បន្ទាប់ពីហេតុការណ៍ភ្លើងឆាបឆេះសង្កាត់ដ៏ល្បីមួយនៅទីក្រុង Los Angeles កាលពីដើមខែនេះមក វីដេអូមួយដែលងបង្ហាញភ្លើងឆាបឆេះដ៏សន្ធោសន្ធៅ ត្រូវបានគេអះអាងថា ជាទិដ្ឋភាពនៃភ្លើងឆាបឆេះទីក្រុង Los Angeles។ ការអះអាងនេះ ត្រូវបានចែករំលែកផុសផុលលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូមួយដែលបង្ហាញភ្លើងឆាបឆេះដ៏សន្ធោសន្ធៅ ត្រូវបានគេបង្ហោះនៅលើបណ្ដាញសង្គមជាមួយការអះអាងថា វាជាហេតុការណ៍ភ្លើងឆេះព្រៃដែលបានបំផ្លិចបំផ្លាញសង្កាត់ជាច្រើននៅទីក្រុង Los Angeles ស្ថិតក្នុងរដ្ឋ California របស់សហរដ្ឋអាមេរិកកាលពីដើមខែនេះ។
វីដេអូនេះ ត្រូវបានចែករំលែកព្រោងព្រាតនៅលើបណ្ដាញសង្គមហ្វេសប៊ុកពីសំណាក់អ្នកប្រើប្រាស់ហ្វេសប៊ុកកម្ពុជា ដែលបង្ហាញអារម្មណ៍តក់ស្លុតក្រោយពីបានមើលវីដេអូនេះ។
ខាងក្រោមនេះ គឺជារូបភាពផ្ដាមពីការអះអាងនៅលើបណ្ដាញសង្គមកាលពីថ្ងៃទី២៤ ខែមករា ឆ្នាំ២០២៥ ដែលសរសេររៀបរាប់ថា “ព្រះអើយដូចភ្លើងឆេះកាល USA fire at Los Angeles and LA mountain បន្ទាប់ពីឆេះនៅ Los Angeles county អស់រយៈពេល ១០ថ្ងៃចាប់ពីថ្ងៃទី០៧ដល់ថ្ងៃទី១៧ ខែមករា ឆ្នាំ២០២៥មក។ ឥឡូវនេះ ថ្ងៃទី២២ មករា ២០២៥ វេលាម៉ោងប្រហែល ១០:៥៣នាទី បានឆាបឆេះនៅភ្នំ La ចម្ងាយ៨០គីឡូម៉ែត្រ នៅផ្នែកខាងជើងនៃ Los Angeles county មានមនុស្សជាង ៣ម៉ឺននាក់ត្រូវបានជម្លៀសចេញពីតំបន់ភ្នំ La […]”។
ការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតដែរនៅក្នុងរយៈពេលប៉ុន្មានថ្ងៃមកនេះ ដែលនាំឱ្យមានការចែកចាយបន្តគ្នាកាន់តែច្រើន។
ខាងក្រោមនេះ គឺជារូបភាពផ្ដាមចេញពីការអះអាងដូចគ្នានេះដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី២៦ ខែមករា ឆ្នាំ២០២៥ ជាមួយសំណេររៀបរាប់ដូចគ្នាទាំងស្រុង ហើយត្រូវបានចែករំលែកបន្តជាច្រើន។
វីដេអូដូចគ្នានេះ ក៏ត្រូវបានគេបង្ហោះនៅលើបណ្ដាញសង្គមដទៃទៀតផងដែរ ដោយភ្ជាប់មកជាមួយការអះអាងជាភាសាអង់គ្លេសថា វាជាហេតុការណ៍ភ្លើងឆាបឆេះនៅទីក្រុង Los Angeles របស់សហរដ្ឋអាមេរិក។
ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គម Instagram កាលថ្ងៃទី១៣ ខែមករា ឆ្នាំ២០២៥ ជាមួយសំណេររៀបរាប់ជាភាសាអង់គ្លេសថា “The fires in Los Angeles continue”។
Instagram Post | Archived Link
ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គម TikTok កាលពីថ្ងៃទី១៧ ខែមករា ឆ្នាំ២០២៥ ដែលត្រូវបានអ្នកប្រើប្រាស់បណ្ដាញសង្គមនេះជាច្រើនជឿថា វាជាវីដេអូពិតប្រាកដនៃហេតុការណ៍ភ្លើងឆាបឆេះនៅទីក្រុង Los Angeles។
