បច្ចុប្បន្ន ជំងឺដ៏កាចសាហាវកូវីដ១៩នេះ កំពុងរីករាលដាលពាសពេញសកលលោក ដែលក្នុងនោះរួមមាន ប្រទេសកម្ពុជាផងដែរ។ ទន្ទឹមគ្នានេះ យេីងសង្កេតឃេីញមានការបង្ហោះរូបភាពមួយសន្លឹកដែលបង្ហាញអំពីការរៀបចំ និងរក្សាគម្លាតពីគ្នាយ៉ាងមានរបៀបរៀបរយ និងបានលើកឡើងថា ជាទិដ្ឋភាពផ្សារសិរីសោភ័ណក្នុងខេត្តបន្ទាយមានជ័យ។ រូបនេះត្រូវបានបង្ហោះ និងចែកចាយជាច្រើន នៅតាមបណ្តាញសង្គមហ្វេសប៊ុកនិយាយភាសាខ្មែរ។ ទោះយ៉ាងណាក្តី ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៣ ខែមីនា ឆ្នាំ២០២១នេះ ទំព័រហ្វេសប៊ុកមួយ បានបង្ហោះរូបភាពមួយសន្លឹក ដែលបង្ហាញអំពីការលក់ដូរនៅតាមផ្លូវមួយមានគម្លាតយ៉ាងរៀបរយ។ ទំព័រហ្វេសប៊ុកដដែលនេះ បានសរសេររៀបរាប់ថា «ទិដ្ឋភាពផ្សារសិរីសោភ័ណ ខេត្តបន្ទាយមានជ័យ»។ ការអះអាងនេះ ត្រូវបានចែករំលែកតៗគ្នាជាច្រើនដងពីសំណាក់អ្នកប្រើហ្វេសប៊ុកនិយាយភាសាខ្មែរ។
រូបភាពផ្ដាមចេញប៉ុស្តិ៍ពីទំព័រហ្វេសប៊ុក រៀបរាប់ថា «គំរូល្អណាស់ ទិដ្ឋភាពផ្សារសិរីសោភ័ណ ខេត្តបន្ទាយមានជ័យ ស៊ែ និងឡាតម្នាក់មួយ លើកទឹកចិត្តពួកគាត់»។
ការត្រួតពិនិត្យការពិត
Fact Crescendo Cambodia បានចាប់ផ្តើមធ្វើការត្រួតពិនិត្យ និងផ្ទៀងផ្ទាត់រូបភាពតាមរយៈកម្មវិធី Google Reverse Image ដែលនាំឲ្យទៅរកឃើញប្រភពដើមនៃរូបភាពទិដ្ឋភាពផ្សារមួយនេះ ដែលមានទម្រង់ដូចគ្នាទាំងស្រុង។
តាមរយៈការបង្ហោះរបស់លោក Thaung Tun នៅលើបណ្តាញសង្គម Twitter កាលពីថ្ងៃទី១៩ ខែមេសា ឆ្នាំ២០២០ កន្លងទៅនេះ លោកបានលើកសរសើរទៅកាន់អាជ្ញាធរ និងប្រជាជនក្នុងក្រុង Kalaw ដែលបានរក្សានូវគម្លាតសង្គម។ Kalaw គឺជាទីប្រជុំជនមួយដែលស្ថិតនៅក្នុងរដ្ឋសាន ភាគកណ្ដាលនៃប្រទេសមីយ៉ាន់ម៉ា ដែលមានចម្ងាយប្រមាណ ៥៧៧គីឡូម៉ែត្រពីទីក្រុងយ៉ាំងហ្គូន។
រូបភាពផ្ដាមចេញពីប៉ុស្តិ៍គណនីរបស់លោក Thaung Tun សរសេរជាភាសាអង់គ្លេសថា «Social distancing in practice! Hats off to Kalaw authorities and people» ដែលអាចប្រែជាភាសាខ្មែរមានន័យថា «ការអនុវត្តនូវវិធានការរក្សាគម្លាត! សូមគោរពកោតសសើរអាជ្ញាធរ និងប្រជាជន Kalaw»។
ទិដ្ឋភាពផ្សារមួយនេះ ក៏ត្រូវបានសារព័ត៌មាន ABS-CBN របស់ប្រទេសហ្វីលីពីន បង្ហោះនៅលើទំព័រ Twitter របស់ខ្លួនកាលពីថ្ងៃទី២០ ខែមេសា ឆ្នាំ២០២០ផងដែរ។
