ការផ្ទុះឡើងនូវចំនួនឆ្លង និងករណីស្លាប់ដ៏ច្រើនជារៀងរាល់ថ្ងៃនៅក្នុងប្រទេសឥណ្ឌា ដោយសារតែជំងឺកូវីដ១៩បំម្លែងថ្មីនោះ បានធ្វើឲ្យឥណ្ឌាជួបប្រទះនូវការលំបាកជាច្រើន ដែលជាពិសេសនោះ គឺការរៀបចំទុកដាក់សពស្លាប់ដោយសារតែមេរោគឆ្លងមួយនេះ។
ទន្ទឹមគ្នានេះ រូបថតមួយសន្លឹកដែលបានបង្ហាញអំពីទិដ្ឋភាពសាកសពរលួយមួយ ត្រូវបានសត្វស៊ីនៅតាមមាត់ទឹកមួយកន្លែងនោះ ត្រូវបានបង្ហោះនៅលើបណ្ដាញសង្គមជាមួយនឹងការអះអាងថា វាជាទិដ្ឋភាពសាកសពអ្នកស្លាប់ដោយសារតែជំងឺកូវីដ១៩ នៅក្នុងប្រទេសឥណ្ឌា។ ទោះយ៉ាងណា ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១០ ខែមិថុនា ឆ្នាំ២០២១កន្លងទៅថ្មីៗនេះ អ្នកប្រើហ្វេសប៊ុកម្នាក់ បង្ហោះរូបថតមួយសន្លឹកបង្ហាញសត្វឆ្កែចំនួនពីរក្បាល កំពុងស៊ីសាកសពនៅតាមបណ្តោយមាត់ទន្លេ។ អ្នកប្រើហ្វេសប៊ុកដដែលនេះ ក៏បានបញ្ជាក់អះអាងនៅក្នុងសារបង្ហោះរបស់ខ្លួនផងដែរថា រូបថតនោះ គឺទិដ្ឋភាពមួយនៃវិបត្តិកូវីដ-១៩នៅឥណ្ឌា។
រូបថតជាមួយសំណេរនេះ ត្រូវបានចែករំលែកបន្តៗគ្នាជាច្រើនដង រួមជាមួយនឹងការចុចគាំទ្រពីសំណាក់អ្នកប្រើហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ជាភាសាខ្មែរថា «គួរឱ្យអាណិតណាស់ សាកសពអ្នកស្លាប់ដោយសារតែកូវីដនៅឥណ្ឌា»។
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀងផ្ទាត់រូបថតតាមរយៈកម្មវិធី Google Reverse Image ដែលនាំឲ្យទៅរកឃើញប្រភពដើមដែលមានទម្រង់ដូចគ្នាទាំងស្រុង។
រូបថតមួយសន្លឹកនេះ ត្រូវបានរកឃើញនៅលើគណនីមួយនៃបណ្ដាញសង្គម Pinterest ដែលផ្ដល់ព័ត៌មានជាបឋមថា រូបថតនេះគឺផ្តោតទៅលើភាពក្រីក្រ និងការគ្មានអនាម័យថែរក្សាសុខមាលភាពនៅតាមបណ្តោយទន្លេគង្គា។
ការបង្ហោះរូបថតនៅលើបណ្ដាញសង្គម Pinterest មួយនេះ ពុំមានការបញ្ជាក់ថា សាកសពនេះជាសាកសពរបស់ជនរងគ្រោះ ឬទាក់ទងដោយសារតែជំងឺឆ្លងកូវីដ១៩នោះឡើយ។
Pinterest Link | Archived Link
Fact Crescendo Cambodia ក៏បានពិនិត្យសេចក្តីរាយការណ៍ទៅលើគេហទំព័រ Chinasmack ដែលបានចុះផ្សព្វផ្សាយតាំងពីខែតុលា ឆ្នាំ២០១០មកម៉្លេះ។ រូបថតនេះ ត្រូវបានចុះផ្សាយកាលពីឆ្នាំ២០១០ ឬ ៩ឆ្នាំមុននឹងមានជំងឺឆ្លងកូវីដ១៩នេះទៅទៀត។
រូបភាពផ្ដាមចេញពីគេហទំព័រ Chinasmack Report ដែលបានសរសេររៀបរាប់ចំណងជើងជាភាសាអង់គ្លេសថា «Filthy India Photos, Chinese Netizen Reactions» ឬប្រែជាភាសាខ្មែរមានន័យថា «រូបថតនៃភាពកខ្វក់របស់ប្រទេសឥណ្ឌា និងការបញ្ចេញមតិរបស់អ្នកប្រើប្រាស់បណ្តាញសង្គមនិយាយភាសាចិន»។
Chinasmack Report | Archived Link
តាមរយៈសេចក្តីរាយការណ៍នៅក្នុងគេហទំព័រមួយផ្សេងទៀត Planet Custodian Report កាលពីខែតុលា ឆ្នាំ២០១៥នេះ ក៏បានចែកចាយរូបថតមួយសន្លឹកនេះផងដែរ។ សេចក្តីរាយការណ៍មួយនេះ គឺត្រូវបានគេធ្វើឡើង និងចុះផ្សព្វផ្សាយតាំងពីមុននឹងមានជំងឺឆ្លងកូវីដ១៩នេះ ដល់ទៅ ៤ឆ្នាំឯណោះ។
ព័ត៌មានលម្អិតនៃរូបថតមួយសន្លឹកនេះ បានរៀបរាប់ផងដែរថា មានសាកសពជាង ១០០នាក់ រួមទាំងកុមារផង ត្រូវបានគេប្រទះឃើញនៅតាមបណ្តោយទន្លេគង្គា។
រូបភាពផ្ដាមចេញពីគេហទំព័រខាងលើដែលបានសរសេររៀបរាប់ជាភាសាអង់គ្លេសថា «50+ Scary Images Depicting Filth of Varanasi and River Ganges that Went Viral in China» ឬប្រែសម្រួលជាភាសាខ្មែរមានន័យថា «៥០រូបដែលបង្ហាញអំពីភាពកខ្វក់នៃតំបន់ពារានសី(Varanasi) និងទន្លេគង្គា ដែលបាននឹងកក្រើកនៅក្នុងប្រទេសចិន»។
Planet Custodian Report | Archived Link
សន្និដ្ឋាន (Conclusion)
Fact Crescendo Cambodia បានរកឃើញថា ការអះអាងដូចបានរៀបរាប់ខាងលេីនេះ គឺមិនត្រឹមត្រូវនោះឡេីយ។ រូបថតមួយសន្លឹកនេះ មិនមែនជាទិដ្ឋភាពសាកសពអ្នកស្លាប់ដោយសារតែជំងឺកូវីដ១៩ ដែលត្រូវបានសត្វស៊ីនៅក្នុងប្រទេសឥណ្ឌានោះទេ។ ការពិត រូបថតមួយសន្លឹកនេះ ត្រូវបានគេរកឃើញប៉ុន្មានឆ្នាំមុននឹងមានជំងឺឆ្លងកូវីដ១៩មកម្ល៉េះ ដែលជាទិដ្ឋភាពសាកសពមួយនៅតាមបណ្តោយទន្លេគង្គារ ក្នុងប្រទេសឥណ្ឌា។
Title:តើរូបថតនេះបង្ហាញជ្រុងមួយនៃវិបត្តិកូវីដ-១៩នៅឥណ្ឌាមែនឬទេ?
Fact Check By: Kakada SimResult: False
