វីដេអូមួយដែលលោក ខាន់ សុវណ្ណ បាននិយាយថា ប្រជាពលរដ្ឋខ្មែរមិនចេះចិញ្ចឹមត្រី និងខ្លាចស្រុកខ្មែរអត់ត្រីស៊ី បើមិនមានអ្នកចិញ្ចឹមត្រីក្នុងបែរនៅក្នុងទន្លេនោះ កំពុងក្លាយជាប្រធានបទជជែក ដេញដោល និងមានប្រតិកម្មចម្រុះគ្រប់មជ្ឍដ្ឋានអ្នកប្រើប្រាស់បណ្តាញសង្គមទូទៅ។
ទន្ទឹមគ្នាៗនេះ រូបថតមួយសន្លឹកក្នុងចំណោមរូបថតពីរសន្លឹក ដែលបានបង្ហាញលោក ខាន់ សុវណ្ណ កំពុងអង្គុយក្នុងប៉ុស្តិ៍នគរបាលមួយនោះ ត្រូវបានបង្ហោះនៅលើបណ្ដាញសង្គមជាមួយនឹងការអះអាងថា លោកត្រូវបានសមត្ថកិច្ចប៉ូលិសចាប់ខ្លួនមុននេះបន្តិចហើយ។ ទោះយ៉ាងណា ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៤ ខែមិថុនា ឆ្នាំ២០២១កន្លងទៅថ្មីៗនេះ ទំព័រហ្វេសប៊ុកឈ្មោះ កាមទេព លីមហុង បានបង្ហោះរូបថតពីរសន្លឹក ដែលក្នុងនោះ រូបថតមួយសន្លឹកបង្ហាញអំពីទិដ្ឋភាពលោក ខាន់ សុវណ្ណ កំពុងតែអង្គុយតុទល់មុខក្រុមមន្ត្រីនគរបាលក្នុងបន្ទប់មួយកន្លែង។ ទំព័រហ្វេសប៊ុកដដែលនេះ បានអះអាងថា លោក ខាន់ សុវណ្ណ ត្រូវបានសមត្ថកិច្ចចាប់ខ្លួនហើយនៅមុននេះបន្តិច។
រូបថតជាមួយសំណេរនេះត្រូវបានចែករំលែកបន្តៗគ្នាជាច្រើនពាន់ដង រួមជាមួយនឹងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរផងដែរ។
រូបភាពផ្ដាមចេញពីទំព័រហ្វេសប៊ុកខាងលើដែលបានរៀបរាប់ជាភាសាខ្មែរ ដោយអមជាមួយនឹងរូបថតថា «មុននេះបន្តិច សមត្ថកិច្ចបានទៅចាប់ខ្លួន យួន ខាន់ សុវណ្ណហើយ។ ជាប់គុកមិនជាប់គុកចាំមើលភាគបន្ត #បញ្ជាក់ ពីមុន គាត់ធ្លាប់ប្រមាទសាសនា ចង់ចាប់លោកផ្សឹកផងដែរ…»។
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀងផ្ទាត់រូបថតតាមរយៈកម្មវិធី Google Reverse Image ដែលនាំឲ្យទៅរកឃើញប្រភពដើមនៃទិដ្ឋភាពរូបថតមួយនេះដែលមានទម្រង់ដូចគ្នាទាំងស្រុង។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញនៅក្នុងសារបង្ហោះមួយ បានចុះផ្សាយតាំងពីថ្ងៃទី៣០ ខែកញ្ញា ឆ្នាំ២០២០មកម្ល៉េះ។ នៅក្នុងសារបង្ហោះដដែលនេះ ក៏បានបញ្ជាក់បន្ថែមទៀត ទាក់ទងទៅនឹងករណីបាញ់ស្តារគ្រាប់កាំភ្លើងដែលបានកើតឡើងនៅចំការរបស់លោក ខាន់ សុវណ្ណ ក្នុងទីតាំងភូមិសាស្ត្រខេត្តព្រះសីហនុ។ លោកក៏ត្រូវបានសមត្ថកិច្ចហៅទៅធ្វើកិច្ចសន្យាផងដែរ នៅឯនគរបាលប៉ុស្តិ៍រដ្ឋបាលឃុំចំការហ្លួងក្រោយពីមានករណីបាញ់ស្តារគ្រាប់កាំភ្លើងនេះឡើង។
រូបភាពផ្ដាមចេញពីប៉ុស្តិ៍របស់លោក San Prum បានរៀបរាប់ថា «#សមត្ថកិច្ចចុះទៅដល់ចំការរបស់លោក ខាន់ សុវណ្ណ នៅស្រុកកំពង់សីលា រឿងបាញ់ស្តារគ្រាប់កាំភ្លើង! ព្រះសីហនុ៖ នគរបាលប៉ុស្តិ៍រដ្ឋបាលឃុំចំការហ្លួង ស្រុកកំពង់សីលា ខេត្តព្រះសីហនុ កាលពីថ្ងៃទី២៩ ខែកញ្ញា ឆ្នាំ២០២០ បានចុះទៅដល់ចំការរបស់លោក ខាន់ សុវណ្ណ បន្ទាប់ពីទទួលបានព័ត៌មានថា មានការបាញ់ស្តារគ្រាប់កាំភ្លើងចំនួន៣គ្រាប់»។
