ខណៈពេលដែលកោះត្រល់ជាភាសាខ្មែរ ឬកោះភូកុកជាភាសាវៀតណាម បានក្លាយជាប្រធានបទនៃការជជែកដេញដោល និងបញ្ចេញមតិជារឿយៗនៅលើបណ្ដាញសង្គមពីសំណាក់ប្រជាពលរដ្ឋកម្ពុជានោះ រូបថតមួយសន្លឹក បង្ហាញទិដ្ឋភាពផ្លូវអមឆ្នេរសមុទ្រដ៏ស្រស់ស្អាតមួយ ត្រូវបានបង្ហោះដោយអ្នកប្រើប្រាស់ហ្វេសប៊ុកម្នាក់ ដោយភ្ជាប់ជាមួយនឹងការសរសេរថា «កោះត្រល់ របស់ខ្មែរ»។ ការបង្ហោះបែបនេះ ត្រូវបានចែកចាយ និងប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមកម្ពុជា។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតភ្ជាប់ដោយសំណេរខាងលើ គឺធ្វើឲ្យមានការយល់ច្រឡំ។
ការអះអាងលើបណ្តាញសង្គម
កាលពីថ្ងៃទី២៥ ខែមករា ឆ្នាំ២០២៣កន្លងទៅថ្មីនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក បង្ហាញទិដ្ឋភាពផ្លូវអមសួនច្បារ មាត់សមុទ្រ មួយកន្លែង។ រូបថតខាងលើនេះ ត្រូវបានអ្នកប្រើប្រាស់ភ្ជាប់ជាមួយនឹងការអះអាងថា ទិដ្ឋភាពនេះ គឺជាទិដ្ឋភាពកោះត្រល់ (ភាសាខ្មែរ) ឬកោះភូកុក (ភាសាវៀតណាម)។ ការបង្ហោះរូបថតខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ហ្វេសប៊ុកខាងលើ ដែលបានសរសេរថា «អ្នកមានផ្ទះធំប៉ុណ្ណាក៍ដោយ បើយួនយកប្រទេសបាត់ នោះវាគ្មានន័យទេ ពិសេសបាត់ទាំងអ្នកក្រ ទាំងអ្នកមានតែម្តង»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញ និងផ្សព្វផ្សាយនៅលើគេហទំព័រ Vietnam Tourism ពុំបានបញ្ជាក់ថា ទិដ្ឋភាពនេះ គឺជាទិដ្ឋភាពកោះត្រល់នោះឡើយ។ ទិដ្ឋភាពផ្លូវអមឆ្នេរសមុទ្រមួយនេះ ត្រូវបានគេស្គាល់ឈ្មោះថា Tran Phu និងមានទីតាំងស្ថិតក្នុងខេត្តញ៉ាត្រាង (Nha Trang) ប្រទេសវៀតណាម។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានបញ្ជាក់ជាភាសាអង់គ្លេស ឬប្រែសម្រួលជាភាសាខ្មែរមានន័យថា «Nha Trang គឺជាទីក្រុងរមណីយដ្ឋានមាត់សមុទ្រដ៏ពេញនិយមបំផុតរបស់ប្រទេសវៀតណាម ដែលមានទីតាំងនៅតាមឆ្នេរសមុទ្រដ៏ស្រស់ស្អាតបំផុតទីពីរនៅក្នុងប្រទេស»។
Vietnam Tourism Link | Archived Link
ទិដ្ឋភាពនៃផ្លូវអមឆ្នេរសមុទ្រមួយនេះ ក៏ត្រូវបានរកឃើញ និងបង្ហោះដោយគេហទំព័រ VN Express ផងដែរ កាលពីថ្ងៃទី១៣ ខែតុលា ឆ្នាំ២០១៨កន្លងទៅ ដែលបានបញ្ជាក់ជាភាសាអង់គ្លេស ឬប្រែសម្រួលជាភាសាខ្មែរមានន័យថា «ទិដ្ឋភាពឆ្នេរ Tran Phu ក្នុងខេត្តញ៉ាត្រាង ប្រទេសវៀតណាម»។ ខេត្តញ៉ាត្រាង គឺជាខេត្តជាប់សមុទ្រមួយរបស់វៀតណាម ដែលមានទីតាំងស្ថិតនៅភាគកណ្ដាលនៃប្រទេស។
VN Express Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថារូបថតភ្ជាប់ដោយសំណេរខាងលើ គឺធ្វើឲ្យមានការយល់ច្រឡំ។ រូបថតខាងលើនេះ មិនមែនជាទិដ្ឋភាពកោះត្រល់នោះឡើយ។ ការពិតរូបថតនេះ គឺជាទិដ្ឋភាពផ្លូវអមឆ្នេរសមុទ្រ (Tran Phu) ស្ថិតក្នុងខេត្តញ៉ាត្រាង (Nha Trang) ប្រទេសវៀតណាម។
Title:ផ្លូវអមឆ្នេរក្នុងខេត្តញ៉ាត្រាងត្រូវបានភ្ជាប់មិនត្រឹមត្រូវថាជាទិដ្ឋភាពកោះត្រល់
Fact Check By: Kakada SimResult: Misleading
