ការអះអាងដ៏ផុសផុលនៅថ្ងៃនេះ បានផ្សព្វផ្សាយថា មេនគរបាលជាតិកម្ពុជា លោក ស ថេត បានរងប្រហារ ហើយត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។ ការអះអាងនេះ ត្រូវបានគេបង្ហោះ និងចែករំលែកព្រោងព្រាតលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
អ្នកនយោបាយបក្សប្រឆាំងនៅឯក្រៅប្រទេស បានបង្ហោះការអះអាងនៅលើបណ្ដាញសង្គមនាថ្ងៃនេះថា អគ្គស្នងការនគរបាលជាតិ លោក ស ថេត ត្រូវបានជនមិនស្គាល់អត្តសញ្ញាញបាញ់ប្រហារនៅក្នុងកន្លែងធ្វើការ និងត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី២៦ ខែធ្នូ ឆ្នាំ២០២៤ ដែលសរសេររៀបរាប់ថា “ស ថេត ត្រូវបានបញ្ជូនទៅសង្គ្រោះបន្ទាន់បន្ទាប់ពីជនមិនស្គាល់អត្តសញ្ញាណចូលទៅបាញ់នៅក្នុងការិយាល័យធ្វើការ”។
បន្ទាប់មកទៀត ទំព័រហ្វេសប៊ុកដដែលនេះ បានបង្ហោះការអះអាងមួយទៀតថា ខ្មាន់កាំភ្លើងបានបាញ់ប្រហារលើលោក ស ថេត ត្រូវបានអង្គរក្សការពារអគ្គស្នងការនគរបាលរូបនេះ បាញ់សម្លាប់ភ្លាមៗនៅមុខក្រសួងមហាផ្ទៃ។
ខាងក្រោមនេះ គឺជារូបភាពផ្ដាមចេញពីការអះអាងរបស់ទំព័រហ្វេសប៊ុកដដែលនេះនៅថ្ងៃទី២៦ ខែធ្នូ ឆ្នាំ២០២៤ ដែលរៀបរាប់ថា “ឧក្រិដ្ឋជនដែលបាញ់សម្លាប់ឧត្ដមសេនីយ៍ ស ថេត ត្រូវបានអង្គរក្សលោក ស ថេត បាញ់ស្លាប់ភ្លាមៗនៅមុខក្រសួងមហាផ្ទៃ”។
ប៉ុន្មានក្រោយមកទៀត ទំព័រហ្វេសប៊ុកដដែលនេះ ក៏បានបង្ហោះការអះអាងមួយទៀតថា មេនគរបាលជាន់ខ្ពស់ ១០នាក់ទៀតដែលស្និទ្ធនឹងលោក ស ថេត និងរដ្ឋមន្ត្រីក្រសួងមហាផ្ទៃ លោក ស សុខា អាចប្រឈមមុខនឹងការដកចេញពីតំណែង ប្រសិនបើពួកគេមិនងាកទៅគាំទ្រលោកនាយករដ្ឋមន្ត្រី ហ៊ុន ម៉ាណែត។
ខាងក្រោមនេះ គឺជារូបភាពផ្ដាមចេញពីការអះអាងដោយទំព័រហ្វេសប៊ុកឈ្មោះ Samdech Seng Ratana ដែលគេស្គាល់ថា ជាអ្នកនយោបាយបក្សប្រឆាំងកំពុងរស់នៅឯសហរដ្ឋអាមេរិក។
ការបង្ហោះការអះអាងរបស់ទំព័រហ្វេសប៊ុកនេះ ត្រូវបានចែករំលែកបន្តជាច្រើនដង ហើយក៏ទទួលបានប្រតិកម្មពីអ្នកប្រើប្រាស់បណ្ដាញសង្គមផងដែរ ក្នុងនោះមានអ្នកប្រើប្រាស់ហ្វេសប៊ុកមួយចំនួនជឿលើព័ត៌មាននេះ ហើយមួយចំនួនទៀតបានចោទសួរពីភាពត្រឹមត្រូវនៃការអះអាងនេះ។
ការត្រួតពិនិត្យការពិត
Fact Crescendo បានចាប់ផ្ដើមផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលសេចក្ដីបំភ្លឺរបស់ក្រសួងមហាផ្ទៃ អគ្គស្នងការនគរបាលជាតិ និងស្ថាប័នដទៃទៀតរបស់រដ្ឋាភិបាល ដែលនាំឱ្យយើងរកឃើញការពិតដូចខាងក្រោមនេះ។
