ្ជាប់នឹងការលើកឡើងថា រូបថតមួយសន្លឹកនេះព្រះឆាយាល័ក្ខរបស់ព្រះបាទជ័យជេដ្ឋាទី២។

ការបង្ហោះរូបថតខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីគណនីហ្វេសប៊ុកអ្នកប្រើប្រាស់ខាងលើ ដែលរៀបរាប់ថា «អាជ័យសេដ្ឋាទីពីរយកប្រពន្ធយួនអស់ព្រៃនគរ អាជ័យសេថោកទីបីយកប្រពន្ធយួនហាន់ណូយងាប់អស់បីលាននាក់ អស់ប្រទេសទាំងមូល តើវាឈ្មោះអ្វី? ចូលខមិន(បិតាបង្កើតរបបប្រល័យពូជសាសន៍)»។

Facebook Post | Archived Link

រូបថតដែលភ្ជាប់នឹងការលើកឡើងបែបនេះ ក៏ទទួលបានការចែករំលែកជាច្រើនដង ខណៈដែលមានការបញ្ចេញមតិយោបល់ជាច្រើន និងប្រតិកម្មចម្រុះពីសំណាក់អ្នកប្រើប្រាស់ហ្វេសប៊ុកដទៃទៀតផងដែរ។

សូមមើលរូបថត និងខ្លឹមសារសំណេរទាំងស្រុង តាមរយៈតំណភ្ជាប់មាននៅទីនេះ (archived link) ឬតំណភ្ជាប់មួយទៀតមាននៅទីនេះ (archived link)។

ការត្រួតពិនិត្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។

រូបថតសខ្មៅមួយសន្លឹកដែលបង្ហាញបុរសម្នាក់ស្ថិតក្នុងឈុតសម្លៀកបំពាក់បែបរាជវង្សនោះ ត្រូវបានរកឃើញនៅលើគេហទំព័រ Alamy ដោយមានបញ្ជាក់ឱ្យដឹងថា មិនមែនជាអតីតព្រះមហាក្សត្រខ្មែរ ព្រះបាទជ័យជេដ្ឋាទី២ ដូចការអះអាងខាងលើនោះឡើយ។

បើតាមគេហទំព័រដដែលខាងលើនេះ បុរសម្នាក់នោះ គឺត្រូវបានស្គាល់ថាជាព្រះចៅអធិរាជវៀតណាម Khai Dinh ដែលជាអធិរាជទី១២ នៃខ្សែរាជវង្សង្វៀន (Nguyen) នៃប្រទេសវៀតណាម ដែលបានសោយរាជ្យក្នុងអំឡុងឆ្នាំ១៩១៦ ដល់១៩២៥។

ខាងក្រោមនេះ គឺជារូបភាពផ្ដាមចេញពីគេហទំព័រ Alamy ដែលបានសរសេររៀបរាប់ថា ព្រះចៅអធិរាជវៀតណាម Khai Dinh ដែលមានព្រះនាមដើមគឺ Nguyễn Phúc Bửu Đảo គឺជាបុត្ររបស់ព្រះចៅអធិរាជ Đồng Khánh។

Alamy Link | Archived Link

ដូចគ្នានេះ ព្រះឆាយាល័ក្ខរបស់ព្រះចៅអធិរាជវៀតណាម Khai Dinh ក៏ត្រូវបានរកឃើញនៅលើគេហទំព័រ Getty Images ផងដែរ ដែលគេហទំព័រមួយនេះ មិនបានបញ្ជាក់ថាព្រះមហាក្សត្រអង្គនេះ គឺជាអតីតព្រះមហាក្សត្រខ្មែរ ព្រះបាទជ័យជេដ្ឋាទី២ ដូចដែលបានអះអាងដោយអ្នកប្រើប្រាស់បណ្ដាញសង្គមនោះឡើយ។

Getty Images | Archived Link

សន្និដ្ឋាន

Fact Crescendo Cambodia បានរកឃើញថា ការអះអាងដោយភ្ជាប់ទៅនឹងរូបថតដូចដែលបានរៀបរាប់ខាងលើ គឺមិនត្រឹមត្រូវនោះឡើយ។ រូបថតនេះ គឺជាព្រះចៅអធិរាជវៀតណាម Khai Dinh ដែលជាស្ដេចទី១២ នៃខ្សែរាជវង្សង្វៀន (Nguyen)បានសោយរាជ្យចន្លោះឆ្នាំ១៩១៦ ដល់១៩២៥។