កាលពីសប្ដាហ៍កន្លងមកនេះ មនុស្សយ៉ាងតិចណាស់ចំនួន ១៥៦នាក់ បានបាត់បង់ជីវិត បន្ទាប់មានហេតុការណ៍រត់ជាន់គ្នា ស្ថិតនៅក្នុងទីក្រុងសេអ៊ូល ប្រទេសកូរ៉េខាងត្បូង។ បន្ទាប់ពីហេតុការណ៍ដ៏រន្ធត់នេះបានកើតឡើង វីដេអូឃ្លីបមួយដែលបង្ហាញទិដ្ឋភាពសាកសពជាច្រើនតម្រៀបគ្នា ត្រូវបានគេបង្ហោះនៅលើបណ្ដាញសង្គមជាមួយនឹងការភ្ជាប់ថា ជាជនរងគ្រោះក្នុងហេតុការណ៍ជាន់គ្នានៅប្រទេសកូរ៉េ។ ការអះអាងនេះ ត្រូវបានចែករំលែកបន្តគ្នាជាច្រើនដងពីសំណាក់អ្នកប្រើប្រាស់បណ្ដាញសង្គម។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដោយភ្ជាប់ទៅនឹងវីដេអូឃ្លីបខាងលើនោះ គឺជាមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី០១ ខែវិច្ឆិកា ឆ្នាំ២០២២ អ្នកប្រើប្រាស់ហ្វេសប៊ុកម្នាក់ បានបង្ហោះវីដេអូឃ្លីបមួយ បង្ហាញអំពីទិដ្ឋភាពសាកសព និងមនុស្សចោមរោមជាច្រើន។ វីដេអូមួយនេះ ត្រូវបានភ្ជាប់ និងអះអាងថាជាជនរងគ្រោះពីហេតុការណ៍រត់ជាន់គ្នានៅទីក្រុងសេអ៊ូល ប្រទេសកូរ៉េខាងត្បូង កាលពីប៉ុន្មានថ្ងៃកន្លងទៅនេះ។
ការអះអាងខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជាវីដេអូឃ្លីបទាំងស្រុង ដែលបានបង្ហោះដោយអ្នកប្រើប្រាស់ខាងលើ។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីបដូចគ្នាទាំងស្រុងនេះ ត្រូវបានរកឃើញ និងបង្ហោះនៅលើគេហទំព័រវីដេអូ YouTube កាលពីថ្ងៃទី៣១ ខែតុលា ឆ្នាំ២០២២កន្លងទៅនេះ។ វីដេអូនេះ ពុំត្រូវបានភ្ជាប់ជាមួយនឹងហេតុការណ៍នៃការរត់ជាន់គ្នា ដែលបានកើតឡើងនៅក្នុងទីក្រុងសេអ៊ូល ប្រទេសកូរ៉េខាងត្បូង នោះឡើយ។
រូបថតដែលមានទម្រង់ និងសណ្ឋានដូចគ្នានេះ ក៏ត្រូវបានរកឃើញនៅលើគេហទំព័រសារព័ត៌មាន Detik ផងដែរ កាលពីថ្ងៃទី៣១ ខែតុលា ឆ្នាំ២០២២កន្លងទៅ។ សារព័ត៌មានដដែលនេះ បានបញ្ជាក់ជាភាសាឥណ្ឌូនេស៊ីថា រូបថតទាំងនេះ គឺជាទិដ្ឋភាពនៃការរៀបចំពិធីបុណ្យប្រពៃណី Calonarang។
Detik News Report | Archived Link
ខាងក្រោមនេះ គឺជាវីដេអូឃ្លីប បង្ហាញទិដ្ឋភាពទាំងស្រុងនៃពិធីបុណ្យប្រពៃណីរបស់កោះបាលី ដែលគេហៅឈ្មោះថា “Calonarang”។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថាវីដេអូឃ្លីប និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ច្បាប់ដើមនៃវីដេអូឃ្លីបនេះ គឺជាទិដ្ឋភាពនៃការសម្ដែងនៅក្នុងពិធីបុណ្យប្រពៃណីរបស់ប្រជាជននៅលើកោះបាលី ប្រទេសឥណ្ឌូនេស៊ី ហើយវាមិនមែនជាទិដ្ឋភាពហេតុការណ៍រត់ជាន់គ្នា នៅកូរ៉េខាងត្បូង នាពេលថ្មីៗនោះឡើយ។
Title:ពិធីបុណ្យប្រពៃណីមួយនៅកោះបាលីមិនពាក់ព័ន្ធនឹងហេតុការណ៍ជាន់គ្នានៅកូរ៉េខាងត្បូងទេ
Fact Check By: Kakada SimResult: False
