ថ្មីៗនេះ វីដេអូឃ្លីបមួយ បង្ហាញប្រាសាទ Tikal ក្នុងប្រទេសហ្គាតេម៉ាឡា ត្រូវបានបង្ហោះរួមជាមួយនឹងទិដ្ឋភាពសត្វតូចៗមួយក្រុម ដែលមើលទៅដូចជាដាយណូស័រ។ វាក៏ត្រូវបានភ្ជាប់ជាមួយនឹងការអះអាងថា សត្វទាំងនោះ គឺជាដាយណូស័រពិតប្រាកដ។ អ្នកប្រើប្រាស់ប្រព័ន្ធផ្សព្វផ្សាយសង្គមជាច្រើន បានចែករំលែក និងប្រតិកម្មចំពោះការអះអាងនេះ។ ទោះជាយ៉ាងណាក៏ដោយ បន្ទាប់ពីធ្វើការផ្ទៀងផ្ទាត់ជាមួយ Google Reverse Image search យើងបានរកឃើញថា ការអះអាងនេះ ធ្វើឱ្យមានការយល់ច្រឡំ។
ការអះអាងលើបណ្ដាញសង្គម
វីដេអូឃ្លីបមួយ បង្ហាញទិដ្ឋភាពសត្វមួយក្រុម ត្រូវបានលើកឡើងថា ជាក្រុមសត្វដាយណូស័រ។ ឃ្លីបវីដេអូជាមួយសំណេរបែបនេះ ត្រូវបានចែករំលែកព្រោងព្រាតនៅលើបណ្ដាញសង្គមហ្វេសប៊ុកពីសំណាក់អ្នកប្រើប្រាស់ហ្វេសប៊ុកកម្ពុជា ដែលបានបញ្ចេញប្រតិកម្មចម្រុះបែប និងមតិយោបល់ផ្សេងៗ ក្នុងនោះមានការចោទសួរថា តើសត្វដាយណូស័រពិតជាមានជីវិតមែនឬនាពេលបច្ចុប្បន្ន។
ខាងក្រោមនេះ គឺជាឃ្លីបវីដេអូទាំងស្រុង ត្រូវបានបង្ហោះនៅលើបណ្ដាញសង្គមកាលពីថ្ងៃទី០៥ ខែកុម្ភៈ ឆ្នាំ២០២៥ ជាមួយសំណេររៀបរាប់ថា «ដាយណូស័រ ច្បាស់ៗ»។
https://www.facebook.com/reel/2043455812838115
ក្រៅពីការអះអាងខាងលើនេះ ឃ្លីបវីដេអូ បង្ហាញទិដ្ឋភាពសត្វតូចៗមួយក្រុម ដែលអះអាងថាជាសត្វដាយណូស័រនោះ ក៏ត្រូវបានបង្ហោះនៅលើបណ្ដាញសង្គម Instagram ផងដែរកាលពីថ្ងៃទី០៦ ខែកុម្ភៈ ឆ្នាំ២០២៥នេះ។
Instagram Post | Archived Link
ខាងក្រោមនេះ គឺជាវីដេអូដូចគ្នាមួយផ្សេងទៀត ដែលត្រូវបានបង្ហោះនៅលើបណ្ដាញសង្គម TikTok ជាមួយសំណេររៀបរាប់ថា «Scientist report Dinosaur revived in 2025» ឬអាចប្រែជាភាសាខ្មែរថា «របាយការណ៍អ្នកវិទ្យាសាស្ត្របានបញ្ជាក់ថា ដាយណូស័របានរស់ឡើងវិញនៅឆ្នាំ២០២៥»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈដំណើរការ Google Reverse Image Search យើងបានរកឃើញថា ឃ្លីបវីដេអូ និងរូបភាពដែលបានបង្ហាញទិដ្ឋភាពសត្វតូចៗមួយក្រុម មើលទៅដូចជាដាយណូស័រនោះ ត្រូវបានបង្ហោះព្រោងព្រាតនៅលើបណ្ដាញអ៉ិនធឹណិត ហើយក៏ផ្ដល់ព័ត៌មានបន្ថែមអំពីអំបូរ និងឈ្មោះនៃប្រភេទសត្វទាំងនោះផងដែរ។
ទិដ្ឋភាពពពួកសត្វដែលមានសណ្ឋាន និងទម្រង់ដូចគ្នានេះ ត្រូវបានគេស្គាល់ឈ្មោះថា Kawati ឬ Coati ឬកូទី (ជាភាសាខ្មែរ) ដែលអ្នកប្រើប្រាស់អាចនឹងច្រឡំថាជាសត្វដាយណូស័រ បើគ្រាន់តែមើលពីចម្ងាយ ឬមិនបានពិនិត្យឱ្យបានច្បាស់លាស់។
