- >>
- FALSE
កុមាររងគ្រោះរញ្ជួយដីនៅស៊ីរីត្រូវបានភ្ជាប់មិនត្រឹមត្រូវនឹងសង្គ្រាមអ៊ីស្រាអែល-ហាម៉ាស់
ខណៈដែលសង្គ្រាមរវាងអ៊ីស្រាអែល និងក្រុមហាម៉ាសបានផ្ទុះឡើងជាច្រើនថ្ងៃមក វីដេអូឃ្លីបមួយដែលបង្ហាញកុមារជាប់នៅក្រោមគំនរបាក់បែក ត្រូវបានបង្ហោះឡើងដោយទំព័រហ្វេសប៊ុកជាច្រើន ដោយភ្ជាប់ថា ទិដ្ឋភាពនោះ គឺជាលទ្ធផលនៃសង្គ្រាមខាងលើ។ ការអះអាងលើវីដេអូឃ្លីបនេះ ទទួលបានការចែកចាយ និងប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុក និយាយភាសាខ្មែរជាច្រើនយ៉ាងផុសផុល។ ទោះជាយ៉ាងណា Fact Crescendo Cambodia បានរកឃើញថា ការអះអាងដោយភ្ជាប់ទៅនឹងវីដេអូឃ្លីបខាងលើ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី១៤ ខែតុលា ឆ្នាំ២០២៣ ទំព័រហ្វេសប៊ុកមួយ បានបង្ហោះវីដេអូឃ្លីបដែលមានរយៈពេល ៣៨វិនាទី បង្ហាញក្មេងម្នាក់ជាប់នៅក្រោមគំនរបែកបាក់នៃអគារមួយកន្លែង។ វីដេអូឃ្លីបនោះ ត្រូវបានភ្ជាប់ជាមួយនឹងសង្គ្រាមរវាងអ៊ីស្រាអែល និងក្រុមហាម៉ាសប៉ាឡេស្ទីន ដែលបានកើតឡើងនាពេលថ្មីៗនេះ។
ការបង្ហោះដោយភ្ជាប់ទៅនឹងវីដេអូឃ្លីបខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជាវីដេអូឃ្លីបទាំងស្រុង ដែលទំព័រហ្វេសប៊ុកខាងលើ បានសរសេររៀបរាប់ថា «ក៏ព្រោះតែវីដេអូនេះ មកពីប្រទេសប៉ាឡេស្ទីន ទើបគ្មានព័ត៌មានណាចុះផ្សាយ»។
ការលើកឡើងដោយភ្ជាប់ទៅនឹងវីដេអូឃ្លីបដូចគ្នានេះ ត្រូវបានរកឃើញនៅលើទំព័រហ្វេសប៊ុកដទៃទៀតផងដែរ។
វីដេអូឃ្លីបភ្ជាប់ដោយការអះអាងបែបនេះ ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុក ជាច្រើនទៀតផងដែរ។ សូមមើលខ្លឹមសារអះអាងទាំងស្រុង តាមរយៈតំណភ្ជាប់មាននៅទីនេះ (archived link) និងតំណភ្ជាប់មួយទៀតនៅទីនេះ (archived link)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
វីដេអូឃ្លីបដែលមានទិដ្ឋភាព និងទម្រង់ដូចគ្នាទាំងស្រុង ត្រូវបានរកឃើញនៅលើគេហទំព័រទីភ្នាក់ងារព័ត៌មាន Reuters ដែលត្រូវបានចុះផ្សព្វផ្សាយ កាលពីថ្ងៃទី១២ ខែកុម្ភៈ ឆ្នាំ២០២៣កន្លងទៅ។ គេហទំព័រដដែលខាងលើ ពុំបានបញ្ជាក់ថានោះ គឺជាទិដ្ឋភាពជនរងគ្រោះ ដែលជាលទ្ធផលនៃសង្គ្រាមរវាងអ៊ីស្រាអែល និងហាម៉ាសប៉ាឡេស្ទីន កាលពីពេលថ្មីៗនោះឡើយ។
ផ្ទុយទៅវិញ នោះគឺជាទិដ្ឋភាពនៃការទាញយក និងជួយសង្គ្រោះជនរងគ្រោះកុមារម្នាក់ ដែលជាប់នៅក្រោមគំនរបាក់បែកនៅក្នុងទីក្រុង Aleppo ប្រទេសស៊ីរី ក្រោយពីមានគ្រោះរញ្ជួយដី ដែលបានកើតឡើង កាលពីខែកុម្ភៈឆ្នាំ២០២៣កន្លងទៅ។
ខាងក្រោមនេះ គឺជាវីដេអូឃ្លីបទាំងស្រុង ដែលត្រូវបានរាយការណ៍ដោយគេហទំព័រទីភ្នាក់ងារព័ត៌មានខាងលើ។
ដូចគ្នានេះ ករណីខាងលើ ក៏ត្រូវបានរាយការណ៍ និងផ្សព្វផ្សាយដោយ The Telegraph កាលពីថ្ងៃទី១៣ ខែកុម្ភៈ ឆ្នាំ២០២៣ នៅលើគេហទំព័រវីដេអូ YouTube របស់ខ្លួនផងដែរ ដោយពុំបានបញ្ជាក់ថា នោះគឺជាលទ្ធផលនៃសង្គ្រាមរវាងអ៊ីស្រាអែល និងក្រុមហាម៉ាសប៉ាឡេស្ទីននាពេលថ្មីៗនេះទេ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការអះអាងដោយភ្ជាប់ទៅនឹងវីដេអូខាងលើ គឺមិនត្រឹមត្រូវនោះឡើយ។ ការពិត វីដេអូឃ្លីបនេះ គឺជាទិដ្ឋភាពនៃការទាញយក និងជួយសង្គ្រោះកុមារម្នាក់ ដែលជាប់នៅក្រោមគំនរបាក់បែកនៅក្នុងទីក្រុង Aleppo ប្រទេសស៊ីរី ពីគ្រោះរញ្ជួយដី កាលពីខែកុម្ភៈឆ្នាំ២០២៣កន្លងទៅ។
Title:កុមាររងគ្រោះរញ្ជួយដីនៅស៊ីរីត្រូវបានភ្ជាប់មិនត្រឹមត្រូវនឹងសង្គ្រាមអ៊ីស្រាអែល-ហាម៉ាស់
Written By: Kakada SimResult: False
