កម្ពុជាបានដំណើរការចាក់វ៉ាក់សាំងជូនប្រជាពលរដ្ឋខ្លួនបានជាង ៧លាននាក់ហើយគិតត្រឹមចុងខែកក្កដានេះ ដោយសម្រេចបានខ្ទង់ជាង ៧០ភាគរយនៃគោលដៅចាក់វ៉ាក់សាំងជូនប្រជាជន ១០លាននាក់ដែលកំណត់ដោយរដ្ឋាភិបាល។ ដំណើរការចាក់វ៉ាក់សាំងនេះ បានប្រើប្រាស់វ៉ាក់សាំងចិនទាំងស៊ីណូហ្វាម និងស៊ីណូវ៉ាក់ និងវ៉ាក់សាំង CoviShield ផលិតឡើងនៅប្រទេសឥណ្ឌាក្រោមអាជ្ញាប័ណ្ណរបស់ AstraZeneca។
ទន្ទឹមគ្នានេះ អ្នកប្រើប្រាស់បណ្ដាញសង្គមមួយចំនួន នៅតែចោទសួរពីសុវត្ថិភាព ដោយលើកឡើងថា លោកនាយករដ្ឋមន្ត្រី ហ៊ុន សែន មិនចាក់វ៉ាក់សាំងចិនទេ ព្រោះវ៉ាក់សាំងចិនបង្កផលប៉ះពាល់ដល់សុខភាព។ ទោះជាយ៉ាងណា ការត្រួតពិនិត្យ រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២៥ ខែកក្កដា ឆ្នាំ២០២១ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបង្ហាញលោកនាយករដ្ឋមន្ត្រី ហ៊ុន សែន ស្ថិតក្នុងសម្លៀកបំពាក់អាវយឺតខោជើងវែង និងកំពុងទទួលការចាក់វ៉ាក់សាំងពីគ្រូពេទ្យម្នាក់។
អ្នកប្រើប្រាស់ហ្វេសប៊ុកនេះ បានអះអាងថា លោកនាយករដ្ឋមន្ត្រី ហ៊ុន សែន មិនទទួលចាក់វ៉ាក់សាំងផលិតដោយប្រទេសចិននោះឡើយ ព្រោះតែវ៉ាក់សាំងផលិតឡើងនៅក្នុងប្រទេសចិន បង្កឱ្យស្លាប់ ពិការ និងប៉ះពាល់ដល់សមត្ថភាពផ្លូវភេទ។ អ្នកប្រើប្រាស់ហ្វេសប៊ុកដដែលនេះ បានអះអាងបែបនេះដោយយោងតាមការសិក្សាមួយដែលធ្វើឡើងដោយ UHAFF។
រូបថត និងការអះអាងនេះ ត្រូវបានអ្នកប្រើប្រាស់ហ្វេសប៊ុកចែករំលែកបន្តជាច្រើនដង និងមានការបញ្ចេញមតិចម្រុះផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក ដែលអះអាងថា «ហ៊ុន សែន មិនចាក់វ៉ាក់សាំងចិន ព្រោះវ៉ាក់សាំងចិន នាំឱ្យស្លាប់ ពិការ និងអសមត្ថភាពផ្លូវភេទ(ងាប់លិង្គ) នេះបើតាមការស្រាវជ្រាវចុងក្រោយរបស់ UHAFF»។
ការពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើរូបថត និងការអះអាងនេះតាមរយៈដំណើរការកម្មវិធីស្វែងរករូបថតរបស់ Google និងការផ្ទៀងផ្ទាត់ទៅលើលទ្ធផលនៃការសិក្សារបស់ UHAFF ដែលអ្នកប្រើប្រាស់ហ្វេសប៊ុកខាងលើបានអះអាង។
រូបថតច្បាប់ដើម ត្រូវបានរកឃើញចុះផ្សាយនៅក្នុងអត្ថបទមួយនៃគេហទំព័រសារព័ត៌មានដំរី កាលពីថ្ងៃទី១៧ ខែកក្កដាកន្លងមកថ្មីៗនេះ។ រូបថតនោះ គឺជាលោក អេ ភូថង អតីតអ្នកប្រដាល់ដ៏ល្បីល្បាញរបស់កម្ពុជាកាលជាង ១៥ឆ្នាំមុន នៅពេលលោកទៅទទួលការចាក់វ៉ាក់សាំងបង្ការជំងឺកូវីដ-១៩។