ខាងក្រោមនេះ គឺជាវីដេអូឃ្លីបផ្ដាមចេញពីបណ្ដាញសង្គម TikTok បង្ហាញទិដ្ឋភាពក្រុមសត្វកូទី នៅក្នុងបរិវេណតំបន់ប្រាសាទ Tikal ក្នុងប្រទេសហ្គាតេម៉ាឡា។
ក្នុងនោះវីដេអូឃ្លីបមួយផ្សេងទៀត ប្រមាណ៥០វិនាទី បង្ហោះនៅលើបណ្ដាញសង្គមហ្វេសប៊ុក ក៏បានបង្ហាញទិដ្ឋភាពសត្វកូទី (Coati) មួយប្រភេទនេះផងដែរ ដែលត្រូវបានថតចេញពីតំបន់ប្រាសាទ Tikal និងមិនមែនជាសត្វដាយណូស័រនោះទេ។
ខាងក្រោមនេះ គឺជាវីដេអូឃ្លីប ដែលអ្នកប្រើប្រាស់បញ្ជាក់នៅក្នុងសំណេររបស់ខ្លួនថា «Coatis in Tikal, Guatemala» ប្រែសម្រួលថា «សត្វកូទី (Coati) នៅប្រទេសហ្គាតេម៉ាឡា»។
គេហទំព័រ Alamy ដែលជាគេហទំព័រផ្គត់ផ្គង់រូបថត និងវីដេអូដ៏ធំមួយនៅលើពិភពលោក យើងបានរកឃើញរូបថតសត្វកូទី (Coati) ដែលមានសណ្ឋាន និងទម្រង់ដូចទៅនឹងទិដ្ឋភាពសត្វតូចៗមួយក្រុម ដែលត្រូវបានអ្នកប្រើប្រាស់អះអាងមិនត្រឹមត្រូវថា ជាសត្វដាយណូស័រ។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានសរសេរបញ្ជាក់ជាភាសាអង់គ្លេស «Guatemala, Tikal National Park, coati (coatimundi); UNESCO World Heritage Site» ឬប្រែសម្រួលជាភាសាខ្មែរថា «ប្រទេសហ្គាតេម៉ាឡា ឧទ្យានជាតិ Tikal សត្វកូទី ឬ coatimundi បេតិកភណ្ឌពិភពលោករបស់អង្គការយូណេស្កូ»។
តាមរយៈគេហទំព័រ Arthur Grosset កូទី (Coati) គឺជាប្រភេទសត្វអំបូរ Racoon ដែលរកឃើញមាននៅទីតាំងម៉ិកស៊ិក អាមេរិកកណ្ដាល ប៉ាណាម៉ា និងភាគខាងជើងនៃប្រទេសកូឡុំប៊ី។ ពពួកសត្វមួយប្រភេទនេះ ភាគច្រើនស៊ីផ្លែឈើ និងគ្រាប់ធញ្ញជាតិជាអាហារ។
ខាងក្រោមនេះ គឺជាទិដ្ឋភាពសត្វកូទី (Coati) ថតនៅក្នុងតំបន់ប្រាសាទ Tikal ក្នុងប្រទេសហ្គាតេម៉ាឡា កាលពីឆ្នាំ២០១៥កន្លងទៅ។
Arthur Grosset Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook | Twitter | Telegram | Google News | TikTok | WhatsApp
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ទិដ្ឋភាពសត្វតូចៗមួយក្រុម ដែលត្រូវបានថតចេញពីប្រាសាទ Tikal ក្នុងប្រទេសហ្គាតេម៉ាឡា ត្រូវបានគេស្គាល់ថា គឺជាប្រភេទសត្វកូទី (Coati) មិនមែនជាសត្វ ដាយណូស័រ នោះទេ។
Title:វីដេអូសត្វមួយក្រុមនៅប្រាសាទ Tikal ត្រូវបានគេអះអាងថា ជាសត្វដាយណូស័រ
Fact Check By: Kakada SimResult: Misleading
