- >>
- Political
សំណេរមួយលើហ្វេសប៊ុករបស់រដ្ឋមន្ត្រីព័ត៌មានត្រូវបានកាត់តឱ្យខុសពីខ្លឹមសារដើម
ស្របពេលលោកនាយករដ្ឋមន្ត្រី ហ៊ុន សែន បានក្លាយជាផ្ទាំងស៊ីបនៃពាក្យចរចាមអារ៉ាម ការរិះគន់ និងការចោទប្រកាន់ផ្សេងៗនៅក្នុងឆាកនយោបាយរបស់លោកជាច្រើនឆ្នាំមកហើយ រូបថតភ្ជាប់ដោយសំណេរមួយថា លោក ខៀវ កាញារីទ្ធ ចុះត្រួតពិនិត្យទីតាំងដើម្បីដាក់កាមេរ៉ាតាមបណ្ដោយផ្លូវ ដែលត្រូវដង្ហែសពនាយករដ្ឋមន្ត្រី។ ការបង្ហោះនេះ ត្រូវបានចែកចាយ និងប្រតិកម្មជាច្រើនយ៉ាងផុសផុលនាពេលថ្មី។ ទោះជាយ៉ាងណា ការផ្ទៀងផ្ទាត់របស់យើង រកឃើញថា សំណេរខាងលើ គ្រាន់តែជារូបភាពកាត់តតែប៉ុណ្ណោះ។
ការអះអាងលើបណ្តាញសង្គម
រូបថតផ្ដាម ដោយភ្ជាប់ជាមួយសំណេរកាលពីថ្ងៃអង្គារ ម្សិលមិញនេះ បានលើកឡើងថា លោករដ្ឋមន្ដ្រីក្រសួងព័ត៌មាន បានចុះពិនិត្យទីតាំងដាក់កាមេរ៉ាតាមបណ្តោយផ្លូវដែលត្រូវដង្ហែសពសម្តេច ហ៊ុន សែន។ ការអះអាងបែបនេះ ត្រូវបានចែករំលែកបន្ដជាច្រើនដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយក៏មានការបញ្ចេញមតិចោទសួរពីភាពត្រឹមត្រូវនៃការអះអាងនេះផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គម កាលពីថ្ងៃទី២៣ ខែឧសភា ដែលរៀបរាប់ថា «ចុះពិនិត្យទីតាំងដាក់កាមេរ៉ាតាមបណ្តោយផ្លូវដែលត្រូវដង្ហែសពសម្តេច ហ៊ុន សែន»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើសារដែលត្រូវបានបង្ហោះលើបណ្ដាញសង្គមនេះ តាមរយៈការពិនិត្យមើលសារបង្ហោះរបស់លោករដ្ឋមន្រ្ដីក្រសួងព័ត៌មាន ដែលនាំឱ្យយើងរកឃើញការពិតដូចខាងក្រោមនេះ។
កាលពីថ្ងៃសុក្រ ទី១៩ ខែមេសា ឆ្នាំ២០២៣កន្លងមកថ្មីៗនេះ លោករដ្ឋមន្រ្ដីក្រសួងព័ត៌មាន ខៀវ កាញារីទ្ធ បានបង្ហោះរូបថតមួយសន្លឹកនៅក្នុងគណនីហ្វេសប៊ុករបស់ខ្លួន បង្ហាញទិដ្ឋភាពលោកជិះម៉ូតូពីក្រោយនគរបាលម្នាក់។
រូបថតនេះ ត្រូវបានភ្ជាប់ជាមួយសំណេររៀបរាប់ថា លោកអរគុណទៅដល់មនុស្សម្នាក់ដែលបានថតរូបលោកអំឡុងពេលចុះពិនិត្យទីតាំងដាក់កាមេរ៉ាតាមបណ្ដោយផ្លូវដែលត្រូវដង្ហែសពសម្ដេច ជា ស៊ីម។
ខាងក្រោមនេះ គឺជារូបភាពផ្ដាមចេញពីគណនីហ្វេសប៊ុករបស់លោក ខៀវ កាញារីទ្ធ ដែលរៀបរាប់ថា «អរគុណលោក Kim Hong ដែលបានផ្ញើរូបមកអោយ - ចុះពិនិត្យទីតាំងដាក់កាមេរ៉ាតាមបណ្ដោយផ្លូវដែលត្រូវដង្ហែសពសម្ដេច ជា ស៊ីម»។
សូមមើលរូបភាពប្រៀបធៀបគ្នារវាងរូបភាពត្រូវបានកាត់ត និងរូបភាពច្បាប់ដើម ដែលត្រូវបានផ្ដាមចេញពីគណនីហ្វេសប៊ុករបស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ។
ក្រុមការងាររបស់ Fact Crescendo Cambodia ក៏បានរកឃើញផងដែរថា លោកនាយករដ្ឋមន្ដ្រី ហ៊ុន សែន នៅរស់រានមានជីវិតធម្មតា និងទើបតែបង្ហាញវត្តមាននៅក្នុងពិធីសម្ពោធទីតាំងថ្មីនៃសាកលវិទ្យាល័យភូមិន្ទវិចិត្រសិល្បៈ និងប្រគល់សញ្ញាបត្រជូនដល់និស្សិតសាលាមួយនេះនៅព្រឹកថ្ងៃនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការបង្ហោះរូបភាពដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សំណេររបស់លោក ខៀវ កាញារីទ្ធ ដែលបង្ហោះលើទំព័រហ្វេសប៊ុករបស់លោក ត្រូវបានគេកែប្រែឱ្យខុសពីខ្លឹមសារនៃសំណេរដើម។ សំណេរដើមរបស់លោកដែលបង្ហោះនៅលើបណ្ដាញសង្គម រៀបរាប់ថា លោកចុះពិនិត្យមើលការបំពាក់កាមេរ៉ាតាមដងផ្លូវដែលត្រូវដង្ហែសពលោក ជា ស៊ីម។
Title:សំណេរមួយលើហ្វេសប៊ុករបស់រដ្ឋមន្ត្រីព័ត៌មានត្រូវបានកាត់តឱ្យខុសពីខ្លឹមសារដើម
Written By: Kakada SimResult: Altered