រូបភាពផ្ដាមចេញពីទំព័រ Twitter នៃសារព័ត៌មាន ABS-CBN រៀបរាប់ថា «សូមមើល! អាជីវករ និងអ្នកទិញ អនុវត្តគម្លាតសង្មនៅផ្សារសាធារណៈមួយនៅមីយ៉ាន់ម៉ា»។
Twitter នៃសារព័ត៌មាន ABS-CBN រៀបរាប់បន្តថា «គិតត្រឹមថ្ងៃទី២០ ខែមេសា ឆ្នាំ២០២០ មីយ៉ាន់ម៉ារកឃើញមនុស្ស ១១១នាក់ បានឆ្លងមេរោគកូវីដ១៩ ក្នុងនោះអ្នកជំងឺ ៧នាក់ បានជាសះស្បើយវិញ ហើយជំងឺ ៥នាក់ទៀត បានស្លាប់បាត់បង់ជីវិត»។
រូបថតនៃទិដ្ឋភាពផ្សារដ៏រៀបរយនេះ ត្រូវបានចុះផ្សាយដោយសារព័ត៌មានថៃ The Nation កាលពីខែមេសា ឆ្នាំ២០២០ ដោយមានចំណងជើងថា«អ្នកនិយមលេងតាមបណ្តាញសង្គមអបអរសាទរប្រទេស មីយ៉ាន់ម៉ាចំពោះការរក្សាគម្លាតនៅក្នុងទីផ្សារ»។
រូបភាពផ្ដាមចេញពីការផ្សាយរបស់សារព័ត៌មាន The Nation Thailand សរសេររៀបរាប់ជាភាសាអង់គ្លេសថា «Facebook user Jain Weraphong’s post of a fresh market in Myanmar employing the social distancing practice has come in for praise.» ឬដែលមានន័យជាភាសាខ្មែរថា «រូបថតផ្សារដ៏ស្រស់ស្អាតមួយនៅមីយ៉ានម៉ាដែលបង្ហាញនូវការរក្សាគម្លាត ដែលបង្ហោះដោយអ្នកប្រើហ្វេសប៊ុក Jain Weraphong នោះ ទទួលបាននូវការកោតសរសើរ»។
សារព័ត៌មានថៃដដែលនេះ រៀបរាប់បន្តថា «Pictures show the ground marked with paint to separate each seller as well as allow space for shoppers to safely browse products while maintaining a distance of 1-2 metres as suggested by the World Health Organisation.» ឬប្រែជាភាសាខ្មែរថា «រូបថតបង្ហាញផ្ទៃដីត្រូវបានគូសជាមួយគំនូសសដើម្បីបែងចែកអាជីវករម្នាក់ ព្រមទាំងជួយរក្សាគម្លាតសម្រាប់អ្នកដើរផ្សារដើម្បីរកទិញផលិតផល ខណៈរក្សាគម្លាតចន្លោះពី ១ម៉ែត្រ ទៅ ២ម៉ែត្រពីគ្នា ទៅតាមការណែនាំរបស់អង្គការសុខភាពពិភពលោក»។
The Nation | Thailand | Archived Link
សន្និដ្ឋាន
Fact Crescendo Cambodia បានរកឃើញថា រូបថតដែលអ្នកប្រើប្រាស់បណ្ដាញសង្គមកម្ពុជាអះអាងថាជាទិដ្ឋភាព ផ្សារសិរីសោភ័ណ ក្នុងខេត្តបន្ទាយមានជ័យនោះ មិនមែនជាការពិតនោះឡើយ។ រូបថតនេះ បង្ហាញពីទិដ្ឋភាពនៃការរក្សាគម្លាតរបស់អាជីវករនៅផ្សារមួយស្ថិតក្នុងទីប្រជុំជន Kalaw ស្ថិតនៅក្នុងប្រទេសមីយ៉ាន់ម៉ា កាលពីខែមេសា ឆ្នាំ២០២០។
Title:Fact Check: រូបថតបង្ហាញទិដ្ឋភាពរក្សាគម្លាតនៅទីផ្សារមួយនៅមីយ៉ាន់ម៉ា មិនមែននៅក្រុងសិរីសោភ័ណទេ
Fact Check By: Kakada SimResult: False