អតីតកំពូលអ្នកប្រដាល់កម្ពុជារូបនេះ ត្រូវបានរកឃើញឆ្លងមេរោគកូវីដ-១៩ កាលពីពាក់កណ្ដាលខែកក្កដានេះ បើទោះបីជាលោកបានចាក់វ៉ាក់សាំងបង្ការជំងឺកូវីដ-១៩ចំនួន ២លើករួចមកហើយក្ដី។
សម្រាប់ការអះអាងថា វ៉ាក់សាំងចិនស៊ីណូវ៉ាក់ ឬស៊ីណូហ្វាម បង្កឱ្យស្លាប់ ពិការ និងប៉ះពាល់សុខភាពផ្លូវភេទនោះ យើងបានពិនិត្យមើលសេចក្ដីណែនាំរបស់អង្គការសុខភាពពិភពលោក។
នៅមុនការមកដល់នៃវ៉ាក់សាំងស៊ីណូហ្វាមដែលផលិតឡើងដោយក្រុមហ៊ុន China National Pharmaceutical Group ដែលជាក្រុមហ៊ុនផលិតឱសថរបស់រដ្ឋចិននោះ លោកនាយករដ្ឋមន្ត្រី ហ៊ុន សែន បានប្រកាសថា លោកនឹងចាក់វ៉ាក់សាំងនេះមុនគេ។
ប៉ុន្តែ ប្រហែល ៣សប្ដាហ៍ក្រោយមក លោក ហ៊ុន សែន បានប្រកាសថា លោកមិនអាចចាក់វ៉ាក់សាំងស៊ីណូហ្វាមបាននោះឡើយ ព្រោះលោកមានអាយុលើសពីអាយុដែលត្រូវបានណែនាំឱ្យចាក់វ៉ាក់សាំងនេះ។ វ៉ាក់សាំងស៊ីណូហ្វាមនេះ ត្រូវបានណែនាំឱ្យចាក់ដល់ក្រុមមនុស្សមានអាយុចន្លោះពី ១៨ឆ្នាំ ទៅដល់អាយុ ៥៩ឆ្នាំ។
អង្គការសុខភាពពិភពលោក (WHO) បានរកឃើញថា វ៉ាក់សាំងទាំងពីរប្រភេទដែលផលិតនៅក្នុងប្រទេសចិននេះ មានប្រសិទ្ធភាព និងសុវត្ថិភាព។
នៅក្នុងសេចក្ដីរាយការណ៍របស់ Reuters ប្រធានក្រុមអ្នកជំនាញប្រឹក្សាយុទ្ធសាស្ត្រ (SAGE)របស់ WHO លោក Alejandro Gravioto ត្រូវបានដកស្រង់សម្ដីដែលនិយាយថា វ៉ាក់សាំងចិនទាំងពីរប្រភេទនេះ មានប្រសិទ្ធភាពស្របតាមមាត្រដ្ឋានដែលតម្រូវដោយ WHO និងមិនបង្កគ្រោះថ្នាក់ដល់មនុស្សប្រើប្រាស់វានោះឡើយ។
អង្គការសុខភាព បានអនុម័តដាក់បញ្ចូលវ៉ាក់សាំងស៊ីណូហ្វាម និងស៊ីណូវ៉ាក់ ទៅក្នុង«បញ្ជីប្រើប្រាស់បន្ទាន់»នៅថ្ងៃទី០៧ ខែឧសភា និងនៅថ្ងៃទី០១ ខែមិថុនាជាបន្តបន្ទាប់នៅក្នុងឆ្នាំនេះ។
សន្និដ្ឋាន
Fact Crescendo Cambodia រកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ រូបថតនេះ ត្រូវបានកាត់ត ហើយរូបថតច្បាប់ដើម គឺជាអ្នកប្រដាល់កម្ពុជា លោក អេ ភូថង់។ សម្រាប់សុវត្ថិភាពវ៉ាក់សាំងចិនវិញ អង្គការសុខភាពពិភពលោក បញ្ជាក់ថា មានសុវត្ថិភាព ហើយបានអនុម័តឱ្យប្រើប្រាស់ផងដែរ។
Title:តើវ៉ាក់សាំងចិនអាចបង្កឱ្យស្លាប់ ពិការ និងខូចសមត្ថភាពផ្លូវភេទមែនឬទេ?
Fact Check By: Jay UdomResult: False
