ឈុតឆាកសម្ដែងក្នុងបទវីដេអូចម្រៀងមួយនាំឱ្យអ្នកប្រើប្រាស់ហ្វេសប៊ុកយល់ច្រឡំ
ពីរថ្ងៃមុនទិវានៃក្ដីស្រឡាញ់ វីដេអូឃ្លីបមួយដែលបង្ហាញនូវការប្រទាញ់ប្រទងគ្នារវាងបុរសពីរនាក់នៅក្នុងពិធីមង្គលការមួយ ត្រូវបានបង្ហោះនៅលើបណ្ដាញសង្គម ដែលនាំឱ្យមានការចែករំលែកបន្តជាច្រើនដង និងមានការបញ្ចេញមតិជាច្រើនផងដែរ។ អ្នកប្រើប្រាស់ហ្វេសប៊ុកមួយចំនួន បានបញ្ចេញមតិប្រតិកម្មនឹងវីដេអូឃ្លីបនោះ ដោយគិតថា ការប្រទាញ់ប្រទងនោះ គឺជារឿងពិតកើតឡើងនៅកម្ពុជា។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា ការបង្ហោះវីដេអូឃ្លីបនោះ មិនត្រឹមត្រូវនោះឡើយ ដែលនាំឱ្យមានការយល់ច្រឡំ។
ការអះអាងលើបណ្ដាញសង្គម
កាលពីថ្ងៃសៅរ៍សប្ដាហ៍មុន វីដេអូឃ្លីបមួយ ដែលបង្ហាញបុរសម្នាក់យំសោកនៅក្នុងពិធីមង្គលការមួយរហូតបណ្ដាលឱ្យមានការប្រទាញប្រទង់គ្នាជាមួយកូនកម្លោះនោះ ត្រូវបានបង្ហោះលើបណ្ដាញសង្គម។
វីដេអូឃ្លីបរយៈពេល ២នាទីកន្លះមួយនេះ ទទួលបានការចូលទស្សនារហូតដល់ជាង ២លាន ៤សែនដង ការចែករំលែកបន្តដល់ទៅជាង ២៥,០០០ដង និងមានការបញ្ចេញមតិយ៉ាងច្រើន។
ខាងក្រោមនេះ គឺជាវីដេអូដែលត្រូវបានបង្ហោះដោយទំព័រហ្វេសប៊ុក Chantrea Online Shop ជាមួយការរៀបរាប់ថា «មួយឃ្លីបនេះ ដាក់បទអីក៏ត្រូវដែរ»។
អ្នកប្រើប្រាស់ហ្វេសប៊ុកមួយចំនួន បានបញ្ចេញមតិទៅនឹងវីដេអូនេះ ដោយគិតថា អ្វីដែលពួកគេបានឃើញនៅក្នុងវីដេអូ គឺជារឿងរ៉ាវកើតឡើងពិតប្រាកដនៅផ្នែកណាមួយនៃប្រទេសកម្ពុជា ដែលនេះជាមូលហេតុនាំឱ្យយើងសម្រេចផ្ទៀងផ្ទាត់ទៅលើវីដេអូឃ្លីបនេះ។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើវីដេអូដែលត្រូវបានបង្ហោះដោយទំព័រហ្វេសប៊ុកខាងលើតាមរយៈ Reverse Image Search ដែលនាំឱ្យយើងបានរកឃើញការពិតនៃវីដេអូឃ្លីបនេះ។
វីដេអូឃ្លីបរយៈពេលជាង ២នាទីនេះ ត្រូវបានរកឃើញនៅក្នុងឆាណែល YouTube របស់ផលិតកម្ម Bong Ath Media ដែលបង្ហាញឱ្យឃើញថា វាគឺជាឈុតឆាកសម្ដែងនៅក្នុងវីដេអូចម្រៀងមានចំណងជើងថា «ព្រមឱ្យអូនការ»។ វីដេអូចម្រៀងមួយបទនេះ ត្រូវបានដាក់បង្ហោះនៅលើឆាណែល YouTube របស់ផលិតកម្មនេះកាលពីថ្ងៃទី១៤ ខែកុម្ភៈ នៅចំថ្ងៃដែលពិភពលោកប្រារព្ធទិវាបុណ្យនៃក្ដីស្រឡាញ់។