ជាមួយគ្នានេះដែរ លោក ខាន់ សុវណ្ណ បានធ្វើកិច្ចសន្យាជាមួយសមត្ថកិច្ចដោយមានខ្លឹមសារទាំងស្រុងថា «ខ្ញុំបាទ សូមធ្វើកិច្ចសន្យាចំពោះមុខសមត្ថកិច្ចថា បើសិនជាសមត្ថកិច្ចត្រូវការកោះហៅរូបខ្ញុំនៅពេលណា រូបខ្ញុំបាទនឹងទៅជួបបំភ្លឺទៅតាមការហៅរបស់សមត្ថកិច្ចថ្នាក់លើត្រូវការខ្ញុំ។ ក្នុងករណីរូបខ្ញុំគេចវេសមិនព្រមចូលខ្លួនទៅបំភ្លឺតាមការកំណត់របស់សមត្ថកិច្ចទេនោះ រូបខ្ញុំព្រមប្រគល់ខ្លួនជូនសមត្ថកិច្ចចាត់វិធានការតាមច្បាប់»។
រូបថតមួយសន្លឹកនេះក៏ត្រូវបានចុះផ្សព្វផ្សាយផងដែរ តាមរយៈគេហទំព័រសារព័ត៌មាន KBN News កាលពីថ្ងៃទី០១ ខែតុលា ឆ្នាំ២០២០កន្លងទៅនេះ។ តាមសេចក្តីរាយការណ៍ព័ត៌៌មានដែលបានផ្សាយខាងលើ លោក ខាន់ សុវណ្ណ ត្រូវបានកម្លាំងនគរបាល និងកម្លាំងអាវុធហត្ថបានចុះទៅដល់ចម្ការរបស់លោក និងបាននាំខ្លួនមកធ្វើកិច្ចសន្យា បន្ទាប់ពីមានវីដេអូឃ្លីបមួយបង្ហាញពីសកម្មភាពបុរសម្នាក់បាញ់កាំភ្លើងខ្លី អមដោយសំឡេងរបស់លោកស្រែកបន្ទរថា «អើ!មួយទៀត ដាក់ឱ្យត្រង់មើល៍…ស្ដារកាណុងក្នុងចម្ការតាសុវណ្ណ»។
រូបភាពផ្ដាមចេញពីគេហទំព័រសារព័ត៌មាន KBN News បានសរសេររៀបរាប់ចំណងជើងជាភាសាខ្មែរថា «ស្ដារកាណុងក្នុងចម្ការតាសុវណ្ណ! អ្នកបាញ់កាំភ្លើងទៅណា ឱ្យតាសុវណ្ណ ចេញមុខធ្វើកិច្ចសន្យា? (មានវីដេអូ)»។
KBN News Report | Archived Link
កាលពីថ្ងៃទី១៤ ខែមិថុនា ឆ្នាំ២០២១នេះ លោកក៏បានធ្វើការផ្សាយផ្ទាល់តាមរយៈទំព័រហ្វេសប៊ុករបស់លោក ខាន់ សុវណ្ណ ផងដែរ ដែលឆ្លើយតបទៅនឹងប្រតិកម្មរបស់មតិអ្នកប្រើប្រាស់បណ្តាញសង្គមនានាទាក់ទងទៅនឹងការលើកឡើងរបស់លោកអំពីការចិញ្ខឹមត្រីរបស់ប្រជាជនខ្មែរ។ ការផ្សាយផ្ទាល់នេះ គឺធ្វើឡើង ២ម៉ោងក្រោយពីមានការអះអាងមួយថា លោកត្រូវបានសមត្ថកិច្ចចាប់ខ្លួនហើយ។
រូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកខាងលើបានរៀបរាប់ថា «១៤.៦.២០២១ ម៉ោង៦.៣០នាទី ប្រធានបទក្តៅគគុក…. គេជេរតាសុវណ្ណហើយ…»។
ដោយឡែក Fact Crescendo Cambodia ក៏បានរកឃើញផងដែរថា នៅក្នុងវីដេអូរបស់លោកដែលបានធ្វើការផ្សាយផ្ទាល់កាលពីលាុ្ងចថ្ងៃម្សិលមិញនេះ លោកបានបញ្ចេញប្រតិកម្ម និងឆ្លើយតបទៅនឹងការអះអាងរបស់ទំព័រហ្វេសប៊ុក កាមទេព លីមហុង ដែលបាននិយាយថា លោកត្រូវបានគេចាប់ខ្លួននោះ។
នៅត្រង់នាទី ទី៧.២២ក្នុងវីដេអូផ្សាយផ្ទាល់របស់ខ្លួន លោក ខាន់ សុវណ្ណ បាននិយាយថា «ខ្ញុំឃើញថា តាសុវណ្ណ គេកំពុងចាប់ខ្លួន។ បងប្អូនភាគច្រើនភូតចាញ់អត្មា ពួកអាប្រឆាំងដាច់ផ្ងារ ប្រហាររលាយរលត់បក្សខ្លួនឯង វាតែប៉ុណ្ណឹង»។
សន្និដ្ឋាន (Conclusion)
Fact Crescendo Cambodia បានរកឃើញថា ការអះអាងរបស់ទំព័រហ្វេសប៊ុកដូចបានរៀបរាប់ខាងលេីនេះ គឺមិនត្រឹមត្រូវនោះឡេីយ។ រូបថតមួយសន្លឹកនេះ មិនបញ្ជាក់ថា លោក ខាន់ សុវណ្ណ ត្រូវបានសមត្ថកិច្ចនគរបាលចាប់ខ្លួននាពេលថ្មីៗនោះទេ។ រូបថតមួយសន្លឹកនេះ បង្ហាញលោក ខាន់ សុវណ្ណ ត្រូវបាននគរបាលនាំទៅសាកសួរជុំវិញការបាញ់កាំភ្លើងក្នុងដីចម្ការរបស់លោកកាលពីឆ្នាំ២០២០កន្លងមកនេះ។
Title:តើលោក ខាន់ សុវណ្ណ ពិតជាត្រូវបានសមត្ថកិច្ចចាប់ខ្លួនមែនឬទេ?
Fact Check By: Kakada SimResult: False