បន្ទាប់ពីព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម អ្នកនាំពាក្យក្រសួងមហាផ្ទៃ លោក ទូច សុខៈ បានបំភ្លឺនៅថ្ងៃនេះនៅក្នុងវីដេអូមួយដែលត្រូវបានផ្សព្វផ្សាយលើទំព័រហ្វេសប៊ុកក្រសួងថា ព័ត៌មានក៏ដូចជាការអះអាងដូចដែលរៀបរាប់ខាងលើនេះ គឺជាព័ត៌មាន “ក្លែងក្លាយ” ដែលត្រូវបានបង្កើតឡើងដើម្បីមូលបង្កាច់ថ្នាក់ដឹកនាំក្រសួង និងប្រមុខរាជរដ្ឋាភិបាល។
ខាងក្រោមនេះ គឺជាវីដេអូទាំងមូលនៃការបំភ្លឺរបស់អ្នកនាំពាក្យ លោក ទូច សុខៈ ដែលផ្សព្វផ្សាយលើទំព័រហ្វេសប៊ុកក្រសួងមហាផ្ទៃ នៅថ្ងៃទី២៦ ខែធ្នូ ឆ្នាំ២០២៥។
នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ក៏បានចាត់ទុកការអះអាងនេះជាព័ត៌មាន “ក្លែងក្លាយ”ដែរ ហើយថែមទាំងបង្ហាញរូបថតអគ្គស្នងការនគរបាលជាតិ លោក ស ថេត ចូលរួមក្នុងពិធីផ្សព្វផ្សាយច្បាប់ប្រឆាំងអំពើពុករលួយនៅរាជធានីភ្នំពេញនៅព្រឹកថ្ងៃនេះជាមួយប្រធានអង្គភាពប្រឆាំងអំពើពុករលួយ លោក ឱម យិនទៀង ទៀតផង។
ទំព័រហ្វេសប៊ុកផ្លូវការរបស់លោក ស ថេត ក៏បានបង្ហោះរូបថតលោកជាច្រើនសន្លឹកនៅថ្ងៃនេះ ដែលបង្ហាញរូបលោកចូលរួមនៅក្នុងកម្មវិធីផ្សព្វផ្សាយច្បាប់ប្រឆាំងអំពើពុករលួយជាមួយលោក ឱម យិនទៀង។
សេចក្ដីរាយការណ៍ព័ត៌មានរបស់សារព័ត៌មានភ្នំពេញ ប៉ុស្តិ៍ ដែលបានដកស្រង់សម្ដីអ្នកនាំពាក្យក្រសួងព័ត៌មាន បានឱ្យដឹងថា ក្រសួងបានកត់ត្រាព័ត៌មានក្លែងក្លាយ ១,៧០១ករណីនៅឆមាសទី១នៃឆ្នាំ២០២៤នេះ ដោយបានកើនឡើង ១២ភាគរយបើធៀបទៅនឹងតួលេខក្នុងរយៈពេលដូចគ្នាកាលពីឆ្នាំ២០២៣។ សម្រាប់ឆ្នាំ២០២៣ទាំងមូល ក្រសួងបានកត់ត្រាព័ត៌មានក្លែងក្លាយជាង ៣,០០០ករណី។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instgram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ក្រសួងមហាផ្ទៃ បានបញ្ជាក់ជាសាធារណៈថា ព័ត៌មាន ឬការអះអាងដូចដែលរៀបរាប់ខាងលើនេះ គឺជាព័ត៌មាន “ក្លែងក្លាយ”។ អគ្គស្នងការនគរបាលជាតិ លោក ស ថេត មិនបានរងការបាញ់ប្រហារដូចការអះអាងនោះឡើយ។ ផ្ទុយទៅវិញ លោក ស ថេត បានបង្ហាញវត្តមាននៅក្នុងកម្មវិធីផ្សព្វផ្សាយច្បាប់ប្រឆាំងអំពើពុករលួយនៅថ្ងៃនេះ។
Title:ព័ត៌មានមិនពិតផ្សាយថា មេនគរបាលជាតិត្រូវបានខ្មាន់កាំភ្លើងបាញ់ប្រហារ
Written By: Jay UdomResult: False