សម្រាប់វីដេអូចម្រៀងពេញទាំងស្រុង គេអាចចូលទៅទស្សនានៅក្នុងឆាណែល YouTube តាមរយៈតំណភ្ជាប់នៅទីនេះ ឬក៏តាមរយៈតំណភ្ជាប់ត្រូវបានរក្សាទុកមាននៅទីនេះ។
Bong Ath Media’s Video Music on YouTube channel| Archived Link
វីដេអូចម្រៀងមួយនេះ ត្រូវបានបង្ហោះនៅលើទំព័រហ្វេសប៊ុករបស់ផលិតកម្ម Bong Ath Media ផងដែរកាលពីថ្ងៃម្សិលមិញនេះ ដែលគេអាចមើលវីដេអូចម្រៀងទាំងស្រុងបានតាមរយៈតំណភ្ជាប់នៅទីនេះ។
កាលពីចុងខែវិច្ឆិកាឆ្នាំមុន វីដេអូឃ្លីបមួយផ្នែកនៃវីដេអូចម្រៀងមួយរបស់ផលិតកម្មមួយនេះ ត្រូវបានបង្ហោះនៅលើបណ្ដាញសង្គមហ្វេសប៊ុកផងដែរ ដែលបណ្ដាលឱ្យអ្នកប្រើប្រាស់បណ្ដាញសង្គមនិយាយភាសាខ្មែរ យល់ច្រឡំ ហើយក៏ត្រូវបានសារព័ត៌មានក្នុងប្រទេសថៃយកទៅចុះផ្សាយផងដែរ។
ស្ថាប័នត្រួតពិនិត្យការពិត Fact Crescendo Cambodia បានផ្ទៀងផ្ទាត់នៅលើវីដេអូឃ្លីបនោះ ហើយរកឃើញថា វីដេអូឃ្លីបនោះ គឺជាផ្នែកមួយនៃវីដេអូចម្រៀង MV មានចំណងជើងថា «បើមិនច្បាស់លាស់ ម្ដេចឱ្យអូនចាំ» ដែលច្រៀងដោយតារាចម្រៀង កញ្ញា សូ សុផលីន។ តំណភ្ជាប់នៅទីនេះ គឺជាអត្ថបទទាំងស្រុងរបស់ស្ថាប័នត្រួតពិនិត្យការពិត Fact Crescendo Cambodia ដែលបានផ្ទៀងផ្ទាត់លើវីដេអូឃ្លីបនោះ។
សន្និដ្ឋាន
Fact Crescendo Cambodia បានរកឃើញថា វីដេអូឃ្លីបដែលត្រូវបានបង្ហោះលើបណ្ដាញសង្គមដូចដែលបានរៀបរាប់ខាងលើនេះ បាននាំឱ្យមានការយល់ច្រឡំនៅលើបណ្ដាញសង្គម។ វីដេអូឃ្លីបនោះ មិនមែនជារឿងរ៉ាវពិតប្រាកដកើតឡើងនៅកម្ពុជានោះឡើយ។ វីដេអូឃ្លីបនោះ គឺជាផ្នែកមួយនៃវីដេអូចម្រៀង MV មានចំណងជើងថា «ព្រមឱ្យអូនការ»របស់ផលិតកម្ម Bong Ath Media ដែលចេញផ្សាយលើបណ្ដាញសង្គមកាលពីថ្ងៃម្សិលមិញនេះ។
Title:ឈុតឆាកសម្ដែងក្នុងបទវីដេអូចម្រៀងមួយនាំឱ្យអ្នកប្រើប្រាស់ហ្វេសប៊ុកយល់ច្រឡំ
Fact Check By: Jay UdomResult: Missing Context