ការអនុវត្តទោសប្រហារជីវិតនៅតែបន្តមាននៅតាមបណ្តាប្រទេសនានា ដូចជាប្រទេសជប៉ុន សិង្ហបុរី ចិន និងវៀតណាមជាដើម ដែលវីធីសាស្រ្តមួយនេះ បានក្លាយទៅជាប្រធានបទនៃការជជែកវែកញែក ដេញដោល និងចែករំលែកយ៉ាងផុសផុល។
ជាក់ស្តែង នៅលើបណ្ដាញសង្គមកម្ពុជាថ្មីៗនេះមានវីដេអូ និងរូបថតចំនួនបីសន្លឹក បង្ហាញអំពីទិដ្ឋភាពនៃការចង និងយកមនុស្សទៅដុត ត្រូវបានអ្នកប្រើប្រាស់បណ្ដាញសង្គមអះអាងថា នេះគឺជាលទ្ធផលនៃការរំលោភកូនក្មេង។
ទោះជាយ៉ាងណា ការត្រួតពិនិត្យការពិតរបស់ក្រុមការងារ Fact Crescendo Cambodia បានរកឃើញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១០ ខែសីហា ឆ្នាំ២០១៨កន្លងទៅនេះ មានអ្នកប្រើហ្វេសប៊ុកម្នាក់ បានបង្ហោះវីដេអូ និងរូបថតផ្តាម បង្ហាញអំពីសកម្មភាពដែលក្រុមមនុស្សមួយក្រុម បាននឹងកំពុងតែចង និងដុតបុរសចំនួន៤នាក់នៅក្នុងភ្លើងចំបើង។ អ្នកប្រើប្រាស់បណ្ដាញសង្គមដដែលនេះក៏បានអះអាងផងដែរថា ទិដ្ឋភាពទាំងនេះ គឺជាការកាត់ទោសប្រហារជីវិតសម្រាប់ជនដែលបានរំលោភកូនក្មេង។
វីដេអូឃ្លីប និងរូបថតផ្តាមចំនួនបីសន្លឹកនេះត្រូវបានចែករំលែកតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ថា «#ទោសប្រហារជីវិតពីបទរំលោភកូនក្មេង»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើករណីនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសារវីដេអូនៃច្បាប់ដើមមួយចំនួន។
វីដេអូឃ្លីប និងរូបភាពផ្តាមដែលមានភិនភាគដូចគ្នាទាំងស្រុងនេះ ត្រូវបានរកឃើញនៅក្នុងគេហទំព័រសារព័ត៌មាន News Mobile ដែលចុះផ្សព្វផ្សាយកាលពីថ្ងៃទី១០ ខែមិថុនា ឆ្នាំ២០២០កន្លងមក។
តាមរយៈសេចក្តីរាយការណ៍មួយនេះ បានបញ្ជាក់ថាវីដេអូដែលបុរសចំនួន៤នាក់ត្រូវបានគេចងដុត និងអះអាងថាជាជនជាតិមូស្លីមនោះ ពិតជាមិនត្រឹមត្រូវនោះឡើយ។
ប្រភពដើមនៃវីដេអូមួយនេះ ការពិតគឺជាទិដ្ឋភាពនៃការសម្តែងវេទមន្តរបស់លោក Puthiyath ដែលត្រូវបានគេស្គាល់ថាជាអ្នកលេងវេទមន្តម្នាក់នៅក្នុងរដ្ឋ Kerala កាលពីឆ្នាំ២០១៨។
រូបភាពផ្តាមចេញពីគេហទំព័រដែលមានចំណងជើងសរសេររៀបរាប់ជាភាសាអង់គ្លេសថា «FAKE Alert: Old video of magic trick shared with ‘extremists burning Muslims for cow slaughter’ claim» ប្រែជាភាសាខ្មែរមានន័យថា «ព័ត៌មានក្លែងក្លាយ៖ វីដេអូចាស់នៃការលេងវេទមន្តត្រូវបានចែកចាយ និងអះអាងថាជាការដុតជនជាតិមូស្លីមដោយសារតែការកាប់សម្លាប់សត្វគោ»។
News Mobile’s Report | Archived Link
ករណីមួយខាងលើនេះ ក៏ត្រូវបានផ្សព្វផ្សាយ និងបង្ហោះផងដែរនៅក្នុងគេហទំព័រវីដេអូ Youtube កាលពីថ្ងៃទី២៦ ខែសីហា ឆ្នាំ២០១៧ ដែលនេះគឺជាប្រភពដើមនៃវីដេអូ។ វីដេអូដែលមានរយៈពេលប្រមាណ៦នាទីមួយនេះ ត្រូវបានបង្ហោះដោយលោក Puthiyath ដែលជាអ្នកសម្តែងវេទមន្តម្នាក់នៅក្នុងប្រទេសឥណ្ឌា។
រូបភាពផ្តាមចេញពីគេហទំព័រ ដែលបានសរសេររៀបរាប់ជាភាសាអង់គ្លេសថា «World’s first mass fire escape | Malappuram Kottapadi stadium | fire escape 2008 |» ឬប្រែជាភាសាខ្មែរមានន័យថា «ការរត់គេចខ្លួនដោយភ្លើងដ៏ធំលើកដំបូងរបស់ពិភពលោក | ពហុកីឡដ្ឋាន Malappuram Kottapadi | រត់គេចខ្លួនដោយអគ្គិភ័យឆ្នាំ ២០០៨ |»។
ការអះអាងដូចគ្នាមួយនេះ ក៏បានត្រួតពិនិត្យ និងផ្ទៀងផ្ទាត់ផងដែរដោយក្រុមការងារ Fact Crescendo របស់យើង ជាភាសាហិណ្ឌូកាលពីថ្ងៃទី០៩ ខែមិថុនា ឆ្នាំ២០២០កន្លងមកនេះ។ នៅក្នុងសេចក្តីរាយការណ៍ដដែលនេះ បានធ្វើការបញ្ជាក់ថា ទិដ្ឋភាពនៃការចង និងដុតបុរសទាំង៤នាក់នេះ គឺគ្រាន់តែជាការសម្តែងវេទមន្តតែប៉ុណ្ណោះ ដោយពុំបានបញ្ជាក់អំពីការកាត់ទោសប្រហារជីវិតសម្រាប់ជនដែលរំលោភកូនក្មេងនោះឡើយ។
Fact Crescendo’s Report | Archived Link
សន្និដ្ឋាន
Fact Crescendo Cambodia រកឃើញថា ការអះអាងដូចបានរៀបរាប់ខាងលើនេះ គឺមិនត្រឹមត្រូវនោះឡើយ។ វីដេអូឃ្លីប និងរូបថតបីសន្លឹកនេះ មិនមែនជាទិដ្ឋភាពការកាត់ទោសប្រហារជីវិតសម្រាប់ជនដែលរំលោភកូនក្មេងនោះទេ។ ការពិត វាគឺជាទិដ្ឋភាពនៃការសម្តែងវេទមន្តរត់គេចចេញពីអគ្គិភ័យនៅក្នុងពហុកីឡដ្ឋាន Kottapadi កាលពីឆ្នាំ២០១៨មកម្ល៉េះ។
Title:តើវីដេអូនេះបង្ហាញការប្រហារជីវិតបុរស៤នាក់ដែលបានរំលោភកូនក្មេងមែនឬទេ?
Fact Check By: Kakada SimResult: False
