ប្រទេសវៀតណាមបានរកឃើញ មនុស្សដល់ទៅជាង ៤,៣៣៥នាក់បន្ថែមទៀត បានឆ្លងជំងឺផ្លូវដង្ហើមនេះនៅថ្ងៃទី២០ ខែកក្កដា ដែលនាំករណីឆ្លងសរុបឡើងលើស ៦ម៉ឺននាក់ហើយ ក្នុងនោះមនុស្ស ២៥៤នាក់បានស្លាប់ដោយសារជំងឺនេះ។ កាលពីថ្ងៃម្សិលមិញនេះ រដ្ឋាភិបាលកម្ពុជាបានបញ្ជូនជំនួយជាសម្ភារៈវេជ្ជសាស្ត្រទៅកាន់ប្រទេសវៀតណាម ខណៈដែលប្រទេសជិតខាងកម្ពុជាមួយនេះ កំពុងប្រឈមមុខនឹងការឆ្លងរីករាលដាលនៃមេរោគកូវីដ-១៩កាន់តែខ្លាំង។
ខណៈដែលវៀតណាមកំពុងប្រឈមនឹងការរីករាលដាលនៃមេរោគកូវីដ-១៩នោះ ព័ត៌មានជាច្រើនបានចែកចាយលើបណ្ដាញសង្គម ដែលនិយាយអំពីស្ថានភាពកូវីដ-១៩នៅវៀតណាម។ ក្នុងចំណោមនោះ វីដេអូខ្លីមួយ ត្រូវបានបង្ហោះលើបណ្ដាញសង្គមហ្វេសប៊ុកជាមួយការអះអាងថា វាបង្ហាញទិដ្ឋភាពនៃការបញ្ចុះសពអ្នកស្លាប់ដោយសារជំងឺកូវីដ-១៩នៅវៀតណាម។ វីដេអូនេះ ត្រូវបានចែករំលែកបន្តជាច្រើនរយដង រួមជាមួយការបញ្ចេញមតិជាច្រើនផងដែរ។
ទោះជាយ៉ាងណា ក្រោយផ្ទៀងផ្ទាត់រួច យើងរកឃើញថា វីដេអូជាមួយការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
នៅថ្ងៃទី២០ ខែកក្កដា ឆ្នាំ២០២១ ទំព័រហ្វេសប៊ុកមួយបានបង្ហោះវីដេអូខ្លីមួយដែលបង្ហាញក្រុមមន្ត្រីសុខាភិបាលជាមួយសម្លៀកបំពាក់ការពារសុវត្ថិភាពនោះ រៀបចំបញ្ចុះសពនៅឯទីកន្លែងបញ្ចុះសពមួយកន្លែង។ ទំព័រហ្វេសប៊ុកដដែលនេះ អះអាងថា វីដេអូនោះ គឺជាទិដ្ឋភាពមួយជ្រុងនៃស្ថានភាពកូវីដ-១៩នៅក្នុងប្រទេសវៀតណាម។
វីដេអូជាមួយនឹងការអះអាងនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់បណ្ដាញសង្គមហ្វេសប៊ុក រួមជាមួយការបញ្ចេញប្រតិកម្ម និងមតិជាច្រើនផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកនោះ ដែលមានការរៀបរាប់ថា «វៀតណាមមានអ្នកស្លាប់ដោយសារកូវីដច្រើនណាស់ បងប្អូនខ្មែរយើងថែរក្សាសុខភាពទាំងអស់គ្នា»។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើវីដេអូ និងការអះអាងនេះតាមរយៈការដំណើរការលើកម្មវិធីស្វែងរករូបថតរបស់ Google ដែលនាំឱ្យយើងជួបប្រទះនឹងរូបថត វីដេអូ និងព័ត៌មានលម្អិតលើរូបថត និងវីដេអូមួយនេះ។
វីដេអូនេះ ត្រូវបានរកឃើញបង្ហោះនៅលើបណ្ដាញយូធូប (YouTube) កាលពីថ្ងៃទី០៩ ខែកក្កដា ឆ្នាំ២០២១ ជាមួយរូបថតច្បាស់ៗ ប៉ុន្តែ មិនមានព័ត៌មានបន្ថែមនោះឡើយ។ វីដេអូដើមនៅលើបណ្ដាញយូធូអាចចូលមើលបាននៅលើតំណភ្ជាប់ទីនេះ។
ខាងក្រោមនេះ គឺជារូបភាពផ្ដាមចេញពីវីដេអូដែលត្រូវបានបង្ហោះនៅលើបណ្ដាញយូធូ bang oland កាលពីថ្ងៃទី០៩ ខែកក្កដា ឆ្នាំ២០២១។
Add video from YouTube channel here
YouTube Channel | Archived Link
វីដេអូនេះបាននាំឱ្យយើងរកឃើញរូបថត និងព័ត៌មានលម្អិតដែលត្រូវបានចុះផ្សាយដោយទីភ្នាក់ងារព័ត៌មានរ៉យទ័រ (Reuters)កាលពីថ្ងៃទី០៨ ខែកក្កដា ឆ្នាំ២០២១ ឬមួយថ្ងៃមុនការចេញផ្សាយវីដេអូនេះនៅលើបណ្ដាញយូធូបខាងលើនេះ។
អត្ថបទរាយការណ៍របស់រ៉យទ័រ បានឱ្យដឹងថា រូបថត ឬវីដេអូនេះ គឺជាទិដ្ឋភាពនៃទីបញ្ចុះសពអ្នកស្លាប់ដោយសារជំងឺកូវីដ-១៩ នៅរដ្ឋធានីហ្សាកាតា ប្រទេសឥណ្ឌូនេស៊ី។ ផ្ទៃដីទីបញ្ចុះសពអ្នកស្លាប់ដោយសារកូវីដ-១៩ទៅតាមប្រពៃណីមូស្លីមមួយនេះ បានរីកធំឡើងនៅក្នុងរយៈពេលតែជាង ១សប្ដាហ៍ប៉ុណ្ណោះចន្លោះពីថ្ងៃទី២៨ ខែមិថុនា ដល់ថ្ងៃទី០៧ ខែកក្កដា ឆ្នាំ២០២១នេះ។ ទីតាំងបញ្ចុះសពអ្នកស្លាប់ដោយសារកូវីដ-១៩នេះ មានឈ្មោះថា ទីស្មសាន Rorotan ស្ថិតនៅភាគខាងជើងនៃរដ្ឋធានីហ្សាកាតា។
សន្និដ្ឋាន
Fact Crescendo Cambodia បានរកឃើញថា វីដេអូជាមួយការអះអាងដូចបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូនោះ មិនមែនជាទិដ្ឋភាពនៃការបញ្ចុះសពអ្នកស្លាប់ដោយសារជំងឺកូវីដ-១៩នៅក្នុងប្រទេសវៀតណាមនោះឡើយ។ វីដេអូនោះ គឺជាទិដ្ឋភាពនៃការបញ្ចុះសពអ្នកស្លាប់ដោយសារកូវីដ-១៩កាលពីថ្ងៃទី០៧ ខែកក្កដាសប្ដាហ៍មុន នៅឯទីបញ្ចុះសពមួយ ស្ថិតនៅភាគខាងជើងរដ្ឋធានីហ្សាកាតា។
Title:តើវីដេអូនេះគឺជាទិដ្ឋភាពបញ្ចុះសពអ្នកស្លាប់ដោយសារកូវីដ-១៩នៅវៀតណាមមែនទេ?
Fact Check By: Jay UdomResult: False