ដោយសារតែការអះអាងនេះផុសផុលនៅលើបណ្ដាញសង្គម គេអាចស្វែងរកការអះអាងនេះនៅលើបណ្ដាញសង្គមតាមរយៈតំណភ្ជាប់មាននៅទីនេះ៖ Link 1 (archived), Link 2 (archived), និង Link 3 (archived)។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងដូចដែលត្រូវបានរៀបរាប់ខាងលើនេះតាមរយៈការដំណើរការឧបករណ៍វិភាគមាតិកាបង្កើតឡើងដោយបញ្ញាសិប្បនិម្មិត ដែលនាំឱ្យយើងរកឃើញការពិតដូចខាងក្រោមនេះ។
នៅក្នុងដំណើរពិនិត្យផ្ទៀងផ្ទាត់វីដេអូនេះ យើងអាចកត់សម្គាល់នូវចំណុចមិនប្រក្រតីមួយចំនួនដែលបង្ហាញថា វីដេអូនេះ មិនមែនជាទិដ្ឋភាពជាក់ស្ដែងនៃហេតុការណ៍ភ្លើងឆាប់ឆេះសង្កាត់មួយនៃទីក្រុង Los Angeles នៅក្នុងរដ្ឋ California នោះឡើយ។
ចំណុចមិនប្រក្រតីមួយនៅក្នុងចំណោមនោះ គឺរូបភាពរថយន្តដែលបានប្រែប្រួលរូបរាងទៅជាអ្វីផ្សេងវិញ ឬក៏បាត់ទាំងស្រុងពីគន្លងផ្លូវឡោមព័ទ្ធដោយភ្លើងឆាបឆេះ។
ជាងនេះទៀត លទ្ធផលនៃការវាយតម្លៃដោយឧបករណ៍វិភាគមាតិកាបង្កើតឡើងដោយបញ្ញាសិប្បនិម្មិត បង្ហាញថា ទាំងរូបភាព និងសំឡេងនៃវីដេអូនេះ ត្រូវបានបង្កើតឡើងដោយកម្មវិធីបញ្ញាសិប្បនិម្មិត។
ខាងក្រោមនេះ គឺជាលទ្ធផលវាយតម្លៃដោយឧបករណ៍វិភាគមាតិកា AI ដែលវាយតម្លៃជារួមថា វីដេអូមួយនេះត្រូវបានបង្កើតឡើងដោយបច្ចេកវិទ្យាបញ្ញាសិប្បនិម្មិត។
ក្រៅពីការវាយតម្លៃខាងលើនេះ ការវាយតម្លៃដោយឧបករណ៍វិភាគមាតិកា AI មួយទៀត ក៏បង្ហាញនូវសន្ទស្សន៍រហូតដល់ ៩៩ភាគរយ ដែលមានន័យថា រូបភាពនៃវីដេអូនេះ ត្រូវបានបង្កើតឡើងដោយ AI ផងដែរ។
ខាងក្រោមនេះ គឺជារូបភាពផ្ដាមចេញពីការវាយតម្លៃដោយវេបសាយ SightEngine ដែលជាឧបករណ៍វិភាគមាតិកាបង្កើតឡើងដោយ AI។
វីដេអូដែលត្រូវបានបង្ហោះ និងចែករំលែកព្រោងព្រាតលើបណ្ដាញសង្គមនេះ ក៏ត្រូវបានស្ថាប័នត្រួតពិនិត្យព័ត៌មានក្លែងក្លាយដទៃទៀត ដូចជា AFP Fact Check និង News Meter ផ្ទៀងផ្ទាត់ផងដែរ ហើយវាយតម្លៃថា វាត្រូវបានបង្កើតឡើងដោយបច្ចេកវិទ្យាបញ្ញាសិប្បនិម្មិត។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូនេះ មិនមែនជារូបភាពជាក់ស្ដែងនៃហេតុការណ៍ភ្លើងឆាបឆេះទីក្រុង Los Angeles នោះឡើយ។ វីដេអូនេះ ត្រូវបានបង្កើតឡើងដោយបច្ចេកវិទ្យាបញ្ញាសិប្បនិម្មិត (AI)។
Title:វីដេអូ AI ត្រូវបានអះអាងថាជាហេតុការណ៍ភ្លើងឆាបឆេះក្រុង Los Angeles
Fact Check By: Jay UdomResult: False
