ការផ្ទុះឡើងចំនួនឆ្លង និងករណីស្លាប់ដ៏ច្រើនជារៀងរាល់ថ្ងៃនៅក្នុងប្រទេសឥណ្ឌាដោយសារតែមេរោគកូវីដ-១៩ទម្រង់ថ្មីនោះ បានបង្ខំឱ្យកម្ពុជាបិទជើងហោះហើរ និងការធ្វើដំណើរទាំងអស់មកពីប្រទេសយក្សអាស៊ីខាងត្បូងមួយនេះ។ ខណៈដែលឥណ្ឌាកំពុងប្រឈមមុខនឹងវិបត្តិកូវីដ-១៩នេះ រូបថត រូបភាព វីដេអូ និងព័ត៌មានជាច្រើនអំពីវិបត្តិនៅប្រទេសឥណ្ឌា ត្រូវបានផ្សព្វផ្សាយ និងចែកចាយយ៉ាងច្រើនលើបណ្ដាសង្គម។ ក្នុងចំណោមនោះ រូបថតមួយសន្លឹកបង្ហាញពីសាកសពជាច្រើនដែលត្រូវបានវេចខ្ចប់រក្សាទុកនៅទីតាំងមួយ ត្រូវបានបង្ហោះចូលបណ្ដាញសង្គមផងដែរជាមួយនឹងការអះអាងថា វាជាទិដ្ឋភាពនៃសោកនាដកម្មដោយសារមេរោគកូវីដ-១៩ ដែលបានកើតឡើងនៅប្រទេសឥណ្ឌា។ ទោះជាយ៉ាងណា ការផ្ទៀងផ្ទាត់ទៅលើរូបថតនេះ រកឃើញថា ការភ្ជាប់រូបថតនេះទៅនឹងសោកនាដកម្មនៅក្នុងប្រទេសឥណ្ឌា មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០២ ខែឧសភានេះ រូបថតមួយសន្លឹកក្នុងចំណោមរូបថត ៣សន្លឹកផ្សេងទៀត ត្រូវបានបង្ហោះនៅលើបណ្ដាញសង្គមដោយអ្នកប្រើហ្វេសប៊ុកម្នាក់ ដែលភ្ជាប់ជាមួយការអះអាងថា រូបថតនោះ គឺសពដ៏ច្រើនដោយសារតែវិបត្តិកូវីដ-១៩នៅក្នុងប្រទេសឥណ្ឌា។
រូបថតជាមួយសំណេរនេះ ត្រូវបានចែកចាយតៗគ្នារហូតដល់ទៅរាប់ពាន់ដងពីសំណាក់អ្នកប្រើបណ្ដាញសង្គមហ្វេសប៊ុកនិយាយភាសាខ្មែរ និងមានការបញ្ចេញប្រតិកម្ម និងយោបល់ចម្រុះបែប។ ប៉ុស្តិ៍ជាមួយរូបថតនេះ ក៏ត្រូវបានចែកចាយទៅកាន់គ្រុបផ្សេងៗលើបណ្ដាញសង្គមហ្វេសប៊ុកផងដែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុក សរសេររៀបរាប់ថា «#ឋាននរកនៃប្រទេសឥណ្ឌា។ ប្រទេសឥណ្ឌាពេលនេះបានប្រែក្លាយទៅជាសោកនាដកម្មដ៏រន្ធត់មួយ ដោយសារតែជំងឺឆ្លងកូវីដ១៩ នេះក៏ព្រោះតែប្រជាពលរដ្ឋឥណ្ឌាមិនស្ដាប់តាមការណែនាំអំពាវនាវរបស់ក្រសួងសុខាភិបាលរបស់ពួកគេ គឺជំនឿរលើសាសនាពួកគេច្រើនពេក ទើបធ្វើឲ្យមានការបាត់បង់ជីវិតប្រជាជនច្រើនបែបនេះ រកតែកន្លែងដាក់សាកសពបូជា ស្ទើរតែមិនបាន កន្លែងដុតសាកសព ដូចជាកន្លែងដុតសម្រាម ។
«សូមចូលរួមអនុវត្តន៍ការពារតាមការណែនាំរបស់ក្រសួងសុខាភិបាល ឲ្យបានម៉ឺងម៉ាត់ និងខ្ជាប់ខ្ជួន ៣ការពារ ៣កុំ 
ការពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យរូបថតនេះតាមរយៈកម្មវិធីស្វែងរករូបថត TinEye ដែលនាំទៅប្រទះឃើញរូបថតដូចគ្នានេះ និងព័ត៌មានលម្អិតអំពីរូបថតនេះផងដែរ។
បើតាមវេបសាយរបស់ក្រុមហ៊ុនប្រព័ន្ធផ្សព្វផ្សាយ Getty Images រូបថតមួយសន្លឹកនេះ ត្រូវបានថតដោយអ្នកថតរូបសារព័ត៌មាន លោក Macro Di Lauro កាលពីខែឧសភា ឆ្នាំ២០០៣។ ខ្លឹមសារនៃរូបថតនេះ បង្ហាញកុមារជនជាតិអ៊ីរ៉ាក់មួយរូប រត់កាត់សពជាច្រើនដែលត្រូវបានវេចខ្ចប់ និងរក្សាទុកនៅបរិវេណនៃសាលារៀនមួយ នៅទីក្រុងអាល់ មូសាយយីប (Al MUSAYYIB) ស្ថិតក្នុងប្រទេសអ៊ីរ៉ាក់។
ព័ត៌មានលម្អិតនៃរូបថតមួយសន្លឹកនេះ រៀបរាប់ថា បំណែកសាកសពជាច្រើន ត្រូវបានគេប្រមូលយកចេញពីរណ្ដៅសពរួមដ៏ធំមួយ ដែលត្រូវបានគេរកឃើញនៅវាលខ្សាច់ជាយក្រុងអាល់ មូសាយយីប ស្ថិតនៅចម្ងាយប្រហែល ៥០គីឡូម៉ែត្រភាគខាងត្បូងនៃរដ្ឋធានីបាដាដ។
បំណែកសាកសពទាំងនោះ ត្រូវបានគេរៀបចំវេចខ្ចប់ និងរក្សាទុកនៅសាលារៀនមួយ ដើម្បីឱ្យសាច់ញាតិមកស្វែងរក និងកំណត់អត្តសញ្ញាណសមាជិកគ្រួសាររបស់ខ្លួនដែលបានបាត់ខ្លួន ក្នុងនោះមានទាំងក្មេងៗផងដែរ។
អ្នកថតរូប លោក Macro Di Lauro បានសាកសួរប្រជាជនអ៊ីរ៉ាក់នៅក្នុងតំបន់នោះ ដែលនិយាយថា បំណែងសាកសពជនមូស្លីមស៊ីអ៊ីតរាប់រយននាក់ ត្រូវបានប្រហារជីវិតដោយរបប សាដាម ហ៊ូសេន បន្ទាប់ពីពួកគេងើបឡើងបះបោរនៅក្រោយសង្គ្រាមឈូងសមុទ្រនៅឆ្នាំ១៩៩១។
សន្និដ្ឋាន
Fact Crescendo Cambodia បានរកឃើញថា ការប្រើប្រាស់រូបថតនេះជាមួយសំណេរបរិយាយភ្ជាប់ទៅនឹងសោកនាដកម្មវិបត្តិកូវីដ-១៩នៅក្នុងប្រទេសឥណ្ឌានោះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាសពមនុស្សស្លាប់ដោយសារជំងឺកូវីដ-១៩នៅក្នុងប្រទេសឥណ្ឌាទេ។ រូបថតនេះ គឺជាបំណែកសាកសពដែលត្រូវបានវេចខ្ចប់រក្សាទុកនៅក្នុងប្រទេសអ៊ីរ៉ាក់ បន្ទាប់ពីប្រមូលយកចេញពីរណ្ដៅសពរួមដ៏ធំមួយនៅទីក្រុងអាល់ មូសាយយីប កាលពីខែឧសភា ឆ្នាំ២០០៣។
Title:រូបថតបង្ហាញសាកសពជាច្រើនត្រូវបានភ្ជាប់ដោយមិនត្រឹមត្រូវទៅនឹងវិបត្តិកូវីដ-១៩នៅឥណ្ឌា
Fact Check By: Jay UdomResult: False
