រូបថត ឬវីដេអូជាច្រើន ត្រូវបានចែករំលែកជារៀងរាល់ថ្ងៃនៅលើបណ្ដាញសង្គមហ្វេសប៊ុក ក្នុងនោះមានទាំងរូបថត ឬវីដេអូមួយចំនួន បាននាំឱ្យអ្នកប្រើប្រាស់បណ្ដាញសង្គមយល់ច្រឡំ។ ដូចក្នុងករណីមួយនេះ ទំព័រហ្វេសប៊ុកមួយបានបង្ហោះរូបថតទារកម្នាក់ដែលត្រូវគេបោះបង់ចោល ហើយបានស្នើសុំអ្នកប្រើប្រាស់បណ្ដាញសង្គមឱ្យទទួលយកកូននោះទៅចិញ្ចឹម។ ការបង្ហោះរូបថតជាមួយខ្លឹមសារបែបនេះ ទទួលបានការចែករំលែកយ៉ាងច្រើន ហើយអ្នកប្រើប្រាស់ហ្វេសប៊ុកមួយចំនួន បានបង្ហាញបំណងរបស់ពួកគេចង់យកទារកនោះទៅចិញ្ចឹម។ ទោះជាយ៉ាងណា ការត្រួតពិនិត្យរបស់យើង បានរកឃើញថា ការបង្ហោះរូបថត និងខ្លឹមសារបែបនេះ បាននាំឱ្យមានការយល់ច្រឡំ។
ការអះអាងលើបណ្ដាញសង្គម
កាលពីថ្ងៃទី២៦ ខែមករាកន្លងមកនេះ ទំព័រហ្វេសប៊ុកមួយបានបង្ហោះរូបថតចំនួន ៤សន្លឹក ដែលបង្ហាញទារកតូចមួយ ត្រូវបានគេបោះបង់ចោល ហើយទំព័រហ្វេសប៊ុកនេះ បានស្នើអ្នកប្រើប្រាស់បណ្ដាញសង្គមឱ្យចែករំលែកដើម្បីឱ្យបានដល់បុគ្គលដែលមានបំណងសុំយកកូននោះទៅចិញ្ចឹម។
រូបថតទារកដែលគេបោះបង់ចោលនេះ ត្រូវបានអ្នកប្រើប្រាស់ហ្វេសប៊ុកនិយាយភាសាខ្មែរចែករំលែករហូតដល់ជាង ៣០០ដង ហើយអ្នកប្រើប្រាស់ហ្វេសប៊ុកមួយចំនួន បានបញ្ចេញមតិ និងប្រតិកម្មចម្រុះបែប។
ទំព័រហ្វេសប៊ុកដដែលនេះ មិនបានបញ្ជាក់ទេថា ទារកនោះ ត្រូវបានគេបោះបង់ចោលនៅទីណា ឬនៅពេលណានោះឡើយ ប៉ុន្តែ អ្នកប្រើប្រាស់ហ្វេសប៊ុកមួយចំនួន បានបញ្ចេញមតិរបស់ពួកគេ ដោយបានស្នើសុំយកទារកនោះទៅចិញ្ចឹម។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកនោះ ដែលសរសេររៀបរាប់ថា «ករណី… ទុកកូនចោល កូនគួរអោយ[ឱ្យ]ស្រឡាញ់ កូនគ្នាមិនដឹងអីទេ ហេតុ[អ្វី]បានជួបឪពុកម្ដាយឃោឃៅបែបនេះ ជួយស៊ែរអោយ[ឱ្យ]សប្បុរសជនយកទៅចិញ្ចឹម admin ក៏ស្រឡាញ់ គួរអោយអាណិតណាស់»។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតទារកដែលត្រូវបានគេបោះបង់ចោលនេះតាមរយៈការដំណើរការកម្មវិធី Google Reverse Image ដែលនាំឱ្យយើងបានឃើញរូបថតដូចគ្នា និងព័ត៌មានលម្អិតអំពីទារកនេះ។
រូបថតរបស់ទារកនេះ ត្រូវបានរកឃើញនៅផ្សព្វផ្សាយនៅលើវេបសាយ Huynh Tieu Huong ដែលជាគេហទំព័ររបស់អង្គការសប្បុរសធម៌មួយឈ្មោះថា មជ្ឈមណ្ឌលមនុស្សធម៌ដើម្បីចិញ្ចឹមកុមារកំព្រា និងពិការ (Humanitarian Center for Raising Orphans and Disable Children)។
មជ្ឈមណ្ឌលសប្បុរសធម៌មួយនេះ បានរាយការណ៍ថា ទារកម្នាក់អាយុទើបតែបានប្រហែល ១០ថ្ងៃប៉ុណ្ណោះ ត្រូវបានគេប្រទះឃើញនៅព្រឹកថ្ងៃទី២០ ខែមករា ឆ្នាំ២០២២ នៅឯមុខមជ្ឈមណ្ឌលមួយនេះតែម្ដង ដែលមានទីតាំងស្រុក ឌី អាន ខេត្តប៊ិញឌឿង ស្ថិតនៅវៀតណាមខាងត្បូង។
មជ្ឈមណ្ឌលកុមារកំព្រាមួយនេះ បានទទួលយកទារកនេះទៅចិញ្ចឹមនៅក្នុងមណ្ឌល បន្ទាប់ពីបានជូនដំណឹងរួចរាល់ទៅប៉ូលិសនៅក្នុងខេត្តប៊ិញឌឿង។
មណ្ឌលកុមារកំព្រាមួយនេះ បញ្ជាក់ថា ទារកត្រូវបានគេបោះបង់ចោលមួយនេះដោយរុំជាមួយកន្សែងពោះគោពណ៌លឿង ពាក់មួកពណ៌លឿងស្រាល ពាក់ស្រោមដៃពណ៌លឿង និងពាក់អាវពណ៌ស ហើយកន្ត្រកពណ៌ក្រហមផ្ទុកទៅដោយសម្ភារៈសម្រាប់ទារក ក៏ត្រូវបានគេរកឃើញនៅក្បែរទារកនោះផងដែរ។
huynhtieuhuong | Archived Link
សន្និដ្ឋាន
Fact Crescendo Cambodia បានរកឃើញថា រូបថតដែលត្រូវបានបង្ហោះដោយទំព័រហ្វេសប៊ុកដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយដែលបណ្ដាលឱ្យមានការភ័ន្តច្រឡំ។ ទារកដែលត្រូវបានគេបោះបង់ចោលនេះ មិនមែនកើតឡើងនៅប្រទេសកម្ពុជានោះឡើយ។ ទារកអាយុប្រហែល ១០ថ្ងៃនេះ ត្រូវបានគេបោះបង់ចោលនៅមុខមណ្ឌលកុមារកំព្រាមួយ ស្ថិតនៅក្នុងខេត្តប៊ិញឌឿង វៀតណាមខាងត្បូង កាលពីថ្ងៃទី២០ ខែមករាកន្លងមកនេះ។
Title:ទារកដែលគេបោះបង់ចោលនៅវៀតណាម នាំឱ្យអ្នកប្រើប្រាស់ហ្វេសប៊ុកនៅកម្ពុជាយល់ច្រឡំ
Fact Check By: Jay UdomResult: Misleading
